O orzamento de Defensa xa crecera en 1.349 millóns a un mes de pechar 2017 - A contía destinada a Defensa para este ano creceu case dous mil millóns, o gasto final segue inflándose, como en anos anteriores

O orzamento de Defensa xa crecera en 1.349 millóns a un mes de pechar 2017

As contas aprobadas destinaban 7.638 millóns, pero a 30 de novembro as modificacións soben esa cifra até os case 9.000 millóns de euros.

O BOE de hoxe recolle a execución orzamentaria a 30 de novembro de 2017, isto é, as modificacións que se realizaron ao orzamento inicial a un mes de pechadura de 2016. O orzamento de Defensa, unha vez máis, crece.

Aínda que se presupostaron 7.639 millóns -fronte aos 5.788 do ano anterior-, os créditos ascenden xa a case 9.000 millóns de euros, 1.349 millóns extra. Así, o custo xa alcanza os case 9.000 millóns de euros, cifras de execución similares ás de 2012, o exercicio dos últimos anos no que o gasto final, o real, foi o máis elevado.

Este crecemento dos orzamentos, que se repite cada ano, produciuse até sen créditos extraordinarios, un sistema que se veu utilizando nos últimos exercicios e que inxectaba centos de millóns extra no verán vía Decreto-Lei para o pago de programas especiais de armamento, e que o Constitucional tombou en 2016.

Na sentenza, que responde a un recurso presentado por varios grupos parlamentarios (PSOE, IU, ICV, CHA e UPyD) contra o crédito de 2014, o Constitucional considera que o uso do Real decreto-lei para aprobar estes pagos non está xustificado e anulou a decisión. Iso si, non houbo marcha atrás para as transferencias xa realizadas e de orzamentos anteriores (2014 e 2015).

Así, en 2016 o Goberno non puido aprobar ese crédito extraordinario, e aprazou a 2017 o pago de 717 millóns de euros destinados a sufragar estes programas de modernización das Forzas Armadas. O orzamento inicial de 2017, así, inclúe logo de moitos anos de ocultalo na aprobación dos PGE, unha previsión sobre o custo destes programas especiais: uns 1.800 millóns para os pagos atrasados de 2016 e os correspondentes a 2017.

Pese a que ese custo xa estaba contemplado nos orzamentos iniciais e a que a contía destinada a Defensa para este ano creceu case dous mil millóns, o gasto final segue inflándose, como en anos anteriores. Polo momento, e a 30 de novembro, 1.349 millóns extra. En 2016, a pechadura do ano deixou 1.395 millóns máis que os presupostados.

Eva Belmonte
4 xaneiro 2018
Baixo licenza Creative Commons.

Fonte: Civio - O Boletín Noso de Cada Día.
_________________

Estamos a construír soños colectivos! - A loita da veciñanza do barrio vigués de Coia mobiliza-se contra o malgasto, as multas, as porradas e o malgoberno

En Ferrol, non nos son alleas as políticas de malgasto desde os gobernos municipais, para proba o que nos malgoberna na nosa cidade, o do Partido Popular de José Manuel Rey Varela. O malgasto de máis sona foi a Praza de España que aínda seguen gastando moito diñeiro ano pos ano. Agora saltan-nos cun ascensor panorámico para subir desde as inmediacións da Alameda do Carbón até os xardíns de San Francisco, nos baixos da costa de Mella. Ou os cambios innecesarios de mobiliario urbano, ... Todo nunha cidade co 32% de desemprego e cun montón de necesidades a nivel social, ... cidade que conta cun parque de case 1000 vivendas municipais abandonadas a súa sorte en Recimil, ou mesmo o que pasa co Mercado Municipal de Caranza moi deteriorado e en case total abandono, ...  polo que a nosa solidariedade coa veciñanza de Coia é moi consciente e sentida. Desde Ártabra 21 amosamos o noso total apoio. As veciñas e veciños de Coia levan moito tempo na loita veciñal por mil motivos de malgasto e malgoberno, o da loita contra a decisión municipal de impoñer un gasto innecesario na rotonda ven a amosar un barrio disposto a loitar. A resposta represiva do Alcalde Abel Caballero, con porradas e multas non quedou sen resposta, este venres 16 de xaneiro a veciñanza saíu masivamente á rúa pedindo "xustiza socia, nin cartos na rotonda , nen estado policial".

Comunicado lido na manifestación que rematou na rotonda de Coia

Estamos a construír soños colectivos! Nunha asemblea, convocada de urxencia o 3 de decembro, decidimos parar as obras da rotonda; e conseguímolo. Foi a primeira vitoria, pero non a máis importante. Sen decatármonos, no rexeitamento da veciñanza á instalación do Bernardo Alfageme na rotonda, estabamos a expresar cos nosos corpos en desobediencia que SI, SI SE PODE!

Non sabemos se ao final chantarán o barco na rotonda, pero si temos claro que no seu intento están dispostos a empregar todos os medios que teñen á man: represión, criminalización, multas, mentiras... Nestas semanas golpeáronnos con forza, pero non acalaron, nin acalarán, a nosa resistencia; porque nós temos razóns, forza colectiva, constancia, poesía, mandarinas ecolóxicas... para continuar cunha loita que hai tempo superou a cuestión do barco.

Esta loita destapou o seu “malgoberno” e tamén o desastre dunhas políticas sociais que deixan a moitas persoas sen luz, sen vivenda, sen alimentos básicos, sen o local de Sereos...; en definitiva, sen dereitos sociais.

O alcalde e os seus concelleiros falan de agresións, vandalismo e minoría marxinal para non ter que falar e afrontar o colapso do departamento de Benestar Social, dos meses de espera nas UTS, das protestas das propias traballadoras sociais, da falla de orzamentos, das denegacións inxustificadas das axudas de emerxencia, da miseria e precariedade da cidadanía...; en resumo, da arbitrariedade, inxustiza e ineficacia da política social deste Concello.

As relacións humanas, as reflexións, as experiencias, os coidados... son algúns dos fíos que estamos a empregar para tecer redes fortes que desde abaixo, desde a xente, vaian construíndo o barrio, a cidade, a terra que precisamos. Espazos onde a VIDA e as necesidades das persoas sexan o centro das políticas.

Os únicos barcos que queremos na rotonda son de papel. Barcos cheos de poesía, de beleza en que coller o impulso que precisamos para poñer os nosos corpos e as nosas mentes ao servizo doutra cidade máis humana.

Que o noso berro se escoite ben forte:

XUSTIZA SOCIAL!!

NIN CARTOS NA ROTONDA, NIN ESTADO POLICIAL!!

Vigo, 16 de xaneiro de 2015


Asemblea Aberta de Coia
nonarotonda@gmail.com  |  @AsembleaDeCoia  |  facebook.com/asembleaabertacoia


Enviado por:
Asemblea Aberta Coia
-nonarotonda@gmail.com-
16 de janeiro de 2015 20:34
_____________

Esquerda Unida demanda unha nova política de urbanismo e incide na crítica á política escurantista do goberno municipal do Partido Popular, en todo o que ten que ver coa ordenanción do espazo público e o transporte

O grupo municipal de Esquerda Unida considera necesario un cambio radical na política urbanística na cidade. | Esquerda Unida considera que se está a perder unha oportunidade para unha planificación integral que poña en conexión emprego con rehabilitación. | O grupo  de Esquerda Unida reclama, por enésima vez ,que se activen os organismos de participación e comece a discusión pública sobre o secuestrado plan de mobilidade.

