Acompañarán á autora ás feministas Sonia Mouriz e Lupe Ces; e o antropólogo e economista Marcos Lorenzo.
"Pérez. Historia dun triunfo"
de Llerena Perozo Porteiro [*]
Editorial Galaxia
Sen afastarse nunca do sentido do humor, apelando sempre á falibilidade humana e á empatía, a autora condúcenos nun relato áxil a través de vidas entrecruzadas. Un home de pro, machista militante e con éxito social, unha esposa sometida, unha nai rebelde, dúas migrantes vítimas do mundo da prostitución, outras dúas mulleres procedentes do rural abocadas ao servizo e unha moza urbana que conta coas ferramentas para revolucionar o mundo, dan forma a esta historia de supervivencias.
Cada unha das protagonistas, e todas xuntas, vanlle dar un novo sentido ao concepto do triunfo. Daquela, estamos tamén ante unha historia de xustiza poética, de rebelión, de esperanza.
[*] Llerena Perozo Porteiro (Vigo, 1974), non ten un oficio ao uso. Na actualidade vive na Gargalleira (Silleda), onde habita un proxecto vital e social de volta á natureza, ao rural e á cultura. Ademais do seu activismo ecofeminista, traballou ata hai un tempo nos eidos profesionais da cultura (produción audiovisual e editorial), o medio ambiente e a igualdade. Publicou dous libros de divulgación sobre estes temas e varios outros, tamén contos e narracións para xente nova, no marco de campañas educativas.
_______