Rajoy anuncia brutais recortes e medidas antipopulares

O presidente do Goberno, Mariano Rajoy, debullou esta mañá no Congreso un amplo paquete de medidas con severos recortes para a clase obreira, en especial funcionarios, parados e dependentes e subidas de impostos para lograr un axuste de 65.000 millóns de euros nos próximos dous anos, segundo explicou o presidente. Este abanico de medidas representa o maior axuste desde o franquismo e cambiarán radicalmente o escenario económico e administrativo do país nos próximos anos. A elas súmanse os 27.000 millóns que incluían os orzamentos e as medidas adoptadas polo Goberno a finais de decembro. Tamén hai que considerar os máis de 18.000 millóns en diminución de gastos e subidas de ingresos postos en marcha polas comunidades autónomas. O anterior Executivo, liderado polo socialista José Luís Rodríguez Zapatero, xa recortou 15.000 millóns en dous anos.

Fontes do Goberno aseguran que estas medidas serán aprobadas no próximo Consello de Ministros, o venres, e que entrarán en vigor inmediatamente. A subida do IVE empezará a aplicarse "nos próximos días", indican desde fontes do Executivo. Para as compras xa realizadas, pero que aínda non se pagaron, será a data de emisión da factura a que fixe se se ve afectada polo aumento do imposto. As medidas que afectan aos funcionarios entrarán en vigor o luns.

Os Orzamentos de 2012 quedaron en papel mollado en menos de dúas semanas tras a batería de medidas avanzadas por Rajoy esta mañá. O Goberno levaba semanas estudando todas as posibilidades para recortar o gasto e subir impostos para equilibrar as contas públicas desbocadas “ata maio o déficit do Estado ascendía ao 3,41%, case todo o previsto para todo o ano”. Entre as medidas aprobadas hai un paquete de medidas que afecta á función pública. Rajoy anunciou que suprimirá a paga extraordinaria de Nadal para os funcionarios este ano. O presidente pediu que tamén sexa aplicada aos senadores e deputados. A medida suporá un aforro de preto de 5.000 millóns de euros.


Os funcionarios poderán recuperar parte desta paga a partir de 2015 pero non en metálico, senón a través dunha achega ao fondo de pensións. Está por determinar se esta medida de suspender a paga extra será aplicable tamén nos próximos dous anos.

O Goberno reducirá tamén os moscosos, os días de libre disposición, a pesar de que o ministro de Facenda asegurou o pasado luns que non se tocarían. Outra das medidas máis polémicas consiste na equiparación da situación de incapacidade temporal ás do resto de traballadores. Esta medida -segundo eles- serve tanto para reducir o gasto de persoal como para combater o absentismo dos traballadores públicos. Durante os primeiros días de baixa o Estado complementa o soldo dos traballadores ata o 100% do soldo a diferenza do sector privado que depende dos convenios de cada empresa.

O presidente tamén precisou que haberá un novo recorte nas partidas de gasto dos ministerios de 600 millóns de euros no que queda de 2012 para reducir subvencións, gastos correntes e transferencias. Ademais, avanzou que os Orzamentos de 2013 terán unha rebaixa do 20% na subvención para partidos políticos, sindicatos e organizacións empresariais que se engade ao recortado neste capítulo neste exercicio.

O Goberno tamén dá un forte machadazo ás prestacións sociais. “Racionalizarase o gasto no sistema de dependencia, revisando o baremo e as prestacións”. Ademais, suprimirá un gran número de bonificacións á contratación, salvo as relativas ao novo contrato para emprendedores ou a inserción laboral dos discapacitados.

Respecto das prestacións por desemprego, o Goberno rebaixa a contía da percepción por desemprego en 10 puntos a partir do sexto mes como desempregado: Os novos receptores verán reducida do 60% ao 50% da base reguladora. O presidente tamén avanzou que planea acelerar a aplicación de factor de sustentabilidade. É dicir, acelerarase o atraso da idade de xubilación e endurecerase o tratamento da xubilación anticipada.

No lado dos ingresos. Rajoy anunciou unha subida do IVE a pesar de que se opuxo ferreamente a adoptar esta decisión, e durante o goberno de Zapatero crearon unha polémica páxina web facendo campaña contra a subida do IVE que se prevía entón. Considera que subir este tributo cando cae o consumo detrae a economía. Finalmente, sobe o imposto. O tipo xeral pasa do 18% ao 21% e o tipo reducido do 8% ao 10%. Esta medida suporá un ingreso extra de máis de 6.000 millóns de euros, e empobrecer aínda máis á clase traballadora. A última subida do tributo, aprobada polo anterior goberno “socialista” en 2010 supuxo un ingreso extra de 5.500 millóns. O tipo reducido do IVE (10%) aplícase á maioría de produtos alimenticios, produtos sanitarios, transporte terrestre de viaxeiros e equipaxes e aéreo e marítimo e ao turismo en xeral que reclamara que non se subise o tributo. Tamén están suxeitos a este tipo reducido as entradas a espectáculos culturais (cines, teatros, circos, concertos, bibliotecas, museos, exposicións). Está por ver cando entra en vigor a medida e se finalmente haberá unha reforma na estrutura do imposto: é dicir pasar artigos gravados co tipo reducido (10%) ao tipo xeral (21%).

A subida dos impostos indirectos irá acompañado, segundo explicou o presidente, cunha rebaixa das cotizacións sociais de dous puntos ata 2014: un punto en 2013 e outro en 2014. Esta medida supón un alivio para os custos laborais dos empresarios que verán minorados os seus gastos.

Tamén se subirán os impostos vinculados co medioambiente -“quen contamina paga”, dixo Rajoy- e outros impostos indirectos como o do tabaco. O presidente avanzou unha nova medida sobre o imposto de Sociedades para modificar o pago fraccionado, a pesar de que nos orzamentos xerais presentados a finais de marzo xa se introduciron varias reformas sobre o tributo. Ademais, seguindo a recomendación da Comisión Europea o Goberno eliminará a dedución por compra de vivenda habitual a partir de 2013. Esta dedución no imposto sobre a renda supón unha carga para as arcas públicas do Estado de preto de 2.500 millóns. Pero como a medida non ten carácter retroactivo, non afecta aos que se beneficien xa dela só aos novos compradores, non terá un gran impacto nas contas públicas.

Respecto da reforma da Administración pública, o presidente do Goberno anunciou que reducirá un 30% o número de concelleiros dos Concellos en función dos tramos de poboación. Rajoy avanzou que nos próximos días presentará a reforma de racionalización e sustentabilidade da Administración local. “Delimitaranse competencias para solucionar o problema das competencias impropias para que os Concellos non poidan prestar servizos para os que non se contan co financiamento necesario e refórzase o papel das Deputacións co fin de centralizar a prestación de servizos”, indicou Rajoy, que cifra a medida en 3.500 millóns. No plan de estabilidade financeira 2012-2015 remitido polo Goberno a Bruxelas estima que a “racionalización do número de entidades locais e competencias impropias” suporía un aforro de preto doutros 10.500 millóns de euros. Ademais, o presidente manifestou que se reforzará o papel do interventor municipal e dos funcionarios con habilitación nacional. O Executivo tamén procederá a acelerar a eliminación de empresas públicas locais.

O presidente tamén aludiu ao esforzo que deben realizar as comunidades autónomas. E explicou que no Consello de Política Fiscal e Financeira que se celebra mañá as comunidades deberán aprobar o obxectivo de déficit para os dous próximos anos, examinarase o cumprimento dos plans de equilibrio -que conteñen axustes por 18.000 millóns para este ano- e poranse en marcha os hispanobonos, como popularmente se coñece ao mecanismo de asistencia financeira para que as comunidades poidan afrontar os vencementos da súa débeda bancaria e comercial. As comunidades que se acollan a esta medida terán que asumir novas condicións de consolidación fiscal (máis recortes e máis impostos) para as comunidades.

Rajoy precisou tamén que “levará a cabo un proceso de liberalización e, no seu caso, privatización dos servizos asociados ao transporte ferroviario, portuario e aeroportuario”. Fontes do Goberno explicaron que esta medida de levarse a cabo nas condicións previstas podería xerar un ingreso extra de 30.000 millóns de euros.

Para rematar, o presidente aludiu a un paquete regulatorio para avanzar na liberalización dos servizos profesionais e na clarificación da normativa para o sector enerxético que irá acompañado por un novo esquema de fiscalidade enerxética.

[Tirado de PRAVDA, traducido ao galego por FORXA!]