Hai no concello un informe polo que se pagou unha chea de cartos que vai de cousas referidas a mobilidade e espazo público e que , suponse, é o documento técnico necesario para un debate sobre as solucións de detalle en aspectos esenciais para áreas como o transporte público, a rede de rúas peonís a rexeneración urbana dos barrios a recuperación económica e comercial da cidade e, por parar por algún lado, o deseño dos aparcadoiros en superficie. Por suposto que este documento está en contexto con outros ,ben xa existentes ben en proxecto por necesidade urxente, por exemplo con plans sectoriais de urbanismo cos que se poida comezar a poñer fin a esperpénticas situacións que se dan no noso concello. Un que inviste cartos procedentes de fondos europeos finalistas para a rexeneración de barrios enteiros, coas súas rúas e os seus servizos, e logo as vivendas deses barrios caen por desleixo.

Todo isto debería ser motivo de debate no concello. Pero non. Hai tempo o grupo municipal de Esquerda Unida demandou dúas cousas: a primeira que se modificara a prioridade do investimento nas obras da praza de España, e outras, para, a través dun plan específico de apoio á economía social, crear emprego de calidade poñendo en conexión cousas como a rehabilitación integral e a rexeneración económica dos barrios; a segunda que se puxeran en marcha as medidas necesarias para comezar un amplo e extenso (no tempo e nos axentes participantes) debate sobre o conxunto da proposta do Plan de Mobilidade e Espazo Público e os seus detalles sectoriais. Ambas cuestións son   prioridades para este grupo municipal e así se fixo saber á hora de emendar os orzamentos deste ano. Xa alí diciamos o de sempre desde que entrou o Partido Popular no goberno da cidade: ao malgasto hai que sumar o escurantismo; tamén na política local está a acontecer a trufa de elementos que se dan en Galicia ou no Estado:corrupción política e baleirado das arcas públicas en favor das corporacións amigas máis ocultación máis lei mordaza etc.

Dúas son as alegacións que queremos remarcar: fronte ao malgasto creación da Empresa Municipal de Vivenda e inicio inmediato da política de acción rehabilitadora encamiñada a potenciar unha política pública de alugueiro e creación de emprego, fronte ao escurantismo  dotación dunha partida suficiente para a presentación pública e edición masiva do plan de mobilidade urbana de xeito que a peonalización e reorganización do tráfico, aparcadoiros, transporte de mercadorías etc sexan obxecto de discusión pública e planificación integral.

Se non, e cremos que por desgraza, non , seguirán a derrubarse edificios, a cidade continuará a súa lenta pero inexorable agonía e, por suposto, a veciñanza de Ferrol Vello e doutras latitudes acabará por non ter, xa non paradas para coller o autobús, senón autobús e servizos públicos en xeral. Así, como soa.

Esquerda Unida de Ferrol
R/ do Sol 124 Entrechán Esquerda
981944035
www.euferrol.org
https://www.facebook.com/esquerdaunida.ferrol
https://twitter.com/EUFerrol
http://www.esquerdaunida.org/ferrol.html

Enviado por:
Ferrol Esquerda Unida
-eu-ferrolterra@esquerdaunida.org-
20 de janeiro de 2014 16:23
Boas. Enviamos nota do grupo municipal de Ferrol pola que demandamos unha nova política de urbanismo e incidimos na crítica á política escurantista do goberno en todo o que ten que ver coa ordenanción do espazo público e o transporte. Grazas e un saúdo, Secretaría de Comunicación. Consello Político Local- Ferrol
__________________

Foto de José Pardo.
__________________________

O alcalde de Burgos suspende definitivamente as obras en Gamonal, a veciñanza gaña a súa loita contra o malgasto municipal - En Ferrol tamén houbo mobilización en Solidariedade coa loita veciñal do Gamonal

O Movimento Veciñal do Gamonal consegue dobregar ao alcalde de Burgos do Partido Popular Javier Lacalle, na súa loita contra o malgasto municipal do diñeiro público. o Alcalde burgalés compareceu en rolda de prensa para anunciar finalmente a paralización definitiva das obras no barrio de Gamonal, tras unha semana intensa de protestas veciñais. Na rolda de prensa manifestou: "Vemos a imposibilidade material de executar esta reforma e decidimos a paralización definitiva das obras", e anunciou que "... o luns comezará o acondicionamento da zona".

En Ferrol

A loita veciñal de Gamonal, convirteu-se nun exemplo de que "si se pode" e despertou movimentos de solidariedade en moitas cidades e vilas do, polo de agora, Reino de España, tamén na Galiza.

A mobilización na nosa cidade foi, este venres 17 de Xaneiro, na Praza do Concello de Ferrol, diante do Pazo Municipal: Concentración e Asemblea. O acto converteu-se no punto de encontro da protesta e da solidariedade, falou-se do exemplo da loita do Gamonal, mais tamén valorou-se entre as persoas que interviñeron, o malgasto en Ferrol, e de como se lapidaba diñeiro público en proxectos innecesarios.

Na Galiza, tamén tiveron lugar mobilizacións en Vigo, Lugo, Ourense, Pontevedra, Mondoñedo e Coruña. O movimento nas redes como #GamonalResiste propiciou unha grande onda de solidariedade.

Solidariedade Galega com #Gamonal, #GamonalResiste

Crónica dun conflito anunciado: o bulevar de Gamonal en Burgos | O recorte do gasto social en Burgos estivo orientado a favorecer a dúas grandes empresas, as principais beneficiadas da construción dun bulevar no barrio de Gamonal | Ismael Arnaiz - Burgos | Enlace co artigo.

Paralización definitiva das obras do bulevar de Gamonal. O pobo unido xamais será vencido - 'Diario de Vurgos' | Enlace co artigo.

Un moi interesante artigo de Ignacio Escolar no xornal dixital 'elDiario.es', para entender mellor o porque da loita de Gamonal:

"Que está pasando en Burgos?"
Para entender a que vén a durísima oposición da veciñanza do barrio burgalés de Gamonal ás obras dun simple aparcamiento, hai que remontarse moito. Polo menos un par de décadas | Enlace co artigo.

____________________

Sobre o mantemento de viais en Ferrol - Esquerda Unida considera que debe revogarse o contrato coa empresa adxudicataria, e iniciar unha xestión pública integral

ESQUERDA UNIDA CRE NECESARIA A REVOGACIÓN DO CONTRATO COA EMPRESA MISTURAS

Segundo Javier Galán, voceiro do grupo municipal o lamentable estado das rúas da nosa cidade son consecuencia directa do empeño do Partido Popular de externalizar servizos, cando quedou máis que demostrado que a xestión de recursos públicos por empresas privadas tan só carrexa emprego precario e servizos diferentes.

A nosa cidade que xa ostenta o vergoñento record na taxa de paro, na de risco de pobreza, na perda de poboación, senón que agora tamén exemplificamos o que non debe ser a xestión do mantemento de viais, que debería facer non só máis confortable a vida da cidadanía, senón, cando menos, posible, cousa que non está a suceder.

O compromiso de hai máis dun ano adquirido polo goberno municipal é evidente que non se está a cumprir, como así o demostran as convocatorias cidadás de protesta, as declaracións de comerciantes e o sentir xeral da cidadanía, que debe saber que cos seus cartos, preto de medio millóns de euros anuais, non se está a solucionar un tema prioritario para o convivir ferrolán, nin tan sequera está habilitada a liña telefónica a que quedou comprometida a empresa adxudicataria para que a veciñanza puidera por de manifesto as irregularidades dos seus barrios.

O mantemento de viais e a reparación de fochas pareceu quedar reducido ás visitas daquel Plan de Barrios que emprendeu o noso alcalde, cando ao seu paso promete investimentos para reparacións defectuosas, e cando non queda un só barrio da nosa cidade no que os veciños poidan dicir que non hai prexuízos polas irregularidades do pavés: A Malata, Santa Mariña, o Ensanche, San Xoan,... son públicos e notorios os incumprimentos no mantemento.

