Martes 8 de Xuño de 2010: Folga Xeral en toda a Administración Pública [Ensino, Sanidade e administracións central, autonómica e local]

O insaciable "Deus Mercado" pide máis sacrificios humanos aos gobernos europeos, estes, sen cuestionar-se nada, tanto dá que sexan socialdemócratas ou populistas de dereita, deciden, seguindo ordes de quen provocou a crise, que o cinto ten que apreta-lo a Clase Traballadora.

Os Gobernos europeos, seguindo directrices do FMI, Banco Central Europeo, Axencias Certificadoras da fiabilidade económica dos diferentes países, e outras lerias neoliberais, que non elexiu ninguén, e que non se poden controlar democráticamente, ditan decretos restritivos de dereitos contra a Clase Traballadora: millóns de persoas van sufrir recortes salariais, conxelacións das pensións, merma dos servizos e prestacións públicas, e desemprego.

Diante desta situación os sindicatos da Función Pública estan-se mobilizando e chaman a secundar a Folga Xeral en toda a Administración Pública, para este Martes 8 de Xuño de 2010. Mágoa que non haxa unidade sindical nas mobilizacións, o resultado da Folga sería moito mellor, cando os obxectivos son os mesmos:

• Non aos recortes salariais.
• Na defensa do emprego e dos Servizos Públicos.
• Que a crise a pague o Capital.

Os gobernos europeos, entre eles o español, aplican medidas que supoñen recortes laborais e sociais de embergadura. Estas medidas son inxustas e innecesarias e serán ineficaces para os obxectivos que se din perseguir.

Se queren reducir o déficit público hai outras medidas, unhas de menos gasto e outras de máis ingresos:

• A anulación do Plus dos Altos Cargos, un privilexio denunciado mil e unha vez.
• Abordar unha reforma fiscal ou  artellar mecanismos administrativos para acabar co fraude fiscal e a economía somerxida.
• Reformar a estrutura administrativa do Estado eliminando as deputacións provinciais. Institucións obsoletas que só serven para aumentar o gasto público e nas que as maiorías partidarias exerce abertamente o caciquismo e amiguismo político.
• Recuperar o imposto de patrimonio e aumentar os impostos de transmisións e doazóns, e o de sociedades. Non como fixo o goberno en complicidade coa dereita populista, que eliminou o primeiro e os outros reduciunos.
• Limitar por lei os insultantes salarios, pensións e comisións dos executivos das grandes empresas e bancos.
• Deixar de participar na guerra de Afganistán. Non aos gastos militares.
• Supresión do réxime especial que bonifica nun 99% os beneficios das Sociedade de Inversión de Capital Variable (SICAV)[*].
• Eliminación do Senado, baleiro de funcións reais. Facer o mesmo coa Casa Real.
• E moitas máis, que aumenten o capítulo de ingresos do estado, para poder aumentar o gasto social e reducir a débida pública. Que pasa con todas as empresas enerxeticas e de telecomunicacións que antes eran públicas e revertian os seus benefícios nas arcas do estado e agora están nas maos dos grandes imperios financieiros?

É necesaria a participación na folga, pois do suceso desta, dependerá que se poida paralizar a imposición das medidas neoliberais que só benefician ao Capital e evitaremos que sigan impoñendo outras máis restritivas en dereitos ou mesmo a chamada "reforma laboral", non só para a función pública senón mesmo para o conxunto da Clase Traballadora.

Ainda que se está negociando o facer piquetes conxuntos e unha só manifestación, polo de agora o asunto está así.

En Ferrol haberá dúas manifestacións:

• CIG | Ferrol. Saída: ás 12 do mediodía desde Esteiro - Esquina Avda de Esteiro - Rúa Eduardo Pondal [Local CIG].

• UGT-CCOO-CSIF | Ferrol. Saída: 12 do mediodía desde a Praza Amada García diante do Edificio Administrativo da Xunta. Remata na Praza de Armas.

Centrais Sindicais na Galiza:

• Central Obreira Galega - COG
  
  
• Confederación Galaica da - CNT/AIT
  
  
• Confederación Intersindical Galega - CIG
  
  
• Confederación Unitaria de Traballadores - CUT
  
  
• Confederación Xeral do Traballo en Galicia - CGT
  
  
• Sindicato Nacional de CCOO de Galicia - CCOO
  
  
• Unión Xeral de Traballadores en Galicia - UGT
  
  
• Unión Sindical de Traballadores Galegos - USTG
  
  

Confederacións Internacionais:

• Federación Sindical Mundial - FSM
  
  
• Confederación Sindical Internacional - CSI
  
  
• Asociación Internacional dos Traballadores - AIT
  

[*] No Estado Español, unha SICAV é un instrumento financeiro que permite a elusión de impostos (evasión de impostos legal) ás grandes fortunas a través da creación dunha Sociedade Anónima cuxo obxecto social é investir en activos financeiros, rompendo coa progresividade (que pague mais quen mais ten ou gana) establecida na constitución. Gozan de importantes vantaxes fiscais, de forma que as SICAV tributan ao 1% no imposto sobre sociedades. Actualmente este instrumento de investimento é un dos máis utilizados por persoas con grandes capitais [Fonte: wikipedia].
________________