Amosando publicacións coa etiqueta Orgullo LGTBI. Amosar todas as publicacións
Amosando publicacións coa etiqueta Orgullo LGTBI. Amosar todas as publicacións

luns, xuño 28, 2021

O Día do Orgulho, 28 de Xuño, Avante LGTB+ convoca en Ferrol unha manifestación, con saída da Praza Amada Garcia ás 8 da Tarde - O Orgullo volve á rúa coa reivindicación da 'débeda histórica' cos dereitos das persoas trans e non binarias



O Día do Orgullo 2021 en Ferrolterra

O Día do Orgulho, luns 28 de Xuño, o colectivo Avante LGTB+ convoca en Ferrol unha manifestación, con saída da Praza Amada Garcia ás 8 da Tarde.

Compañeiras o 28 de Xuño tomamos as rúas!!

Como cada ano marchamos polos nosos dereitos, visibilizando as nosas realidades e este ano máis que nunca pola aprobación da Lei Trans. Unha lei imprescindible para recoñecer os dereitos e demandas das nosas compañeiras.

Marcha connosco, partindo da Praza de Amada García (edificio da Xunta) a partir das 20.00h. Remataremos na Praza de Amboaxe coa lectura dun manifesto.

Estade atentas ás redes porque temos máis cousas para celebrar o Orgullo!!

Avante LGTB+ Ferrolterra. No facebook.
---

Reportaxe de Ana Liste [*] en Praza Pública no Día do Orgullo LGTBi

O Orgullo volve á rúa coa reivindicación da "débeda histórica" cos dereitos das persoas trans e non binarias

O Día do Orgullo recupera a reivindicación e os festexos nas rúas despois dun ano marcado pola COVID-19. "Tiñamos moitas ganas de celebrar na rúa, para nós é moi importante ter de novo a manifestación", di Raquel Cordeiro, activista da asociación Nós Mesmas de Vigo. "É o primeiro Orgullo que podemos celebrar de verdade desde que comezou a pandemia e o primeiro que queremos garantir é a seguridade", salienta Ana G. Fernandez, presidenta Asociación pola Liberdade Afectiva e Sexual da Coruña (ALAS).

Chegamos a este 28 de xuño despois duns meses complexos polos efectos da pandemia e, máis concretamente, polos convulso debate sobre a lei trans. O anteproxecto da Lei para a igualdade real e efectiva das persoas trans e para a garantía dos dereitos das persoas LGTBI vén emendar unha "débeda histórica" para estas asociacións galegas, que forman parte da Federación Estatal de Lesbianas, Gais, Trans y Bisexuales (FELGTB), que xunto á asociación Chrysallis de familias con menores trans e a fundación Triángulo está a negociar este proxecto lexislativo co Goberno estatal.

"O activismo non é patrimonio de ningunha ideoloxía", afirma Ana G. Fernández, "e como en todos os movementos sociais hai moitos puntos de vista, nós respectamos as discrepancias e o traballo dos colectivos que optan por non traballar coas institucións".

"Esta é unha lei que cambia vidas, igual que no seu momento a do matrimonio igualitario", sinala a presidenta de ALAS, quen recoñece que lle gustaría "confluír" na manifestación como noutros anos, mais evita ver as diferencias de criterio "como unha confrontación".

Na Coruña haberá dúas mobilizacións este ano polo Orgullo LGTBIQ+, pois colectivos como Amizando, Avante LGBT+, ErgoSum, Abrir Fenda e Acción Antifascista decidiron organizarse e convocan un Orgullo Rebelde, Orgullo Disidente para separarse dunha celebración que consideran que fica moi vinculada ás institucións.

Para Nós Mesmas este ano a reivindicación leva o lema Os dereitos humanos non se negocian, lexíslanse: Lai Integral Trans Xa! para a protección das persoas trans. "Queremos que a autodeterminación de xénero estea na lei e que ninguén teña que corroboralo como pasa agora", explica Raquel Cordeiro. Na asociación viguesa tamén fan fincapé na inserción laboral, en concreto, das mulleres trans, "porque son un dos colectivos máis desempregados que existen en España".

A diversidade nas aulas

Desde as aulas a Rede Educativa de Apoio LGBTIQ+ de Galicia traballa para incluír nos institutos "educación tanto en igualdade de xénero, en diversidade sexual e da identidade de xénero, como educación sexual". "Son tres piares fundamentais que teñen que entrar no sistema educativo de maneira urxente", di a coordinadora, Ana Ojea, profesora do IES Politécnico de Vigo.