Polo tanto, segundo Suso Basterrechea, considera que debe revogarse o contrato coa empresa adxudicataria, e iniciar unha xestión pública integral, con cuadrillas municipais para acometer as obras de reparación e mantemento, que ademais de asegurar un maior control sobre as mesmas, crearían ese emprego que tanto necesita a nosa cidade e suporían un abaratamento do custo do servizo.

Ferrol, 13 de xaneiro de 2014-01-13

Esquerda Unida de Ferrol
R/ do Sol 124 Entrechán Esquerda
981944035
www.euferrol.org
https://www.facebook.com/esquerdaunida.ferrol
https://twitter.com/EUFerrol
http://www.esquerdaunida.org/ferrol.html

Enviado por:
Ferrol Esquerda Unida
-eu-ferrolterra@esquerdaunida.org-
13 de janeiro de 2014 14:21
Bo día, Remítese nota de prensa do Grupo Municipal de Esquerda Unida sobre o mantemento de viais e reparación de fochas na nosa cidade. Un saúdo. Secretaría de comunicacion de EU Ferrol
__________________

Foto de Daniel Alexandre no Diario de Ferrol.
______________________

O Grupo Municipal de EU critica o resultado final das obras na praza de España: un desastre funcional e esteticamente un bodrio

O Grupo Municipal de EU critica o resultado final das obras na praza de España: un desastre funcional  e esteticamente un bodrio. | Esquerda Unida considera  lamentable que o Partido Popular se esconda do seu proxecto de Praza de España.

O Partido Popular e o Alcalde Rey Varela rematan o vodevil da praza de España tal e como o comezaron o mentor político do señor Rey e o seu compañeiro Vilariño cando o da performane do  pico e a pala: con un espectáculo lamentable e bochornoso.

En primeiro lugar é lamentable todo o conxunto de decisións tomadas para chegar a un malgasto dun millón de euros. Neste punto non imos insistir máis xa que abonda co moito que xa se dixo no seu momento e os ouvidos xordos dos nosos gobernantes, insensibles ao sufrimento da xente do común e extraordinariamente atentos a cumprir con supostos mandados e compromisos electorais que, no fondo, son actuacións dun programa  impregnado de revanchismo político.

En segundo lugar é lamentable que o propio Alcalde inaugure o labirinto da praza aludindo a unha rocambolesca comparativa coa situación de hai doce anos. O labirinto inaugurado metéuselle nos miolos e agora temos un labirinto mental  do señor Rey. Non señor Rey, a cuestión é se había ou non que investir en cousas como levantar o chan recén feito e volver a poñer outro modelo, se había que retirar un xardín e deseñar e poñer outro, se había que defender ou non disparates como o de que non hai prazas sen árbores etc. vostede ten  que asumir que procedeu de maneira aloucada a executar compromisos sen sentido en virtude de argumentos irracionais É, amodo de exemplo, o disparate seguinte: non me gusta a praza de Armas e arrecende a estética franquista ergo levanto o chan da praza e póñoo novo, “de vermello- Ferrol” a poder ser. Adubío todo co discurso dos postos de traballo, investimentos, plan de barrios e demais e asunto concluído. Pero a cidadanía non está para estas bromas. Nin para estas nin para ningunha outra. É literalmente impresentable a súa actitude, politicamente cobarde, de non asumir as súas propias decisións e inaugurar a súa magna obra pola porta de atrás, con disimulo e con declaracións infumables. Un auténtico laberinto mental.

Porque, e en terceiro lugar, a obra é un atentado ao bon gusto. Sen dúbida o peor proxecto de todos os posibles. Esquerda Unida sempre foi respetuosa como organización cos profesionais que presentaban as súas propostas e ofertas pero hai que dicilo, agora xa, unha vez concluídas: é tecnicamente un bodrio e estéticamente horrible; dá arrepíos e é un atentado ao gusto. Nin é praza, nin é xardín nin hai concepto regulativo que recolla o feixe de impresións de tal cuadro: unha mistura kitsch que só con bo humor ferrolano conseguiremos dixerir. Bo nadal, señor Alcalde. Parabéns, señor Evia. Debeulles quedar a cabeza aliviada.

Ferrol a 21 de novembro de 2013

Grupo Municipal

Esquerda Unida de Ferrol
R/ do Sol 124 Entrechán Esquerda
981944035

www.euferrol.org
https://www.facebook.com/esquerdaunida.ferrol
https://twitter.com/EUFerrol
http://www.esquerdaunida.org/ferrol.html

Enviado por:
Ferrol Esquerda Unida
-eu-ferrolterra@esquerdaunida.org
21 de dezembro de 2013 13:51
Bo dia. Adxunto enviamos nota do grupo municipal sobre a inauguración da praza de España. Grazas e un saúdo. Secretaría de Comunicación. CPL- EU Ferrol.
____________

Ferrol non necesita malgastar 812.000 euros de diñeiro público na Praza de España - A Asociación Veciñal de Esteiro promove unha petición en change.org

A Asociación Veciñal de Esteiro promove unha petición en change.org

Ao Alcalde do Concello de Ferrol (A Coruña): Que non se malgaste mais diñeiro público na Praza de España de Ferrol

Ferrol non necesita malgastar 812.000 euros de diñeiro público na Praza de España

A Cidade de Ferrol ten unha taxa de desemprego altísima, moitas entidades de carácter social e funcións asistenciales de axuda a persoas doentes ou con dependencias, como Lazos, Asfedro e outras, teñen problemas para poder continuar o seu traballo social por falta de recursos.

A Praza de España leva consumido 21 millóns de euros de diñeiro público e agora, por un capricho do novo concelleiro de Urbanismo, Guillermo Evia, vanse a malgastar 812.000 euros mais nunha obra innecesaria e cando as rúas, beirarrúas, prazas, parques, señalización vertical e horizontal, mercados municipais de Caranza e Recimil, etc están nun estado de conservación lamentable.

A Praza de España está case terminada e só está pendente de unir, con ela, as rúas Rochel e Real.

Os 812.000 euros deben destinarse a fins sociais, creación de emprego e mellorar e conservar as infraestructuras de Ferrol.

Foto de Jorge Meis Díaz publicada no 'Diario de Ferrol'.
Web de Joge Meis: http://www.jorgemeis.com/

Se queres asinar esta petición, pode-lo facer en:
http://www.change.org/petitions/alcalde-del-concello-de-ferrol-a-coru%C3%B1a-que-no-se-malgaste-mas-dinero-p%C3%BAblico-en-la-plaza-de-espa%C3%B1a-de-ferrol-2

Local Veciñal:
Rúa Fernando VI,
Bloque I baixo
Ferrol -15403
Telef. 981933223
avesteiro@galicia.com
http://avesteiro.blogspot.com/





Información baseada na enviada por:
avesteiro
-avesteiro@galicia.com-
13 de agosto de 2013 10:37
___________

Autoconvocatoria: Asemblea Aberta a toda a cidadanía para abordar o asunto do malgasto de máis de 812.000 euros na Praza de España - Este martes 14 de Maio, ás 7 da tarde, na Escola de Idiomas de Ferrol

O goberno municipal de Ferrol, pretende gastar por enésima vez, centos de miles de euros nunha nova remodelación da Praza de España, cando xa se levan dilapidados máis de 16,5 millóns de euros, segundo medios de prensa.

Das 15 empresas que optaban a facer a obra de remodelación, foi seleccionada, a UTE (Unión Temporal de Empresas) formada por Extraco S.A. e Prace Servicios y Obras S.A. que rebaixou a oferta en case 100.000 euros, con respecto á cantidade fixada no prego de condicións, que ascendía a 916.000 euros. A remodelación da Praza terá un custo inicial de 812.000 euros, máis os xa gastados 56.000 euros que custou o proxecto, segundo datos facilitados desde o propio Concello.

