O Concello abre o prazo de preinscripción para a primeira Escola Infantil Municipal de Ferrol

• A edil Beatriz Sestayo destaca que permitirá avanzar na aposta do Concello pola conciliación de traballo e familia
• As familias interesadas en inscribir aos nenos poderán solicitalo no Edificio Social, dende mañá e durante todo maio
• A infraestructura, ubicada no barrio de Caranza, nace do convenio de colaboración entre Concello e Xunta de Galicia

Ferrol, 29 de abril de 2009.-

Todas as familias interesadas poderán, dende mañá, realizar os trámites de preinscripción na primeira Escola Infantil Municipal de Ferrol que, emprazada no barrio de Caranza, abrirá as súas portas o vindeiro curso escolar. Así o anunciou esta mañá a concelleira de Benestar Social, Xuventude, Muller e Solidariedade, Beatriz Sestayo. Deste xeito, a edil detallou que será o Equipo Municipal de Infancia e Familia (Emifa), creado polo actual goberno municipal para a atención en exclusiva desta área, o encargado de xestionar as peticións de preinscripción e información no Edificio Social (rúa Sánchez Barcáiztegui). O prazo se inicia mañá e se manterá durante todo o mes de maio.

Nesta liña, Beatriz Sestayo lembrou que a posta en marcha da primeira Escola Infantil Municipal de Ferrol é unha aposta clara do Concello pola conciliación da vida familiar e laboral que nace dun ambicioso convenio suscrito hai un ano entre a institución local e a Xunta de Galicia. Ao respecto, lembrou que as obras de acondicionamento hoxe en marcha, orzamentadas en 313.320 euros e financiadas pola administración autonómica, se iniciaron tras a cesión do edificio de titularidade municipal situado no CEIP Manuel Masdías con fronte á rúa Masaia. Dirixido a nenos de cero a tres anos, conta con 41 prazas.

Así mesmo, a concelleira apuntou que o Concello determinará coa nova Xunta, na comisión paritaria establecida no convenio de colaboración, os criterios de concesión das prazas. Non será o único punto a analizar e, preguntada pola segunda escola infantil incluída no acordo, Sestayo reiterou que o Concello mantén o ofrecemento da parcela ubicada en Esteiro para a súa construcción. En todo caso e preguntada por si o cambio na Xunta porá en perigo esta ou outra infraestructura social, a concelleira asegurou que o goberno local non permitirá que a Administración autonómica incumpla os compromisos asumidos e firmados coa cidade. Unha cuestión que non presupón da actual Xunta, pero que garantirá a través do seu traballo como concelleira e deputada autonómica.

Saúdos; Gabinete de Comunicación
___________________