As traballadoras de Berskha (Inditex), despois de 9 días de folga e intensa mobilización, consiguen os seus obxectivos - Nas Asembleas de hoxe acordan por unanimidade aceptar o preacordo e desconvocar o paro indefinido

O persoal de Bershka decide por unanimidade aceptar o acordo e desconvocar a folga. | A empresa incorporará melloras sociais e avanzará na equiparación salarial de todo o persoal.

O cadro de persoal de Bershka na provincia de Pontevedra decidiu por unanimidade en asemblea aceptar o preacordo pactado onte entre e representación sindical e a dirección e desconvocar a folga indefinida iniciada o pasado venres 26 de outubro para denunciar a discriminación laboral con respecto ás compañeiras/os doutras provincias. O acordo contempla a incorporación de todas as medidas sociais que reclamaban e avanza na equiparación salarial, xa que Berskha terá que pagarlles 120 dos 130 euros en pluses que cobran o persoal da Coruña.

Foi precisamente este último aspecto o que frustrara o acordo na primeira xuntanza celebrada entre as partes, e a piques estivo onte de volver a facelo ante a negativa da empresa a abonarlles o plus de 50 euros do que si gozan as traballadoras/es coruñesas/es (Bershka si aceptara pagar o plus de 80).

Na primeira reunión as negociadoras da empresa unicamente ofrecían 10 euros do plus de 50, pero a determinación das traballadoras/es, que seguiron coa folga e volveron a mobilizarse diante da sede central de Inditex en Arteixo, fixo que tivesen que sentarse de novo. As empregadas/os, pola súa parte, amosaron incluso a súa disposición a aceptar unicamente a metade do plus, 25 euros, ofrecemento que non foi atendido pola compañía.

Mais no segundo encontro entre Bershka e a representación das traballadoras/es, celebrado onte e que rematou xa de noite, as partes chegaron finalmente a un preacordo que contempla tanto a aplicación das melloras sociais que reclamaban (vacacións, permisos e excedencias, tempo de descanso, lactancia, conciliación familiar e incapacidade permanente) como abono do plus de 80 euros, mentres que do de 50 ingresarán un total de 40 euros (30 en 2018 e 10 en 2019).

Consolidar horas complementarias

Este plus permanencia de 80 euros ao mes é para todas as traballadoras/es independentemente das xornada que fagan, será de 16 pagas e revisábel o 1,5% anual. Ademais, a empresa comprométese a abonar os atrasos dende o mes de xuño. O plus de empresa queda fixado en 40 euros mensuais para o persoal a xornada máxima, mentres que o resto de xornadas recinirán a parte proporcional. Tamén será en 16 pagas e revisábel o 1,5% anual.

Outras das melloras económicas logradas pasan por un incentivo do 1,6% para as terceiras encargadas/os, o que supón o recoñecemento da responsabilidade que desenvolven na tenda cunha porcentaxe da venda tal e como perciben as primeiras e segundas encargadas; un abono de 80 euros por cada día de asuntos propios non gozado ao longo do ano; e un abono de 150 euros por nacemento ou adopción de fillo/a.

No que respecta ás horas complementarias que as empregadas/os están obrigadas/os a facer a pesar de que o 90% ten contrato a tempo parcial, lograron a consolidación como aumento de xornada do 15% do total das que se fagan cada ano no conxunto da provincia, asignando este aumento por criterio de antigüidade. A empresa comprométese a estudar un procedemento de consolidación de xornada para aqueles tramos de entre 30 e 40 horas, de xeito que se adapte á literalidade do convenio, ben mediante unha bolsa de horas de consolidación ou incrementado a xornada durante o período necesario, se ben non se poderá superar o mes consecutivo.

