domingo, febreiro 05, 2023

Tiveron lugar en Pontevedra as Xornadas Temos Alternativas: Eólica Así Non ! - Tecer un modelo enerxético alternativo fronte ao espolio da especulación das macro-eléctricas


Xornadas Temos Alternativas

Esta fin de semana tiveron lugar no Pazo da Cultura de Pontevedra as Xornadas Temos Alternativas organizadas pola Coordinadora Eólica Así Non á que pertence Ortegal di Non.

As xornadas xurdiron para poder reforzar o tecido creado polas plataformas que se están levantando ao longo do territorio galego, como ferramenta e intercambio de coñecementos onde profesionais de distintos ámbitos intentaron dar luz sobre este cambio de modelo enerxético e onde se deron alternativas ao mesmo.

Os 28 poñentes que colaboraron trataron a situación actual enerxética, a eólica mariña e hidroeléctricas, o contexto xurídico-legal, o autoconsumo e comunidades enerxéticas e ata as alternativas enerxéticas no mundo entre outros temas.

O conxunto dos máis de 200 asistentes considera que estas xornadas foron un éxito rotundo e felicitan á organización por un evento tan necesario dado o panorama actual onde as plataformas e asociacións sentimos que a administración favorece os lobis das enerxéticas e o sentimento de indefensión e cada vez máis latente na cidadanía.

Programa das Xornadas | Baixar/Acceder.




Luka, Ortegal di Non

Enviado por:
Ortegal Di Non
-ortegaldinon@gmail.com-
5 de fevereiro de 2023 às 20:52

_______

Lembrando a Carmelo Teixeiro, quen fora o primeiro Coordinador do Comité Cidadán de Emerxencia para a Ría de Ferrol e de todas as compañeiras e compañeiros que nos acompañaron nestes 22 anos de actividade en defensa da nosa Ría, contra o despropósito gasista de Reganosa


Ofrendas florais en Parque Carmelo Teixeiro

O 15º aniversario do pasamento de Carmelo Teixeiro, Coordinador deste Comité Cidadán de Emerxencia.

O Concello de Ferrol lembrou o 15º aniversario do falecemento de Carmelo Teixeiro, cunha ofrenda floral, no parque de Caranza que leva o seu nome.

PARQUE CARMELO TEIXEIRO MENÉNDEZ (Mugardos 1937 – Ferrol 2008). O Excmo. Concello de Ferrol en sesión plenaria do 26.02.2009, acordóu nomear este espazo público na memoria deste activista social, sindical e político, que foi Coordinador do Comité Cidadán de Emerxencia para a Ría de Ferrol, polo seu labor na transición, a súa implicación sindical, a defensa das liberdades e da nosa ría e a súa coherencia na loita polos principios democráticos. 8 de xuño de 2018. Memoria de Ferrol”.

O Comité Cidadán de Emerxencia para a Ría de Ferrol, depositou hoxe unha ofrenda floral no Parque Carmelo Teixeiro de Caranza, en memoria de quen fora o primeiro Coordinador deste Comité e de todas as compañeiras e compañeiros que nos acompañaron nestes 22 anos de actividade en defensa da nosa Ría, da legalidade e da vida das persoas que habitan na súa contorna, sempre coa ameaza presente dunha Planta de Gas no centro dela, que, a pesar dos permisos que unhas administracións cómplices lle conceden, segue incumprindo todas as normas de seguridade segundo demostraron as cinco sentenzas xudiciais en contra dela.

Hoxe cúmprense 15 anos do pasamento de Carmelo pero lembramos tamén a:

José Gabeiras - presidente de honra do Comité Cidadán in aeternum (Xaneiro de 2005), Xaime Quessada autor do mural contra a imposición de Reganosa, mural que agora se expón no Auditorio Municipal de Ferrol (Decembro de 2007), Santiago Torrente 'Tito' (Marzo de 2009), Tino Deibe autor do logotipo do Comité (Maio de 2010), José Luís Estévez Barros 'Seli' (Decembro de 2011), Regino Varela (Xullo de 2014), Victoria Fernández Paredes, (compañeira de Carmelo, falecida o 8 de novembro de 2014), Ramón Capotillo (Febreiro de 2015), Luís Matalobos (Outubro de 2015), Julio Videira (Xuño de 2016), Joaquín Cupeiro (Decembro de 2016), Julio Pico (Xuño de 2017), Bernardo Bastida, (Xaneiro de 2018), Emilio Romero "Milín" (Marzo- 2018), Mel Sanxoán (Abril de 2018), José Luis Rodríguez Pardo (Xuño de 2018), Helena Sánchez (Novembro de 2018), Pepe Leira (Outubro de 2019), Ricardo González Costas "Cardín" (Xaneiro de 2020), Víctor Agulló López (11 de Xullo de 2021),  Eugenio Pereiro Couce (4 de novembro de 2021), Marichy Cuadrado Caruncho (14 de xaneiro de 2022) e Antonio Dopico Carro (23 de xaneiro de 2022).

Todas e todos sempre na nosa memoria!

Enviado por:
Comité Cidadan de Emerxencia
-comitecidadan@gmail.com-
5 de fevereiro de 2023 às 17:1

_______

Nova plantación de Betula, a asociación para a custodia do bosque atlántico das comarcas, desta vez en Montefaro, sobre unha parcela en custodia que foi deseucaliptizada


O vindeiro o sábado 11 de febreiro en Montefaro, Betula, a asociación para a custodia do bosque atlántico, realizará unha primeira fase de plantación de 50 arbores, principalmente carballos. Trátase dunha finca en custodia que foi deseucaliptizada o ano pasado e van comezar a plantar especies autóctonas.

O terreo e chan e non ten ningunha dificultade para acceder a él polo que é apto para tódalas idades e condicións físicas.

Lembramos a importancia do VOLUNTARIADO para a transformación destas zonas degradadas; os traballos de limpeza, deseucaliptización, plantación de autóctonas… requiren de man de obra de xente extraordinaria. ANÍMATE!!

Non dubidedes en formar parte desta loita, agora máis que nunca FAITE SOCIO E COLABORA!!

Para mais información e para confirmar asistencia, CONFIRMADE POR CORREO:

custodia.betula@gmail.com

Na actualidade custodian-se 142.712 m² en propiedade e 2.725.586 m² en convenio: Visor.

O ano 2022 rematou coa adquisición dun total de 13.983 m2 repartidos en diferentes localizacións principalmente nos concellos de Ares e Monfero.

Mais a cousa non remata aquí xa que neste 2023 xa contamos con 1.703 m2 de novo terreo en propiedade na zona de Montefaro en Ares.

Todas as parcelas cumpren cos requisitos de seren zonas degradadas cun alto valor medioambiental, cultural e paisaxístico.

As terras de Ares localízanse principalmente na zona de A Bailadora e do Mosteiro de Santa Catalina de Montefaro, situado na parroquia de Cervás.

O BOSQUE SOMOS NOS

http://www.betula-atlantico.eu

Info baseada na enviada por:
Asociación Custodia Bosque Atlántico BETULA
-custodia.betula@gmail.com-
4 de fevereiro de 2023 às 22:50

_______

sábado, febreiro 04, 2023

Este domingo 5 de febreiro lembramos ás compañeiras e compañeiros que finaron no transcurso da loita contra a Planta de Gas de Mugardos - Cumpre-se o quince cabodano da morte de Carmelo Teixeiro


Este domingo 5 de febreiro lembramos ás compañeiras e compañeiros que finaron no transcurso da loita contra a Planta de Gas de Mugardos.

Cumpre-se o quince cabodano da morte de Carmelo Teixeiro. Ao redor desta data é cando lembramos a todas as persoas que, como Carmelo, participaron na loita contra o despropósito gasista de Reganosa, na defensa da Ría, da seguridade e da vida das miles de persoas que moran na súa contorna.

Imos a depositar unha flores, este domingo ás 11:30 hs, no monumento á lembranza de Carmelo Teixeiro, no Parque de Caranza que leva o seu nome, nas inmediacións da Ermida.