Desde hai tempo diferentes entidades veciñais, sociais e culturais, veñen opoñéndose ao malgasto na Praza. Tamén os tres partidos da oposición. Mesmo nos últimos meses o Colectivo Cidadá 'Acción Directa de Recuperación de Espazos Públicos' ven denunciando este malgasto  "... comunicámoslles que facendo valer os nosos dereitos como contribuíntes dese diñeiro público que van malgastar, exerceremos unha presión activa para impedir que esa obra se execute. Pedimos a colaboración de toda a cidadanía de Ferrol para que nos axuden a parar este despropósito".

A maioría das entidades opositoras ao malgasto, consideran que os centos de miles de euros, que se pretenden gastar na Praza de España, non se deben gastar aí, pois hai outras necesidades urxentes e algunhas de actuación inmediata que se deben de abordar xa. Sobre todo, Ferrol que ten un índice enorme de desemprego, segundo a EPA, máis do 32%, necesita que o diñeiro que se pretende dilapidar nunha nova remodelación da Praza, podería-se empregar, principalmente, en atender os problemas de emerxencia social e en xerar emprego.

Autoconvocatoria

En réxime de Autoconvocatoria, vai ter lugar unha Asemblea Aberta a toda a cidadanía e a todo o tecido asociativo, no salón de actos da  Escola de Idiomas o martes 14  de maio ás 19:00hs, para abordar o asunto do malgasto de máis de 812.000 euros nun novo proxecto de remodelación da Praza de España.

____________

O Grupo Municipal de EU insta ao goberno á modificación dos orzamentos para destinar partidas de obras á creación de emprego e á atención de necesidades sociais

O Grupo Municipal de EU insta ao goberno á modificación dos orzamentos para destinar partidas de obras á creación de emprego e  á atención de necesidades sociais.
Suso Basterrechea, coordinador local de EU, considera unha falta de respecto aos/ás desempregados/as da nosa cidade que centos de miles de euros das arcas municipais sexan dilapidados en obras puramente ornamentais.
O voceiro Javier Galán afirma que queda demostrado, pola vía dos feitos consumados, que o alcalde,Jose Manuel Rey Varela,abandonou a loita polo emprego en Ferrol, cunha taxa insostible do 32%.

O grupo municipal de EU sentencia tallante: os criterios de gasto público do Concello de Ferrol e  cruel e antipolítica, xa que entendemos a política no sentido clásico, como a tarefa de acadar o ben común. Agora ben, o Partido Popular parece entender a política como un exercicio de tanatoestética, é dicir, a maquillaxe dos mortos. Na regresión histórica que se nos propón como saída económica quizais, para algúns, que xa pensan na volta dos faraóns, embalsamar e momificar serán actividades de futuro.

A cidade esmorece. Os comercios pechan. As gradas de Navantia perduran baleiras. Os servizos sociais esfúmanse cara outra cidade ou  déixanse morrer por asfixia económica. Os salarios baixan, os prezos públicos e privados suben. Os dramas persoais de xente sen recursos galopan sobre as conciencias da caste política. Mentres todo isto é a vida real, o alcalde sorrí nos barrios prometendo captación de comercios, grandes avenidas, prazas magníficas e a grandilocuente humanización da cidade, iso que veñen en chamar Ferrol 2020.

Sr Alcalde: para que  unha cidade se cualifique como  humana o primeiro que debe facer e cargar de dignidade aos seus habitantes. Nunha situación de emerxencia social, económica e política, soterrar os problemas non é propio do mandato ao que o somete a cidadanía, e un incumprimento manifesto do cargo que ostenta e causa obxectiva de dimisión por incapacidade sobrevida.

O Grupo Municipal de Esquerda Unida esixe un cambio de rumbo e as modificacións orzamentarias suficientes que permitan espertar a cidade non no estético, senón no ético e, en consecuencia, instamos a dotar partidas para:

1.- A creación dun Plan de emprego municipal. Nunha cidade coa taxa de desemprego máis elevada do país non contamos ni tan sequera con orientadores laborais, tendo que acudir os/as ferroláns/ás a cidades veciñas como Narón, para poder recibir ese servizo de atención básico no momento actual.
2.- Un Plan retribuído de formación e outro de reciclaxe laboral para desempregados/as de máis de 50 anos. A renda básica para a cidadanía, máis alá da burocratización dun RISGA imposible, é un dereito a conquistar, unha inversión en dignidade máis rendible en termos sociais que seguir queimando o erario público nunha Praza de España, estandarte da política ornamental inservible para os dereitos básicos: vivenda, sustento, traballo.

3.- Poñer ao servizo da cidadanía a riqueza social da que dispón a cidade: as vivendas de Recimil, rehabilitadas debidamente e con garantías públicas de función social.

4.- Reducir a externalización de servizos, eufemismo que agocha a entrega de servizos que deberían ser públicos a empresas amigas, e activar a Bolsa de emprego do Concello, que xa existe pero se conserva en formol en sotos ocultos, mentres contratas e subcontratas precarizan o emprego derivado dos servizos municipais.

Está moi ben visitar os barrios, previamente hixienizados, como salmóns postos no anzol do mandatario, pero mentres o alcalde sorrí anunciando inversións millonarias nas pedras da cidade, miles de desempregados nas mesmas casas dos barrios que visita, soportan o peso de mundo, e permanecen abandonados a súa sorte pola inacción municipal. Dende EU, pedimos a dimisión por dignidade política do alcalde de Ferrol, as súas políticas quedou demostrado que non serven, que provocan indignación e carraxe, e que debe deixar paso a outras alternativas que gobernen dende o fondo dos problemas da xente e non dende as formas da mercadotecnia.

Grupo Municipal de Esquerda Unida.

Ferrol a 11 de maio de 2013

Esquerda Unida - Ferrol
Rúa do Sol 124 entrechán esquerda, Ferrol
eu-ferrolterra@esquerdaunida.org
eu-ferrolcomarca@esquerdaunida.org

facebook
http://www.esquerdaunida.org/ferrol.html
http://www.esquerdaunida.org/


Enviado por:
Ferrol Esquerda Unida
-eu-ferrolterra@esquerdaunida.org-
11 de maio de 2013 16:51

_______________

Segunda xornada de Acción Directa en Defensa dos Espazos Públicos no mirador e xardíns d'A Cabana

Remate dos traballos de limpeza no mirador e xardíns de A Cabana

II xornada de traballo nos xardíns que lindan co CIS (Centro de Innovación e Servizos) de A Cabana, a semana pasada xa limparamos a zona do Miradoiro, nos traballos acometidos hoxe limpamos máis de 2.000 m2 deste espazo público.

Chamounos poderosamente a atención unha foxa séptica que hai nos xardíns, esta ten dúas tapas plásticas sen ningunha suxeición. Tamén queremos deixar constancia que esta semana romperon parte do valo de madeira, e a cimentación que suxeita o resto do valo perdeu a terra que aguanta do mesmo.

Nesta xornada de traballo participamos 10 persoas, a alegría foi contar coa colaboración de Laura, unha nena pequena de aproximadamente uns 7 anos, filla dunha compañeira, que traballou máis duro que moitos dos adultos que participamos. Contamos con ela para as próximas accións, aínda que só sexa para facernos unha visita.

Instamos ao actual goberno local para que recapacite sobre o malgasto de 916.426,06 euros previsto para construción unha zona verde na Praza de España.

Pensamos que a actual situación de emerxencia social que están a pasar moitas familias, ten que ser motivo abondo como para que esa obra se paralice de inmediato.

