A Plataforma en Defensa da Sanidade Pública da Área de Ferrol pronuncia-se sobre as últimas medidas orzamentarias do goberno ao respecto dos recortes e a privatización da Sanidade Pública - Convocatoria do Plenario da Plataforma, para o Mércores 25 de Abril

CONTRA OS RECORTES E A PRIVATIZACIÓN DA SANIDADE PÚBLICA GALEGA.ANTE  A REUNIÓN DO CONSELLO INTERTERRITORIAL DO 18 DE ABRIL.

A crise, a redución do déficit e a falsa insostibilidade do sistema sanitario público están sendo utilizados como coartada para introducir recortes e privatizacións na sanidade galega. Con todo, o noso sistema é dos máis baratos da Unión Europea (o gasto por persoa é de 2.049 dólares,  fronte aos 2.870 dólares da UE en poder paritario de compra), e a nosa presión fiscal é das máis baixas (34% do PIB fronte a 44% da UE), cun nivel de fraude que alcanza o 25% do PIB (90.000 millóns de euros). 

Doutra banda o crecemento do gasto sanitario ten pouco que ver coa demanda de asistencia da poboación que está relacionado coa organización, funcionamento e orientación do sistema; coa falta de planificación; coa descoordinación entre hospitais e atención primaria; co abuso das tecnoloxías diagnósticas e terapéuticas (un 23% máis alto que a media europea) e da prescrición farmacolóxica; coa parasitación do sector público polo privado; e co abandono da atención primaria, da promoción da saúde e da prevención da enfermidade.
 

Despois de que a Xunta de Galicia reducira o orzamentario en 300 millóns o Goberno central pretende que fagamos máis recortes para cumprir co seu obxectivo de reducir o gasto sanitario en 7.000 millóns de euros, a concretar no Consello Interterritorial do próximo día 18 de abril cos conselleiros dos servizos de saúde autonómicos.

Entre as medidas que se están aplicando ou adiantado, a modo de globos sondas, polos responsables de algunhas CCAA e polos ministros de economía e sanidade están:

• Incrementar o repagamento farmacéutico segundo nivel de renda.
• Acabar coa gratuidade das receitas dos pensionistas.
• Repagamento por consultas e probas diagnósticas.
• Recorte da carteira servizos ofertados pola sanidade pública.
• Promoción de seguros complementarios con desgravacións fiscais.
• Colaboración Público Privada para construír e xestionar as novas infraestruturas.
• Privatización de servizos sanitarios (radioloxía, laboratorios; servizos clínicos..) e non sanitarios (administración, centrais de chamadas, alimentación, limpeza, hixiene, informáticas, avaliación tecnolóxica, planificación, centrais de compras, etc.)
• Eliminar fondos de cohesión interterritorial.
• Peche de servizos sanitarios: Hospitais e plantas, urxencias, centros de de Saúde e consultorios.
• Eliminar a actividade asistencial dos hospitais pola tarde.
• Redución de persoal e de gastos de persoal: Xubilacións obrigatorias aos 65 anos sen reposición das vacantes, despedimento ou redución do horario do persoal interino, precarización de contratos, redución salarial, laboralización, etc.

A gran maioría destas medidas atentan contra os alicerces fundamentais do noso sistema sanitario como son a universalidade, a accesibilidade, a equidade, o carácter redistributivo, a calidade e a eficiencia, e terán graves consecuencias para a maioría da poboación que recibirá unha atención de menor calidade, e terá dificultado o seu acceso á asistencia que será diferente segundo o seu nivel de renda, pagará máis por menos e deberá procurarse seguros complementarios para ser atendido polos problemas de saúde excluídos do sistema público.