Cada vez que arriba un buque LNG, normalmente son buques de grande porte próximos aos 290 metros de eslora, para descargar as decenas de miles de toneladas de gas natural licuado na regasificadora de Mugardos, perante 24 horas, aumenta de xeito exponencial, o xa de por si perigo que ten a Planta de Gas, instalada no corazón da nosa Ría. Un potencial perigo, para todas as miles de persoas que moramos na súa contorna. Unha planta de gas que Reganosa construíu na ribeira sur da nosa Ría, a poucos metros dos núcleos de poboación, empobrecendo-a aínda máis do que estaba e poñendo en perigo a seguridade e a vida das miles de persoas que moramos na súa contorna.

Para máis perigo esta planta regasificadora está á beira dun complexo industrial petroquímico que almacena centos de miles de metros cúbicos de fluídos tóxicos, propiedade dos socios promotores e maioritarios da planta de gas e que agora conforma xa un holding transnacional da enerxía (Reganosa Holdco) que xunto á transnacional nipona (Sojitz Corporation) son os propietarios da regasificadora.

Mais o aumento do potencial perigo para a poboación que mora na contorna da Ría de Ferrol non remata aí, a voraz ambición do grupo que controla Reganosa (Grupo Tojeiro) que pretende engadir (baixo a etiqueta de "verde", para facer-se con parte dos fondos europeos do NextGenerationEU), unha planta de fabricación de metanol no complexo petroquímico de Punta Promontorio.

Este 5 de Febreiro, cumpren-se 15 anos (2008) do falecemento do noso ben querido compañeiro Carmelo Teixeiro, primeiro Coordinador do Comité Cidadán de Emerxencia para a Ría de Ferrol. Como xa mencionamos, desde entón ao redor desta data, é cando lembramos a todas as persoas que como Carmelo participaban na loita contra o despropósito gasista.

Despois de que o goberno cedera ante Reganosa, concedendo os permisos de construción e funcionamento, aínda que estes chegaran despois de máis de 17 anos de ter comezado a súa construción e 13 desde a entrada en funcionamento. Todo un proceso cheo de irregularidades, onde se alegan feitos consumados, aínda que fora transgredindo toda a lexislación medioambiental en referencia a súa localización próxima a núcleos de poboación consolidados. Foron responsábeis políticos, funcionarios, tribunais, xornalistas e medios, ... os que se implicaron na fraude, para "legalizar" o despropósito gasista. Abrindo unha nova etapa na loita, despois de cinco sentenzas do Tribunal Supremo en contra da regasificadora de Mugardos.

Reganosa é unha ameaza para a vida humana e o medio ambiente e pode chegar a converterse nunha enorme traxedia, no caso dun accidente na Planta ou no gaseiro. Nesta localización, dentro da Ría, con 40.000 habitantes ao redor, non hai Plan de Emerxencia capaz de facer fronte a catástrofe que provocaría, contiguo como está ademais ao Complexo Petroquímico.

O Comité Cidadán de Emerxencia para a Ría de Ferrol dende o ano 2000, en ausencia e sen amparo das administracións, veuse na obriga de defender a Vida, a Ría e a Legalidade ameazadas pola construción da Planta de Gas de Reganosa. Foron cinco ás sentenzas do Tribunal Supremo que confirmaron que Reganosa está baseada nunha flagrante ilegalidade e non cumpre coa normativa esixida para a construción deste tipo de instalacións. Sentenzas que anulaban a falsa tramitación ambiental que fixo Reganosa ou mesmo o cambio de usos dos terreos nos que se construíu a Planta; a modificación do Plan Xeral de Ordenación de Mugardos, feita polo Concello, que serviu para que se instalara a Planta; ou a resolución do goberno de Mariano Rajoy que eximía a Reganosa de ter que someter-se a avaliación de declaración ambiental (DIA)...  Mais agora a administración, baixo o goberno progresista se lle aprobou a DIA e se lle concedeu os permisos de construción e funcionamento. De todos os xeitos, fronte a este desprósito, o Comité Cidadán para a Ría de Ferrol ten presentado, unha vez máis, recursos contra estes novos permisos.

A regasificadora entrou ilegalmente en funcionamento o 4 de maio de 2007; como ilegais tamén foron as entradas na Ría dos gaseiros que abasteceron, durante anos á planta; irregulares os permisos concedidos tanto de construción e funcionamento; todo o mundo sabía que non cumpría a Lei no asunto fundamental da localización ao non respectar-se a distancia de 2000 metros que marcaba a Lei, ate que en 2013 a Xunta de Galicia elaborou unha Lei á medida de Reganosa...

Estamos diante do maior fraude cometido no noso país coa escusa de que o gas é estratéxico para Galiza.

INMEMORIAM

Ademais de Carmelo, lembramos a: José Gabeiras - presidente de honra do Comité Cidadán in aeternum (Xaneiro de 2005), Xaime Quessada autor do mural contra a imposición de Reganosa, mural que agora se expón no Auditorio Municipal de Ferrol (Decembro de 2007), Santiago Torrente 'Tito' (Marzo de 2009), Tino Deibe autor do logotipo do Comité (Maio de 2010), José Luís Estévez Barros 'Seli' (Decembro de 2011), Regino Varela (Xullo de 2014), Victoria Fernández Paredes, (compañeira de Carmelo, falecida o 8 de novembro de 2014), Ramón Capotillo (Febreiro de 2015), Luís Matalobos (Outubro de 2015), Julio Videira (Xuño de 2016), Joaquín Cupeiro (Decembro de 2016), Julio Pico (Xuño de 2017), Bernardo Bastida, (Xaneiro de 2018), Emilio Romero "Milín" (Marzo- 2018), Mel Sanxoán (Abril de 2018), José Luis Rodríguez Pardo (Xuño de 2018), Helena Sánchez (Novembro de 2018), Pepe Leira (Outubro de 2019), Ricardo González Costas "Cardín" (Xaneiro de 2020), Víctor Agulló López (11 de Xullo de 2021),  Eugenio Pereiro Couce (4 de novembro de 2021), Marichy Cuadrado Caruncho (14 de xaneiro de 2022) e Antonio Dopico Carro (23 de xaneiro de 2022).

Desde Ártabra 21 seguimos apoiando a loita do Comité Cidadán de Emerxencia.

Comité Cidadán de Emerxencia para a Ría de Ferrol
comitecidadan@gmail.com
www.comitecidadan.org
@ComitCEmerxenc


_______

venres, febreiro 03, 2023

Podemos e a crise de goberno do PSOE ferrolán pola dimisión de Teresa Deus - Borja San Ramón lamenta a 'inestabilidade' do goberno local, e pide ao alcalde 'pensar a longo prazo'


Borja San Ramón (Podemos) lamenta a “inestabilidade” do goberno local, e pide ao alcalde “pensar a longo prazo”

Borja San Ramón, candidato á alcaldía de Ferrol por Podemos Ferrol, lamentou que a dimisión da concelleira María Teresa Deus na “recta final” do mandato “abre unha crise de goberno que Ferrol non se pode permitir”. O candidato reclamou ao alcalde reconfigurar o seu equipo “coa maior présa posible”, xa que ao seu xuízo “hai temas que precisan solucións urxentes”. As tarefas de Teresa Deus como concelleira de Economía, Facenda e Patrimonio, así como Recursos Humanos, Emprego o Promoción Económica son de tal peso dentro do Concello que dende a formación morada non entenden como o señor Mato non foi quen de manter a cohesión que precisa o goberno da cidade. Cuestións coma “a biblioteca municipal de Ferrol, ou o estado das instalacións deportivas, son problemáticas nas que as solucións non poden estar paralizadas”.

San Ramón considera que “a brevidade e a visión curtoplacista e partidista dos gobernos locais forman un círculo vicioso que pesa sobre Ferrol dende hai décadas”. Neste senso, fixo un “chamamento ás forzas progresistas a pensar entre todas un proxecto de cidade, deixando o lado intereses de partido, e sobre ese acordo, artellar un goberno amplo que garanta estabilidade e normalidade política sen sobresaltos”.

Ferrol, 2 de Febreiro de 2023

Aitor Cordero
Comunicación Podemos Ferrol
contacto@ferrol.podemos.info

https://www.facebook.com/PodemosFerrolOficial/

Enviado por:
Podemos Ferrol
-contacto@ferrol.podemos.info-
2 de fevereiro de 2023 às 17:04

_______

Hoxe venres 3 de febreiro, comeza o Ciclo de Cultura Democrática 'Cóntamo Ti', coa presencia dos exalcaldes de Ferrol: Manuel Couce, Xaime Bello, Juan Juncal e Vicente Irisarri - Ás 7 da tarde no Centro Cívico de Canido


CANIDO LANZA O CICLO DE CULTURA DEMOCRÁTICA “CÓNTAMO TI”

Coa colaboración das xornalistas Rebeca Collado, Marta Corral, María Luaces,
Araceli Pita e Alicia Seone.