Esixímos que ese diñeiro sexa destinado a contratar xente en situación de desemprego, mediante a creación de cuadrillas de traballo municipais, para a reparación, limpeza, e saneamento dos espazos públicos da cidade, ou ben, para a reparación das vivendas de titulación municipal, co fin de crear o necesario "Parque de Vivendas de Aluguer e Refuxio Social".


Convidamos a toda a cidadanía a participar con nós na recuperación dos espazos públicos.

No blogue do colectivo atopase información adicional:
http://recuperaciondeespazospublicos.blogspot.com.es/

e-mail: recuperacióndeespazospúblicos@gmail.com

Teléfonos: 620 312 992 - 637 567 497

O noso blogue: http://recuperaciondeespazospublicos.blogspot.com.es/   é un Diario que recolle a nosa traxectoria, serve de difusión de próximas accións.

_____________

De fochanca en fochanca, de burato en burato, por Ferrol, contra o Malgasto do diñeiro público

Un "flashmob" sobre as fochancas da cidade.

O Colectivo Cidadán Acción Directa de Recuperación de Espazos Públicos, apoiado pola Plataforma contra ou Malgasto do Diñeiro Público, da Asociación Grupo Diversidade Funcional de Ferrol e Comarcas e da Asociación Veciñal de Esteiro, organizou unha especie de "flashmob" que contou coa presencia de Bob Esponxa e o Señor Cangrexo. A cada fochanca visitada, das centos que hai repartidas por todos os barrios e parroquias da cidade, se lle deu un uso especial, desde unhas pinturas de Sorolla, pasando por un personaxe dunha das traxedias de Shakespeare,  un mergullador, mariscadoras, espeleólogo, pescador@s, lavar a roupa, lectura de libros, ..., nunha das fochancas até deu para pescar uns lirios, noutra plantar unha árbore do natal e noutra as tartarugas e hipopótamos atoparon un bon lugar para ben vivir. No transcurso do percorrido puidemos observar a cantidade de barreiras arquitectónicas que dificultan o tránsito pola cidade de persoas con diversidade funcional, mesmo un grande burato na beira rúa, en Esteiro, foi unha das escenas elixidas. As fochancas cobraron vida perante case tres horas de percorrido, rematando en Caranza, na que se denominou "O burato de Rey Varela", onde celebramos o seu primeiro aniversario, con tres meses de atraso. Unha queimada puxo punto final ao percorrido reivindicativo.

O obxectivo desta acción foi o de poñer en evidencia o Malgasto do Goberno Municipal do Partido Popular, con José Manuel Rey Varela á cabeza, que van de "Austeridade" e se dedican ao malgasto desmesurado do diñeiro público en proxectos sobre proxectos, nos que xa había proxectos. O máis vergoñento de todos, o da "Praza de España", é unha coladeira de millóns de euros, aos que queren somar outro millón máis en volver a remodelar  e levantar a Praza para facer un caprichoso "Pulmón Park", cando os barrios e mesmo o centro da cidade necesitan con urxencia ese diñeiro.

Cando chegou Rey Varela e o Sr. Evia ao poder municipal, mandaron paralizar o remate da Praza e encargaron un novo proxecto, para o que destinaron 58.000 euros máis -todo suma. Coa agravante de que xa pasaron máis de 18 meses e a Praza segue sen rematar. Foron varias as persoas que sufriron un accidente por este motivo. E os irresponsábeis seguen tan panchos, anunciando que o proxecto inicial que dicían que ía custar 700.000 euros, máis os 58.000 xa citados do novo proxecto, agora hai que sumar-lles outros 216.000 euros de axustes. E o que queda por sumar, non o dubidedes.

En Maio deste ano, os irresponsábeis municipais, anunciaban que unha empresa privada accedería a un novo contrato para o mantemento de rúas e estradas de Ferrol, por catro anos e que estaría dotado con 2,8 millóns de euros. A empresa  adxudicataria dispoñería xa que logo cada ano de 700.000 euros para levar a cabo as reparacións dos viales municipais. Sobre uns 2.000 euros diarios para acabar coas fochancas e buratos, que a día de hoxe é un dos principais problemas das rúas e estradas de Ferrol, xunto ás barreiras arquitectónicas que aínda perduran. Onde vai a execución deste pomposo plano de actuación, onde está o equipo municipal de Rey Varela ?

Os colectivos contra o malgasto do diñeiro público, alertan da necesidade que hai de atender situacións de emerxencia social cada vez máis importantes. Rehabilitar o parque municipal de vivendas ten que ser unha prioridade. Elaborar e executar planos de creación de emprego. E sobre todo non malgastar o diñeiro que fai falta para atender as necesidades máis urxentes, das persoas, barrios e parroquias.

Fotos do Colectivo Cidadán Acción Directa de Recuperación de Espazos Públicos

____________________

O Domingo imos de fochas con Bod E$ponxa - Flashmob, de burato a burato, de Ferrol a Caranza

FLASHMOB" DANDO "USO ÁS FOCHAS DE FERROL


Mañá domingo, 23 de Decembro de 2012, Bob Esponxa e os seus amigos escenificarán e darán USO ás Fochas de Ferrol, estes sairán ás 11:00 h. dende o Cantón (Altura da fonte) e finalizarán no barrio de Caranza, no que terá lugar unha degustación gratuíta dunha boa Queimada.

Con este "FLASHMOB" queremos facer visible o estado de desleixo das nosas rúas, así como impedir o malgasto millonario en obras ridículas por parte do actual goberno do PP.

Como a obra proxectada para a Praza de España, prevista inicialmente nun valor de 700.000 euros, e que antes de ser executada xa nos anuncian que se incrementa en 216.000 euros, para situarse en 916.000 euros. Aos que hai que sumar os 56.000 euros que costou o proxecto.

Coa que está a caer, co padecemento de familias, desafiuzamentos, colas nos comedores sociais, e con máis de 20.000 desempregad@s na bisbarra, e o PP de Ferrol tira polo desaugadoiro un diñeiro imprescindible para paliar estas situacións. Instamos o Goberno do Sr José Manuel Rey Varela, a que recapacite e dea marcha atrás neste proxecto. Queremos que ese diñeiro se destine á contratación de desempregad@s en contratos de media xornada, e en función dá carga familiar ou precariedade que poidan estar a pasar.

Organizan e colaboran “Acción Directa de Recuperación de Espazos Públicos”, “Plataforma contra o Malgasto” e a “Asociación Veciñal de Esteiro” .

Convidase a participar a toda a cidadanía

Fonte: http://recuperaciondeespazospublicos.blogspot.com.es/2012/12/flashmob-dando-uso-as-fochas-de-ferrol.html
______________

O malgasto do goberno municipal de Ferrol non ten fin, agora suben a licitación da enesima remodelación da Praza de España até 916.000 Euros

A Xunta de Goberno, do Concello de Ferrol acordou entre outros malgastos, que a Praza de España saia a licitación por 916.000 euros, 200.000 máis do que anunciaran nun principio.

O alcalde, José Manuel Rei Varela, e o concelleiro de Urbanismo, Guillermo Evia, manifestaron que na reunión da Xunta de Goberno Local, que tivo lugar hoxe pola mañá, acordou dar-lle para diante ao 'Pulmón Park' da Praza de España, unha remodelación máis que nos vai custar ás veciñas e veciños de Ferrol, un millón de euros que hai que sumalos aos máis de 17 millóns (Declarados) que se levan gastados na famosa Praza, en obras desde hai máis dunha decada. Di o concelleiro Evia que a execución da Praza pode estar lista para finais do 2013.

