A CIG de Ferrol convoca unha Manifestación este 1º de Maio de 2010: “ Emprego e salarios dignos. Non ao pacto social” e “O déficit público que o pague o capital. Reforma fiscal xa!”

Manifestación 1º Maio en Ferrol


Sábado 1 de Maio ás 12 .h, Manifestación con saída dos locais da CIG, en Esteiro, e remate no Cantón. PARTICIPA!

NON Á POLÍTICA DE PACTO SOCIAL

Desde sempre, o sindicalismo nacionalista fixo do 1º de Maio unha data reivindicativa de defensa dos nosos intereses específicos como clase traballadora galega, en solidariedade co resto d@s traballador@s do mundo, opóndonos así aos intentos do capital de dar por rematada a loita de clases e de facer desta data unha xornada festiva máis.

A crise económica, as causas que a provocaron e as saídas que están a propor os poderes económicos e políticos, son demostrativos do carácter de clase do actual sistema de capitalismo neoliberal, xerador dun enorme lucro para os especuladores, claramente ao servizo dos intereses da oligarquía financeira e contrario aos intereses da clase traballadora, cunha redución de salarios, precarización das condicións laborais e recorte dos seus dereitos.

As propostas que se están a facer de saída á crise, por parte da Xunta de Galiza, Patronal e Goberno Central, van dirixidas a recortar gasto público, facilitar o despedimento, privatizar servizos públicos e de asistencia social, rebaixar salarios, etc. Medidas todas elas encamiñadas a que sexa a clase traballadora quen pague as consecuencias da recesión económica, contando ademais coa complicidade de CCOO e UGT que, coa CEOE e o Goberno Español acordan reformas do mercado laboral, e un Pacto de Moderación Salarial para os vindeiros tres anos.

Temos que reivindicar a mellora do poder adquisitivo dos salarios, a estabilidade no emprego, o incremento do gasto público produtivo, unha política fiscal realmente progresiva, a eliminación dos paraísos fiscais, uns servizos públicos e un sistema público de protección social dignos, o apoio aos sectores produtivos, investimentos en I+D+i, a creación dunha banca pública e un forte control e presenza de capital público en sectores estratéxicos como o financeiro, enerxético ou de telecomunicacións.

Este tipo de reivindicacións e de conquistas non van vir, como pretenden facernos crer as centrais sindicais estatais, das chamadas Mesas e Políticas de Pacto Social que practican. Cómpre, pois, mobilizarnos e presionar aos Gobernos Español Galego, para que rachen co neste modelo, e leven adiante unhas políticas públicas orientadas á defensa dos intereses da maioría, no camiño da conformación dun modelo social e económico máis xusto, solidario, igualitario, democrático e galego.

Por todo isto, pedímosche que acudas a estas mobilizacións.

A Executiva Comarcal da CIG de Ferrol.

Enviado por:

Confederación Intersindical Galega

-cig-informa@galizacig.com-

30 de abril de 2010 10:12

________________