"Está complicado, comezabamos espertar cun plan da Xunta para incorporar todas estas cuestións ás aulas, e coa pandemia sufrimos un parón total. Agora hai un ambiente enrarecido pola pandemia e a situación política que fai que sexa difícil traballar", explica Ojea.

O vindeiro luns encheremos as rúas da #Coruña de #Orgullo .

Marcharemos baixo o lema 📢 Os dereitos humanos non se negocian, lexíslanse: Lei trans integral xa! 🏳️‍⚧️

Para garantir un #Orgullo2021 responsable e cheo de 💜coidados, as entidades convocantes pregamos o uso da 😷 pic.twitter.com/z1jnNryzpa— ALAS A Coruña (@alasacoruna) June 21, 2021

Porén, a rapazada responde activa e positivamente ás iniciativas que lles permiten achegarse a esta realidade. "A receptividade é moi boa, agás contadas excepcións, daste conta de que é unha demanda que levan facendo case a berros desde hai anos e que si que o precisan", salienta a coordinadora da rede educativa LGBTIQ+, que leva pouco máis dun ano traballando nun contexto limitado polas restricións da COVID pero que non deixou de estar presente nas aulas con máis de 80 docentes involucrados. Por este labor, o Ministerio de Igualdad lle outorga un dos premios Reconocimiento Arcoíris ás boas prácticas de inclusión da diversidade sexual e de xénero no ámbito educativo.

Como profesora de 1º de Bacharelato, Ana Ojea ve que a "guerra cultural" creada arredor da lei trans afecta máis á xeración dos docentes que á xente máis nova. "As adolescentes e os adolescentes eu vexo que están un pouco descolgados desta historia e que non lles afecta demasiado. Non encontramos discursos TERF [acrónimo en inglés que significa feminista radical trans-excluínte] entre o alumnado. Quen discrimina e pode ter discursos de odio son máis ou menos os de sempre e as de sempre", salienta.

"Ata que punto afectan a ultradereita facendo forza en contra da diversidade de xénero e eses grupos autodenominados 'feministas', que están defendendo postulados idénticos? Pois afectan a calquera que incorpore ou confirme esas ideas", abonda Ana Ojea, quen critica que neste curso escolar se "cortaron todas as formacións para o profesorado en cuestións de diversidade e de xénero" mentres a Xunta mantivo outras actividades para docentes en liña.

En 1969, na revolta de Stonewall da que agromou esta celebración do Orgullo, "as mulleres trans racializadas foron as que deron máis a cara". Así o lembra Raquel Cordeiro, quen incide en que "pasaron xa 50 anos e seguen sen ter recoñecidos os seus dereitos". "Por iso a lei é unha reivindicación histórica para garantir os dereitos das persoas trans", engade Ana G. Fernández. Xunto ás reivindicacións, este ano os colectivos piden responsabilidade e seguridade ás asistentes: "O máis seguro e o máis coherente é que levemos as máscaras nas manifestacións".

Fonte: Praza Pública. | luns 28, xuño 2021

Foto: Imaxe de arquivo da celebración do Día do Orgullo na Coruña CC-BY-SA Galiza Contrainfo.

[*] Ana G. Liste @BelaMistura. Xornalista viguesa do 90. Traballei en Faro de Vigo, El País, Europa Press e Nós Diario. Vogal no Colexio Profesional de Xornalistas de Galicia e membro da asociación Xornalistas Galegas.

Baixo Licenza Creative Commons by-sa/3.0.
_______

xoves, maio 30, 2019

Orgullo Crítico 2019, Sábado 1 de Xuño na Praza Vella de Ferrol, desde as 5 da tarde - Debate, reflexión e creación de redes entre a comunidade LGBT da Galiza - Coa participación de Brigitte Vasallo, e comezando a noite coa actuación das Las Antonias e Nüca Live Set


Orgullo Crítico 2019
Sábado 1 de Xuño, na Praza Vella de Ferrol, desde as 5 da tarde.

Este ano queremos centrar as actividades do Orgullo no debate, na reflexión e na creación de redes entre a comunidade LGBT da Galiza. Comenzamos as xornadas cun coloquio entre organizacións LGBT do país e continuamos con Brigitte Vasallo, presentada por Crity Tojo de Lesbicas Creando que removerá as nosas mentes e corpos co seu discurso e forza.