Ao mesmo tempo, os calendarios de todas as xornadas limitaranse a un máximo de tres peches semanais. A empresa comprométese a que as traballadoras/es con xornadas parciais contratadas a data do acordo se adecuarán aos calendarios limitándose o número de peches a tres, se ben, as futuras contratacións realizarán o número de peches preciso para cubrir as necesidades organizativas da empresa derivadas desta limitación na distribución horaria.

Tamén se establece un sábado libre mensual para todas as traballadoras/es, se ben as encargadas/os gozarán de 12 sábados libres ao ano, que se poderán regular en función das necesidades da tenda, podendo gozar de dous sábados acumulados no mesmo mes e de tres sábados en quenda de mañá. Isto significa que todas as empregadas/os terán o mesmo tempo de descanso.

A pausa diaria para o café pasa a ser de 10 minutos para as xornadas inferiores a cinco horas, de 30 minutos para as xornadas de entre 5 e 6 horas e media, podéndose fraccionar en dous descansos, e para as xornadas de 7 horas en diante o descanso será de 40 minutos, podéndose fraccionar tamén en dúas pausas. Isto suporá unha importante redución de xornada anual.

Determinación das traballadoras/es

A secretaria nacional da CIG-Servizos, Transi Fernández, valorou moi positivamente o acordo alcanzado coa empresa, até o punto de soster que superou as pretensións marcadas inicialmente polo cadro de persoal, e amosouse convencida de que non tería sido posíbel sen a determinación amosada polas traballadoras/es durante os nove días de folga. “Foi un conflito unitario de longa duración contra unha grande empresa como Inditex no que atopamos moitas dificultades, como ter boa parte dos medios de comunicación en contra, mais coa forza das traballadoras/as conseguimos arrincar un bo acordo”, indicou.

Finalmente, lembrou que o persoal de Bershka está a vender bonos solidarios para paliar na medida do posíbel os efectos económicos da folga sobre as afectadas/os, que por outra banda tamén contarán coa axuda da caixa de resistencia da CIG. Con todo, durante as negociación tamén lograron que Bershka lles abone os días de folga do mes de novembro “entendendo que deberan ter chegado a un acordo xa na primeira reunión, celebrada o martes 31”.

Máis info sobre os motivos e o desenvolvemento da Folga. | Ir á Web.

A Folga no buscador libre DuckDuckGo.

Fonte: Avantar. |  Vigo, 4 de novembro, de 2017. | Baixo unha licenza Creative Commons.

______________

Os cinco establecementos de Bershka na provincia de Pontevedra (tres en Vigo, un en Pontevedra e outro en Vilagarcía), permanecen en Folga - Unha significativa loita contra a discriminación laboral, nun momento onde Inditex, reparte varios miles de millóns de euros entre os seus accionistas e Amancio Ortega, leva máis de 628 millóns no reparto de dividendos que a final de ano seran 1.256 millóns de euros - Vídeo da concentración en Arteixo, diante de Inditex, do pasado luns 30 de outubro

Continúa a folga en Bershka na provincia de Pontevedra cun seguimento total e co peche de todas as tendas. | A representación do persoal mantivo unha primeira xuntanza coa dirección que rematou sen acordo.

A folga convocada en todos os establecementos de Bershka na provincia de Pontevedra chegou hoxe ao seu sexto día cun seguimento total por parte das arredor de 65 traballadoras/es, que volveron concentrase ás portas das tendas aproveitando que unha xornada máis tampouco abriron as súas portas. A representación das traballadoras/es mantivo unha primeira xuntanza en Santiago coa dirección da empresa que rematou sen acordo, polo que o paro indefinido continuará até que remate a discriminación laboral na cadea pertencente ao grupo téxtil Inditex.

Os cinco establecementos de Bershka na provincia de Pontevedra (tres en Vigo, un en Pontevedra e outro en Vilagarcía) permaneceron por sexto día consecutivo sen actividade como consecuencia da folga convocada polo comité de empresa (cinco delegadas da CIG) contra a discriminación laboral que padecen as empregadas/os pontevedresas/os con respecto ao persoal doutras provincias.