En abril de 2019 a Asociación Veciñal de Canido organizaba un encontro con 8 candidatos á Alcaldía, baixo a metodoloxía “Pecha Kucha”, no que cada opción política expuxo o seu proxecto en 20 imaxes x 20 segundos, tendo tan só un total de 6 minutos 40 segundos para a exposición. Esta sesión tivo moito éxito en canto á participación numerosa dun público moi plural. Se ben, este método resultou moi ríxido para os candidatos, que apenas tiveron tempo para defender o seu programa.
Hoxe, as entidades residentes no Centro Cívico de Canido (AV Canido, ASC Muíño do Vento e Rádio Filispim) presentan un novo ciclo de 6 xornadas, no que pretenden dar a coñecer os candidatos ás Eleccións Locais, baixo un formato moito máis próximo e amable, con conversas que durarán 1 ½ hora.

O obxectivo deste ciclo é profundar sobre temáticas de interese para o barrio e a cidade, coñecer aos candidatos a Alcaldía e os seus programas concretos de actuación.

Inténtase achegar á veciñanza información valiosa sobre diversos aspectos das políticas públicas locais que tan presentes están no día a día, corrixindo certa desafección pola vida comunitaria. Neste sentido, chama a atención que Ferrol é unha localidade cunha alta porcentaxe de voto en branco, con gran fragmentación e polarización social, con cambios de goberno constantes, gobernos en minoría e unha falta de visión estratéxica, de futuro. Esta carencia de políticas públicas a longo prazo é aínda máis ameazante nun territorio que posúe uns indicadores socioeconómicos ligados a altas taxas de desemprego, pobreza e avellentamento da poboación. Ferrol precisa de altas doses de deliberación a de acordos en asuntos clave que excedan os períodos temporais dos 4 anos de mandato.

É así como nace o ciclo CÓNTAMO TI #ISTONONÉUNMITN, que dará inicio o próximo venres 3 de febreiro ás 19:00 horas no Salón de Actos do Centro Cívico de Canido cunha sesión inaugural. Nesta sesión participarán 4 ex-alcaldes (que xa non son elixibles na próxima convocatoria electoral). Algúns xa están retirados da política e van ofrecer a súa visión da cidade co paso de tempo e dende a súa experiencia de xestión.

Neste primeiro encontro contaremos con Manuel Couce (alcalde en 1989 -1991, 1991-1995), Xaime Bello (1999-2003), Juan Juncal (2003-2007) e Vicente Irisarri (2007-2011).

Nas seguintes sesións terán lugar varios diálogos cos candidatos á Alcaldía que xa foron presentados formalmente. Estes encontros terán lugar:

1.- Venres 10 de febreiro ás 19:00 horas, Jorge Suárez (Ferrol en Común)
2.- Venres 17 de febreiro ás 19:00 horas, Iván Rivas (BNG)
3.- Venres 24 de febreiro ás 19:00 horas, José Manuel Rey (PP)
4.- Venres 3 de marzo ás 19:00 horas, Ángel Mato (PSdG-PSOE)

O esquema de preguntas para os encontros cos Alcaldables seguirá o mesmo patrón: E ti, de quen vés sendo? Biografía da persoa candidata.

Dime con quen andas… Equipo de candidatura, sinerxías e colaboracións.

Éche o que hai! Resumo das propostas realizadas durante este mandato, vinculadas a Canido.

Que hai do meu? Principais liñas estratéxicas para Ferrol e en especial, plan de acción para Canido 2023/2027

En todas as sesións haberá un espazo para as preguntas do público, grazas a un sistema de tarxetas que serán clasificadas pola organización durante o evento, para trasladarllas aos poñentes. Aquelas preguntas que queden sen reposta, por mor do tempo, serán publicadas na web do evento: https://contamoti.avcanido.org/ na que se pode atopar toda a información do ciclo e na que se irá subindo información actualizada. Os eventos serán emitidos e gravados por Rádio Filispim. Unha vez rematadas as sesións individuais, celebrarase un encontro conxunto cos candidatos, cuxa data está aínda por concretar, previsiblemente a finais de marzo. Dende as entidades organizadores comunícase que se abre unha canle de recollida de desexos cidadáns, podendo enviar arquivos de audio con frases curtas nas que se manifesten necesidades concretas e proxectos a realizar (máximo 30 segundos). Os arquivos deberán ser enviados por e-mail avcanido@gmail.com Durante o último evento, conxunto entre os candidatos a Alcaldía, proxectaranse as voces da veciñanza. O ciclo pretende, ademais, ter continuidade máis alá das Eleccións Locais de Maio, con máis encontros de seguimento tanto do labor do goberno local como da oposición, tratando temas específicos que afecten ao barrio de Canido e ao municipio.

https://contamoti.avcanido.org/


_______

mércores, xaneiro 18, 2023

O H2Med protagonizará o cume hispano-francesa a pesar da súa dubidosa viabilidade - A rede 'Gas Non é Solución' sobre o hidroducto-proxecto H2Med


O H2Med protagonizará o cume hispano-francesa a pesar da súa dubidosa viabilidade

O proxecto H2Med/BarMar protagonizará as negociacións do cume hispano-francesa coa complicidade do President da Generalitat, Pere Aragonès.

Esta infraestrutura foi contestada por expertos e a sociedade civil organizada. A rede Gas non é Solución [*] e a Plataforma Resposta ao BarMar, radicada en Barcelona, sinalan este proxecto como unha falsa solución á crise enerxética actual.

O 19 de xaneiro celebrarase en Barcelona o cume hispano-francesa na que se tratarán varios asuntos, entre eles o H2Med, que aspira a ser a principal infraestrutura de hidróxeno verde entre España e Francia. A capital catalá foi especialmente escollida para centrar as discusións neste proxecto que conectará Barcelona con Marsella, tal como aseguraba a portavoz do Goberno español, Isabel Rodríguez, hai unha semana. O proxecto, ademais do apoio da Comisión Europea, Francia e Portugal, conta coa complicidade de Pere Aragonès. O President da Generalitat subliñaba hai uns días a súa vontade de aproveitar este cume para concretar e impulsar o H2Med.

Pero o avance das conversacións está a ser contestado pola sociedade civil. A rede Gas non é Solución (en diante, a rede), formada por máis de 30 organizacións, rexeita firmemente este proxecto. A esta oposición súmase a Plataforma Resposta ao BarMar, anteriormente conformada para responder á construción do gasoduto MidCat, xa abandonado.

O H2Med é unha aposta que pon en risco a viabilidade da transición enerxética, desviando para a exportación unha enerxía imprescindíbel para a descarbonización da demanda estatal. Ademais de usar un vector enerxético como o hidróxeno (H2) moi ineficiente, este tipo de infraestruturas perpetúan un modelo centralizado que vai en contra das persoas, o medio ambiente e segue privilexiando ás grandes empresas enerxéticas como Enagás.

O pasado xoves 15 de decembro presentouse ao fin o H2Med no rexistro de proxectos candidatos a recibir financiamento europeo. Esta infraestrutura suporá a construción sen precedentes dun conxunto de gasodutos que transportarán en principio hidróxeno producido a partir de enerxías renovábeis. Será adxudicada a Enagás e custará entre 2.500 e 3.000 millóns de euros procedente das arcas públicas. Comezará en Portugal co tramo Celorico-Zamora (CelZa) e continuará co tramo submarino Barcelona-Marsella (BarMar). O H2Med non se entende sen outras interconexións que involucrarán a Huelva, Cartaxena, Puertollano, Zamora e Xixón creando unha rede moito máis ampla e paralela á nosa rede actual de gas. Ademais, o proxecto presentado expón dous almacenamentos subterráneos de hidróxeno situados en cavidades salinas de Cantabria e o País Vasco.

A rede aclara que o hidróxeno verde pode axudar a alcanzar un sistema enerxético 100% renovábel. Pero a súa utilización debe reservarse para casos concretos nos que sería inviábel utilizar outro tipo de enerxía renovábel, especialmente para substituír o uso do hidróxeno como materia prima en determinados procesos industriais, así como naqueles que requiren de altas temperaturas que non teñen polo momento outras opcións de descarbonización.