Ás 20h faremos un pequeno descanso para comer e beber nos bares da Praza Vella, rematando as xornadas coa actuación das Las Antonias e Nüca Live Set.

Difunde e acude!!

#OrgulloCríticoFerrolterra

Evento
https://www.facebook.com/events/2334209723519549

Redes
Instagram | Facebook | Twitter

Info por:
@AvanteLGBT en Ferrolterra.
@AvanteLGTBFerrolterra
Asociación Galega LGBT, feminista e anticapitalista.
Contacta con nós!
avanteferrol@gmail.com
Enviado por:
Inácio GZ
-inaciogz@gmail.com-
30 de maio de 2019 01:08
__________

luns, xuño 19, 2017

O Día do Orgullo LGTBIQ e a Marcha Mundial das Mulleres - 28 de Xuño de 2017 - Queremos denunciar, que baixo un manto de maior visibilidade e aceptación, segue a esconderse a intolerancia e discriminación máis feroz


A Marcha Mundial das Mulleres celebra o Orgullo LGTBIQ

Un ano mais, dende a Marcha Mundial das Mulleres queremos apoiar o día do orgullo LGTBIQ. Sempre é preciso a reivindicación deste día, pero agora debemos facelo se cabe, con maior intensidade, xa que, no noso entorno, asistimos nestes anos a un aumento de agresións e LGTBIQ fobia. Queremos denunciar, que baixo un manto de maior visibilidade e aceptación, segue a esconderse a intolerancia e discriminación máis feroz. O Colectivo LGTBIQ continúa a ser acosado, invisibilizado, discriminado e rexeitado no ámbito laboral, nas escolas, nas institucións, nas rúas...e en todos os ámbitos da vida dunha persoa.

Conmemoramos neste día os disturbios de Stonewall, acontecidos no 1969 en Nova York, cando un grupo de lesbianas, gais, travestís e transxéneros alzaron a súa voz, fart@s de sufrir continuos abusos. Ao longo da historia repetíronse moitos Stonewall e agardamos ver o día en que non faga falla reivindicar algo tan de sentido común, como que todas as persoas somos diversas e diferentes mais debemos ter iguais dereitos e dignidade.

En moitos países segue a ser un delito que os teus afectos ou sexualidade non sigan as normas obrigadas polo heteropatriarcado e relixión. Así, moitas persoas son torturadas, apresadas, violadas ou asasinadas polo simple feito de expresar a súa sexualidade. Son moitas as normas escritas que legalizan e promoven a represión contra o colectivo LGTBIQ. Son moitas as mensaxes de odio que se difunden con total impunidade. Seguen a existir supostas clínicas onde se “curan” comportamentos denominados por estas como “desviados”. Son moitas as persoas que sofren todas estas violencias e humillación e somos cada vez máis as que queremos mudar esta inxustiza.

Parécenos que as escolas son unha ferramenta fundamental de transformación desta situación e dende as que debemos traballar valores igualitarios e integradores. Mais os continuos acosos que sofren menores nos colexios e institutos reflicten con grande crueza que neste ámbito non se está a educar axeitadamente na diversidade e no respecto as orientacións afectivo-sexuais e identidades de xénero das nen@s. Sendo un inferno para el@s un entorno que debería servir para reforzar a súa personalidade e formación. Por iso denunciamos reformas educativas que buscan unha maior presenza das relixións nas escolas e que promoven sociedades máis insolidarias e reaccionarias.

A loita contra a homofobia, lesbofobia, e transfobia debe extenderse  a todos os eidos da sociedade: educación, familia, política, medios de comunicación... para rematar coa terrible inxustiza de ver minguados os teus dereitos como persoa, ser rexeitad@ ou incluso agredid@ por algo propio da túa liberdade persoal. Reivindiquemos, pois, este día, como un día de loita, mais tamén, como un día de orgullo e dignificación da diversidade afectivo-sexual, das diferentes identidades de xénero e sexuais e da estrutura familiar escollida libremente.

Por todo isto, convidámoste a participar nas actividades organizadas pola Asociación Nós Mesmas en Vigo co gallo da celebración deste día e desfrutar de proxeccións, obradoiros, exposicións, música e poesía nos días do 19 ata o 28 de xuño. E tamén a participar coa Marcha Mundial das Mulleres o sábado 24 de xuño, na praza da Pedra de Vigo para elaborar un tapiz, coa imaxe representada no evento, sobre o chan con area, borra do café... etc.