Fonte: http://revistaforxa.blogspot.com

Enviado por:
Forxa!! Construír o partido, preparar a revolución!!
-forxagz@gmail.com-
12 de julho de 2012 17:32
____________

NÓS-Unidade Popular, com o povo trabalhador galego e contra as constantes agressons do capitalismo espanhol

O papel de extorsom permanente que o Estado espanhol joga em relaçom à Galiza e ao seu povo trabalhador fica mais claro em tempos de crise como os que vivemos. A sucessom de medidas antipopulares, dirigidas a manter os privilégios dos mais poderosos frente aos direitos fundamentais da imensa maioria, situa os governos espanhóis (primeiro do PSOE, agora do PP) como ameaça permanente para a maioria social galega.

NÓS-Unidade Popular identifica-se com essa maioria agredida sobre a qual os verdadeiros donos do atual sistema capitalista, que nom som os governantes e sim quem os financia, estám a carregar os custos de umha crise provocada polo próprio capital como conseqüência dos limites desse modo de produçom e polo seu afám de manter os seus lucros a qualquer custo.

Dentro da sucessom de medidas regressivas contra o nosso povo que se venhem impondo desde que o PP chegou ao poder (como antes já começara a fazer o PSOE), ontem mesmo assistimos ao anúncio de algumhas dirigidas, novamente, contra os setores mais desprotegidos nesse regime espanhol de livre mercado capitalista.

A reduçom da proteçom dos desempregados e desempregadas, a importante subida do IVA e o corte nas ajudas da área de dependência representam, em primeiro lugar, um novo e flagrante incumprimento do programa eleitoral e das promessas do PP que, mais umha vez, demonstra que o valor da palavra dos políticos burgueses é igual a zero.

Porém, o mais importante é que essas medidas representam também umha reacionária conceçom política que se situa, claramente, do lado dos privilegiados, que socializa os custos da crise atual entre os mais pobres e que evita qualquer medida tendente a reduzir umhas desigualdades cada vez mais profundas. É o capitalismo neoliberal despido e em estado puro.

No caso do aumento do IVA, estima-se em 500 euros o custo imediato por família da subida anunciada, umha subida generalizada que nom distingue níveis de renda e que, portanto, é claramente discriminatória para as mais baixas.

Os desempregados e desempregadas perderám em torno de 1.800 euros nas prestaçons a partir do 6º mês, no que supom um roubo descarado de um dinheiro e de uns direitos resultantes das quotizaçons com que todas as trabalhadoras e trabalhadores garantíamos umha mínima cobertura aos que ficam sem emprego.

A todo o anterior, devemos acrescentar a supressom de umha das duas pagas e de dias de folga a que os funcionários e funcionárias públicas tenhem direito, que vem somar-se ao aumento de horas e às reduçons salarias de que venhem sendo alvo nos últimos anos.

Outras medidas incluídas na série apresentada ontem por Mariano Rajoi incidem na mesma linha e venhem confirmar que, como a porta-voz do executivo espanhol tinha anunciado pouco depois da vitória eleitoral, estamos só no “início do início”. Já daquela sabiam bem que as promessas eleitorais eram águas de bacalhau e que começava umha ofensiva planificada para desmentelar o chamado Estado de Providência ou Bem-Estar. Por trás desse objetivo nom está unicamente o governo de Rajoi: estám principalmente o grande capital espanhol e a troika (Comissom Europeia, Banco Central e Fundo Monetário Internacional).

É a esse desmantelamento planificado que assistimos, que conduzirá ao empobrecimento generalizado e ao endurecimento das condiçons de vida num capitalismo senil sem mais expetativas que manter os privilégios da classe dominante a qualquer preço. Depois do capítulo de ontem, virám outros, como já vimos e continuamos a ver na Grécia e Portugal.

Só umha mudança significativa na resposta coletiva dos setores afetados polas agressons do grande capital poderá deter a ofensiva a que fazemos referência. É preciso organizar sem pausa essa resposta em cada setor do movimento popular, a nível social, sindical, político… porque somos maioria e, organizados e organizadas, somos mais fortes.

A agudizaçom da luita de classes exige umha contraofensiva que vaia além da alternáncia eleitoral, que já se demonstrou como inútil. Nengumha das forças eleitorais reformistas empenhadas em humanizar o capitalismo som umha verdadeira alternativa ao atual sistema. Temos que avançar num projeto revolucionário, liderado pola classe trabalhadora, que derrube o atual regime e faga da Galiza umha República Socialista, soberana, realmente democrática, livre de capitalismo e de patriarcado.

É preciso construir amplas alianças de base com esse horizonte estratégico. Essa é a aposta em que NÓS-UP está empenhada.

Espanha é a nossa ruína!

Avante a luita contra o capitalismo e a crise!

Nem Espanha, nem Uniom Europeia, nem FMI!

Independência, socialismo e feminismo!

Direçom Nacional de NÓS-Unidade Popular

Galiza, 12 de julho de 2012


Correio-e: nacional@nosgaliza.org | nosup.imprensa@gmail.com | Telefones:
Porta-Vozes: 651 089 971 (Alberte Moço) 659 306 973 (Rebeca Bravo) | Responsável Nacional de Imprensa: 616 868 589 (Carlos Morais) | Responsável Nacional de Organizaçom: 669 778 474 (Bruno Lopes Teixeiro) | Sede Nacional: Rua Costa do Vedor 47, rés-do-chao. Compostela. Galiza | web: www.nosgaliza.org | twitter: @nosgaliza

Enviado por:
NÓS-Unidade Popular NÓS-UP
-nosup.imprensa@gmail.com-
12 de julho de 2012 17:07
_______________

Asembleas Abertas de Desempregad@s na comarca de Ferrol: os venres 13 e 20 de Xullo, no Inferniño e Freixeiro

A Asemblea de Desempregad@s da CIG (de Ferrol) ven desenvolvendo desde o pasado mes de xuño unha serie de asembleas abertas en distintos barrios e vilas: As Pontes, Fene e Ferrol (nos barrios de Caranza, Recimil e Santa Icía).

As dúas seguintes datas previstas, que pecharán esta primeira rolda ata despois do mes de agosto, son:

- Barrio do Inferniño (Ferrol): 13 de xullo, na pista deportiva da Praza do Inferniño.

- Barrio de Freixeiro (Narón): 20 de xullo, na Praza Álvaro Paradela.

Ambas ás 18:00 horas.

Cómpre sinalar que estas asembleas son abertas a todos os traballadores e traballadoras desempregadas, independentemente de cal sexa a súa filiación sindical, ou mesmo sen estar sindicados.

Do que se trata é de ir sumando forzas e crear un forte e amplo movemento de desempregad@s, que na comarca de Ferrol-Eume-Ortegal xa supera a cifra dos 20.000.

Tratase de canalizar a defensa das persoas desempregadas en forma de mobilizacións e propostas urxentes, mais que tamén sirva ao conxunto das clases traballadoras para dar resposta a asuntos como o mantemento de postos de traballo ou a mellora substancial das súas condicións laborais.

É moi importante traballar de forma conxunta (tanto desempregad@s como en activo) cara á convocatoria dunha gran folga xeral, e das que fagan falla, até derrubar todas as reformas antiobreiras e antipopulares que se están a acometer e que se acometerán.

Fonte: http://revistaforxa.blogspot.com

Enviado por:
Forxa!! Construír o partido, preparar a revolución!!
-forxagz@gmail.com-
12 de julho de 2012 17:32
____________

Esquerda Unida denuncia o trato discriminatorio que, en contra das disposicións legais vixentes, recibíu un matrimonio (formado por dúas mulleres) da comarca a instancias do Rexistro Civil de Ferrol

Comunicado do Consello comarcal de Esquerda Unida
Ferrol, xoves 12 de xullo de 2012

ALEAS-ESQUERDA UNIDA QUERE DENUNCIAR O TRATAMENTO DISCRIMINATORIO PROVOCADO NO REXISTRO CIVIL DE FERROL
OS DEREITOS DE CIDADANÍA SON PARA TODAS E TODOS, NON TEÑEN QUE VER COA OPCIÓN SEXUAL DE CADA QUEN
EU RECLAMA UNHA RECTIFICACIÓN FORMAL DO REXISTRO CIVIL DE XEITO QUE SITUACIÓNS SEMELLANTES NON SE VOLVAN PRODUCIR

Dende a Área de Liberdade de Expresión Afectivo-Sexual de Esquerda Unida queremos denunciar o trato discriminatorio que, en contra das disposicións legais vixentes, recibíu un matrimonio da comarca de Ferrolterra a instancias do Rexistro Civil de Ferrol.

O matrimonio formado por dúas mulleres da comarca, acudíu ao Rexistro Civil para inscribir aos seus fillos recén nacidos, cando se atoparon cunha serie de trabas impropias da súa situación legal. Para poder efectuar o rexistro indicóuselles un procedemento propio dunha parella non casada en matrimonio, o que non se corresponde co estado legal da parella. Posto que dende estas instancias se lles poñían unha serie de trabas optaron por acudir ao Rexistro Civil do concello do que procede unha das mulleres, Outeiro de Rei, onde segundo o establecido por Lei se permitíu o trámite sen obxeccións.