Enlace relacionado:

Ártabra 21: Nova xuntanza do tecido asociativo de Ferrol para abordar as accións contra o Malgasto do Goberno dereitista do PP na cidade

Ártabra 21: Presentación dunha Moción contra o 'Malgasto do Goberno Municipal' - Reunión coas asociacións de comerciantes - Hai outras necesidades, xa basta de malgastar máis diñeiro público na Praza de España - Recollida de sinaturas, este Martes 20 de Xuño, para solicitar unha 'Consulta Popular'
______________

E xa son sete as xornadas de traballo comunitario no Castelo de San Cristovo

Os compañeiros e compañeiras do Colectivo Cidadán 'Acción Directa de Recuperación de Espazos Públicos' están desenvolvendo un enorme traballo, non só físico, senón de concienciación e reivindicación. Reivindican o dereito ao traballo, reivindican que non se malgaste o diñeiro público, reivindican a recuperación do noso patrimonio cultural, natural e arquitectónico, ... reivindican a recuperación dos espazos públicos. Desde Ártabra 21 queremos amosar un agarimoso e solidario saúdo ás compañeiras e compañeiros na loita pola xustiza social, o medio ambiente, os bens comúns e a igualdade.

Onte, sábado día 29, continuamos coa limpeza e recuperación para a cidadanía, da Batería de San Cristovo, na que xa fai a VII xornada de traballo nesta.

Os traballos actualmente realízanse no exterior da fortaleza e na limpeza dos muros.

Denunciamos de novo a cidadanía que o Concello de Ferrol e a Autoridade Portuaria seguen sen recoller os restos de maleza amoreadas. Lembramos cos restos de roza do miradoiro exterior da fortaleza xa levan dende o sábado 18 de agosto esperando ser recollidos, a pesar de entregar un aviso por rexistro ao concello de Ferrol dando conta dos mesmos.

Unha grata visita e un descubrimento

Onte achegouse xunta nós un ancián, Julio Pintos, veciño de Doniños, veu facernos unha visita e explicarnos detalles descoñecidos da Fortaleza, (esta era o lugar de xogos da súa infancia).

Unha compañeira realizoulle unha entrevista que decidimos gravar e facer pública polo interese que ten.

Descubrimos que o interior da Fortaleza ten chan de pedra, algo impensable para nós, pois non existe documento gráfico nin escrito público que así que o testemuñe. Despois de cavar uns 30 cms puidemos dar crédito ás súas palabras, hai unha empedrada preciosa e moi ben conservada. O sexa que si se pasase una pequena pala non habería que volver a limpar o interior.

Julio Pintos tiña unha empresa de traballos en pedra, foi canteiro de oficio. Conta que ofreceuse hai moitos anos ao Concello para restaurala Fortaleza gratuitamente, debido ao apego sentimental que tiña coa mesma, pero parece ser que ninguén lle soubo dicir nin tampouco sabían a quen remitilo.

Tamén nos dixo que o ideal sería que na Fortaleza o Concello puxese en marcha unha Escola Taller, que a parte de dar traballos a desempregad@s serviría para a recuperación desta á vez que a xente aprendería un novo oficio.

Esta é a entrevista con Julio Pintos:  



http://www.goear.com/listen/2735f32/entrevista-a-un-avo-en-san-cristovo-accion-directa-de-recuperacion-de-espazos-publicos

Si o Concello tivese interese no patrimonio non faría oídos xordos a canta denuncia e achado estamos a facer, resulta insultante para nós non obter unha resposta de ningún tipo.

Así mesmo os medios de comunicación da comarca, que son unha parte importante do MOTOR DA CIDADE, debían tamén facerse eco do que estamos a facer e axudar a trasladar á cidadanía o que estamos contando.

Para máis información, pode-se visitar o Blogue ou as contas nas redes sociais, tamén facilitamos os teléfonos e correo-e.

Calquera cidadán ou cidadá que queira sumarse a estas tarefas solidarias só ten que comunica-lo.

--
e-mail: recuperacióndeespazospúblicos@gmail.com

Teléfonos: 620 312 992 - 637 567 497

O noso blogue: http://recuperaciondeespazospublicos.blogspot.com.es/   é un Diario que recolle a nosa traxectoria, serve de difusión de próximas accións e faise eco doutros exemplos solidarios e comunitarios que están a suceder na bisbarra.

Facebook: https://www.facebook.com/groups/444525015569821/

Enlaces relacionados:

• Ártabra 21: Unha nova xornada de traballo comunitario no Castelo de San Cristovo, e van tres
• Ártabra 21: Así foi a segunda xornada de traballo comunitario no Castelo de San Cristovo
• Ártabra 21: Hoxe segunda xornada de traballo comunitario no Castelo de San Cristovo - Así foi a "Acción sorpresa", limpeza e recuperación dun lavadoiro na zona d'A Cabana
• Ártabra 21: Primeira Xornada de Traballo Comunitario no Castelo de San Cristovo
• Ártabra 21: Segunda Acción Comunitaria de Recuperación de Espazos Públicos, desta vez no Castelo de San Cristovo
• Ártabra 21: Rematou o traballo comunitario no antigo lavadoiro da Mina de Ponzos - En marcha a próxima Acción
• Ártabra 21: Acción Comunitaria para recuperar os espazos públicos: Tarefas de limpeza e desbroce do lavadoiro da mina de ouro de Ponzos - Sabádo 11 de Agosto

_______________

A Plataforma contra o Malgasto do diñeiro público a todo o tecido asociativo e cidadáns a título individual a unha reunión o próximo venres, día 14 de Setembro

A Plataforma contra o Malgasto de diñeiro público constutuída despois de que o Concello de Ferrol anunciara o gasto de máis de 700.000 € nunha nova obra na praza de españa, convocamos a todo o tecido asociativo e cidadáns a título individual a unha reunión o próximo venres, día 14 de setembro, ás 19,00 horas no local da A.VV. de Esteiro para informar sobre os actos que estamos facendo e programar os seguintes pasos para impedir este malgasto nun espazo público no que xa se levan gastados máis de 16 millóns de euros.

Conscientes de que o goberno actual do Concello de Ferrol segue adiante co seu proxecto, esta Plataforma quere impedir esta remodelación da praza e, para elo, precisamos sumar apoios da cidadanía e reclamar a convocatoria dunha consulta popular, tal como se contempla no Regulamento de Participación Cidadá, para que os cidadáns expresen a súa opinión.

Nestes momentos, esta Plataforma continúa recollendo sinaturas para solicitar esta Consulta Popular, así como tamén está preparando un acto reivindicativo na propia praza; pero sobre este último asunto xurdiron problemas que nos fan replantear a súa organización e o seu formato.

Por todo isto, solicitamos a vosa presencia na reunión e así dar forma definitiva a ese acto que traslade o malestar da cidadanía coas decisións unilaterais dun goberno que ten a osadía de dicir que son eles os que "sentaron as bases da participación cidadá en Ferrol".

Enviado por:
ana beceiro mosquera
-beceiroana@hotmail.com-
12 de setembro de 2012 19:26
____________

Documentación:

Escrito ao Alcalde (08.06.2012)

Panfletos.

Folla divulgativa.

Escrito para a recollida de sinaturas solicitando unha Consulta Popular.

Moción ao Pleno (Rexistrada o 12 de Xuño de 2012).

Intervención no Pleno (28.06.2012).

______________

O mércores 5 de Setembro nova xuntanza do tecido asociativo de Ferrol para abordar as accións contra o Malgasto do Goberno dereitista do PP na cidade

O tecido asociativo de Ferrol, agrupados na Plataforma Contra o Malgasto do Diñeiro Público, volve-se reunir en Asemblea, o Mércores 5 de Setembro, ás 19:30 horas, no local da Asociación Veciñal de Esteiro. A análise do seguimento do Malgasto do Goberno Municipal, a situación de recollida de sinaturas para solicitar a Consulta Popular e as novas accións, figurarán na orde do día da citada xuntanza veciñal.