Con todo, denuncia que esta aposta pola exportación de hidróxeno a gran escala implica grandes riscos debido á inmadureza da tecnoloxía que se contempla tanto na produción como no transporte de hidróxeno. O investimento público estaría mellor empregada en medidas cuxo funcionamento xa foi comprobado como o é a electrificación, a aposta por proxectos renovábeis con participación cidadá, o autoconsumo, as comunidades enerxéticas e melloras na eficiencia enerxética dos fogares.

Ademais, ás limitacións e riscos xa mencionados, as organizacións agrupadas na rede engaden as seguintes consideracións:

– Exportar grandes cantidades de hidróxeno implicaría a implantación de moitísimos máis proxectos de renovábeis de grandes dimensións que poderían ter un  alto impacto ambiental e territorial. Tamén existe o risco de que, ao non haber suficiente excedente de enerxía renovábeis, caia en producir o hidróxeno con gas fósil como é o caso do 99% do H2 obtido na actualidade.

O anterior risco aumenta debido á baixa eficiencia enerxética do H2, como sinalou xa o instituto de investigación independente Hydrogen Science Coalition. No proceso de produción de hidróxeno por electrólise a partir, por exemplo, de fontes renovábeis e durante o seu transporte por gasoduto, pódese chegar a perder ate un 80% da enerxía investida.

– Se finalmente o H2Med inclúe-se na lista de Proxectos de Interese Común (PICs), aspirando a financiamento europeo, podería acollerse aos controis ambientais menos esixentes introducidos polo REPowerEU. Como denunciou xa ClientEarth, este paquete de medidas destinadas a substituír o gas ruso outorga aos PICs a posibilidade de saltarse o principio de “Non Dano Ambiental Significativo” (ou “Do Non Significant Harm” en inglés) e estar exentos de avaliacións de impacto ambiental exhaustivos.

– Isto último faise especialmente relevante se temos en conta que atravesará o Golfo de León, un dos ecosistemas con maior índice de biodiversidade no Mediterráneo, onde se atopan espazos mariños protexidos, un corredor de cetáceos e o Santuario de Pélagos.

Por todas estas razóns, a rede Gas non é Solución denuncia a postura do executivo do Estado español. Tamén sinala o apoio que recibe da Generalitat, que ve o H2Med e concretamente no tramo Barcelona-Marsella (BarMar) “positivamente, no sentido de que marca a Catalunya e Barcelona como un punto neurálxico da nova estrutura enerxética europea”, en palabras de Aragonès. Os riscos asociados a este megaproxecto urxen a un debate social moito máis amplo, transparente e que involucre á cidadanía.

18 de xaneiro de 2023

A rede 'Gas Non é Solución'

[*] Os colectivos que integran esta rede son: 350 Bcn, Aliança contra la Pobresa Energètica, Amigos de la Tierra, Asamblea Ciudadana contra el Gas en Gran Canaria, Asociación de Cultura Popular Alborada (Gallur), Berriztu!, Comité Cidadán de Emerxencia para a Ría de Ferrol (Galiza), Ecologistas en Acción, Enginyeria Sense Fronteres (ESF), Equo, Equo Huelva, Ferrol-Cape, Fracking Ez, Fundación Renovables, Fundación Ecología y Desarrollo, Greenpeace España, Instituto Internacional de Derecho y Medio Ambiente, No Més Gas,Observatorio Crítico de la Energía, Observatori del Deute en la Globalització, Plataforma Ciudadana Zaragoza sin Fractura, Plataforma por un Nuevo Modelo Energético, Plataforma Resposta al Midcat, Plataforma Salvemos Doñana, Podemos, SEO/BirdLife, Transport & Environment, WWF España, Xarxa per la Sobirania Energètica.

Enviado por:
Manuel Amorim
-m.amorim@telefonica.net-
18 de janeiro de 2023 às 10:53

_______

mércores, novembro 30, 2022

Concentración en vilas e cidades de toda Galiza ante un novo asasinato machista - En Ferrol, o vindeiro 1 de decembro, ás 8 da tarde na Praza Amada Garcia



Concentración asasinato machista

A Marcha Mundial das Mulleres de Ferrolterra, ante o asasinato, o pasado domingo en Lugo, de Cristina Cabo Buján, chamamos a mobilización para dar resposta a esta nova agresión criminal e machista contra as mulleres.

Día: Xoves, 1 de Decembro
Hora: ás 8 da tarde.
Lugar: Praza de Amada García (Diante do Edificio da Xunta de Ferrol).

"As mulleres decidimos"

Coordenadora Local de Ferrolterra da Marcha Mundial das Mulleres
mmmferrolterra@gmail.com
www.feminismo.info
https://www.facebook.com/marchamundialmulleres.galiza
twitter.com/MMMGaliza
 
Enviado por:
Marcha Mundial Ferrolterra
-mmmferrolterra@gmail.com-
30 de novembro de 2022 13:24

_______

Acto público do BNG en Ferrol, coa presencia de Ana Pontón: 'medidas contra a crise...' - Hoxe mércores 30 de novembro, ás 8 da tarde, no salón de actos do Antigo Hospicio - Tamén intervirá o portavoz municipal Iván Rivas


Acto público, medidas contra a crise.

A grave situación económica que estamos a vivir provoca que as súas consecuencias incidan de xeito directo sobre as costas das maiorías sociais deste país.

O custe da vida incrementouse nun 11% no último ano, especialmente nos produtos básicos coma o pan, leite, carne, cereais, peixe, verduras e hortalizas frescas…; mais tamén o custe da vivenda e transporte, cun encarecemento que empeora aínda máis as condicións de vida da poboación e a desbocada suba da electricidade.

O nacionalismo galego da man do BNG ten propostas para superar está crise de prezos e para presentar estas propostas, organizamos un acto público o mércores 30 de novembro ás 20 horas no salón de actos do Antigo Hospicio en Ferrol.

Neste acto público no que contaremos coa portavoz nacional do BNG, Ana Pontón.

Bloque Nacionalista Galego


Ferrol | Web | Facebook | Twitter.

Ferrolterra | Web.



Enviado por:
BNG de Ferrol
-bng@ferrol.es-
25 de novembro de 2022 14:14

_______

Mobilización en toda Galiza na defensa da Atención Primaria, este mércores 30 de Novembro - En Ferrol, ás 7 da tarde diante do centro de saúde Fontenla Maristany


HOXE MÉRCORES, 30 DE NOVEMBRO, ÁS 7 DA TARDE, CONCENTRACIÓN EN FERROL NA DEFENSA DA ATENCIÓN PRIMARIA, DIANTE DO CENTRO DE SAÚDE FONTENLA MARISTANY, NA PRAZA DE ESPAÑA.

Haberá mobilizacións simultáneas en todas as cidades e numerosas vilas da Galiza

Desde a Plataforma SOS Sanidade Pública de Galicia convocamos a toda a cidadanía a mobilizarse para salvar e fortalecer a Atención Primaria e a todo o Sistema Sanitario Público Gallego, seriamente ameazado polas política de recortes e desmantelamento da Xunta de Galicia e a Conselleira de Sanidade.

A Poboación sofre importantes trabas e limitacións para:

✅ Acceder e ser atendida de maneira presencial nos Centros de Saúde, PAC e Servizos de Pediatría de Atención Primaria.

✅ Soporta listas de espera de días ou semanas e consultas masificadas
✅ Estan a desaparecendo as consultas de pediatría.

✅ Moitos PAC están pechados al igual que moitos de saúde no rural.

✅ Boa parte dos Centros de Saúde perderon as actividades de promoción,
prevención, promoción, rehabilitación, atención ás enfermidades crónica e os programas da muller.

✅ O SERGAS acabou coa participación comunitaria.

✅ O persoal dos centros esta sometido a condicións de inestabilidade e precariedade laboral inaceptables e a unha enorme presión asistencial polo recorte de persoais e falta de recursos.

Desde a Xunta de Galicia e a Consellaría de Sanidade non hai ningunha vontade de facer fronte ao problema dado que para o 2023 orzamento sanitario apenas crece respecto a este ano, especialmente o de Atención Primaria que paso do 13,4% ao 13,7% do gasto sanitario total, tres miserables décimas para facer fronte á maior crise do sistema sanitario desde que se creo. Con este incremento es imposible recuperar a normalidade nas consultas de medicina familiar e os servizos de pediatría e os PAC pechados por falta de persoal medico e dos outros profesionais necesarios para unha atención de calidade.