Estes feitos constitúen un caso flagrante de discriminación deste matrimonio entre persoas do mesmo sexo, en relación con calquera outro de distinto sexo, en contra do establecido legalmente a partires das reformas derivadas tanto da Lei 13/2005, de 1 de xullo, pola que se modifica o Código Civil en materia de dereito a contraer matrimonio, como da Lei 14/2006, de 26 de maio, sobre técnicas de reprodución humana asistida, que no Artigo 7.3. establece que “Cando unha muller estivese casada [...] con outra muller, esta última poderá manifestar fronte o Encargado do Rexistro Civil do domicilio conxugal, que consinte en que cando naza o fillo [...] se determine ao seu favor a filiación respecto ao nacido”.

Entendemos que estes feitos seguen a acontecer aínda hoxe por descoñecemento e desatención ás obrigas estabrecidas por Lei, polo que requerimos rectificación inmediata por parte da institución, así como se solicita se emprendan as accións precisas para que feitos coma este non volvan a acontecer nun futuro.

Esquerda Unida - Ferrol
Rúa do Sol 124 entrechán esquerda, Ferrol


eu-ferrolterra@esquerdaunida.org
eu-ferrolcomarca@esquerdaunida.org

facebook
http://www.esquerdaunida.org/ferrol.html
http://www.esquerdaunida.org/

Enviado por:
Ferrol Esquerda Unida
-eu-ferrolterra@esquerdaunida.org-
12 de julho de 2012 14:07
Prezadas/os amigas/os: achegamos un comunicado do Consello denunciando a discriminación padecida por unha parella no rexistro civil. Saúdos, Ramiro Marier
_______________

'Desobedecer a crise' é o título dunha moi interesante Editorial do Boletín nº21 de Coop57

Quinto ano de crise balbuceando a mesma linguaxe que os catro anteriores. Recortes e colapso, estancamento e empobrecemento, cabeza gacha ante os 'mercados' e, en consecuencia, récords históricos de endebedamento, de desigualdades e dos índices de paro. Salpimentados cinicamente con novos rescates bancarios millonarios abonados de novo con recursos públicos e o diñeiro de todas e todos. Mentres, á vez e por contra, provoca-se a peor ofensiva antisocial desde o final da ditadura: na inercia involutiva da economía de casino que todo o malogra.

Obsesionados neuroticamente polo déficit, cegados politicamente polo axuste permanente e submisos aos ditames duns mercados financeiros que ninguén escolleu, a crise segue golpeando e galopando. E segue-nos interpelando. Con toda crueza. Cinco anos atrás, o estalido da crise financeira parecía anunciar que se abriría un profundo debate para reformular a fondo a insostenibilidade económica, social e ambiental do desenvolvemento capitalista e que se anunciarían outros camiños. Un espellismo en toda regra: desde 2007, crónica maldita do gran saqueo, só se reforzaron as dinámicas máis perversas dun capitalismo xa senil. Nunha especie de doutrina do shock que pretende lanzar á papeleira da historia dereitos fundamentais irrenunciables, alicerces básicos da cohesión social e instrumentos imprescindibles para reverter a especulación e a recesión. E anuncien que é polo noso ben e que o fan por nós. No noso nome e, encima, co noso diñeiro.

Ruela sen saída ou libro aberto aínda, aquilo obvio é que desta crise sae-se. A inquietude é cando. O dilema é como. A pregunta é a que prezo. A resposta é por que camiño. A clave, baixo que modelo. Á grega? Á islandesa? Con fórmulas propias? Si ninguén nunca é neutral nun tren en marcha, desde Coop57 somos conscientes, anos ha, que o único territorio liberado do que dispoñemos para construír outro futuro é a vida cotiá. O hoxe e o aquí. Alí onde se demostra que outras formas de facer son posíbeis, o único lugar onde certificamos que si, que si podemos, que si que hai alternativas.

Sobre ese sólido firme da solidariedade que nos acolle, sobre as raíces fondas dos principios irrenunciábeis da democracia económica e social e desde a práctica e memoria acumulada polo cooperativismo, constatamos que hoxe é necesario comprometerse máis que nunca. E máis e mellor: para fortalecer as alternativas que xa funcionan, para consolidar os útiles dos que xa dispoñemos e para reforzar todas as redes sociais e comunitarias: as que xa son e as que virán.

Activos e activadas pola transformación social, na última asemblea xeral de Coop57 decidimos que unha das prioridades do 2012 sería, precisamente, o apoio á creación e mantemento da ocupación. Espremendo todas as posibilidades malia todas as dificultades, ante un contexto desbocado de crecemento da pobreza e de niveis máximos de desocupación e precariedades. O vento que nos axita a facelo, máis forte desde o Encontro 2011 celebrado en Outubro pasado, asubiar que para saír desta haberá que facelo con máis redes colectivas, con máis consolidación cooperativa e con máis, moita máis, implicación cidadá. Barrio a barrio e pobo a pobo, para poder avanzar cara a un sistema integral de finanzas éticas e solidarias.

Hoxe, semente da outra economía por vir, miles de persoas xa se comprometeron con outro modelo socioeconómico, están destinando o seu aforro a dinamizar a economía social e reactivar a economía social, están implicados con outra saída á crise. Con formas de consumo responsable e traballo cooperativo arraigadas á economía local, a innovación socioeconómica e o desenvolvemento comunitario. E é que a casa común do futuro xa a estamos construíndo. Niso estamos: as primeiras pedras dun vínculo social reforzado están postas fai anos. E si imos lentos é porque imos lonxe. E porque á parálise do non se pode facer nada? opoñemos claramente a ameaza do bo exemplo.

Sementa, rego e colleita, hoxe aínda é tempo de bater a terra. Non será o mercado quen resolverá as necesidades humanas. Non será o Estado, neste momento, quen erradique ou reduza as desigualdades sociais. E entre a teaza dun mercado toleado e un estado impotente, quedamos aínda nós e todo o potencial inexplorado do compromiso social e o apoio mutuo. Na metáfora dun equipo pequeno que xoga nun terreo hostil e adverso, pero que continúa ben disposto a seguir a partida. A cambiar de campo. A seguir labrando o futuro, sabendo que con pouco se pode facer moito e que, entre todas e todos, todo é posíbel.

Finalmente só gritan, sempre, para ver si nos calan. Pero entre a fraude e a esperanza aínda, no medio dunha sociedade mediatizada polo medo, as posibilidades e opcións dunha saída ética, solidaria e ecuánime á crise seguen sendo reais e urxentes, necesarias e posíbeis. Un novo paradigma vén incubándose fai tempo e xa está reproducíndose: a democracia económica e social, a grande descoñecida pola que andamos camiñando. Ninguén di que chegar será fácil. Nin mecánico nin automático: ningún cambio social o é. Dependerá de miles de xestos, de miles de microcoherencias, de miles de vontades agregadas. Cando todo segue empezando e acabando ao mesmo lugar: en nós mesmas.

Volver empezar de novo e outra vez, é a hora de desobedecer a saída á crise que nos pretenden impoñer. Escribía Fromm que "todo é posible porque hai persoas que se atreven a dicir non ao poder que sexa, en nome da súa conciencia; a evolución depende a capacidade da desobediencia". A economía, certamente, ou a facemos nós ou será feita contra nós. Ou a facemos cooperativa e de escala humana ou non será cooperativa. E hoxe, tras cinco anos de crises e fraudes, sobra dicir o obvio: que deixala en mans dos tabeiróns dos mercados financeiros e os seus xestores sería peor que unha irresponsabilidade colectiva. Sería unha suicidio.

Si o presente sempre é o vértice onde se cruzan pasado e futuro, percorremos incesantemente á memoria dun futuro anterior. No afastado 1809, na proclama da 'Junta Tuitiva de La Paz' (Bolivia) que proclamaba a independencia afirmaba-se: "gardamos un silencio demasiado parecido á estupidez". É tempo de non calar. De deconstuír todo silencio para saír da crise. E tal e como di a concorrida proclama do século XXI... esperade-nos, porque estamos chegando.

Boletín Informativo.
Número 21. Primavera 2012.
[Desobedecer a crise]
Boletín 211,9 Mb

Web oficial de COOP57:
http://www.coop57.coop





***
Grupo de Apoio ás Finanzas e Seguros Éticos da cooperativa Arméria

_______________

Que é a Banca Ética? - Vídeo

Vídeo realizado durante a celebración do I Asemblea Estatal de Fiare en Rivas-Vaciamadrid. 28 e 29 de Abril de 2012. Realizado pola súa base social para contarnos que é banca ética.

