A Comisión Cidadá pola Recuperación de Ferrol Vello convoca unha concentración este sábado día 8 de marzo ás 13.00 horas na Praza Vella

Concentración o próximo sábado día 8 de marzo ás 13.00 horas na Praza Vella.

COMUNICADO
6 de Marzo do 2014

A Comisión Cidadá pola Recuperación de Ferrol Vello convoca unha concentración o próximo sábado día 8 de marzo de 2014, ás 13.00 horas na Praza Vella. (É importante acudir CON CASCO)

En solidaridade cos veciños desaloxados das súas vivendas da rúa Carme Curuxeiras hai case xa dous meses e tamén para denunciar o abandono ao que as administracións públicas, tanto Xunta de Galicia coma o Concello de Ferrol, someten ao barrio de Ferrol Vello.

A convocatoria faise extensiva á toda a cidadanía da Comarca, sensibilizada con este problema.

Os acontecementos da última semana, coa caída da medianeira da casa natal de Carvalho Calero, fan aínda máis necesaria esta convocatoria.

Dende a súa adquisición hai agora tres anos o Concello de Ferrol non foi quen de mantela en axeitadas condicións de seguridade e estabilidade, incumprindo así os deberes que lle son esixibles como propietario.

Ademais foi incapaz de iniciar a súa prevista rehabilitación con fondos Urban, o que é mostra tanto dunha nula responsabilidade na xestión destes fondos públicos (que moi probablemente vanse perder) como dunha absoluta falta de vontade política na mellora do barrio e na recuperación dunha parte importante da historia da cidade.

A concentración tamén ben motivada por que se van cumprir dous meses dende que foran desaloxados os veciños da rúa Carme Curuxeiras das súas vivendas.

Dende a Comisión Cidadá consideramos que o seu desaloxo tamén é en parte consecuencia da falta de eficacia do Concello de Ferrol á hora de esixirlles aos propietarios dos inmobles e solares o deber de edificar e rehabilitar, permitindo así o abandono das propiedades, o que termina sendo prexudicial para os inmobles lindantes.

Tal é o caso dos inmobles desaloxados na rúa Carme Curuxeiras, rodeados de propiedades abandonadas polos seus donos dende hai anos, sen que o Concello de Ferrol adoptase medidas eficaces para obrigar á súa rehabilitación.

Facemos esta convocatoria extensiva a toda a cidadanía de Ferrol, pois consideramos que parar o desleixe e destrucción do patrimonio do barrio no que nasceu esta cidade é responsabilidade de todos.

Por último, aconsellamos aos veciños e veciñas que se acheguen á concentración o vindeiro sábado traigan un casco a fin de garantir unhas mínimas condicións de seguridade durante o acto, se ben a organización porá cascos a disposición dos asistentes que non o traigan.

Unha aperta

REDES:
CORREO-E: comision.cidada.prdfv@gmail.com
WEB: http://www.comision-ferrol-vello.blogspot.com.es/
FACEBOOK: http://goo.gl/bYc1vv
TWITTER: http://twitter.com/Comision_FV
FLICKR: http://www.flickr.com/Photos/ferrol_vello/sets/

Enviado por:
Comisión Cidadá Pola recuperación de Ferrol Vello
-comision.cidada.prdfv@gmail.com-
6 de março de 2014 22:48
_________________