Por todo iso desde SOS Sanidade Pública convocamos esta mobilización xeral de rexeitamento ao desmantelamento da Atención Primaria Pública e en apoio da Iniciativa Lexislativa Popular na que propoñemos que o Parlamento de Galicia debata e aprobe unha serie de medidas necesarias para solucionar a situación.

E necesario acordou redobrar os esforzos para recoller firmas para a ILP, informar á poboación do desastre da Atención Primaria e continuar convocando concentracións e manifestacións en todas as localidades de Galicia.

Reivindicamos un Novo Modelo de Atención Primaria que responda as necesidades da poboación, dotado dos recursos necesarios para atender os problemas e demandas de saúde da poboación, baseado na promoción, prevención, participación social e traballo comunitario.

As mobilizacións non van parar ata conseguir o obxectivo de salvar e fortalecer a nosa Atención Primaria.

SOS Sanidade Pública convocara unha nova manifestación en Santiago a primeiros do mes de xaneiro.

Soamente a alianza da poboación co persoal sanitario pode frear a deterioración do nivel primario de asistencia e a precariedade do persoal.

Seguiremos convocando novas actuacións unitarias.

Para contactar coa Plataforma SOS Sanidade Pública de Ferrolterra:

plataformasosanidadepublica@gmail.com

_______

venres, novembro 18, 2022

Manifestación en Compostela na defensa dunha Vida Digna, dos Servizos Públicos e do Estado do Benestar, sábado 19 de novembro, ás 12 do mediodía na Alameda


A Plataforma de Ferrolterra na Defensa das Pensións Públicas, integrada en MODEPEN, vai participar na Manifestación que vai ter lugar en Santiago de Compostela, este sábado 19 de novembro, ás 12 do mediodía, convocada por diferentes organizacións, sindicatos e colectivos, unha mobilización simultánea en todas as capitais das comunidades autónomas e nacionalidades do Estado, na defensa “dunha vida digna, a recuperación e reforzo dos servizos públicos e a demanda de medidas políticas que garantan o Estado do Benestar”.

As entidades convocadoras son diversas organizacións sociais que abranguen desde movementos de pensionistas (Modepen, Plataforma pensionistas Compostela), Sindicatos (CGT, CUT), da defensa do mundo Rural (SLG) das dependencias (Vellez Digna, Trega, Plataforma SAF), ecoloxistas e de defensa do territorio (Verdeval), Sociais (Os Ninguéns, Colectivos pola Renda Básica), da defensa do ensino (Foanpas).

Autobús para desprazase ate Compostela


Desde Ferrolterra, partirán autobuses que sairán, ás 10 da mañá, desde a Praza do monumento do 10 de Marzo (barrio de Recimil), pasando por Caranza, Fene e Cabanas, por un prezo de 10 euros, ida e volta, o regreso será unha vez rematada a manifestación (aproximadamente ás 2 da tarde).

Artigo de Bieito Lorenzo, publicado no xornal praza.gal | Ir á web.

Polo dereito a envellecer con dignidade...

Todos os cidadáns teñen dereito a unha vida digna!

Plataforma de Ferrolterra na Defensa das Pensións Públicas, integrada en MODEPEN (Movemento Galego pola Defensa das Pensión Públicas).

Para contactar coa Plataforma:

Correo-e:
plataf.pensionspublicas.ferrol@gmail.com

Conta no facebook:
https://www.facebook.com/DefensaPensionsFerrolterra/

Web de MODEPEN:
https://www.modepen.org/
_______

xoves, novembro 10, 2022

O vindeiro sábado 12 de novembro, ás 12 do mediodía inagurarase, en Ares, a exposición intinerante: 'Rostros da Memoria Marzo 1972' - Álbum fotográfico da presentación do libro: '10 de Marzo. Un conflito do movemento obreiro galego pola democracia' celebrada no concello de Neda


Inauguración da exposicións: "ROSTROS DA MEMORIA FERROL 1972" en Ares

Exposición en Ares de Xurxo Lobato, o vindeiro acto da Memoria Histórica "Dez de Marzo 50 Aniversario".

Exposición estará do 11 ao 24 de Novembro, no Paseo Marítimo de Ares, diante da Casa do Concello.

Este pasado mércores presentou-se en Neda o libro: "10 de Marzo. Un conflito do movemento obreiro galego pola democracia".

ÁLBUM FOTOS: Enlace presentación en Neda.

Presentamos en Neda, nun entrañable acto na Casa das Palmeiras, o libro “10 DE MARZO. Un Conflicto del Movimiento Obrero Gallego por la Democracia” e contamos coa participación do Alcalde de Neda, Ánxel Alvariño o historiador José García Alén, coordinador da publicación e o escritor e profesor Xesús Alonso Montero, un dos autores da obra, xunto con Enrique Barrera, Rafael Pillado e José Torregrosa. Lamentamos que Rafael Pillado non puidera participar por motivo da enfermidade. O noso agradecemento a todas as persoas asistentes e ao Concello de Neda sempre colaborador nestas cuestión da Memoria e da Cultura coas nosas Asociacións Culturais, Fuco Buxán e Memoria Histórica Democrática.

Na presentación en Neda do Libro "10 DE MARZO", o profesor Xesús Alonso Montero comenta o poema "Esguéstevos cedo" de Uxío Novoneyra, dedicado a Amador e Daniel, asasinados o 10 de Marzo de 1972, en Ferrol, pola policía franquista.

"Erguéstesvos
                      cedo aquel día
o costume do traballo
                     mañá cediño
para facernos ca vosa morte
"

VÍDEO: Enlace vídeo das palabras de Alonso Montero.

E-mail:

10m72.50aniversario@gmail.com

Podes seguirnos na nosa páxina de Facebook: Dez De Marzo Cincuenta Aniversario,.

Enviado por:
10M72 50Aniversario
-10m72.50aniversario@gmail.com-
9 de novembro de 2022 22:15
9 de novembro de 2022 22:10

_______

Muíño do Vento, Fundaçom Artábria e a Asociación Veciñal de Canido organizam magusto popular - O evento, aberto ao público, será esta sábado 12 de novembro a partir das 18:30hs no Centro Cívico de Canido


Muíño do Vento, Fundaçom Artábria e a Asociación Veciñal de Canido organizam magusto popular

O evento, aberto ao público, será esta sábado  12 de novembro a partir das  18:30 no Centro Cívico de Canido

A Asociación Sociocultural Muíño do Vento, Fundaçom Artábria e a Asociación Veciñal de Canido convidam a participar no magusto popular que decorrerá o próximo sábado 12 de novembro a partir das 18.30h no Centro Cívico de Canido.

Lembram desde as entidades convocantes que esta festa tradicional galega é umha merenda-ceia própria do mês de novembro e que tradicionalmente se festeja nos dias próximos ao Dia de Defuntos e do Sam Martinho. Dentro das festas cíclicas representa o fim dumha etapa, a morte simbólica da natureza.

A protagonista indiscutível desta data é a castanha que serám repartidas gratuitamente com cada consumiçom. Além das castanhas assadas haverá liscos e chouriços a preços populares.

E como em toda boa festa nom faltará a música tradicional. Desde as entidades convocantes animam a somar-se à foliada e trazer quem quiger os seus instrumentos.

A música e o baile estará acompanhado dumha queimada.

Umha  jornada lúdica para que a vizinhanza do bairro participe e da que todas sejamos partícipes para que as nossas festas tradicionais nom se convirtam num espetáculo folclorizado alheio à participaçom popular.

Ferrol, 9 de novembro de 2022
--
Travessa de Batalhons nº7   Esteiro
15403 Ferrol - GALIZA
Telefone:  +34 981 35 29 86
www.artabria.net
 
Segue-nos em twitter @fartabria e em facebook!
 
A Fundaçom Artábria é um projecto popular em defesa da língua e cultura nacional, os valores solidários e os direitos históricos da Galiza. Entidade de carácter sociocultural sem ánimo de lucro que está declarada de Interesse Galego e classificada de interesse cultural, com o nº 54 no registo de fundaçons da Xunta de Galicia.


