O Concello publica o Orzamento Municipal Xeral para o 2021
O alcalde, Ángel Mato, lembrou esta mañá que as contas para este ano reflicten o “proxecto de cidade” do goberno local para “contribuír á saída da crise” e “reactivar a economía local”. As contas para este ano, en vigor desde hoxe mesmo, ascenden a 86.869.243,11 euros
O Boletín Oficial da Provincia (BOP) publicou onte a aprobación definitiva do Orzamento Xeral do Concello de Ferrol para o exercicio económico de 2021 tras saír adiante na sesión plenaria celebrada o pasado 26 de agosto cos votos a favor do PSOE, FeC e o BNG e en contra do PP.
O alcalde, Ángel Mato, lembrou que as contas para este ano, en vigor desde hoxe mesmo, ascenden a 86.869.243,11 euros e reflicten o “proxecto de cidade deste goberno” nun documento “moi ambicioso” que busca “contribuír á saída da crise a través da creación de emprego” ao tempo que “reactivar a economía local”. Neste punto, o rexedor incidiu en que o orzamento municipal busca “compensar os esforzos que están a desenvolver outras administracións”.
Mato recalcou que se dedica “especial atención” ao capítulo de investimentos, que supera os 22 millóns de euros, co fin de “mellorar o estado da nosa cidade” a través das obras previstas, como a reurbanización das rúas da Igrexa e Pardo Baixo, a estrada da Castela ou o acondicionamento do parque de personaxes populares e o de Fontelonga, entre outras actuacións.
Fonte: Web Oficial Concello de Ferrol.
✔ Doc no BOP d'A Coruña, publicado o 30 de agosto de 2021. | Aprobación definitiva do Orzamento Xeral do Concello de Ferrol para o exercicio económico de 2021 - Anuncio - 4 páxinas e pdf. | Acceder/Baixar.
_______