sábado, maio 21, 2022

Preséntase o libro póstumo de Pitusa Arias: 'María Casares. Eu son do océano' - Este sábado 21 de maio, ás 19:30hs, no Círculo Mercantil e Industrial Unidade de Fene


O libro póstumo de Pitusa Arias preséntase este sábado 21 de maio en Fene. Trátase da novela gráfica “María Casares. Eu son do océano”, un volume que conta coas ilustracións de Carlos Sardiña. É unha obra divulgativa da vida de quen foi número un de teatro en Francia e Europa durante boa parte do século vinte. Paula Carballeira conducirá o acto de presentación este sábado ás sete e media da tarde no Círculo Mercantil e Industrial Unidade de Fene. Pitusa Arias, escritora e xornalista de Radio Fene faleceu o pasado 8 de abril.

Pitusa Arias, escritora e xornalista de Radio Fene

María Casares

Neste exercicio cúmprense os cen anos do nacemento de María Casares. No acto do Círculo de Fene tamén se presentará o podcast do mesmo nome con guión de Puri Seixido e música orixinal de Sofía Oriana Infante. Foron os intérpretes Vicky Sas, Eugenia Sanmartín, Helga Mëndez, Cristina Mariño, Rogelio Arias e Cristina Moreira. Como técnico de son Xabier Fernández e na dirección Eugenia Sanmartín. Unha produción de Son Radiofusión que contou coa colaboración da Deputación da Coruña. María Casares, nacida na Coruña en 1922, exiliada en Francia ao rematar a guerra, ao ser filla do republicano Santiago Casares Quiroga. Nunca esqueceu as súas orixes galegas. María Casares foi unha primeira figura no mundo do teatro en Francia e no mundo.

19 de Maio, 2022 - 11:14 h. | Publicada por Radio Fene.
RADIOFUSIÓN
Praza Alcalde Ramón Souto s/n,
15500 Fene (A Coruña) Galicia
981 492 773
direccion@radiofusion.eu
_______


Por favor, o contido do seu comentario debe estar relacionado co asunto do artigo.

Prega-se o maior respecto coas persoas, polo que ataques persoais e insultos serán eliminados.

Por favor, non use os comentarios, só para facer propaganda do seu sitio ou será eliminado.
EmoticonEmoticon