Amosando publicacións coa etiqueta ; Sanidade. Amosar todas as publicacións
Amosando publicacións coa etiqueta ; Sanidade. Amosar todas as publicacións

martes, xuño 12, 2012

Presentación do libro "A saúde como negocio" o vindeiro 26 de xuño - Artigo de Pablo Vaamonde sobre o libro

A Plataforma en Defensa da Sanidade Pública de Ferrol organiza a presentación do libro "A saúde como negocio".

O acto será presentado por Xosé Miguel López Pérez, presidente da A.V. de Esteiro e portavoz da Plataforma en Defensa da Sanidade Pública de Ferrol.

No mesmo intervirán, D. Francisco Pillado Maior, Director de Edicións Laiovento. D. Pablo Vaamonde, D. Jesús Rey e D. Manuel Martín, Especialistas en Medicina Familiar e Comunitaria e coautores do libro.

A presentación será o vindeiro 26 de xuño ás 19:30 horas na Galería Sargadelos Ferrol.

Colabora coa Plataforma: Descarga, imprime e reparte o cartaz (pdf e A3)



Artigo de Pablo Vaamonde, coordinador e coautor do libro sobre o mesmo:
“A saúde como negocio”
Neste tempo de incertezas sobre o noso futuro colectivo, Edicións Laiovento ven de publicar o libro “A saúde como negocio”, no que se describe a situación actual da sanidade pública, analízanse as actuacións realizadas polos actuais gobernantes e faise unha valoración das consecuencias negativas que estas intervencións poden ter para a sustentabilidade do sistema sanitario no porvir inmediato.

Trátase dun libro colectivo. Os seus autores son Mª Luísa Lores, Manuel Martín, Jesús Rey, Marciano Sánchez-Bayle e Pablo Vaamonde, todos eles persoas comprometidas coa defensa da sanidade pública. É un texto oportuno e necesario, que aporta información obxectiva, argumentos e análises para explicar como é posible facer outras políticas que, na vez de deteriorar e pór en risco o sistema público, procuren a súa mellora e consolidación.

De xeito didáctico e a grandes trazos podemos definir dúas posicións confrontadas en relación coa política sanitaria e a xestión dos servizos sanitarios públicos:
*Hai unha corrente progresista que entende a sanidade pública como un dos piares esenciais do estado do benestar, defende a atención sanitaria como un dereito dos cidadáns e promove o acceso aos servizos de forma universal e gratuíta, sen ningunha restrición. Esta corrente considera que o financiamento da sanidade debe realizarse cos impostos dos cidadáns e a prestación debe ser fundamentalmente pública, considerando o sector privado como subsidiario e complementario.
*Na outra banda existe un pensamento ultraliberal que considera que cadaquén debe acceder aos servizos sanitarios que poida custear persoalmente. Esta corrente, hoxe predominante, fixo circular nos últimos tempos unha argumentación elemental baseada en catro conceptos: a insustentabilidade do actual sistema sanitario, a utilidade de separar financiamento e prestación dos servizos para mellorar a eficiencia, a necesidade imperiosa de introducir o copagamento para o acceso aos servizos, e a crenza (non demostrada) de que a xestión da sanidade privada é mellor e máis eficiente que a pública.

Os autores deste libro partimos da hipótese de que as diferentes medidas adoptadas nos primeiros tres anos de goberno de PP en Galicia (redución dos orzamentos sanitarios, recorte das prestacións, restricións no acceso aos servizos, limitación dos recursos destinados a investigación e formación profesional etc.) están enmarcadas nesta corrente ultraliberal e motivadas pola mesma estratexia: a precarización dos servizos sanitarios públicos e a definición de espazos de negocio (a construción e xestión dos centros sanitarios, o control da tecnoloxía sanitaria etc.) que permitan a grupos empresariais afíns apropiarse dunha parte importante dos orzamentos públicos.

