Ante a "situación que está a atravesar a nosa comarca no ámbito económico, social e laboral", o Consello Comarcal do BNG propón unha xuntanza en réxime de autoconvocatoria para "... estruturar un ente plural, permanente e operativo que se constitúa como aglutinador e interlocutor das demandas de Ferrolterra ... "

Primeiro encontro para o vindeiro Xoves dia 23 de Febreiro, ás 19 horas no centro cultural “Torrente Ballester” de Ferrol
. . .

A situación que está a atravesar a nosa comarca no ámbito económico e laboral – tamén no social –convértese en crítica; por mor da falta de políticas claras que aborden dun xeito claro e inmediato un proceso de defensa dos nosos sectores produtivos tradicionais e, en paralelo, novas accións no campo da industrialización e da defensa de sectores primarios potenciais ( marisqueo, madeira...).

Organismos estatais e internacionais vinculados ao poder financieiro están a facer previsións negativas para os próximos anos, previsións que aplicadas aos datos comarcais sobre da elevada taxa de paro -perto de 20.000 persoas-, do número de fogares que sobreviven tendo como único ingreso unha pensión, do incremento exponencial dos EREs, do peche progresivo de medianas e pequenas empresas , da falta de carga de traballo no sector naval, da preocupante porcentaxe de mozas e mozos aos que non lles queda máis alternativa que a emigración, debuxan un panorama no que nengún dos axentes sociais da nosa comarca podemos nen, sobre de todo, debemos mirar para outro lado.

Desde o BNG defendemos sempre que era preciso actuar co maior grao de unidade entre as forzas sociais, sindicais, empresariais e políticas do ámbito comarcal; pero que esa unidade tiña que ter logo unha translación a decisións políticas por parte dos diversos gobernos con accións urxentes e concretas. Lamentabelmente, desde hai moitos anos isto non é así.

Mais acreditamos, sobre todo, que a unidade non pode reducirse á convocatoria de mobilizacións esporádicas -cando a situación non é coxuntural – e por iso precisamos dun mecanismo de acción que nos diversos ámbitos presione, vixíe e comprometa realmente as solucións que a comarca está a demandar desde hai décadas.

Nesta reflexión – que sabemos é compartida por moita outra xente – a nosa organización valora a urxente necesidade de estruturar un ente plural, permanente e operativo que se constitúa como aglutinador e interlocutor das demandas de Ferrolterra, Eume e Ortegal perante os gobernos do estado e galego; sexa no ámbito socio-económico, das infraestruturas, etc….

Lonxe de calquera intento de protagonismo ou patrimonialización por parte de ninguén, desde o BNG avogamos por celebrarmos unha autoconvocatoria do conxunto de entidades, asociacións, forzas sindicais, organizacións políticas, institucións….; na que podamos facer esa reflexión conxunta e, no seu caso, articular propostas de actuación na defensa da comarca, na defensa do noso futuro.

Con ese obxectivo, consideramos a posibilidade de celebrarmos ese primeiro encontro para o vindeiro Xoves dia 23 de Febreiro, ás 19 horas no centro cultural “Torrente Ballester” de Ferrol, para o que desde o BNG fixemos xa a oportuna reserva do devandito local.

Na seguridade de contarmos coa súa participación, aproveitamos para enviarlles un cordial saúdo.

Ferrol, 7 de Febreiro de 2012.

Asdo.- Francisco da Silva Vello. Responsábel Portavoz Comarcal do BNG.

CONSELLO COMARCAL DO BNG-FERROLTERRA
Rúa Naturista López Seoane, 13-baixo-FERROL / ferrol@bng-galiza.org / 981364058


Bloque Nacionalista Galego - Ferrol

Enviado por:

BNG

-bng@ferrol.es-

16 de fevereiro de 2012 12:07

____________________