Enviado por:
Fundaçom Artábria
-correiodeartabria@gmail.com-
10 de novembro de 2022 01:00

_______

martes, novembro 01, 2022

Pronunciamento de AGAMME sobre certos aspectos da chamada Lei Trans


Ante os que consideramos graves acontecementos que se están a producir dende hai meses no marco do debate sobre os contidos da Lei Trans, dende AGAMME emitimos este comunicado.

En primeiro lugar, desexamos amosar noso apoio ás compañeiras pertencentes a diversos partidos e asociacións, universidades e profesións varias que están sufrindo represalias por exercer o lexítimo dereito de expresar libremente a súa opinión, polo simple feito de disentir, de argumentar en contra dalgúns dos puntos clave do texto da chamada Lei Trans. Asistimos a un deterioro continuado e acelerado dos principios democráticos, de tal forma que se chega a normalizar a negación da posibilidade da discusión argumentada como fonte de enriquecemento da política. O mesmo observamos no ámbito académico respecto ao coñecemento científico. Aséntase cada vez con máis intensidade o criterio de “comigo ou contra min”, eliminando a posibilidade de escoitar outras posturas, outros razoamentos. Independentemente de que unhas ou outras teñan a razón, permitir que se hostigue a compañeiras por ter expresado un punto de vista determinado é abrir a porta ao extremismo ultradereitista. Por iso é imperativo deter esta dinámica que está poñendo en serio risco o xa debilitado sistema democrático.

Por outra parte, AGAMME manifestou en repetidas ocasións a súa crítica a algúns aspectos do texto do Proxecto de Lei, que pasamos a resumir a continuación.

Para empezar, y para afastar calquera posibilidade de malentendido, AGAMME maniféstase plenamente respectuosa cos dereitos das persoas transexuais e defendemos o seu dereito a vivir libres de discriminación e violencia, en cumprimento de toda a normativa internacional, estatal e autonómica de Dereitos Humanos.

Unha vez establecido este punto de partida inamovible, ao noso parecer, a que se deu en chamar Lei Trans inclúe no seu articulado algúns contidos que supoñen un risco para a saúde das persoas menores de idade, poñéndoas a mercé dos intereses da industria farmacéutica e dos centros de cirurxía especializados. Pasamos a continuación a describir os nosos principais puntos de disensión co articulado do "Proxecto de Lei para la igualdade real e efectiva das persoas trans e para a garantía dos dereitos das persoas LGTBI":

PRIMEIRO. O concepto “identidade de xénero” como entidade xurídica.

O xénero é unha construción cultural a través da cal se atribúen ás persoas, en función do sexo, unha serie de cualidades conductuais, psicolóxicas, sociais, etc. É de feito a base sobre a que se asentan os postulados patriarcais e machistas que, como sociedade democrática, debemos rexeitar. Admitir que sexa precisamente o xénero o determinante para identificar ao individuo é reforzar un concepto contra o cal o feminismo vén batallando dende as súas orixes.

No ámbito de infancia e adolescencia, deben cumprirse os principios coeducativos, cuxo obxectivo é tirar as barreiras que dificultan o pleno desenvolvemento das persoas menores de idade, máis alá dos estereotipos de xénero. A lei non debe, pois, reforzar un concepto que é causante de discriminación e violencia contra mulleres e nenas.

DEBEN SER RETIRADAS DO TEXTO DA LEI TODAS AS EXPRESIÓNS NAS CALES, DIRECTA OU INDIRECTAMENTE, SE ASENTE O CONCEPTO DE IDENTIDADE DE XÉNERO. NO SEU LUGAR DEBE UTILIZARSE A EXPRESIÓN “IDENTIDADE SEXUAL”.

SEGUNDO. O cambio rexistral do xénero por autodeterminación.

Este é un punto difícil de abordar, dado que é comprensible o desexo de que non sexan necesarios informes médicos e trámites diversos. Non obstante, este cambio na normativa supoñería a eliminación do suxeito xurídico muller –xa que calquera podería selo tan só con declaralo- co cal, toda a loita feminista por lograr igualdade de condicións no ámbito laboral e familiar, para a erradicación da violencia de xénero, a recompilación de datos estatísticos en base ao sexo, o estudo das enfermidades femininas, a promoción do deporte femenino e un longo etcétera, quedaría en auga de borraxe.

Aínda que no plano teórico podemos formular o desexo de que se dilúan as diferenzas por razón de sexo, estas non desaparecen na vida real. A discriminación que sofre a muller segue sendo dramática e a lexislación e as políticas que se foron logrando tras décadas de loita feminista non poden perderse. De feito, seguen sendo insuficientes, debemos seguir promovendo cambios que avancen na eliminación das desigualdades e a violencia. No tocante á infancia e adolescencia, as nenas seguen sendo, con  moito, as principais vítimas de violencia sexual e cada ano as cifras de violencia de xénero en parellas adolescentes son alarmantes.

POLO TANTO, DEBE PERMANECER A NORMATIVA ACTUAL, QUE EXIXE ALGÚNS REQUISITOS E TRÁMITES PARA A CONSECUCIÓN DO CAMBIO REXISTRAL DO SEXO E QUE DITO CAMBIO SE PRODUZA DE FORMA ESTABLE.

TERCEIRO. Tratamentos e intervencións en menores de idade.

Debemos partir de tres presupostos indiscutibles:

En primeiro lugar, non existe evidencia científica sobre os efectos a medio-longo prazo de someter a persoas a tratamentos hormonais dende idades temperás e de por vida.

En segundo, estase esquivando, por ser tema tabú, os efectos que as cirurxías en xenitais e mamas poden ter sobre o pracer sexual e en consecuencia sobre a vida sexual, de forma irreversible.

Por último, a adolescencia caracterízase por ser unha etapa de cambios e de autocoñecemento, non é estática e a súa duración é variable en cada caso.

Por todo isto, pedimos con toda a contundencia posible, que se estableza normativamente:

1.- Que non se someterá a ningunha intervención cirúrxica nin tratamento hormonal a ningunha persoa menor de 16 anos, no marco dun proceso de cambio de sexo.

2.- Que non se someterá a tratamentos hormonais nin intervencións cirúrxicas a ningunha persoa de entre 16 e 18 anos se non é tras unha avaliación médica e psicolóxica que estableza a suficiente madurez e desenvolvemento da persoa así como a conveniencia de ditos tratamentos dende un punto de vista da saúde integral.

Por no estenderse máis neste punto, e dada a total concordancia co seu punto de vista, adherímonos ao manifestado recentemente sobre este tema pola Asociación Española de Pediatría de Atención Primaria.

CUARTO. Sobre a adopción de medidas contra proxenitores-as que se opoñen á realización de tratamentos.

A Convención dos Dereitos da Infancia (CDN) establece no seu artigo 5 que, salvo que aqueles sexan prexudiciais para o benestar da persoa menor de idade, “Os Estados Partes respectarán as responsabilidades, os dereitos e os deberes dos pais (…)”. Polo tanto, salvo que atenten contra a súa integridade ou dignidade, se recoñecese aos proxenitores e proxenitoras a potestade para tomar as decisións que consideren aconsellables para o benestar dos seus fillos e fillas.

Como temos denunciado noutras ocasións, e segundo avalan informes do Valedor do Pobo de Galicia, por exemplo, o cal consideramos extensible a outros territorios, os equipos psicosociais dependentes dos gobernos autonómicos ou municipais (protección de menores, equipos municipais de servizos sociais, …) carecen de formación específica en materia de infancia. Polo tanto, tendo en conta ademais que este novo campo é un nicho de mercado suculento para a industria farmacéutica, ameazar a proxenitores e proxenitoras coa posibilidade de perdela custodia dos  seus fillos e fillas por opoñerse a que se sometan a tratamentos agresivos, de efectos adversos e quizais irreversibles, ataca os dereitos enunciados na CDN así como a independencia (dentro de duns parámetros de coidados e respecto da liberdade sexual dos seus fillos e fillas) das familias para adoptar libremente as decisións que consideran son as que mellor se axustan ao interese superior do ou da menor de idade.

POLO TANTO, DADO QUE AS CONDUTAS VEXATORIAS, O MALTRATO EMOCIONAL, ETC XA ESTÁN REGULADAS NO CÓDIGO PENAL E EXISTE MARXE DE MANOBRA POR PARTE DAS ADMINISTRACIÓNS PÚBLICAS PARA DESENVOLVER DISTINTOS TIPOS DE INTERVENCIÓN EN BENEFICIO DO BENESTAR INFANTIL, DEPENDENDO DA GRAVIDADE DE CADA CASO, ESTE CONTIDO DEBE DESAPARECER DA LEI.