A idea e os principios da Banca Popolare Etica

A idea

A Banca Ética nace para poñer en práctica a idea dun banco colaborador como punto de encontro entre @s aforradores que comparten a esixencia dunha máis que consciente e responsable xestión do seu diñeiro e a iniciativa socio-económica que se inspira nos principios dun modelo de desenvolvemento humano e social sostíbel.

A Banca proponse xestionar as reservas financeiras de familias, mulleres, homes, organizacións, sociedades colectivas, en pleno respecto coa dignidade humana e co ambiente. Neste contexto, Banca Ética desenvolve unha función educativa respecto de @s aforradores e aos beneficiari@s do crédito, responsabilizando ao primeiro a coñecer o destino e a modalidade de uso do seu diñeiro e estimulando ao segundo a desenvolver con responsabilidade proxectiva a súa autonomía e capacidade empresarial.

A acción de Banca Ética non está dirixida a rexeitar as regras fundamentais das finanzas tradicionais, pero aspira máis ben a reformar os valores sobre os cales se fundan as finanzas.

Os principios

Os principios que levaron á creación de Banca Ética, e que diferencian e caracterizan a súa actividade cotiá, son recolleitos no artigo 5 dos Estatutos.

A Sociedade inspírase nos seguintes principios das Finanzas Éticas:

• As finanzas éticamente orientadas son sensíbeis ás consecuencias non económicas das accións económicas;
• o crédito, en todas as súas formas, é un dereito humano;
• a eficiencia e a sobriedade son compoñentes da responsabilidade ética;
• o beneficio obtido da posesión e intercambio de diñeiro debe ser consecuencia da actividade orientada ao ben común e debe ser equitativamente distribuído entre todos os suxeitos que interveñen á súa realización;
• a máxima transparencia de todas as operacións é un requisito fundamental de calquera actividade de finanzas éticas;
• favorecer a participación na toma de decisións da empresa, non só ás persoas socias, senón tamén ás aforradoras.
• a institución que acepta os principios das Finanzas Éticas orienta con tales criterios toda a súa actividade.

Web oficial da Banca Popolare Etica:
http://www.bancaetica.com/

Web oficial de Fiare:
http://www.proyectofiare.com/web/

Web oficial de Fiare Galiza:
http://fiaregz.wordpress.com/

Web oficial de Coop57:
http://www.coop57.coop/

Web oficial de consumo responsábel:
http://konsumoresponsable.coop/gl/


Enviado por:

Elena Casal Mera

12 de julho de 2012 15:13

___________

A Área Sanitaria de Ferrol, mobiliza-se convocando, a súa Xunta de Persoal, unha concentración protesta contra as novas agresións do dereitista Partido Popular contra a Clase Traballadora

Mañá venres día 13 de xullo de 2012, a Xunta de Persoal da ASF, convoca unha CONCENTRACIÓN PROTESTA, contra os novos recortes anunciados polo Goberno Español, onte en Madrid, na última sesión plenaria do Congreso dos Deputados, en formas de medidas chamadas de "axuste". Que non son outras que un ataque frontal contra o persoal das administracións públicas e desempregad@s, entre outras medidas de recortes sociais e aos dereitos democáticos. Que só amosan un grande desprezo ao pobo, por parte do partido gobernante, o dereitista PP, e o seu presidente Mariano Rajoy Brey.

Facemos un chamamento ao persoal da Área a concentrarse na ENTRADA DO HOSPITAL ARQUITECTO MARCIDE, o VENRES 13 DE XULLO AS 11.30hras, coincidindo coa celebración do Consello de Ministros.

Información baseada na enviada por:
CIG Saúde Ferrol
-cigsaudeferrol@gmail.com-
12 de julho de 2012 15:59
http://www.cig-saude.org/ferrol/
_______________

Francisco Jorquera, na súa intervención no Parlamento Español, pide e dimisión de Rajoy - vídeo

@jorqueracaselas pide a dimisión de Rajoy por ter convertido o Estado Español en Grecia 2

Francisco Jorquera, Deputado do BNG no Congreso, que interveu no debate onde o presidente do goberno anunciou os maiores recortes sociais e laborais da historia da democracia.


http://youtu.be/xIDIghpJgTw ________________

Comunicado dos Grupos de Teatro Afeccionado de Ferrol logo da Rolda de Prensa do pasado día 11 de xullo

A práctica totalidade dos Grupos de Teatro afeccionado de Ferrol: Max Teatro, Oquetiquiras (Grupo Bazán), Tremoia Teatro (A.C. Fuco Buxán), N+1, Crucía Teatro, O Maxolo, Amistade de Sta. Mariña, ASCM e Bartoleta Teatro (A. VV. Ensanche A), fixeron público onte en Rolda de Prensa, o seu total desencontro co Concelleiro de Cultura Sr. Reyes García Hurtado, e o seu rexeitamento a nova programación do ciclo “Domingos a Escena” que de xeito unilateral y arbitrario pretende levar adiante, e que estimamos pode acabar co Ciclo teatral afeccionado máis prestixioso de Galicia.

Os grupos de teatro agardan que o Concelleiro rectifique a súa decisión e caso contrario non participarán nas seguintes edicións de “Domingos a Escena”

Comunicado dos Grupos de Teatro Afeccionado de Ferrol

Despois de que, na Comisión de Cultura do 29-6-2012, se aprobaran as Bases para a participación no ciclo Domingos a Escena 2012 (segundo semestre), confírmase que, dende a Concellaría de Cultura, preténdese dar un xiro á organización do Ciclo de Teatro Afeccionado “Domingos a Escena”.

O Concellal, dunha forma unilateral e arbitraria e sen contar co colectivo de Grupos de Teatro Afeccionado de Ferrol, encárgalle a coordinación do Ciclo 2012-2013 ao grupo Ti e mais eu Teatro, que non ten boa relación con ningún do resto dos grupos, e cuias Bases non son válidas para cumprir os obxectivos que estaban marcados dende o primeiro Ciclo:

- Participación de todos os grupos de Ferrol

- Apoio aos grupos do resto de Ferrolterra

- E aproveitando o Circuito Cultural da Deputación da Coruña e dos Ciclos organizados pola FEGATEA (Federación Galega de Teatro Afeccionado) patrocinados pola Xunta de Galicia, enriquecer a programación coas mellores propostas do resto da Provincia e da comunidade galega.

Os grupos de teatro, abaixo asinantes, despois de varias reunións, acordamos o seguinte:

1.- Facer un chamamento á Concellaría para que reconsidere a súa decisión.

2.- No caso de que esa decisión non se reconsidere, estos grupos de teatro, acordaron por unanimidade, non participar non vindeiro ciclo de Domingos a Escena.

3.- Solicitar, novamente, unha entrevista co Alcalde (hai mais dun mes que se lle solicitou e non tivemos resposta) para transmitirlle as nosas inquedanzas.

4.- Estamos convencidos que estos cambios na organización poñen en peligro a continuidade, no futuro, do Ciclo de Teatro “Domingos a Escena” que dende hai 12 anos ben funcionando con un grande éxito de público e un recoñecimento, por parte de todos os grupos participantes, como o ciclo de teatro afeccionado mais importante de Galicia. 

Grupos asinantes:

MAX Teatro, BARTOLETA Teatro, OQUETIQUEIRAS Teatro, TREMOIA Teatro, Teatro N+1, CRUCÍA Teatro, O MAXOLO Teatro, Teatro AMISTADE e Teatro ASCM.

Ferrol a, 11 de Xullo de 2012 

Fonte: Batoleta Teatro www.bartoletaferrol.wordpress.com/

Represión en Madrid - O Ministro do Interior, Jorge Fernández Díaz, ordena cargar contra manifestantes en Madrid. Cargas policiais contra a marcha minera. Detencións e moitas persoas feridas - Vídeos actualizando-se

O Ministro do Interior, Jorge Fernández Díaz, ordena cargar contra manifestantes en Madrid. Cargas policiais contra a marcha minera. Detencións e moitas persoas feridas.

Watch live streaming video from spanishrevolutionsol at livestream.com

Fonte: http://www.tomalatele.tv/web/
_____________________________

Traballor despedido por ASFEDRO comeza unha folga de fame e unha acampada para protestar e denunciar os feitos acaecidos até a data de hoxe - Nota informativa para a cidadanía

Cheto Rico Prieto traballador de ASFEDRO (Asociación Ferrolana  de Drogodependencias) foi despedido no mes de setembro de 2011 argumentando motivos económicos; o despido foi demandado e a sentencia xudicial ditaminou a improcedencia do mesmo. Dous días despois de ser readmitido, foi novamente despedido (4 abril 2012).

