mércores, maio 12, 2010

Navantia: 11 de Maio de 2005 - Para non esquecer - Acidente mortal na fragata norueguesa F-311 'Roald Amundsen' - Enlace documentario

In memorian
  • Ana Belén Paz Vilariño
  • Eduardo González Val
  • Juan Carlos del Real Gamundi
  • José Luis Veiga Infante
O 25 de Maio de 2005 estaba prevista a botadura, nos estaleiros de Bazán [Navantia-Ferrol], da fragata norueguesa F-311 “Roald Amundsen”. Todo preparado, a xerarquía de mando presionando de arriba a baixo no escalafón, todo ten que estar listo e preparado para o día "D", moitas autoridades e altos mandos militares das dúas armadas van estar presentes no estaleiro ese día.




Era o 11 de Maio de 2005, 14 días antes do día "D", ao día seguinte ía-se a realizar un simulacro de botadura. Corría presa, polo que entre moitas ordenes dadas a todos os gremios e contratas e subcontratas, tamén ordenaron a limpeza dos tanques.

Á empresa de limpeza Mainfer [Mantementos Integrais de Ferrol], ordeanaron-lle tamén a limpeza duns tanques. Eduardo González Val [de 30 anos de idade], Juan Carlos del Real Gamundi [de 48 anos de idade] e Ana Paz Vilariño [de 29 anos de idade], eran tres das persoas encarregadas da tarefa de limpeza. No tanque, de apenas catro metros cadrados e dous metros de altura. A primeira hora da mañá entraba no tanque Ana que ao pouco se desvaneceu quedando tendida no chan. A súa compañeira que a axudaba desde fóra deu a voz de alarma e outros dous compañeiros que se atopaban ao lado, Eduardo e Juan Carlos, baixaron a socorrer a Ana, máis tamén perderon o coñecemento, o soldador da empresa Tecnymo, José Luís Veiga Infante, de tan só 25 anos de idade, correu a mesma sorte ao pretender auxiliar ás outras vítimas.




O día anterior realizaran a soldadura dunha tubaxe con gas argón, tras a que, ao parecer, non se seguiron as normas establecidas de peche da "chave nodriza" e a colocación dunha mangueira. Houbo unha fuga de gas argón que se acumulou nese tanque. O argón é un gas que normalmente se utiliza en tarefas de soldadura, ten a función de eliminar o osíxeno no ponto onde se solda para evitar unha posíbel oxidación da peza soldada. O argón é máis pesado que o aire e ao depositar-se no tanque desprazou o osíxeno, o que impediu a respiración. No tanque non había ningunha cota de osíxeno, polo que cando entraron nel, perderon o coñecemento e a vida. Unha investigación, posterior, ao sinistro apunta a que non se fixo a preceptiva medición de gases no tanque. Conclusións dun informe preliminar do accidente, apuntaban a unha "fuga de argón" como causa da morte da traballadora e traballadores no interior do tanque da fragata norueguesa.




Falta da aplicación das medidas de prevención? Fallo humano? seguro que en parte foi iso, consideramos que Navantia ten elaborado diferentes protocolos e normativas en materia de seguridade, mais fai que se cumpra? probabelmente hai máis formalismos e improvisacións que cumprimentos reais, pesan máis a productividade e o cumprimento de prazos que a vida e seguridade das persoas. Había moita présa por rematar, xa mencionamos que o calendario apretaba, pois ao día seguinte ía-se facer un simulacro de botadura e só quedaban 14 días para a de verdade.

Que é o que falla? Falla o propio sistema de traballo, baseado na subcontratación, na precariedade, no papel fundamental das chamadas "compañias", case sempre con persoal moi presionado pola eventualidade, con contratos en fraude de lei, con baixos salarios, complementados co seu traballo en sábados, domingos, festivos, noites, horas extra, ... diñeiro en negro e longas xornadas laborais. Navantia tirara á baixa os precios para facer-se co contrato. Onde estaleiros alemáns e noruegueses facían só tres fragatas, Bazán ofertou cinco. Quen ía sufrir este recorte orzamentario estaba claro, as traballadoras e traballadores que se deixan a saúde e a vida no estaleiro.

Anexos

No Xulgado

O pasado mes de Marzo deste 2010, no Xulgado de Instrución nº1 de Ferrol, os familares das persoas falecidas presentaron un escrito de acusación por supostos delitos contra a seguridade dos traballadores e de homicidio por imprudencia grave, aos que daquela, na data dos feitos, eran o encargado de Mainfer; delegado sindical de Riscos Laborais de Mainfer; administrador único de Mainfer; xefe do buque; xefe de zona do buque; xefe do servizo de Prevención de Riscos Laborais de Navantia e director de Navantia. Tamén presentaron escrito de acusación por suposto delito de homicidio por imprudencia grave a un soldador e ao encargado da auxiliar Montajes Nervión. Solicitando a responsabilidade civil ademais de aos nove acusados, ás aseguradoras Musino, HDI Internacional e Zúric, e a Navantia-Ferrol, Montaxes Nervión e Mainfer.

Documentario de moito interese

Unha canle da TV norueguesa, elaborou un excelente documentario sobre os feitos ocorridos o día 11 de maio de 2005 nas instalacións de Navantia-Ferrol. Desde a nosa opinión este documentario dá as claves da situación e de como se traballa en Navantia-Ferrol, un moi bon documentario que fai reflexionar, e un moi bon documentario para a formación sindical que se ten que transformar en acción, para que as cousas cambien.