Ao igual que nas xornadas anteriores, as traballadoras/es concentráronse dende primeira horas ás portas das tendas, onde aproveitaron para repartir folletos informativos e recibiron o apoio da veciñanza. De feito, o conflito laboral está a espertar unha gran vaga de solidariedade non só no país senón tamén no conxunto do Estado a pesar do silenciamento informativo de boa parte dos medios de comunicación.

Posteriormente, a representación do cadro de persoal trasladouse até Santiago para manter unha xuntanza coas responsábeis de recursos humanos da empresa, que accedeu a manter a reunión tras a protesta desenvolvida onte polas traballadoras/es diante das instalacións de Inditex en Arteixo. O encontro prolongouse dende as 13:00 até case as 21:00 horas, e a pesar de que se achegaron posturas con respecto a algunhas das reivindicacións o acordo non foi posíbel pola negativa da empresa a aceptar as reclamacións económicas do cadro de persoal.

Tanto o contido da xuntanza como a continuidade da folga e das mobilizacións serán abordadas na asemblea de traballadoras/es que se celebra este mércores no local da CIG en Vigo a partir das 10:30 horas e na que participarán tamén as empregadas/os de Pontevedra e Vilagarcía.

Exemplo de loita

Entre os apoios chegados dende distintos puntos do Estado salienta o da central sindical vasca LAB, que fixo público un comunicado no que lle traslada o seu apoio e solidariedade ao persoal pontevedrés de Bershka, “xa que nos parece que a forza e a solidariedade entre todas as traballadoras/es de todas as marcas de Inditex en todo o mundo é indispensábel para facerlle fronte a unha multinacional que se aproveita da man de obra precaria de milleiros de traballadoras/es para multiplicar os seus beneficios”.

Neste senso, sosteñen que o exemplo das empregadas/os de Pontevedra amosa, unha vez máis, a importancia da loita colectiva. “Non nos regalan nada, e se nolo poden quitar, fano, sexa mediante reformas ou cambios de lexislación; polo tanto, é imprescindíbel o compromiso de loita de cada unha das traballadoras/es de Inditex en defensa dos dereitos conseguidos até o de agora e por mellorar condicións laborais totalmente asumíbeis por absolutamente todas as marcas do grupo téxtil”.

Lembran que Inditex gañou 3.157 millóns de euros en 2016, o que supón un aumento do 10%, e que “aínda que Amancio Ortega intente comprar o silencio das traballadoras/es con pagas de beneficios de dubidoso obxectivo fiscal, as que traballamos día a día para as marcas do grupo sabemos que para esta multinacional as empregadas/os somos un mero instrumento para aumentar os seus beneficios”.

Así, denuncian que a temporalidade, a flexibilidade, a carga de traballo, os baixos salarios, en resumo, a precariedade, “son o pan de cada día nos nosos centros de traballo”. Finalmente, esixen que as empregadas/os do comercio, un sector amplamente feminizado, “deixemos de ser traballadoras/es de segunda e teñamos unhas condicións laborais dignas que nos garantan capacidade adquisitiva, respecten o noso dereito ao descanso e ao ocio, á conciliación da vida laboral e familiar, á saúde laboral, en definitiva, a unha vida digna”.

Máis info sobre os motivos e o desenvolvemento da Folga. | Ir á Web.

A Folga no buscador libre DuckDuckGo.

Fonte: Avantar. |  31 de outubro de 2017. | Baixo unha licenza Creative Commons.


Vídeo no 4º día de folga en Bershka - protesta na sede de Inditex (Arteixo, 30.10.2017). | Traballadoras de Bershka da provincia de Pontevedra, que están en folga indefinida dende o 26 de outubro, trasladaron este luns até a sede de Inditex en Arteixo as súas protestas en demanda da aplicación das melloras laborais pactadas noutras provincias e rematar así coa discriminación que padecen.
___________