Hoxe, como acción de protesta e denuncia de todos os feitos acaecidos ata hoxe comezou unha folga de fame indefinida e unha acampada diante do Edificio Administrativo da Xunta de Galiza en Ferrol. Desde CIG Saúde amosamos a nosa máxima solidariedade co traballador.

Nota Informativa para a cidadanía

En meses anteriores celebráronse dous xuizos por despedimento de dous profesionais traballadoras/es de ASFEDRO. En ambos casos as sentenzas dictaminaron a improcedencia dos despedimentos. Estes dous profesionais foron readmitidos, unha profesional continúa a día de hoxe en ASFEDRO e curiosamente o outro profesional que foi readmitido o 2 de abril e despedido novamente con data do día 4 de abril.

A CIG denunciamos os despedimentos fai meses e hoxe novamente voltamos a mobilizarnos para reivindicar, informar e denunciar estes feitos. É o noso desexo dar a coñecer á sociedade: A Xunta Directiva argumenta repetidamente que trata de fomentar e potenciar a prevención en drogodependencias, mais non sabemos que se fixo estes últimos 3 anos, pois estes traballadores/as despedidas/os non tiveron prácticamente ninguna tarefa, sufrindo actos hostís por parte da Xunta Directiva como represalia as súas lexítimas demandas, solicitando una maior transparencia nas contas da entidade, no emprego do diñeiro publico e de respeto dos seus dereitos profesionais e laborais. Parece claro, que a Xunta Directiva de Asfedro non está polo labor de corrixir as liñas de actuación que está a desenvolver, respecto a este despedimento que non se sustenta no recorte de orzamentos...

Esiximos e debemos velar pola transparencia na xestión dunha entidade que presta servizos sociosanitarios con cartos públicos, que debería cumplir escrupulosamente coas súas propias normas estatutarias, co gallo de democratizar as decisións da asociación a través da participación asamblearia dos seus socios e socias; xestionando as situacións conflictivas e evitando o gasto de cartos públicos, en asesoramento xurídico, para despedimentos que respostan a políticas represivas e non a motivos económicos. Unha vez máis, pedimos a aclaración destas cuestión esixindo a obrigada transparencia na xestión da entidade a nivel de servizos e investimento de cartos públicos, coa publicidade debida ‐dunha necesaria Auditoría‐ aos entes públicos que subvencionan a entidade e a tódolos socios e socias da mesma.

Por todo o anteriromente reflectido.... nos facemos e lles facemos unha serie de preguntas á cidadanía:

Coñece vostede o que está a acontecer con algún/algunha dos/as traballadoras/es de ASFEDRO?

Sabe vostede, que os motivos económicos non son a razón pola que se producen os despedimentos?

Ten vostede, como cidadán, información do uso que se fai dos cartos (máis de 1.000.000  €anuais) que a entidade recibe de fondos públicos?

Sabe vostede si a calidade dos servizos prestados, pola entidade, se veu mermada e si esta merma, estivo fundamentada polos recortes ou pola mala xestión e falla de profesionalidade?

Sabe vostede que as actividades, que realizaban as dúas persoas, que foronobxeto de despido estaban subcontratadas a unha empresa privada (SERVISOL)? E a merma que poido sufrir a calidade do servizo por este motivo? Sabe si a subcontratación coa empresa privada segue existindo  a día de hoxe?

Sabe vostede que experiencia e titulacións profesionais se esixen nesta empresa privada? Sabe que experiencia ten esta empresa privada en prevención e tratamento das drogodependencias? Sabe si teñen máis experiencia que o profesional despedido con 24 anos de traballo en ASFEDRO?

Sabe vostede que entre traballadores hay unha diferencia de salarios de hasta 25.000 €?

CIG SAÚDE.
11 de xullo de 2012.


Noticias relacionadas:

• Mobilizacións polos compañeiros despedidos en ASFEDRO
• Concentración diante dos xulgados en apoio aos traballadores despedidos en ASFEDRO
• Continúan as mobilizacións polos despedimentos en ASFEDRO
• Primeira concentración en apoio ás traballadoras/es despedidos en ASFEDRO
• Concentracións en protesta polos despedimentos en ASFEDRO
• CIG Saúde cos traballadores/as de ASFEDRO

Noticia enviada por CIG Saúde Ferrol: www.cig-saude.org/ferrol
___________

Entrevista do Comité Cidadán de Emerxencia co Fiscal de Mediambiente

O Comité Cidadán de Emerxencia, dentro das actividades emprendidas tras a sentenza do Tribunal Supremo, para instar as distintas instancias oficiais a tomar posicionamento cara ao cese de actividades da Planta de Gas de Reganosa, mantivo o día de onte unha reunión co Fiscal de Medioambiente de Galicia, Don Álvaro García Ortíz.

Nesta reunión, como nas mantidas ate agora cos Grupos BNG e PSdG-PSOE, no Parlamento de Galicia, o CCE fixo unha exposición do seu traballo na última década, contra a corrupción e a ilegalidade que sustentan a Planta  e das accións que considera precisas para rematar con esta ameaza real e mal gasto de recursos públicos, pechando as instalacións e depurando responsabilidades.

PASO A PASO, PLANTA DE GAS FÓRA DA RÍA
--

Comité Cidadán de Emerxencia
para a Ría de Ferrol
comitecidadan@gmail.com
www.comitecidadan.org


Documentos:

RECURSO CASACIÓN Num.: 451212008 SENTENZA TRIBUNAL SUPREMO | SALA DO CONTENCIOSO·ADMINISTRATIVO SECCIÓN: QUINTA 11.05.2012

T.S.X.GALICIA A CORUÑA SENTENZA: 00311/2008 - COH/AD SEC.2 22.04.2008

Enlace para acceder ou baixar o Cartaz da VI Marcha a Pé entre Ferrol e Mugardos, formato -pdf: |Ir ao Cartaz|
 
Información baseada na enviada polo:
Comité Cidadán de Emerxencia
-comitecidadan@gmail.com-
11 de julho de 2012 09:05
______________

#AmbSyriza. Entrevista a Stavros Karagkounis, 9 de xullo de 2012 - Vídeo da Entrevista - Vídeo da palestra no @ateneu_roig

O 6 de maio de 2012 unha coalición de partidos de esquerda baixo o nome de Syriza sorprendeu a Europa enteira, ao converterse na segunda forza política máis votada nas eleccións legislativas gregas, forzando a convocatoria de novas eleccións.

O electorado castigara duramente aos partidos favorables ao memorándum imposto pola UE, o BCE e o FMI, cuxas políticas de axuste terán graves consecuencias para o nivel de vida da gran maioría do pobo grego.

Nas segundas eleccións do 24 de xuño Syriza mellorou aínda máis os seus resultados, quedando só a pouco máis de 3 puntos da vitoria. Lonxe de ser un fracaso, os resultados proporcionan unha esperanza aos pobos ameazados polo capitalismo salvaxe que representa a Troika.

Stavros Karagkounis é membro de Syriza e está de visita en Catalunya estes días. Preguntámoslle sobre as claves do éxito do seu partido e si ve posíbel estender o fenómeno de Syriza a outros países europeos.



Unha reportaxe de oscar martínez (@racos1871). Con licenza Creative Commons. Recoñecemento - NoComercial (by-nc): Permítese a xeración de obres derivadas sempre que non se faga un uso comercial. Tampouco se pode utilizar a obra orixinal con finalidades comerciais.

Publicado en 10.07.2012 por photooscar

Enviado por:
Oscar Martínez
11 de julho de 2012 08:31

Palestra con Stavros Karagkounis, de Syriza, no @ateneu_roig

Fonte: http://quiendebe.blogspot.com.es/
__________

Ataque frontal do goberno español contra a Clase Traballadora - Vídeo da intervención de Rajoy no Congreso 11.07.2012

O presidente do goberno español, Mariano Rajoy Brey, do dereitista Partido Popular -PP, na comparecencia ante o Parlamento Español, que se está desenvolvendo no transcurso desta mañá -11 de Xullo de 2012- no Congreso dos Deputados, despois dun relatorio de como está a situación económica -á que nos levaron eles (Os gatos Brancos, Negros e Rosados da fábula 'Parlamento de Ratos' (Mouseland) de Tommy Douglas, os banqueiros, corruptos e especuladores de toda caste, anunciou unha batería de medidas do chamado "axuste", en parte consecuencia, din, dos acordos do Consello Europeo, do pasado cume de Bruxelas, que ataca a liña de flotación do constitucional chamado "Estado Social e de Dereito", dixo que non eran "agradables", mais si "imprescindíbeis". Pretenden recortar no "Estado Social" máis de 65.000 millóns de euros en dous anos e medio. Despois das medidas que xa levamos soportando, repagos, recortes, desmantelamentos, privatizacións, e nos últimos días o desmantelamento do sistema de axudas á dependencia. Sendo sempre as persoas máis pobres as afectadas. O goberno dereitista Tamén vai recortar en democracia, ao propor eliminar o 30% dos concelleir@s.