Neste libro presentamos un conxunto de textos de carácter divulgativo, dirixidos a un público non profesional, que pretende describir e analizar as decisións políticas levadas a cabo polo PP no terreo sanitario dende que no ano 2009 ocupou o poder na Xunta de Galicia. Tamén se valoran as actuacións realizadas pola dereita noutras latitudes: Valencia, Madrid, Castela-A Mancha, Catalunya etc. Consolidando a ruta trazada nas autonomías o goberno de Rajoy, aos cinco meses de ocupar o poder en Madrid, tamén realiza severos recortes que danan gravemente a sanidade pública. O Real Decreto ley 16/2012 recupera o concepto de “asegurado”. Os inmigrantes e outros colectivos cidadáns quedarán sen cobertura sanitaria. Esta norma deixa ver ás claras a intención do PP de retornar ao pasado; devólvenos a unha sanidade dualizada: de seguir adiante coa súa política nos hospitais haberá unha porta para os ricos e outra para os pobres.

Este libro é unha achega seria e documentada, mais non imparcial; pretendemos expoñer argumentos e análises que sexan útiles (aos cidadáns e ás organizacións políticas, sindicais e profesionais) para comprender as estratexias postas en marcha desde a Xunta de Galicia no terreo sanitario e o grave risco que representan para o futuro inmediato da sanidade pública. Poderá ser útil, tamén, ás distintas plataformas para a defensa da sanidade pública que, nos últimos tempos, están a traballar en distintos puntos da xeografía galega para evitar o desmantelamento dos servizos públicos, elementos clave do estado do benestar.

Pretendemos pór en evidencia, con datos e análises rigorosas, as políticas de deterioración dos servizos públicos que vén desenvolvendo o PP en Galicia e nas diferentes comunidades en que goberna. Por último, este libro quere ser unha contribución ao amplo movemento social que se está xerando en todo o Estado para frear esta dinámica destrutiva e privatizadora, que pon en grave risco a atención da saúde das futuras xeracións.

Pablo Vaamonde. Web persoal. Nado na Baña en 1956. É médico de familia no Centro de Saúde de Labañou (A Coruña). Foi fundador e director da revista médica Cadernos de Atención Primaria (1994-2005), presidente da Asociación Galega de Medicina Familiar e Comunitaria (AGAMFEC) de 1996 a 2005 e vicepresidente do Colexio Oficial de Médicos de A Coruña e responsable do Programa de Formación Continuada de 1998 a 2005. Foi director xeral de Asistencia Sanitaria do Sergas entre 2005 e 2006. Tamén foi membro da Comisión Sectorial de Sanidade que elaborou o Plan Xeral de Normalización da Lingua Galega, colaborador habitual dos medios e autor de tres libros de narrativa: O fillo do emigrante (2002), O mes de abril (2004), Luz Divina e outros retratos (2006). Recibiu o Premio Lois Peña Novo en 2005, polo seu compromiso na promoción e defensa da língua de Galicia e é colexiado de Honra con Emblema de Prata (2007) do Colexio Oficial de Médicos da provincia de A Coruña.


Plataforma en Defensa da Sanidade Pública de Ferrol: www.plataformadspferrol.blogspot.com

venres, outubro 28, 2011

Mobilización de Ferrol en Defensa da Sanidade Pública -27-Outubro-2011 - Vídeos, Texto e Fotos


Multitude de mobilizacións en defensa da sanidade pública por toda Galiza, convocadas por "SOS Sanidade Pública". En Ferrol a Praza do Concello foi a protagonista da Concentración, onde a pesar do mal tempo acudiron numerosas persoas na Defensa da Sanidade Pública, contra os recortes da política do PP. Presentou o acto o compañeiro Miguel Lopez, presidente da Asociación Veciñal de Esteiro, portavoz da "Plataforma en Defensa da Sanidade Pública de Ferrol". A artista ferrolá María Manuela, foi a persoa encarregada de dar lectura ao Comunicado consensuado polas 45 entidades que conforman a Plataforma ferrolá.