Enlace documentario:

https://tv.nrk.no/se?v=PRHO85003005&t=441s


O documentario traballa coa hipótese:

Que ... "o esaxerado baixo prezo do contrato das fragatas pode ter levado a graves deficiencias na calidade dos buques e pode ter afectado a vida e á saúde dos traballadores españois". ...

Canle TV - Brennpunkt
Titulo: Lik i Lasten
"Roald Amundsen"
Caden a - NRK
Produsent: NRK Program Riks Bergen
13. desember 2005
Punto Focal - Igualdade na carga

Jornalistas
Coordenación do Programa Astri Thunold, NRK, Bergen
Idéia e pesquisa Synnøve Bakke, NRK, Bergen

https://tv.nrk.no/serie/brennpunkt/2005/PRHO85003005

Documento:

METODERAPPORT
Informe sobre o documetario noreguese

http://www.skup.no/Metoderapporter/2005/19-Lik_i_lasten_-_NRK_Brennpunkt.doc

Tradución do documento do norueguese ao galego coa ferramenta de google tradutor:

http://translate.google.com/translate?hl=pt-BR&sl=no&tl=gl&u=http%3A%2F%2Fwww.skup.no%2FMetoderapporter%2F2005%2F19-Lik_i_lasten_-_NRK_Brennpunkt.doc
_____________________

4 comentarios

A historia non foi exactamente así. Polo que se dixo entonces. A traballadora non entrou nese lugar porque llo mandaran. De feito dise que tal local estaba pechado. Era un tanque. ELA pideu un desparafusador e abriu a porta que o pechaba (de feito eu traballaba nunha empresa en navantia entón e deuse orde por parte da empresa de que non se prestase ferramenta a outras empresas e traballadores)

Cando aconteceu o accidente a media maña parouse o chollo. Mandaron deixar todos de traballar. Houbo uns días por festivos e pontes na que non se traballou. Ao primeiro día de volta ao traballdo. TODOLOS traballadores agardamos nos buques a que viñesen os de seguridade (do estaleiro e demáis empresas) pra autorizar o chollo e ver que todo estivese correcto. Pasamos horas parados. A partires das 10-11 da mañá quedou claro que non ía vir ninguén. Ninguén veu. As empresas de montaxe, soldadura deron orde aos seus traballadores de recoller todo o que tiñan nos buques. Mangueiras, equipos de soldadura... levaron todo dos buques. E durante días non volveron ao chollo
Despois de isas mortes TODO continou igual

A calidade do chollo? Bazán non da o mesmo chollo á mesma empresa noutro buque. Deste xeito nin a empresa nin os traballadores teñen experiencia no que fan. Obviamente a productividade traballando así é baixa e os traballadores carecen de cualificación

Bou dar outro botón do trato que reciben os traballadores. A un dos que entrou nese tanque e o sacaron os bombeiros e salvouse. Tivo outro accidente traballando xa pra outra empresa en navantia un tempo despois. Un accidente na man (nada grave) estando de baixa por ise accidente o chamaron da empresa: que se dera de alta, lle dixeron. El dixo que todavía non estaba recuperado de todo. Pero pideu a alta...

Á semana seguiente botárono da empresa

Estimado Nemigo, está moi bem o teu contributo a este assunto, obrigad@s polo mesmo. Mas nom vemos porque afirmas que "A traballadora non entrou nese lugar porque llo mandaran", mas tampouco dis qual foi o motivo polo que entrou. Nom cremos que tomara a iniciativa de entrar no tanque porque sim, sem mais, ... Hai um informe da inspecçom de trabalho ao respeito que o Comité de Empresa deve ter, ademais doutros informes ... que parece ser que fórom os que servírom de base para iniciar o processo judicial aberto o passado mês de Março.

Recomendamos-che que vejas o documentário, que é moi bom e clarificador.

De todos os jeitos obrig@s de novo polo teu contributo.

Saúde e Liberdade !

Polo CA21
Inácio

como xa poño máis arriba: digo o que me dixeron e escoitei

Nun local PECHADO non pode entrar ninguén ata que o faga os responsables de seguridade. Isa empresa de limpeza o que fai é o chollo que lles din. Mándanos limpar nunha zona (proa, popa) onde sexa e van alí. Limpar toda isa zona. En xeral

Que foi ela quen abriu ese local pechado tamén se dixo no seu momento. Iso e que pediu (ELA) un desparafusador pra abrir o local. Eu traballaba pra empresa do que lle deixou o desparafusador. Despois de acontecer o accidente a empresa ORDEOU que non se prestase ferramenta a ninguén

Se isto foi asi ou doutro xeito forma parte da historia. En navantia traballan así e pasan istas cousas

outro detalle que non se menciona foi o que aconteceu cando se tentou avisar da desfeita. Nos buques había un sistema de emerxencia con interfono pra avisar. Por todo o buque hai micrófonos conectados a unha caseta de emerxencia onde esta un bombeiro. Ise sistema non funcionou polo que posiblemente se retrasase a petición de axuda


Por favor, o contido do seu comentario debe estar relacionado co asunto do artigo.

Prega-se o maior respecto coas persoas, polo que ataques persoais e insultos serán eliminados.

Por favor, non use os comentarios, só para facer propaganda do seu sitio ou será eliminado.
EmoticonEmoticon