QUINTO. Sobre todas aquelas medidas contempladas na lei que atentan contra a liberdade de expresión.

O Proxecto de lei contempla todo un aparato disciplinario que se aplicaría contra calquera persoa que disinta do seu articulado. Consideramos esta unha medida anticonstitucional e un perigo para a estabilidade da democracia o feito de que se inclúa nun texto lexislativo. A lei vixente xa contempla medidas contra aquelas persoas que atenten contra a dignidade das persoas, co cal é absolutamente innecesario establecer medidas disciplinarias e debemos entender estas como un intento de blindar a lei  impedir calquera posibilidade de rexeitamento ou crítica da mesma.

ESTE CONTIDO É COMPLETAMENTE INADMISIBLE DADO QUE ATENTA CONTRA O DEREITO CONSTITUCIONAL DE LIBRE EXPRESIÓN.

SEXTO.  Sobre a necesidade e o consenso social.

Como se evidenciou especialmente nas últimas semanas, existe unha clara desconformidade dun sector importante da sociedade sobre a necesidade e a conveniencia desta lei, ou ao menos dalgúns dos seus contidos. Polo tanto, dado  que o poder lexislativo emana do pobo, os poderes públicos deben ser cautos na aprobación de leis sobre as cales existe un debate aberto e non concluído, cunha oposición clara dunha parte da sociedade.

Non existe suficiente coñecemento científico sobre os efectos a largo prazo de aplicar terapias de transición, non é pertinente asentar unha lexislación baseada na suposición. De feito, están empezando a transcender datos aportados por países que aplicaron leis trans con anterioridade e os resultados obtidos e os relatos de persoas que agora están en fase de detransición non son en absoluto tranquilizadores.

SOLICITAMOS, POIS, QUE SE PRORROGUE A SÚA APROBACIÓN, QUE SE ABRA UN PROCESO DE DISCUSIÓN, DE DEBATE RESPECTUOSO E ARGUMENTADO QUE NUNCA SE PRODUCIU PORQUE, DENDE O INICIO DA TRAMITACIÓN, SE CRIMINALIZOU O DISENSO E EVITOUSE TODA POSIBILIDADE DE DIÁLOGO.

FAISE NECESARIO O QUE NON SE PRODUCIU AO INICIO: UN PERÍODO DE REFLEXIÓN, DE ANÁLISE DE INFORMES E ESTUDOS A NIVEL INTERNACIONAL, DE ESCOITAR ÁS ENTIDADES SOCIAIS E PROFESIONAIS, NON SÓ AS AFÍNS, OS TESTEMUÑOS DE TODA A GAMA DE PERSOAS AFECTADAS POR ESTA CUESTIÓN,  ANTES DE DAR O PASO DEFINITIVO QUE PODERÍA CONDUCIRNOS A UNHA SITUACIÓN NORMATIVA POUCO DESEXABLE NOS ASPECTOS QUE VIMOS DE SINALAR.

Xunta Directiva de AGAMME, a 29 de outubro de 2022




Asociación Galega contra o Maltrato a Menores (AGAMME): Asociación sen ánimo de lucro, fundada en 2010. Os seus obxectivos principais son a visibilización da problemática do maltrato infantil, e de forma sinalada o abuso sexual incestuoso, ofrecer apoio e información a vítimas e as súas familias ou profesionais que traballan habitualmente con nenos, nenas e adolescencia. Para rematar a participación en procesos lexislativos e a presentación de demandas á administración para o cumprimento da lexislación vixente [+Info].

Enviado por:
Agamme Ferrol
-agammeferrol@gmail.com-
30 de outubro de 2022 09:40

_______

mércores, outubro 26, 2022

Valoracion da situación crítica da pediatría en Galicia - SOS Sanidade Pública


Valoración da situación crítica da pediatría en Galicia

Pediatras e Matronas Xa, Costa da Morte

Aquí na costa da morte é unha práctica habitual, ou son atendidos por médicos de familia con cursos de puericultura ou directamente por médicos de familia a secas, a figura do pediatra aquí está practicamente desterrada, non se fan moitos seguimentos de idade nin se dan as vacinas pautadas no seu debido tempo nin a bebés, e en moitos concellos xa se considera un luxo que che atendan o fill@

As nais e pais adoitan peregrinar polos centros de saúde mendigando atención e cando xa non queda máis remedio tirando de PAC (onde non hai pediatra), ou directamente as urxencias do hospital comarcal de Cee, onde tampouco soe haber pediatra (nas urxencias), salvo que lle cadre de garda ou que sexa algo tal gravidade que o fagan chamar.

Plataforma Sanxenxo

Aquí por desgracia está máis normalizado do que quixeramos de feito a veces ata se aplaude cando vas o Centro de Saúde e che atenden á nen@, e nós metémoslle moita caña a xente pero a xente xa ten asumidas dúas cousas:

- Que non imos volver a ter pediatras.
- Que o mellor é facer un seguro privado porque as crianzas son o primeiro.

E para rematala a individua esta sae dicindo dende a xerencia da SERGAS que non pretendamos ter un pediatras por centro de saúde, canta falta de humildade e canto exceso de soberbia teñen os ricos de berce.

Nós xa nos mobilizamos no 2.017 e conseguimos seguir tendo o servizo, pero moito me temo que agora vai ser máis complicado. O bo é que a xente desta zona están máis sensibilizada co tema da pediatría. Aquí xa non hai un pediatra por centro de saúde, haino nun dos dous que temos, e que atende parte dos concello limítrofes.

É o discurso do PP, o mesmo dixo o alcalde de Sanxenxo co tema dos médicos de familia, nun dos plenos. Traédenos médicos que os contratamos pero xa...

Plataformas Condado

Estivemos case 2 anos sen pediatra nin en Covelo, nin Mondariz, nin Mondariz Balneario, que tiñamos o servizo compartido para os 3 concellos distribuíndo a xornada de 8 a 12 en Mondariz e de 12 a 15 en Covelo

Restableceuse o servizo no 2019 tal como estaba, co Covid pasou a atender so no concello de Mondariz ás cativas dos 3 concellos tendo que ser as familias as que se desprazan e a iso hai que sumarlle que non hai transporte público ningún, soamente un taxi en todo o concello de Covelo, e dende finais do 2021 atende en Mondariz en xornada completa todos os días e en Covelo soamente ós xoves

Eu lémbrome que levamos as crianzas as concentracións tanto en Cañiza como en Ponteareas e a Garda Civil coas metralletas na man diante deles berrando "votaivos pa atras!!", as de 1ª fila eran as crianzas.... vergoñento...

Plataforma Sanxenxo

Nun principio, o Sr. Comesaña estará mañá no CS de Baltar a sacar peito da campaña de prevención do cancro de cérvix (as probas realizan-nas as matronas, non si?)  Algún recado para o conselleiro?

Pediatras e Matronas Xa, Costa da Morte

 Cal é a excusa para a falta de matronas.
- Vir quitar as fotos si pero as prazas sen cubrir
- Coa saúde das mulleres no  se xoga

Denuncian que 192 concellos de Galicia carecen de peditria

Si este dato é real, e contando que en Galicia hai 313 concellos, xa hai máis concellos sen pediatra que con pediatra.

Iso tamén llo había que espetar o Sr. Comesaña.

✅ Feijoo mentindo sobre a contratación de pediatras. | Nova no Faro de Vigo.

✅ O SERGAS non quere poñer pediatras nos Centros de Saúde. | Nova en Nós Diario.

Manuel Martin
Voceiro SOS Sanidade Pública

Contacto coa Plataforma SOS Sanidade Pública de Ferrolterra:

plataformasosanidadepublica@gmail.com


Web nacional da Plataforma:

https://sossanidadepublica.wordpress.com/

Foto: Demandando pediatra n'A Lama, de Gustavo Santos (Detalle).