Segundo as axencias de noticias, as medidas, concretan-se en:

• Modificación da prestación por desemprego: seguirá durando un máximo de 24 meses, e manterase o importe actual durante os primeiros seis meses. Pero a partir de entón, e co obxectivo teórico de "animar á procura activa de traballo", os que se sumen á cola do paro verán minguada o seu prestación a partir do sexto mes do 60% ao 50% da base reguladora.
• Subida do IVA, con carácter inmediato, de tres puntos no tipo xeral (do 18% ao 21%). O tipo reducido crecerá do 8% ao 10%. Mantense o máis reducido, para os alimentos de primeira necesidade, no 4%.
• Aceleración da entrada en vigor da reforma do sistema de pensións (retiro aos 67 anos) e da xubilación anticipada.
• Subida dos impostos do tabaco.
• Introdución da fiscalidade medio ambiental, baixo o principio, dixo, de "quen contamina, paga".
• Rajoy anunciou unha "revisión integral da función pública" que realmente esconde un empeoramiento profundo das condicións dos funcionarios. Reduciráselles o número de días de libre disposición, axustarase" o número de liberados sindicais segundo o previsto na lei, se "equipararán condicións de incapacidade ás do resto de traballadores", facilitarase a súa "mobilidade". Pero ademais quitaráselles a paga extra de Nadal polo menos até 2015 (a partir de entón, compensaráselles como achega de fondo de pensións). Tamén deixarán de cobrar esa extra os altos cargos, segundo aclararon despois fontes do Executivo.
• O "esforzo" pedido aos funcionarios será "compartido" por altos cargos da Administración central, da autonómica e local, e tamén por "deputados e senadores". Anticípase así xa un novo recorte dos seus soldos.
• Reduciranse xa no que queda de 2012 os créditos a subvencións, gastos correntes e transferencias. Pero o ano próximo, as axudas a partidos, empresas e sindicatos mermarán un 20% máis, cando xa neste exercicio decreceran na mesma cantidade. O corte no gasto ministerial en 2012 será de 600 millóns de euros.
• O presidente así mesmo sinalou que baixará as cotizacións un punto en 2013 e outro adicional en 2014 (Na parte que lle corresponde pagar á empresa por cada persoa empregada), á vez que eliminará a desgravación por vivenda a partir de 2013
• Recortarase nun 30% o número de concelleiros. Aplicarase unha "drástica redución" ou eliminación directa das empresas e fundacións públicas no ámbito local para evitar "duplicacións ou triplicaciones de servizos".
• Leis de unidade de mercado e de flexibilización dos horarios comerciais.
• Privatización de Renfe, portos e aeroportos.

A "Revolución Liberal" en marcha, concretada, principalmente, nas políticas neoliberais e promovida por toda a dereita occidental, está dando pasos de xigante contra a Clase Traballadora, dinamitando os chamados "estados do benestar", con privatizacións masivas e desmantelamentos de todo o público, incluídas a sanidade e a educación.

Ao mesmo tempo que se anunciaban estas medidas comezaba a matinal Marcha Mineira por Madrid, despois da exitosa marcha nocturna desta madrugada, onde miles de persoas percorreron as rúas da capital do, polo de agora, Reino de España. A manifestación partiu de Colón e transcorre camiño ao Ministerio de Industria, onde esixirán que se paralicen os recortes de 450 millóns de euros no plan de axudas ao carbón, unha rebaixa do 63% cuxa anticipación a 2012 supuxo o inicio do conflito e que pon en perigo a propia existencia dos numerosos pobos das comarcas mineiras.

Xa soan berros de goberno dimisión e Folga Xeral !


__________________

Multitudinario recebimento en Madrid á Marcha Negra - Noite do 10 e madrugada do 11 de Xullo de 2012 - Hoxe Concentración, en Ferrol, en Solidariedade coa Loita Mineira - Vídeos

Multitudinario recebimento en Madrid á Marcha Negra< ... 10 e 11 de Xullo de 2012

Hoxe en Ferrol Acto de Solidariedade coa Loita Mineira,
na Praza do Imno Galego de Esteiro, ás 9 da noite

Persoas pertencentes ás asociacións Fuco Buxán, Colectivo Sociocultural A Revolta de Trasancos e Colectivo Ártabra 21, nun encontro espontáneo, valoraron que era necesario que na nosa comarca se convocara algún acto de solidariedade coa loita dos mineiros de Asturias, León e Aragón. Polo que acordan, mediante este correo, convocar a unha asemblea-concentración aberta, a todas as organizacións e persoas que queiran mostrar a súa solidariedade e recadar axuda económica para a caixa de resistencia da loita mineira.

Asemblea-Concentración Aberta

o vindeiro mércores día 11 de Xullo, ás 21:00 hs,

na Praza do Himno Galego do barrio de Esteiro,

coincidindo coa mobilización en Madrid das columnas mineiras que estiveron marchando a pé no transcurso desta semana.

_________________________

Entrevista do Comité Cidadán de Emerxencia co grupo parlamentario do PSdG-PSOE no Parlamento de Galicia

Xuntanza dunha representación do CCE co Grupo Parlamentario do PSdG-PSOE no Parlamento de Galicia o dia 10 de Xullo de 2012

A xuntanza celebrase despois da petición cursada polo Comité Cidadán de Emerxencia a todos os grupos do Parlamento de Galicia, tras a Sentenza inapelable do Tribunal Supremo que anulou a modificación do PXOM de Mugardos que serviu de base para a construción da planta de gas de Reganosa.

Asistiron a reunión: polo Grupo do PsdG-PSOE as deputadas Beatriz Sestayo Doce e Carmen Gallego Calvar e o deputado José Luis Méndez Romeu, e polo CCE, Luz Marina Torrente López, Manuel A. Rguez. Carballeira, Eliseo Zaera Rios e Humberto Fidalgo Couce.

Por parte do CCE, fíxose unha exposición do percorrido administrativo, xudicial e mobilizador ata esta sentenza do Supremo, lembrando o carácter perigoso da planta de Reganosa, unha ameaza para miles de persoas, que acelera a destrución do ecosistema da Ría, sendo ademais unha instalación deficitaria que nos custou, no ano 2011, perto de 58 millóns de euros. Tamén se puxeron en coñecemento do PSdG-PSOE, as actividades irregulares de Reganosa coa carga e descarga de GNL, as novas agresións á Ría, como o dragado da canle de entrada, ou o numero de dias baixo mínimos da planta durante o 2011.

Tendo en conta que a ilegalidade da planta de Reganosa e insubsanable, o CCE recabou unha actuación decidida e coherente do Grupo Parlamentario do PSdG-PSOE o través das seguintes iniciativas parlamentarias:

• Solicitar do Goberno da Xunta de Galicia, o axeitado cumprimento da sentenza do Supremo
• Abrir unha Comisión de investigación sobre a actividade de Reganosa.

--

Comité Cidadán de Emerxencia
para a Ría de Ferrol
comitecidadan@gmail.com
www.comitecidadan.org


Documentos:

RECURSO CASACIÓN Num.: 451212008 SENTENZA TRIBUNAL SUPREMO | SALA DO CONTENCIOSO·ADMINISTRATIVO SECCIÓN: QUINTA 11.05.2012

T.S.X.GALICIA A CORUÑA SENTENZA: 00311/2008 - COH/AD SEC.2 22.04.2008

Enlace para acceder ou baixar o Cartaz da VI Marcha a Pé entre Ferrol e Mugardos, formato -pdf: |Ir ao Cartaz|
 
Información baseada na enviada polo:
Comité Cidadán de Emerxencia
-comitecidadan@gmail.com-
10 de julho de 2012 23:32
______________

Homenaxe nacional ás vítimas da represión franquista 2012 - Domingo 15 de Xullo na Illa de San Simón

Nas vésperas da infausta data do 18 de xullo temos outra vez a oportunidade de lembrar ás vítimas da represión franquista na Galiza nun acto nacional a celebrar na illa de San Simón. Desta volta a intención é poñer a mirada nas novas xeracións da memoria. Descendentes de vítimas mais tamén mozos e mozas quen sen ter un vencello familiar se achegan a memoria como un xeito de comprender o presente que se lle legou.

Os actos celebraranse o domingo 15 de xullo na Illa de San Simón. Comezará coa presentación do proxecto documental “A pegada dos avós” no auditorio e a actuación musical de Samuel Acuña e Elena Romero. Logo de visitar as instalacións da outrora Colonia Penitenciaria farase unha ofrenda floral e solta de pombas no cemiterio, coas intervencións de Pablo Iglesias Núñez (Fillo de Mercedes Núñez, internada no campo de exterminio nazi de Ravensbruck e representante para Galiza de Amical de Mauthausen), Valentín García Bóveda (Neto de Alexandre Bóveda e Secretario da Fundación que leva o seu nome) e Ana Aller (Neta de Enrique Gómez, fuxido e asasinado no 1937).