Na actualidade forman parte da Plataforma: AAVV de Esteiro, AAVV de San Xurxo, AAVV San Pablo de Catabois, AAVV de Santa Mariña, AAVV Prioriño, AAVV San Román de Doniños, AAVV O Rosario-Inferniño, AAVV de Ultramar, AAVV de San Xoan- Berton Asociación, Asociación  SC López Bouza, Asociación C. Fuco Buxán, Ateneo Ferrolán e Colectivo Ártabra 21

Documentación:

Escrito ao Alcalde (08.06.2012)

Panfletos.

Folla divulgativa.

Escrito para a recollida de sinaturas solicitando unha Consulta Popular.

Moción ao Pleno (Rexistrada o 12 de Xuño de 2012).

Intervención no Pleno (28.06.2012).

Enviada por:

avesteiro

-avesteiro@galicia.com-

28 de agosto de 2012 18:23

______________

Continúa a campaña de recollida de sinaturas en demanda dunha 'Consulta Popular' sobre o novo proxecto da Praza de España (Praza da Porta Nova)

Consulta Popular Praza de España

Continúa a campaña de recollida de sinaturas en demanda dunha CONSULTA POPULAR sobre o novo proxecto da Praza de España, ao que se destinan, ademais dos 58.000 euros xa gastados na elaboración do proxecto, un mínimo doutros 700.000 euros, de maneira inicial, para volver a levantar a superficie da Praza nun malgasto manifesto do diñeiro público e con grave prexuízo para o comercio e a hostalería próximas á Praza que verán como, despois de 10 anos de obras e de contínuas perdas económicas, se lles quere someter a máis obras innecesarias.

Esta campaña está promovida pola Plataforma contra o Malgasto do Diñeiro Público, que compoñen as Asociacións: Ateneo Ferrolán, Sociedade Cultural López Bouza, Colectivo Ártabra 21, Asociación Cultural Fuco Buxán e as asociacións veciñais de: Esteiro, San Xurxo, San Pablo de Catabois, Santa Mariña, Prioriño, San Román de Doniños, O Rosario-Inferniño, San Xoán-Bertón e Ultramar.

Pensamos que cando toda a cidade de Ferrol é un bache, cando as Prazas do Callao, Cantón, Rúa do Sol, Irmandiños, Tunel da Praza de España e cando todas as rúas e camiños do rural están nun estado de conservación lamentable, sen que, durante un ano se fixese ningún arranxo e onde se fixeron arranxos como na Rúa Real, Rochel, etc, xa volven a estar desfeitos.

Cando, pola situación económica  que pasa a cidade, é máis preciso que nunca facer investimentos en servizos sociais, cando non se executan as demandas que os veciños e as veciñas dedidiron no proceso de orzamentos participativos, e que contaban con partida orzamentaria. Cando o coidado das zonas verdes é absolutamente deficiente e a limpeza da cidade é manifestamente mellorable.

Cando temos as torretas de electricidade sen soterrar en Caranza e noutros barrios, canda a Ría está sendo a cloaca onde vai toda a merda. Cando temos infinitas necesidades ao Concelleiro de Urbanismo e Obras non se lle ocurre máis que contratar proxectos: Praza de España, que xa contaba cun proxecto e so queda rematalo, Parque Municipal (que xa contaba cun proxecto), novo Proxecto sobre Mobiliario Urbano no barrio da Madalena, etc, etc. Estes proxectos, con independencia de que se realicen ou non, van supoñer un custo de preto de 180.000 euros innecesarios. Estes proxectos nunca se encargan aos funcionarios municipais do departamento de Urbanismo que poderían facelos perfectamente xa que teñen a capacidade necesaria para realizalos. É un continuo e reiterado malgasto de diñeiro público.

No día de hoxe , sábado 21 de xullo, estivemos recollendo sinaturas no Mercado da Central da Madalena, como se ve nas fotos que achegamos, con moito éxito e cunha recepción absolutamente positiva, da veciñanza de Ferrol, cara á demanda da Consulta Popular e da paralización do novo Proxecto para a Praza de España.

O pasado sábado 14 estivemos no Feirón do Inferniño e o domingo 15 na Feira de Ferrol, en tódolos casos cun resultado altamente positivo. Imos continuar recollendo sinaturas.

O vindeiro xoves día 26 de xullo asistiremos ao Pleno Ordinario do Concello de Ferrol para seguir opoñéndonos ao Malgasto do diñeiro público, o mesmo que faremos no pleno do mes de agosto, setembro, outubro, etc. E outras accións que estamos elaborando.



Documentación:

Escrito ao Alcalde (08.06.2012)

Panfletos.

Folla divulgativa.

Escrito para a recollida de sinaturas solicitando unha Consulta Popular.

Moción ao Pleno (Rexistrada o 12 de Xuño de 2012).

Intervención no Pleno (28.06.2012).

Local Veciñal:
Rúa Fernando VI,
Bloque I baixo
Ferrol -15403
Telef. 981933223
avesteiro@galicia.com
http://avesteiro.blogspot.com/





Enviado por:
avesteiro
-avesteiro@galicia.com-
21 de julho de 2012 13:33
_______________

Hoxe, Xoves 28 de Xuño, ás 6 da Tarde asociacións veciñais e outros colectivos pertencentes á Plataforma Cidadá Contra o Malgasto, van-se concentrar diante do pazo Municipal de Ferrol e as 7 da Tarde terá lugar un Pleno onde se tratará unha moción contraria a malgastar máis de 700.000 euros nunha nova remodelación da Praza de España

Hoxe, Xoves, 28 de Xuño de 2012, as entidades AAVV de Esteiro, AAVV de San Xurxo, AAVV San Pablo de Catabois, AAVV de Santa Mariña, AAVV Prioriño, AAVV San Román de Doniños, AAVV O Rosario-Inferniño, AAVV de Ultramar, AAVV de San Xoan- Berton Asociación, Asociación  SC López Bouza, Asociación C. Fuco Buxán, Ateneo Ferrolán e Colectivo Ártabra 21; decidimos Concentrarnos diante do Pazo Municipal do Concello de Ferrol, para amosar o noso rexeitamento a que se dilapide máis diñeiro público en Obras Innecesarias na Praza de España -Praza da antiga Porta Nova. As 7 da Tarde está prevista a celebración dun Pleno Municipal, onde está previsto a presentación dunha Moción contraria ao malgasto de máis diñeiro Público para volver por enésima vez levantar a Praza e comezar de novo obras nunha zona que pasou unha década de continuas remodelacións.

Texto da intervención prevista realizar no Pleno de hoxe:

INTERVENCIÓN NO PLENO MUNICIPAL SOBRE A PRAZA DE ESPAÑA

O colectivo ó que represento, formado por entidades veciñais, sociais e culturais, presentamos por rexistro o pasado día 19 de Xuño unha proposta, que sería recollida polos grupos municipais da oposición PSOE, EU e BNG, dándolle forma de moción, para informar e debatir neste Pleno o anuncio do goberno municipal de levar a cabo un novo proxecto e novas obras na Praza de España.
Ante esta decisión, tomada polo Partido Popular, de facer un investimento  de máis de 700.000 € nun espazo que, por fin a cidadanía daba por rematado, nos parece un despropósito e un malgasto do diñeiro público que merece un debate entre os cidadáns e os nosos representantes políticos.