Enviado por:
PLATAFORMA FERROLTERRA
-plataformasosanidadepublica@gmail.com-
20 de outubro de 2022 15:26

_______

Caeu a torre da vergoña da ENEL Green Power, veuse a baixo a metáfora de espada de Damocles sobre as nosas cabezas, ... Por André Abeledo Fernández




Por André Abeledo Fernández [*]
26.10.2022


Caeulles a torre aos de ENEL Green Power, os que ameazan a todo un pobo con montar o "Parque Eólico de Caaveiro" e destruír o noso entorno, a nosa forma de vida, e as nosas esperanzas dun futuro mellor para a nosa terra.

Querían medir a forza do vento, e o vento levoulles a canallada, agora si queren medir a forza da veciñanza defendendo a súa terra vainos levar o demo.

Caeulles a torreta de medición da velocidade do vento que todos os veciños podíamos ver como espada de Damocles sobre as nosas cabezas.

Vai ser que a natureza e o vento tamén están con nos na loita contra os muíños do espolio, da especulación e do desastre, vai ser que traballan con nos os elementos para defender a terra.

Ao día seguinte da caída da estrutura xigante, duns 100 metros, os veciños de Anca celebramos a caída do símbolo dos abusos do poder e das multinacionais do sector eléctrico na nosa parroquia.

Aplaudimos ao vento que levou o esperpento ameazante que nos miraba día e noite dende o noso monte.

Sabemos que a loita vai seguir, que volverán a levantar a torre da vergoña, será por cartos, pero esta vitoria do vento sobre os especuladores macroeólicos é a primeira de todas as que veñen detrás.

Porque non imos permitir que destrúan a nosa terra, o noso presente e hipotequen o futuro dos nosos fillos sen loitar.

Porque ata os elementos están berrando que a Galiza non se vende, se defende.

EÓLICOS AQUÍ NON!

[*] André Abeledo Fernández, nado en Neda o 14 de Xullo de 1974, militante comunista e sindicalista. Delegado de persoal da CIG no comité de empresa de Mercadona na Provincia d'A Coruña. | Facebook e Twitter.

Enviado por:
André Abeledo Fernández
-andre1474@gmail.com-
26 de outubro de 2022 12:01

_______

'Agora Ferrol', a candidatura que aspira a representar a Podemos nas eleccións municipais presentarase o xoves día 27 na sede da formación - Tras a presentación da candidatura, o partido organiza a charla 'Emafesa, unha gran estafa' - Podemos Ferrol propón un pacto de cidade para que nos Orzamentos Xerais de 2023 haxa un investimento no tren Ferrol-A Coruña


“Agora Ferrol”, a candidatura que aspira a representar a Podemos nas eleccións municipais presentarase o xoves día 27 na sede da formación

As persoas que integran a lista que se presenta ás primarias farán unha presentación da mesma o xoves 27 de outubro ás 18:30 horas na sede da formación. A continuación, terá lugar unha charla sobre a situación actual de Emafesa. O relator será Inacio Martínez Orero, membro da Plataforma pola Defensa dos Servizos Públicos.

Ferrol, 26 de outubro. –

Podemos Ferrol presenta este xoves, 27 de outubro, a candidatura unitaria “Agora Ferrol” que aspira a representar a Podemos nas eleccións municipais e está encabezada por Borja San Ramón. Será ás 18:30 da tarde na sede que a formación ten na cidade.

Dende a organización queren lembrar a todas as persoas inscritas que o prazo de votación destas primarias comeza o 28 de outubro e remata o 3 de novembro. Poden facelo por vía electrónica, accedendo a https://primarias2022.podemos.info/. Para aqueles que non teñan a posibilidade de facelo dende o seu propio dispositivo, habilitarase un punto de votación telemática no recinto formativo. Os resultados faranse públicos o 4 de novembro.

Tras a presentación da candidatura, o partido organiza a charla "Emafesa, unha gran estafa", na que se tratará a problemática actual de Emafesa e na que participará Inacio Martínez, membro da Plataforma pola Defensa dos Servizos Públicos, pola remunicipalización. Dende a formación consideran que este é un dos temas importantes que afectan actualmente á cidadanía de Ferrol e ao seu peto. Ademais, segundo as palabras do cabeza de lista municipal da formación Borja San Ramón, “quedan moitas cousas por aclarar e resolver en canto ao saneamento da cidade”. Falan, por exemplo, do saneamento do rural, que foi obxecto de debate nun dos últimos plenos do Concello; as lecturas estimativas realizadas pola empresa, que levaron a moitos veciños a presentar denuncias por ter recibido facturas moi elevadas; ou tamén o cobro da taxa de depuración.

Podemos Ferrol propón un pacto de cidade para que nos Orzamentos Xerais de 2023 haxa un investimento no tren Ferrol-A Coruña

O Círculo de Podemos Ferrol insta ás forzas políticas con representación no pleno municipal a poñerse de acordo e, así, demostrar aos seus homólogos no Congreso dos Deputados que a cuestión do tren Ferrol-A Coruña non pode seguir demorando no tempo.

Ferrol, 20 de outubro. –

Podemos Ferrol non está satisfeito con que todas as forzas políticas presenten emendas aos Orzamentos Xerais reclamando antepoñer os intereses da cidadanía. En palabras de Borja San Ramón, futuro cabeza de lista desta formación na cidade, “o mellor resultado sería facer un pacto de cidade esixindo que todos os partidos voten a favor dunha mesma emenda e así conseguir que se aprobe si ou si. , en vez de quedar sen anuncio para a galería”.

Desde o seu punto de vista, o modus operandi dos políticos da cidade con respecto a esta cuestión responde "ao mesmo modelo de goberno que ven perpetuándose dende que houbo varias lexislaturas". Na súa opinión, é máis doado falar cos responsables do seu grupo en Galicia e Madrid para "rendibilizar algúns votos", que pensar en mellorar a cidade e mostrar unidade dende a Deputación.

Debido a que “os ferroláns levamos un tempo estresados” e que “o futuro de Ferrol non se xoga”, pide que o Concello aprobe por unanimidade unha declaración institucional “esixindo enerxicamente unha intervención urxente no ferrocarril”. liña Ferrol-A Coruña, tan necesaria para o futuro da Comarca”.

Comunicación Podemos Ferrol
contacto@ferrol.podemos.info

Enviado por:
contacto@ferrol.podemos.info
-contacto@ferrol.podemos.info-
26 de outubro de 2022 11:29

_______

Barcos de Papel para Patrimonio Mundial, ... Por Iolanda Teixeiro Rei


Por Iolanda Teixeiro Rei [*]
26.10.2022


BARCOS DE PAPEL PARA PATRIMONIO MUNDIAL

O concello de Ferrol acaba de facer a botadura simbóloca de 30.000 barcos de papel para promocionar a candidatura da cidade a Patrimonio Mundial da Unesco. Nada menos que treinta mil! Burro grande ande ou non ande.

E aí entra o decrecentismo como fondamente diferente das propostas da economía circular do capitalismo verde. Hai quen pensa, como a edil do ramo, que producir papel procedente de algas non máis que para facer un acto simbólico desas proporcións é unha iniciativa ecolóxica. E incluso considera a botadura como un proceso natural.

Que mensaxe de educación ambiental lle estamos enviando aos nenos desde as institucións? Que producir, amais un produto innecesario, non contamina? Que o proceso de producir é limpo e xebre e non consume, por exemplo, un ben tan fundamental como auga?.

Hai tan pouca imaxinación para pensar nunha asociación innecesaria entre Armada e Ilustración?. Tan pouco siso como para involucrar ás escolas nun proxecto Ferrol. Porto da Ilustración?

Tendo a ría máis contaminada non sería mellor proposta de candidatura sanear a ría para recuperar o ecosistema mariño implicando a mariscadores e profesionais do mar como biólogos, oceanógrafos… e facer educación ambiental co obxectivo de recuperar a ría e a economía sostivel?.

Contamos contigo, disque. Non sei convosco. Comigo, non.

[*] Iolanda Teixeiro Rei. Secretaria de organización de LiGanDo-LGD. Activista ecoloxista e decrecentista. Unha das organizadoras do primeiro Congreso Galego de Decrecemento que tivo lugar en Ferrol, no mes de outubro deste ano 2018. Articulista e licenciada en Pedagoxía Social pola USC. Profesora de Tai Chi e Chi Kung en Ferrol. No facebook e no twitter. Artigos no Diario de Ferrol e Diario Nós.

Enviado por:
Iolanda Teijeiro
-iolandateixeiro@gmail.com-
25 de outubro de 2022 14:38

_______ _______