APOIO A FOLGA FEMINISTA DO 8 DE MARZO.
Como pai dun neno e unha nena, os quero iguais, cos mesmos dereitos.
Non quero que ningún político, ningún relixioso, ningún home, crease con dereito a decidir pola miña filla, a decidir sobre o seu corpo, sobre a súa vida. Non quero que saia a rúa con medo.
Fai pouco dicía o novo líder da ultradereita española Pablo Casado, sobre as embarazadas: "Creo que es bueno que las mujeres sepan lo que llevan dentro". Vai ser que o famoso master era de xinecoloxía e obstetricia.
Defenden agora unha "lei de apoio a maternidade". Que eu chamaría de "partos patrioticos".
A defenden os mesmos que coas súas reformas laborais fan imposible a conciliación familiar, que permiten salarios de miseria e que os servizos básicos sexan un luxo.
E veñen agora dando solucións en branco e negro, e querendo decidir como naqueles escuros tempos sobre o corpo e a vida das mulleres.
A folga feminista é ante todo unha convocatoria que denuncia ás desigualdades, as discriminacións e as violencias estruturais que sofre máis da metade da poboación mundial, as mulleres, pero tamén de reivindicación dun novo modelo social, xusto, democrático e igualitario.
Porque o feminismo é un movemento que loita pola igualdade de todas e todos.
Non é unha folga de comunistas, nin de radicais da esquerda, como pretenden dende a dereita, é unha folga de mulleres que loitan polos seus dereitos, que loitan pola igualdade.
Sen dubida a folga feminista é tamén unha resposta a un sistema baseado na desigualdade.
En todo o mundo, as mulleres gañan só entre o 60 e o 75 por cento do salario dos homes en traballo similares. A longo prazo, esta fenda salarial afecta ás súas pensións.
Na Galiza a fenda salarial entre mulleres e homes sitúase nun 30%. Esta é a porcentaxe na que debemos incrementar os ingresos medios das mulleres para igualar o dos homes e conseguir equiparación retributiva.
- As mulleres están desprotexidas fronte ás agresións sexuais e as violacións; dende 2016 cometéronse 89 agresións sexuais múltiples no Estado Español.
- A folga é unha resposta aos continuos asasinatos de mulleres pola violencia machista.
- É unha resposta a notoria expansión que está adquirindo o debate e a demanda dos ventres/úteros de aluguer, non o esquezamos, que son as mulleres empobrecidas quenes vense obrigadas a esta forma de explotación. Os ventres de aluguer serán os das fillas das traballadoras e traballadores, non das fillas dos millonarios.
- É unha resposta ao drama das miles e miles de mulleres e nenas traficadas para consumo sexual.
- É unha resposta de apoio as mulleres migrantes que sofren maiores violencias no proceso migratorio e discriminacións xenófobas e racistas.
O 8 de Marzo as mulleres participarán nunha folga histórica, será unha demostración de forza como primeiro paso a mudar o mundo.
Máis tamén serán estas mesmas mulleres as sepultureiras da ultradereita, dos que poñen en entretido os dereitos xa conquistados, dos que pretenden devolvernos a catacumba do pensamento.
A FOLGA FEMINISTA, É A FOLGA POLA IGUALDADE.
(André Abeledo, Candidato a Alcaldía de NARÓN POR DIANTE. Intervención no Pleno 28/02/2019)
Enviado por:
André Abeledo Fernández
-andre1474@gmail.com-
28 de fevereiro de 2019 20:50
________________
Por favor, o contido do seu comentario debe estar relacionado co asunto do artigo.
Prega-se o maior respecto coas persoas, polo que ataques persoais e insultos serán eliminados.
Por favor, non use os comentarios, só para facer propaganda do seu sitio ou será eliminado.
EmoticonEmoticon