Mobilización de Ferrol en Defensa da Sanidade Pública -27-Outubro-2011

http://youtu.be/tGedeAvE_kY

http://youtu.be/xMEjMWBLnQc

http://youtu.be/tGedeAvE_kY
Comunicado leido na Mobilización de Ferrol
en Defensa da Sanidade Pública -27-Outubro-2011

http://youtu.be/eltwg_vdJIc

http://youtu.be/v4UAMpUeTsg

http://youtu.be/1cAFcH3X9yM


[Clicar acima da imaxe
para acceder á Galería Fotográfica de Fuco Buxán A.C.]

Texto do Comunicado:

Boa tarde veciños e veciñas de Ferrolterra, outra vez estamos aquí, outra vez saímos á rúa para defender os dereitos da cidadanía, dereitos que foron froito dunha loita de moitos anos e que ninguén os regalou.

Hoxe volvemos a estar aquí na Defensa da Sanidade Pública como estivemos enchendo esta Praza de Armas, un domingo de abril de 2010 e como estivemos na Praza Quintana en Compostela no mes de novembro do pasado ano.

Neste momento nas principais cidades e vilas de Galicia a cidadanía está berrando como nós contra a Privatización da Sanidade Pública, contra os recortes sanitarios e contra o establecemento do COPAGO.

Desde a chegada á Xunta de Galicia do Sr. Feijoo e a Sra. Farjas os ataques á Sanidade Pública, coa escusa da crise, son constantes, agora tamén se suma á campaña a CEOE. Estase a cotío lanzando a mensaxe de que a Sanidade Pública non é sostible e que hai que facer recortes e mesmo a Xunta de Galicia quere escusar a súa incompetencia culpando ós usuarios de que fan mal uso da Sanidade Pública e que fan insostible o sistema.

Non di nada de que a culpa sexa por como o seu Goberno xestiona a Sanidade Pública, de como ceden ás esixencias e presións continuas da industria farmacéutica, dos escandalosos beneficios que obteñen as Mutuas de Accidentes de Traballo, que cada vez teñen máis poder na xestión das baixas, a conta de cargar á Sanidade Pública o custo das enfermidades profesionais, que presentan como enfermidades comúns. No ano 2010 tiveron uns beneficios de 5.000 millóns de euros. E sobre todo o que non di é o escaso orzamento que se dedica á Sanidade Pública, no Estado Español é onde menos diñeiro se dedica dos países da UE e Galicia estamos nos furgóns de cola. Por cada 9 euros que dedican na Unión Europea á Sanidade no Estado.

Español se dedican 6 euros e, aínda así, no Estado Español temos unha Sanidade Pública equiparable á de calquera país da Unión Europea.

Oculta o Sr. Feijoo que, desde que el está á fronte do Goberno Galego, por vez primeira, desde que a Sanidade é competencia da Xunta, baixou o orzamento da Consellería de Sanidade e do Sergas no ano 2011 e volve a baixar no ano 2012. Pero nos orzamentos do ano que ben a cantidade económica para os concertos con Hospitais Privados medra en case 3 millóns de euros.

Vaise privatizar a construción e xestión dos Hospitais de Vigo e Pontevedra e de moitos novos Centros de Saúde, encarecendo o seu custo, reducindo servizos e prestando peor asistencia ó reducir o número de traballadores e traballadoras. Como exemplo sinalar que o Novo Hospital de Vigo ía custar 450 millóns e euros e agora co Sr. Feijoo, con menos camas e menos servizos, vai custar case 1500 millóns. Así e como entende a sostibilidade a actual Xunta de Galicia.

Quen acaban de afundir e estragar millóns de euros en socorrer á Banca Privada e ás Caixas de Aforro, para que os seus directivos se xubilen con indemnizacións de millóns de euros se atreven a dicir que a Sanidade Pública é insostible? Non teñen vergonza ou menten de maneira interesada.

A actual Xunta de Galicia non respecta os compromisos adquiridos polo Goberno anterior:

Suspende o Plan de Mellora de Atención Primaria, que ía reducir de xeito importante as listas de espera e crear centos de postos de traballo de persoal médico, de enfermería, non sanitario, etc.

Suspende o acordo retributivo asinado cos representantes do persoal do Sergas, nun feito sen precedentes.