Fronte á política de recortes e privatizacións é posible outra, baseada na mellora da eficiencia e o uso racional dos recursos,  para mellorar a calidade e seguridade da atención sanitaria e os niveis de saúde da cidadanía:

Concepto	Recadación copago	Aforro racionalidade
Reducir 50% os medicamentos innecesarios  >65 anos	70  millóns €	83  millóns €
Reducir 50%  ingresos por reaccións adversas aos fármacos	23  millóns €	66 millóns €
Reducir 30% os efectos adversos durante a hospitalización	0 millóns €	27 millóns €
Reducir en 1/3 as estancias inadecuadas	0 millóns €	263  millóns €
Reducir 10%  frecuentación  a urxencias hospitalarias non ingresadas	9,4  millóns €	23 millóns €
Traspasar o 25% das consultas hospitalarias a AP	44 millóns €	60  millóns €
Reducir en 1/3 as RM e TC innecesarios	4,5  millóns €	14,8  millóns €
Integración do mutualismo administrativo no SNS	4,5 millóns €	12,5 millóns €
Total	155 millóns €	549,3  millóns €

Queremos advertir ao presidente da Xunta de Galicia Sr Núñez Feijoo que non imos tolerar que o Consello Interterritorial adopte decisións ou medidas que deterioren ou privaticen o noso sistema sanitario que ten o apoio da grande maioría da poboación e esiximos á Conselleira de Sanidade Rocío Mosquera que defenda o carácter público da nosa sanidade, que se opoña a calquera medida de copago, e que se manteñan os fondos de cohesión interterritorial que compensan a nosa menor capacidade de recadar os impostos que financian a sanidade pública galega.

Desde a Plataforma pola Defensa da Sanidade Pública de Ferrol, integrada en SOS Sanidade Pública; facemos un chamamento á cidadanía galega para dar unha resposta contundente no caso de que o Consello Interterritorial do día 18 de abril adopte calquera medida que deteriore, aínda máis, o Sistema Sanitario Público Galego.

Plataforma pola Defensa da Sanidade Pública de Ferrol (SOS Sanidade Pública)

Ferrol, 17 de abril de 2012.

Asdo./ Xosé Miguel López e Lois Méndez, portavoces da Pdspf.
Para contactar coa Plataforma en Defensa da Sanidade Pública de Área Sanitaria de Ferrol:

plataformadspferrol@gmail.com
http://plataformadspferrol.blogspot.com/

No local social da Asociación Veciñal de Esteiro
Rúa Fernando VI, Bloque I baixo.
Ferrol 15403 - Telef. 981933223.

PARÉMOSLLES OS PES XA, AGORA !!
NON ESPEREMOS A QUE DESMONTEN A SANIDADE PÚBLICA !!
NON AO PECHE DO CONSULTORIO !!
POR UNHA SANIDADE PÚBLICA, UNIVERSAL E GRATUITA !!

Convocatoria do Plenario da Plataforma, para o Mércores 25 de Abril

Ademáis, aproveitamos para lembrarvos a convocatoria do Pleno da Plataforma para a Defensa da Sanidade Pública da Área Sanitaria de Ferrol para o mércores día 25 de abril ás 17:30 horas no local da AV de Esteiro.

1. Recollida dos pregos de sinaturas da Inicativa Lexislativa Popular (Tódos/as que teñan pregos teñen que levalos ese día forzosamente, non hai máis prazo).
2. Novos recortes sanitarios e propostas de mobilización fronte aos mesmos.
3. Informe económico.
4. Varios.

A xuntanza terá unha duración máxima de dúas horas, debendo estar rematada ás 19:30 horas, polo que se prega puntualidade e brevidade nas intervencións e propostas.

Queremos tamén lembrar ás entidades que non fixeron o ingreso dos 50 euros as asociacións e 100 euros os partidos e sindicatos (faltan dous partidos por ingresar e un sindicato) que o fagan canto antes.

Plataforma en Defensa da Sanidade Pública de Ferrol
www.plataformadspferrol.blogspot.com
plataformadspferrol@gmail.com





Enviado por:
Elena Casal Mera
-elenacasalmera@gmail.com-
17 de abril de 2012 23:34
___________________