Hai que apelar á memoria e recordar que este mesmo partido que hoxe está gobernando Ferrol e que nos presenta un novo proxecto para a Praza de España coa intención, non de reamatala ultimando as obras pendentes xa orzamentadas (que hai que dicir que xa levan un ano paralizadas) senón coa intención dunha nova remodelación, con cambio de pavimento incluído, é o mesmo partido que gobernou esta cidade entre 2003 e 2007 no que estaba o actual Alcalde de Ferrol, José Manuel Rey Varela e dous dos seus máis destacados colaboradores, José Manuel Vilariño Anca e Guillermo Evia Pérez, e que no seu momento xa dilapidaron 7,9 millóns de euros en indemnizacións polo seu malgoberno. Nós preguntámonos por que nese momento non presentaron este proxecto que agora, repito, unha vez rematada practicamente esta praza, pretenden levar adiante coa disculpa de crear un “pulmón verde” para esta cidade? Por que, en lugar de querer facer nese momento un gran edificio para lucro e usos privados no medio da Praza e deixarnos ese espazo cheo de estructuras de aceiro-corten, por non falar dun túnel que ós tres días de inaugurarse houbo que pechalo para facer reformas, que se inunda cando chove e que a día de hoxe está cheo de buratos, non fixeron os deberes que agora pretenden facer, vendéndonos que hai que mellorar a Praza? Por que gastaron tantos millóns nesa Praza se agora, pasados 5 anos, os mesmos que gobernaban nese momento pretenden levantala e facela de novo?

Este colectivo que represento nos opoñemos a que se gaste máis diñeiro na Praza de España porque xa se levan gastado moitos millóns. Estamos falando de máis de 16,5 millóns de euros xa enterrados  neste espazo. Queremos aproveitar este momento, apelando ó exercicio de trasparencia do que fai alarde o noso Alcalde para solicitar as contas do que se leva investido na Praza dende que comezaron as obras ata hoxe.

Porque eses centos de miles de euros, que se pretenden gastar, a maiores, na Praza, consideramos que non se deben gastar aí, pois hai outras necesidades urxentes e algunhas de actuación inmediata que se deben de abordar xa. A proba son as centos de demandas veciñais feitas nas 24 asembleas de barrio realizadas nos últimos meses. Por poñer algúns exemplos: reparación da Praza do Callao; reparación inmediata da cuberta do mercado de Caranza e a súa posterior rehabilitación; eliminación das múltiples barreiras arquitectónicas que aínda quedan na cidade; contratación de cuadrillas de traballadoras e traballadores desempregad@s para a limpeza das zonas intre-mareas da Ría; reparación da maioría das fontes que hai na cidade hoxe abandonadas; mantemento dos colexios públicos; soterramento das liñas de alta-tensión de Santa Mariña e Caranza; limpeza de montes e pistas forestais; limpeza e baleirado de edificios en ruínas ou abandonados; reparación de baches por todo Ferrol; unión do Parque Pablo Iglesias co barrio de Ultramar; reparación do parque municipal de vivendas baleiras de Recimil; apoio aos proxectos culturais do tecido sociocultural de Ferrol; reparación do colector de augas fecais que verte directamente na praia de Caranza e leva roto desde finais do verán pasado e denunciado desde o 3 de Outubro de 2011, sen que o Concello fixese nada até agora; axudas a entidades socio-sanitarias ás que se lles rebaixa o subsidio; extensión da rede de comedores sociais, principalmente os comprometidos nos barrios de Catabois e Esteiro; plan de ordenación forestal; en colaboración coa Xunta constitución dun parque público de vivendas sociais para alugar; mellora das novas tecnoloxías nas zonas de sombra da zona rural; aumento da partida para axudas de emerxencia social; parque urbano no campo de tiro, en Catabois ...e, por suposto, dar cumprimento dos acordos das Asambleas cidadás nos orzamentos participativos dos anos 2009 e 2010. Poderíamos seguir con moitas máis necesidades urbanísticas, de creación de emprego e sociais que requirirían do diñeiro que se pretende dilapidar nunha nova remodelación da Praza, pero non nos chegaría o tempo do que disponemos aquí.

Queremos mencionar ademáis algo que ocorreu o pasado 9 de Xuño cando o Alcalde recibía a membros desta Plataforma. Nesa reunión os representantes cidadáns expuxéronlle a posición a respecto da Praza. Non se trata dunha oposición ao proxecto, senón ao gasto que supón. Ese mesmo día, sae anunciando nos medios de comunicación, que o concesionario do parking -Estacionamientos del Noroeste- pagará parte das obras de remodelación da Praza de España, con 345.135,17 euros. Cantidade que di que corresponde aos dereitos económicos de financiamento que a administración local posúe sobre esta concesión e que segundo dixo aos medios, "nunca foron reclamados”.

Foron membros do propio partido responsable do goberno anterior, os que se encargaron de contraatacar (A Plataforma non podíamos entrar a valorar asuntos de tesourería que descoñeciamos), acusando ao Alcalde, José Manuel Rey Varela, de mentir. Aseguran que esa partida (os 345.135,17 euros) está "consignada mediante un aval bancario na pertinente anualidade do Concello desde maio de 2004, durante o mandato presidido polo tamén popular Juan Juncal, e no que o actual alcalde, José Manuel Rey Varela, era edil de Facenda".

"A concesionaria estaba obrigada a pagar 505.039 euros ao finalizar a obra do subsolo e o goberno de Juncal utilizou 159.904 euros desa partida; os 345.135 restantes están en Tesourería, consignados, desde 2004, é dicir, forman parte dos fondos públicos do Concello ferrolán.

Non houbo resposta do Alcalde a estas afirmacións. Por tanto, nós preguntámonos cal é a intención do Sr. Alcalde ó facer unha afirmacións que, parece, non se corresponden coa realidade?

Para nós a intención é clara: Con isto o Alcalde pretende demostrar a súa austeridade, dicindo que vai gastar menos do que tiña previsto gastar o goberno anterior. Intentando, deste xeito, acalar as críticas polo gasto innecesario e ademais, ao tempo, desviar as críticas contra o anterior goberno municipal.
Este asunto reforza os nosos argumentos da solicitude, anteriormente citada,  de que se dea a coñecer o gasto total das obras da Praza de España, pois intentar manipular e mentir ten que ter un custo político e persoal.

As entidades veciñais e sociais que conformamos esta Plataforma contra o malgasto do diñeiro público por parte do goberno municipal, despois dos infrutuosos intentos para ser escoitados os nosos argumentos, decidimos pasar a unha reivindicación activa: presentando esta proposta ao Pleno; realizando mobilizacións de protesta; recollendo sinaturas de rexeitamento do malgasto e de solicitude dunha 'Consulta Popular', onde a cidadanía poda expresar onde quere que se gasten eses centos de miles de euros, se na Praza de España, ou nas necesidades máis urxentes e inmediatas que ten o Concello.

Con estas accións pretendemos que quede claro que somos moitos cidadáns os que estamos en contra de que se gasten 700.000 euros máis na praza de España.
Queremos denunciar que xa se levan gastado moitos millóns nesa Praza que nunca se acaba de remodelar de todo.

Queremos denunciar que nos barrios hai moitas necesidades urxentes que requiren dese diñeiro que se quere malgastar na Praza.
Queremos que se entenda ben que non é o proxecto o que rexeitamos, pois pode ser mellor ou peor, senón o asunto do gasto de centos de miles de euros, cando consideramos que hai outras necesidades.

Por último, e apelando de novo á política de austeridade de que fai gala este goberno, así como ás palabras do propio Alcalde sobre a importancia que para este goberno ten a Participación Cidadá,

SOLICITAMOS a retirada do proxecto da Praza de España xa que a consideramos rematada, agás certas actuacións de arranxo nas confluencias coas rúas Rochel e Real, a zona onde estaba prevista a colocación da fonte e a posta en marcha dos locais situados na Praza.

Ferrol, 28 de Xuño de 2012

***
Accede, baixa, copia e difunde o Folleto contra o Malgasto do Goberno Municipal de Ferrol: [Foleto Informativo]

Información baseada na enviada por:
ana beceiro mosquera
-beceiroana@hotmail.com-
27 de junho de 2012 18:10
__________________