Somos persoas divers@s, mais iguais en dereitos

'As mulleres decidimos'
Coordenadora Nacional Galega
Marcha Mundial das Mulheres
Marcha Mundial das Mulleres
Rúa Romil, 20, baixo
36202 Vigo-Galiza
Teléfonos de contacto:
Coord. A Coruña 639 78 76 26
Coord. Compostela:  647735737
Coord. Vigo: 630486886
Coord. Ourense: 652140217
Coord. Ferrolterra: 636 87 86 06
Comunicación:
http://www.feminismo.info
@MMMGaliza


Que é a Marcha ?
A Marcha Mundial das Mulleres é un movemento mundial de accións feministas que reúne grupos de mulleres e organizacións que actúan para eliminar as causas que orixinan a pobreza e a violencia contra as mulleres. Loitamos contra todas as formas de desigualdade e de discriminación sufridas polas mulleres. Os nosos valores e as nosas accións oriéntanse cara un cambio político, económico e social. Os mesmos que se articulan arredor da mundialización das solidariedades, a igualdade entre mulleres, entre mulleres e homes, e entre os pobos, o respecto e a valoración do liderado das mulleres e o fortalecemento das alianzas entre mulleres e cos outros movementos sociais progresistas.



Enviado por:
Marcha Mundial das Mulleres - Galiza
-marchagaliza@gmail.com-
19 de junho de 2017 09:41

____________

martes, xuño 28, 2016

"Todos os Desexos, Todos os dereitos!", con este lema, a Marcha Mundial das Mulleres organiza os actos deste Día Mundial do Orgullo LGTBI, hoxe martes 28 de Xuño, desde as 8 da tarde no Cantón de Ferrol


ACTOS 28 XUÑO DA MARCHA MUNDIAL DAS MULLERES DE FERROLTERRA

"... Os discursos de odio están no cerne do sistema capitalista, que os empega a vontade para os seus intereses económicos e de control social onde a disidencia é sempre perseguida, sobre todo aquela que desmonta as estruturas xerárquicas do patriarcado escollendo outros modelos de relación e vida, libres e diversos.

Estamos ante unha campaña permanente de invisibilización e criminalización: da unión entre a LGBTQIFobia e o racismo nacen discursos como o que hoxe espallan os grandes medios por todo o planeta, ou discursos que falan das agresións só cando se cometen en lugares nos que hai interese político en sinalar: ben polo control dos seus recursos, ben pola necesidade de exercer presión internacional para condicionar as políticas públicas..." | Detalle dun comunicado da Marcha cando a traxedia de Orlando [ir á Web].
A Coordinadora Comarcal de Ferrolterrra da Marcha Mundial das Mulleres chama a participar nos actos  para conmemorar o  dia do Orgullo LGTBI que terán lugar o martes 28 de Xuño Cantón de Ferrol ás 20:00h.

Neste 28 de xuño, a Marcha Mundial das Mulleres chama a reivindicar unha sexualidade libre de condicionamentos sociais e culturais, rachar co patriarcado e o heterosexismo que domina todos os ámbitos das nosas vidas. Convidan a participar no Acto para seguir denunciando a discriminación, a exclusión, a violencia, a invisibilidade, o acoso e o rexeitamento por unha parte da sociedade e institucións afíns ao heteropatriarcado, por amar dunha maneira diferente aos canones establecidos.

Mulleres en marcha ata que todas sexamos libres!!

"As mulleres decidimos"

Coordenadora Local de Ferrolterra da Marcha Mundial das Mulleres
mmmferrolterra@gmail.com | www.feminismo.info, tamén podes-nos atopar no Facebook e no Twitter.

Que é a Marcha ?
A Marcha Mundial das Mulleres é un movimento mundial de accións feministas que reúne grupos de mulleres e organizacións que actúan para eliminar as causas que orixinan a pobreza e a violencia contra as mulleres. Loitamos contra todas as formas de desigualdade e de discriminación sufridas polas mulleres. Os nosos valores e as nosas accións oriéntanse cara un cambio político, económico e social. Os mesmos que se articulan arredor da mundialización das solidariedades, a igualdade entre mulleres, entre mulleres e homes, e entre os pobos, o respecto e a valoración do liderazgo das mulleres e o fortalecemento das alianzas entre mulleres e cos outros movimentos sociais progresistas.

Información baseada na enviada por:
Marcha Mundial Ferrolterra
-mmmferrolterra@gmail.com-
22 de junho de 2016 23:16

___________________________