O premio Nobel da Guerra

"A guerra é a paz" era un dos tres lemas da implacable ditadura planetaria presidida por un personaxe simplemente chamado O Gran Irmán, que imaxinou o escritor británico George Orwell a mediados do século pasado na súa novela 1984. Un postulado moi semellante pronunciou onte o presidente Barack Obama ao recibir o premio Nobel da Paz na capital norueguesa, nunha cerimonia magna e solemne que non bastou para minguar o azoro de amplos sectores da opinión pública mundial que asistiron á conversión desa presea nunha exaltación de virtudes guerreiras.

Na circunstancia, Obama, comandante en xefe dun abafador aparello bélico que durante oito anos causou miles de mortos inocentes entre as poboacións de Iraq e de Afganistán, buscou xustificar a insólita incongruencia de recibir o galardón mediante piruetas conceptuais, mentiras chairas -como no caso do aserto de que Estados Unidos nunca pelexou unha guerra contra unha democracia, coma se non fosen actos de guerra as sanguentas intervencións de Wáshington contra as presidencias democráticas de Francisco Madero, en México; de Jacobo Árbenz, en Guatemala, e de Salvador Allende, en Chile, por citar só tres casos en América Latina- e unha oratoria brillante, pero carente de sentido.

E é que non hai forma de disfrazar á poboación afgá, regularmente masacrada polas forzas aéreas das nacións ocupantes, como equivalente moderno das hostes hitlerianas; argumentar que a presenza bélica de Estados Unidos en Iraq é unha medida "defensiva" ou que a proxección militar de Wáshington en diversas rexións do mundo corre parella cunha preocupación pola defensa dos dereitos humanos, cando Obama, quen está próximo a cumprir un ano no cargo, non conseguiu nin sequera o peche do campo de concentración establecido en Guantánamo polo seu antecesor.

Non hai escrúpulo posible na mención de figuras como Mahatma Gandhi, Martin Luther King ou Nelson Mandela como xustificacións para a sórdida e violenta historia do intervencionismo estadunidense no mundo, e menos aínda como inspiradores das guerras de rapiña que o goberno de Obama herdou da administración pasada e que mantén e agudiza hoxe día.

Ata onte, o presidente Obama mantívose alleo, nos seus discursos, á sistemática distorsión de valores éticos e de feitos históricos. Pero, ao recibir un premio de paz defendendo a pertinencia da guerra, e en concreto de guerras neocoloniales e depredadoras que non garanten a seguridade nacional de ninguén, senón que serven para xerar oportunidades de negocio aos aparellos industriais, comerciais e financeiros dos países atacantes, o mandatario exhibiu a magnitude da súa abdicación fronte aos intereses de tales aparellos e a continuidade, en Estados Unidos, das principais distorsiones introducidas pola administración Bush na concepción e a práctica do dereito internacional, os dereitos humanos e a xustiza.

En suma, en case un ano de exercicio do poder, Obama non puido ou non quixo converter en feitos as singularidades positivas da súa figura política -parcialmente afroestadunidense, liberal, antigo activista social comprometido-, singularidades que xeraron desbordadas expectativas de cambio, tanto en territorio estadunidense como fóra del. Polo contrario, ante o Comité Nobel de Oslo presentouse un home moralmente derrotado que empezou a asumir os argumentos chovinistas e mentireiros de quen eran "supúñase" os seus adversarios, discurso co que a todo o longo o século XX e na década actual pretendeuse dar un verniz de respetabilidade a unha traxectoria nacional de saqueo violento do mundo e a unha hexemonía que se traduce en esquemas de dominación ignominiosa doutras nacións.

Por outra banda, a decisión dos académicos noruegueses de entregar a Obama unha sorte de "Nobel preventivo" que habería de contribuír a reforzar as tendencias antibélicas no poder público de Estados Unidos, revelouse como profundamente equivocada; pola contra, o premio significou unha sorte de permiso para matar, é dicir, unha espléndida coartada coa cal o xefe de Estado da superpotencia podería xustificar calquera acto de guerra e de barbarie en nome da seguridade nacional, a promoción da democracia ou, simplemente, a paz.


Editorial do 11 de decembro de 2009 no xornal mexicano "La Jornada"
________________