Pecha, durante o verán cada vez máis camas hospitalarias, non substitúe as ausencias dos traballadores, amortiza prazas, privatiza servizos, en definitiva quere levar a Sanidade Galega a situacións como a de Madrid (a peor sanidade pública do Estado Español), de Valencia ou de Cataluña, onde se están a producir peches de camas de Hospitais, de Centros de Saúde e se están producindo centos de despedimentos de persoal sanitario.

Esta Xunta de Galicia acaba de aprobar un decreto de transporte sanitario que elimina a obrigación do Sergas de facerse cargo do mesmo, como recollía o anterior decreto, o que vai facer que os doentes que acoden ós centros sanitarios a recibir tratamentos de diálise, quimioterapia, radioterapia ou rehabilitación, se lles poderá esixir o pagamento dese transporte.

Esta Xunta de Galicia que acaba de endurecer por Lei as condicións de asistencia pública ós inmigrantes e vai cobrar 10 euros por renovar a tarxeta sanitaria.
Na Área Sanitaria de Ferrol, a peor tratada pola Xunta de Galicia, queda en suspenso o investimento prometido de 63 millóns de euros para poñer en valor e mellorar o antigo Hospital Naval.

Non se inviste entre o 2009 e 2011 nin un so euro en Alta Tecnoloxía, xa que nos deixaron fora do Plan de Alta Tecnoloxía do Sergas.

Están paralizadas as obras de construción do novo Centro de Saúde de As Somozas.

Non temos noticias da construción dos novos centros de saúde de A Capela, Ares, Cedeira e Narón (algún xa tiña que estar construído) , a pesar de dispoñer dos terreos para facer a obra.

Vaise deixar ó Hospital Novoa Santos sen ningún contido asistencial.

En Atención Primaria non se substitúe ós médicos de familia, acumulando os cupos o que fai que xa haxa lista de espera en primaria e que moitos doentes colapsen os PAC.

Non se contrataron enfermeiros de desprazados nos Centros de Saúde onde , por mor do incremento da poboación, se viña facendo en anos anteriores. En Médicos de desprazados, en Atención Primaria, só se contratou para o Centro de Saúde de Ares a media xornada.

Os continuos recortes en Orzamentos e en persoal fan que cada vez a calidade asistencial, de maneira absolutamente intencionada, vai sendo menor, a pesar do esforzo dos traballadores e traballadoras do SERGAS en manter a calidade do servizo.

Pola conta, aínda que con pequenas reducións, mantense o concerto co Hospital Juan Cardona por un importe de 13 millóns de euros anuais.

Se a cidadanía non tomamos conciencia da necesidade de defender a Sanidade Publica diante dos continuos ataques a que esta sendo sometida, e de mobilizamos e denunciar e reclamar, cada vez o dereito a unha asistencia sanitaria universal, este dereito se ira perdendo en favor da Sanidade Privada e o copagamento por algúns servizos prestados comezará a aplicarse, o transporte sanitario non urxente será o primeiro ó que a Xunta de Galicia lle aplique o copagamento. Logo virá o querer cobrar 1 euro por cada receita.

Desde a Plataforma pola Defensa da Sanidade Pública de Ferrol imos seguir apostando por unha sanidade publica de calidade e que precisa de mais investimento para mellorar e reducir as listas de espera e imos continuar denunciando os abusos e a discriminación, por parte da Consellería de Sanidade, coa Area Sanitaria de Ferrol.

Hoxe estamos aquí, como están en todo Galicia, e estaremos, cantas veces sexa necesario, por que cremos na Sanidade Pública, que por suposto é mellorable, pero nos opoñemos á súa privatización, ós recortes é o copagamento.

A saúde non é un negocio.

Moitas Grazas.


Texto lido pola artista María Manuela e elaborado pola Plataforma pola Defensa da Sanidade Pública de Ferrol

Ferrol 27 de Outubro de 2011.

Plataforma pola Defensa da Sanidade Pública de Ferrol

Sos Sanidade Pública

Fontes das Fotos:
Susete'70 e Fuco Buxán A.C.
________________