Afiliadas e afiliados de CCOO de Ferrolterra convocan unha concentración este mércores 5 de novembro, por un sindicato ético, loitador, transparente e democrático e para que se repoña canto antes a estrutura da Asesoría Xurídica

ASEMBLEA DE CC.OO DE FERROL

O pasado venres días 24 de outubro, levouse a cabo unha Asemblea de afiliados e afiliadas de CC.OO, cunha maior afluencia que a anterior, participando na mesma 245 afiliados e afiliadas, que abarrotaron a sé do Sindicato. Na citada Asemblea, convocada polo conflito na Asesoría Xurídica, na que se demanda a reincorporación de Cartelle e unha solución definitiva ao conflito que o propio Sindicato Nacional xerou na mesma, acordouse por unanimidade non só o rexeitamento ás medidas adoptadas pola dirección do Sindicato, senón tamén o apoio firme e decidido ás propostas de mobilización que se suscitaron na mesma.

Tamén se mostrou o rexeitamento profundo á actuación levada a cabo polo Secretario Xeral do Sindicato Nacional, José Manuel Sánchez Aguión, e a Secretaria Xeral da Unión Comarcal de Ferrol, María Áurea Vázquez Estraviz que, desde o inicio do conflito, se veñen negando sistematicamente tanto a informar das decisións adoptadas como a abrir unha vía de diálogo que, pensando exclusivamente nos afiliados e afiliadas e nos traballadores e traballadoras da comarca en xeral, repoña canto antes a estrutura da Asesoría Xurídica, que contaba cun enorme prestixio sobradamente coñecido.

Esta actitude da Secretaria Xeral da Unión Comarcal, María Áurea Vázquez Estraviz, que se nega a acudir ás masivas asembleas de afiliados e afiliadas que se están celebrando, malia ser emprazada a participar en cada unha delas, pon de relevo unha actitude prepotente e irresponsable.

A Asemblea tamén acordou denunciar enerxicamente a denigrante campaña de descrédito que se está orquestrando desde o inicio do conflito. Unha campaña de descalcificacións continuada contra a Asesoría Xurídica e, en especial, contra o compañeiro Cartelle, sustentada na demagoxia e en falsidades, chegando xa a extremos intolerables, con comentarios que deben avergoñar aos compañeiros e compañeiras que os promocionan.

A Asemblea tamén acordou non tolerar esta campaña de difamación, polo que a partir de agora vaise a prestar especial atención a este feito, tanto como para tomar as medidas xurídicas oportunas como para denunciar con nomes e apelidos e publicamente as actuacións destas persoas, co fin de que teñan que xustificar e probar ante todos os afiliados e afiliadas as acusacións tan graves que están realizando.

Para alcanzar estes obxectivos, a Asemblea acordou convocar unha GRAN CONCENTRACIÓN ante a sé do Sindicato en Ferrol o MÉRCORES día 5 de NOVEMBRO, ás 18:00 horas, e solicitar o apoio de todos os presentes e do conxunto da afiliación para que esta mobilización logre que se visualice con toda claridade e contundencia o sentir e a demanda dos afiliados e afiliadas de CC.OO.

En Ferrol, a 25 de outubro de 2014.

FERRAMENTAS QUE UTILIZAMOS NA ACTUALIDADE.

BLOG: http://democraciaccoo.blogspot.com.es/
(En construción pero con 'pestanas' xa actualizadas).
TWITTER: https://twitter.com/DemocraciaCCOO
(Síguenos e difunde entre os teus contactos).
FACEBOOK: https://www.facebook.com/pages/Por-a-Democracia-en-CCOO/467813986694554
(Dálle ao 'GÚSTAME' e difunde entre os teus contactos).
EVENTO: https://www.facebook.com/events/359124597597101/
('ASISTE' á concentración do próximo día 5 de Novembro).

Un saúdo e grazas anticipadas por colaborar na causa.

POR UN SINDICATO ÉTICO, LOITADOR, TRANSPARENTE E DEMOCRÁTICO.
__________________