Fonte: Iniciativa Galega pola Memoria www.igmemoria.org

Qué é a Iniciativa Galega pola Memoria?

A Iniciativa Galega pola Memoria non é unha nova entidade nin ten unha estrutura propia senón que simplemente é o punto de encontro das diferentes asociacións, fundacións, colectivos e persoas que están a traballar pola recuperación da memoria histórica na Galiza, e atopan neste espazo un lugar no que poder sumar esforzos por aqueles obxectivos que son comúns a todas estas organizacións.

A primeira xuntanza como tal prodúcese con motivo da elaboración da chamada lei da memoria histórica co fin de facer unha proposta conxunta, e presentase dito manifesto o 13 de abril de 2007 na sala circular do auditorio de Galiza de Santiago de Compostela.

Celebrouse unha actividade conxunta en solidariedade cos investigadores que estaban a ser xulgados e perseguidos por levar a cabo o seu labor de rescate da memoria secuestrada. As xornadas chamáronse "O dereito a saber, a liberdade de investigar", e tiveron lugar en O Grove o 19 a 22 de setembro de 2007.

Desde aquela as diferentes entidades memorialistas teñen coincidido asinando propostas conxuntas até que finalmente o 12 de xuño de 2010, nunha xuntanza para dar resposta ao anuncio do cambio de usos da Illa de San Simón, acordase formalizar este lugar de encontro co fin de canalizar a comunicación e coordinación entre os diferentes colectivos memorialistas para defender uns obxectivos comúns que se definirían nun manifesto que logo do debate entre as diferentes asociacións, unha vez acordada a adhesión a el, se presentaría a opinión pública o 18 de xullo de 2010 na homenaxe ás vítimas do franquismo na Illa de San Simón.

Manifesto da Iniciativa Galega pola Memoria:

DECLARACIÓN DE PRINCIPIOS DA INICIATIVA GALEGA POLA MEMORIA

1. Condena do franquismo, que foi declarado en decembro de 1946 pola ONU como un réxime criminal.
2. Recoñecemento explícito da resistencia antifranquista e de todas as persoas que loitaron pola liberdade.
3. Declaración da nulidade dos xuízos franquistas, de todos os procesamentos, sentenzas, expedientes, condenas e sancións, tanto durante a Guerra Civil como na posterior Ditadura, ate a aprobación da Constitución española no ano 1978.
4. Aplicación do dereito internacional sobre as vítimas da represión franquista, incompatible con calquera mecanismo de impunidade: imprescriptibilidade, dereito a saber, dereito á xustiza, dereito á reparación.
5. Consideración dos crimes do franquismo como delitos contra a humanidade.
6. Obrigatoriedade para todas as administracións (central, autonómica e local) de retirar dos espazos públicos os símbolos franquistas e as referencias ás persoas relacionadas coa Ditadura.
7. Apoio á conservación e potenciamento dos arquivos da memoria, tanto públicos como de partidos, sindicatos, fundacións e outras entidades.
8. Instar á Administración a que apoie aos familiares das vítimas da represión na procura de información, presentación de reclamacións, etc.
9. Intervención pública das distintas administracións nos labores de localización, identificación das foxas de enterramentos das vítimas do franquismo e, no seu caso, exhumación, divulgando os resultados; elaboración dun protocolo de actuación científica multidisciplinar.
10. Revisión dos currículos escolares, fomentando e apoiando a elaboración de materiais didácticos sobre o período republicano, a sublevación militar fascista, a Ditadura e a resistencia antifranquista.
11. Regulación da apoloxía do franquismo como delito e prohibición de toda exaltación do mesmo.
12. Anulación, seguindo a recomendación da Comisión de Dereitos Humanos da ONU datada o 30/10/2008, da Lei de Amnistía do ano 1977.

En base á devandita declaración de principios, os colectivos acordan presentar as seguintes reivindicacións á Xunta de Galicia:

a) Completar o Proxecto xa iniciado pola Consellería de Cultura denominado “As Vítimas, Os Nomes, As Voces, Os Lugares” relativo á represión franquista en Galicia, coa publicación dos seus resultados, conservando o 100% do seu financiamento.

b) Elaboración por parte do Parlamento Galego dunha Lei para a creación dun Centro da Memoria de carácter público, cuxa finalidade sexa a investigación, a documentación e a divulgación da memoria da represión franquista no noso país, así como a promoción de políticas públicas de memoria .

c) Elaboración dunha Lei específica galega, como xa teñen outras comunidades, sobre ás vítimas da represión franquista, que amplíe os dereitos recoñecidos pola lei estatal.

d) Potenciamento de toda a infraestrutura (oficinas) de atención ás vítimas do franquismo, así como facilitar as xestións para solicitar as axudas e recoñecemento que contempla a lei da Memoria Histórica.

e) En aplicación da Lei da Memoria Histórica, elaboración pola Xunta dun catálogo de todas as rúas de Galicia relacionadas co franquismo, así como monumentos, estatuas, escudos, etc. de exaltación da Ditadura e do levantamento militar de 1936, establecendo un plan para a súa eliminación.

f). Continuidade do Convenio coa Universidade de Santiago e o Instituto de Medicina Legal de Galicia para a exhumación das vítimas da represión franquista. Aplicación da Lei aprobada pola Xunta sobre as foxas. Sinatura do convenio de colaboración co Estado para a localización e exhumación das vítimas, que xa foi cumprimentado por varias comunidades autónomas.

g) Apertura inmediata ao público do Pazo de Meirás e aplicación das sancións correspondentes no caso de que a familia Franco continúe coa súa política dilatoria. Que a Xunta realice xestións para a recuperación do Pazo para o patrimonio público.

h) Promoción por parte da Xunta da investigación para a recuperación da Memoria Histórica, así como o fomento da axuda e colaboración para actividades e iniciativas promovidas por entidades, asociacións e institucións sobre o recoñecemento das vítimas da represión franquista.

i) Consolidar a Illa de San Simón como Lugar de Memoria de especial significación na historia de Galicia e como tal debe ser sinalizado, patrimonializado e promovido. Isto concrétase en:

- Respectar a musealización xa acometida na Illa en lembranza da Colonia Penitenciaria, incluíndo a exposición, as placas de homenaxe e as distintas propostas estéticas xa realizadas.

- Potenciar a Illa como espazo para a realización de actividades relacionadas coa recuperación da memoria histórica, facilitando as visitas de grupos promovidas polas asociacións memorialísticas.

- Levar a cabo o Centro Documental sobre a Memoria da Colonia Penitenciaría da Illa de San Simón, incorporando a documentación histórica depositada en malas condicións no Centro Penitenciario de A Lama.

- Facilitar a realización do acto que, dende o ano 2006, vén celebrándose o 18 de Xullo na Illa como homenaxe nacional ás vítimas do franquismo en Galicia.

Illa de San Simón, a 18 de Xullo de 2010

Rajoy e a desigualdade ... por Pablo Vaamonde

As medidas adoptadas polo goberno para afrontar a crise converteron a España no país da eurozona con maiores desigualdades de renda. Así o afirma Fernando Salgado nun artigo (La Voz, 01-07-12): “o custe da recesión recae sobre o lombo dos traballadores asalariados e das capas máis humildes da sociedade”. Somos campións de Europa no fútbol mais tamén somos os primeiros noutra clasificación: España é o país da zona euro con maior distancia entre os máis ricos e os máis pobres, o máis desigual dos 17 países que comparten moeda única.  

Este país está nunha situación económica moi delicada. Con 5.6 millóns de parados e case dous millóns de fogares con todos os seus membros sen traballo as familias teñen que botar man dos aforros para afrontar os gastos correntes: o consumo familiar xa supera, por primeira vez, á renda. Máis dramática é a situación dos mozos: o 52 % dos menores de 25 anos non teñen traballo, a mesma porcentaxe que en Grecia. 

Na vez de mirar para o norte de Europa estamos a seguir a senda de EEUU que ten, segundo Joseph Stiglitz, o nivel de desigualdade máis alta de calquera dos países avanzados. Afirma que na actualidade o soño americano é un mito e “hai unha clara tendencia á concentración de ingresos e riqueza na cima, ao valeiramento das capas medias e a un severo aumento da pobreza”. Recorda que, nos anos 2009 e 2010, o 1% dos estadounidenses con maiores ingresos quedouse co 93% do aumento da renda. Ademáis, durante a recesión, os banqueiros, que arruinaron aos pobres mediante préstamos predatorios e prácticas abusivas e levaron a economía mundial e as propias empresas á ruína, recibiron xenerosas bonificacións. 

