O PP e as Casas Baratas

amadeo -avarela36@mundo-r.com- 15 de março de 2009 13:34

Con motivo do resultado das pasadas eleccións ó Parlamento galego, os veciños das Casas Baratas que non queremos o derribo, vémonos outra vez ameazados polos de sempre. Parece que o PP ten unha manía enfermiza polo derribo dos nosos fogares. Xa que logo, nunha xuntanza extraordinaria, a Asociación San Fernando decidimos sacar á luz pública algunhas das incoherencias dese partido político

Comezaremos este venres coa instalación dunha mesa na Praza de Armas, donde entregaremos o seguinte escrito:

O PP de Ferrol e as Casas Baratas de Recimil.

A .- Os intentos de compra das Casas Baratas

Ao longo da historia das Casas Baratas, os veciños protagonizaron varios intentos de compra das súas vivendas dos que destacan tres:

1.- Ano 1987. É Alcalde o Sr. Couce Doce. Goberna AP en maioría absoluta.

No Pleno do 10 de Outubro, o PSOE presenta unha moción para crear unha Comisión Institucional que estude o acceso á propiedade, para os veciños das Casas Baratas.

A moción apróbase por unanimidade de todos os grupos políticos do Concello (AP, CDS, PC e PSOE), pero o presidente da Comisión (AP), antes protagonista dun intento de derriba, boicotea o funcionamento da Comisión e anúlaa, rompendo o acordo unánime de forma unilateral e ilegal.

2.- Ano 1993. É Alcalde o Sr. Couce Pereiro. Gobernan PSOE e EU en coalición.

Tamén nun Pleno do 10 de Outubro, o BNG presenta unha moción para crear outra Comisión que estude a venda das Casas Baratas aos veciños.

De novo apróbase por unanimidade (BNG, EU, PP e PSOE). A Comisión funciona varios meses e logo dun informe favorable do Secretario Municipal, o Concello contrata unha Empresa para os traballos de división horizontal e valoración das vivendas, pero....

As eleccións repón no goberno municipal ao PP que, de forma unilateral, rompe de novo un acordo unánime e anula todo o feito.

3.- Ano 2000. É Alcalde o Sr. Belo Costa. Gobernan BNG e PSOE en coalición.

O grupo de goberno encarga un estudo para verificar a posibilidade de rehabilitación das Casa Baratas. Este estudo inclúe unha enquisa sobre a intención de compra dos beneficiarios titulares.

En abril do 20001 recíbese o informe encargado e o Concello comeza xestións coa Xunta gobernada polo PP, para a rehabilitación da barriada e a posterior venda das vivendas.

Hai un principio de acordo verbal entre o Alcalde e o Conselleiro Sr. Cuíña, para a intervención sobre "un bloque piloto", pero de novo entra a gobernar o PP en Ferrol e rebenta todo.


B.- A desafectación patrimonial.

En novembro do 2004 recíbese no Concello o "Expediente de Desafección do Barrio de Recimil, Ferrol". Trátase dun informe - de autoría anónima, pois ninguén o asina - infestado de erros e falsidades, que foi encargado polo grupo de goberno (PP - IF), con obxecto de utilizalo para eliminar a protección patrimonial que existe para as Casas Baratas, sen cuxo requisito a derriba non resulta posible.

Este informe é levado a un Pleno Extraordinario, o 12 de Xaneiro do 2005. O PP apoia co seu voto ese compendio de mentiras entre as que figuran descualificacións ao barrio - chamándolle "gueto" e "foco de delincuencia e drogas" ademais de insultar aos veciños, aos que considera "degradados". E apróbase cos seus 13 votos contra os 12 da oposición.


C.- A rehabilitación.

O 21 de Xuño do 2006, celébrase no Parlamento de Galicia un debate sobre Recimil, que finaliza co acordo unánime dos tres grupos parlamentarios - PP, PSOE e BNG ? que aproban unha "Proposición NON de Lei" para:

"Instar á Xunta de Galicia a que, xunto co Concello de Ferrol (...) adóptese unha intervención rehabilitadora e de renovación urbana do barrio de Recimil ..."

O 30 de Xuño do 2006, o Pleno Municipal aproba unha moción do Alcalde Sr. Juncal, que busca o consenso para solucionar o tema de Recimil.

A moción está redactada nos mesmos termos que a aprobada no Parlamento, e resulta aprobada por todos os grupos, con excepción de IF, que segue defendendo a derriba.


D.- As Eleccións Autonómicas.

Con motivo das eleccións Autonómicas do 2009, o PP presenta o seu programa, que no referente a Recimil propón conservar o "Grupo I" (Praza de Sevilla) e derrubar o resto.

E agora, co PP de novo para gobernar na Xunta, o PP ferrolán fai gala da súa prepotencia e ESIXE ao Alcalde PARTICIPAR no futuro de Recimil. Pero, en que futuro?

marzo de 2009.

Asociación San Fernando de Recimil
www.telefonica.net/web2/asociacionsanfernando
sanfernandorecimil@mundo-r.com
____________________