Vicenç Navarro entende que cando son os moi ricos os que deciden como se utiliza a riqueza, a sociedade ten  problemas graves, porque non invirten para crear emprego senon para conseguir máis diñeiro, “e como se poden sacar máis cartos das actividades especulativas que das inversións productivas resulta que se crea moi pouco emprego”. Quen debe guiar a utilización da riqueza, evitando os seus usos non sociais, é a cidadanía a través do Estado. Cando o capital estivo regulado e as diferenzas de renda eran menores que agora (1945-1980) o benestar social medrou máis que no período neoliberal (1980-2011), no que o capital puido facer o que quixo. A actual crise é o resultado.

Por eso Stiglitz cuestiona a peculiar “teoría do derramo”, moi extendida nos anos noventa, a cal  defende que enriquecer aos de arriba redunda en beneficio de todos. Segundo esta teoría os bos resultados macroeconómicos favorecen en primeiro lugar aos máis ricos para, posteriormente, ir derramándose ao resto da sociedade. A realidade en América Latina, nos EEUU e agora no sur de Europa demostra ben ás claras que o crecemento económico, por sí só, non mellora as condicións de toda a sociedade senon que mesmo pode afondar nas desigualdades.  

Estas teorías, que son difundidas como verdades científicas, pretenden xustificar o inxustificable: a acumulación obscena da riqueza en poucas mans, a explotación dos traballadores e dos pobres e o saqueo das arcas públicas coa complicidade de certa clase política. Estas aseveracións non son froito da ciencia senon da ideoloxía. O que hai detrás é un xeito de entender a vida, as relacións entre as persoas e organización social. Porque hai unha facción da sociedade situada ideolóxicamente nun momento histórico previo á revolución francesa (“liberté, egalité, fraternité”) que defende a desigualdade dos seres humanos. Teñen nostalxia daqueles tempos en que a sociedade estaba perfectamente clasificada: amos e criados, señores e servos, poderosos e súbditos.

 

Os franquistas Luis Moure Mariño e Gonzalo Fernández de la Mora defenderon a súa posición supremacista, que negaba a igualdade entre as persoas, en dous libros publicados nos anos oitenta (“La desigualdad humana”, “La envidia igualitaria”). Mariano Rajoy (un mozo de trinta anos  que comezaba a súa carreira política) publicou dous artigos en El Faro de Vigo (1983 e 1984), nos que reseñaba eloxiosamente estes textos. Lonxe da ambiguedade na que se instalou máis tarde aquí deixa ben clara a súa interpretación do mundo e revela as liñas mestras do seu ideario. Son as mesmas ideas que inspiran agora a súa actuación política. No primeiro dos artigos o actual presidente do goberno afirma textualmente:

“Este libro constituye una prueba irrefutable de la falsedad de la afirmación de que todos los hombres son iguales (…) La estirpe determina al hombre y es un hecho objetivo que los hijos de ´buena estirpe` superan a los demás (…). La desigualdad natural del hombre viene escrita en el código genético (…). La búsqueda de la desigualdad tiene múltiples manifestaciones: en el ansia de ganar, en la lucha por el poder, en la disputa por la obtención de premios, honores, condecoraciones, títulos nobiliarios (…). Todo ello constituye la demostración matemática de que el hombre no se conforma con su realidad. Es la lucha por desigualarse. Todos los modelos que predican la igualdad (…) son radicalmente contrarios a la esencia misma del hombre, y suprimen el natural instinto a desigualarse, que es el que ha enriquecido al mundo y elevado el nivel de vida de los pueblos (…) La imposición de la igualdad privaría a los más capaces de esa iniciativa más provechosa para todos que la igualdad en la miseria, que es la única que hasta la fecha han logrado imponer”. 

Pablo Vaamonde: Nado na Baña en 1956. É médico de familia no Centro de Saúde de Labañou (A Coruña). Foi fundador e director da revista médica Cadernos de Atención Primaria (1994-2005), presidente da Asociación Galega de Medicina Familiar e Comunitaria (AGAMFEC) de 1996 a 2005 e vicepresidente do Colexio Oficial de Médicos de A Coruña e responsable do Programa de Formación Continuada de 1998 a 2005. Foi director xeral de Asistencia Sanitaria do Sergas entre 2005 e 2006. Tamén foi membro da Comisión Sectorial de Sanidade que elaborou o Plan Xeral de Normalización da Lingua Galega, colaborador habitual dos medios e autor de tres libros de narrativa: O fillo do emigrante (2002), O mes de abril (2004), Luz Divina e outros retratos (2006). Recibiu o Premio Lois Peña Novo en 2005, polo seu compromiso na promoción e defensa da língua de Galicia e é colexiado de Honra con Emblema de Prata (2007) do Colexio Oficial de Médicos da provincia de A Coruña

Verdegaia Ferrol denuncia un novo recheo ilegal na zona ferrolá de Papoi

COMUNICADO DE PRENSA: Verdegaia denuncia un novo recheo ilegal na zona ferrolá de Papoi.

Os terreos afectados forman parte dunha braña do Regato de S. Xurxo.

Solicita o cese dos vertidos e a reposición do terreo afectado ao seu estado natural.

O núcleo comarcal da asociación ecoloxista Verdegaia informa que ven de interpoñer unha nova denuncia ante o Servizo de Conservación da Natureza da Xunta de Galicia, o Concello de Ferrol e Augas de Galicia pola execución ilegal dun novo recheo nunha braña do Regato de San Xurxo no lugar de Papoi, parroquia de Marmancón, Concello de Ferrol, destinado tradicionalmente á sega de herba pola sua alta hidromorfía. No mes de marzo do pasado ano xa se denunciou outro recheo ilegal nas inmediacións deste,  cuxo propietario do predio foi sancionado requeríndolle, ademáis, a retirada dos materiais sen resultado satisfactorio pois, a día de hoxe, continúan no mesmo lugar.

O recheo está a ser efectuado pola empresa “Excavaciones Migasa. S.L.” e segundo nos confirmaron no departamento de urbanismo do Concello de Ferrol existe unha solicitude para efectuar os recheos que actualmente está en fase de tramitación, pendente de varios informes da Xunta de Galicia, mais todavia sen outorgarlle autorización. Non obstante a empresa procedeu ao recheo da braña a sabendas de carecer a correspondente licenza.

A zona afectada está calificada polo Plan Xeral de Ordeamento Municipal de Ferrol coa Ordenanza 21 de conservación e protección das zonas de cultivo, da paisaxe agrícola e das riveiras fluviais (art. 152). De acordo con esta Ordenanza “Cando existan zonas naturais pantanosas, xuncais, brañas e calquera outro elemento que forme parte do sistema húmido, ditos elementos consideraranse incorporados á ribeira fluvial e as zonas de policía mediranse desde a liña de contacto de ditas zonas cos terreos agrícolas colindantes”.Polo tanto, a braña afectada forma parte do D.P.H. e non da Zona de Policía como nun principio se podería pensar pois, debido ás enchentes do regato, con frecuencia o terreo afectado queda asulagado pola auga; por este motivo procédese, neste caso ilegalmente, ao recheo da braña para darlle outros usos alleos á sega tradicional.

O artigo 234 do Regulamento de Augas proíbe, con carácter xeral “(…) Acumular residuos sólidos, escombros o sustancias, cualquiera que sea su naturaleza y el lugar en que se depositen, que constituyan o puedan constituir un peligro de contaminación de las aguas o de degradación de su entorno (…)”.

Por outra banda, o val fluvial do Regato de San Xurxo foi proposto por Verdegaia ante a Xunta de Galicia como espazo a integrar na Rede Natura 2000, ao albergar hábitats naturais de interese comunitario como, por exemplo, Fragas aluviais de Alnus glutinosa (Cod. 91E0*) ou Prados húmidos de herbas altas do Molinion-Holoschoenion (Cod. 6520), entre outros.

Á marxe das sancións que teñan lugar, desde Verdegaia solicitamos que se denegue a posibilidade de legalizar o recheo por feitos consumados e se lle dea prioridade á reposición do terreo ao seu estado natural. Asimesmo, demandamos dos organismos públicos competentes (Concello de Ferrol, Xunta de Galicia,…) que extreme a vixiancia nas zonas ambientalmente sensibeis do concello co obxecto de evitar este tipo de agresións, así como a denegación de calquera solicitude de recheo neste tipo de ámbitos de carácter hidromorfo.

http://www.verdegaia.org/

ferrol@verdegaia.org

Enviado por:
Verdegaia-Ferrol
-ferrol@verdegaia.org-
10 de julho de 2012 11:52
_____________