Mobilizacións en Ferrol e no resto de Galiza contra as medidas, do goberno de Nuñez Feijóo, de precarización das empregadas e empregados públicos, aprobadas cos votos dos dereitistas do PP

Unha moi importante concentración nas inmediacións do Hospital Arquitecto Marcide, tivo lugar onte, 28 de Febreiro, centos de traballadoras e traballadores da sanidade pública cortaron o tráfico pola mañá de 11 a 12. Na mobilización estaba presente unha representación da veciñanza afectada polo peche do Consultorio d'A Graña que posteriormente se dirixiron até ás dependencias da Dirección de Área, dentro do recinto Hospitalario acompañados por representantes da Xunta de Persoal e centrais sindicais convocantes das mobilizacións -que neste caso son unitarias- e un numerosos grupo de manifestantes. Mentres, realizaban-se concentracións e accións de protesta por toda Galiza por parte de empregad@s da función pública galega, contra as Medidas de precarización do traballo e emprego público, impostas unilateralmente polo goberno do dereitista Partido Popular, encabezado por Alberto Nuñez Feijóo que fixo da mentira e a manipulación o seu principal xeito de gobernar. [En pouco tempo publicaremos fotos das mobilizacións]

"Os traballadores da administración autonómica con destino en Ferrol mantiveron o pulso até o final. Do mesmo xeito que fixeron outros centos de compañeiros en toda Galicia, os funcionarios desta cidade aínda celebraron onte dúas concentracións en rexeitamento aos recortes que, practicamente á mesma hora, aprobaba o Parlamento cos únicos votos a favor do PP. Un bo número de afectados desprazouse até Santiago para participar na multitudinaria concentración que se desenvolveu ante a cámara autonómica, tanto en coches particulares como en dous autobuses fretados para a ocasión.

Parte dos funcionarios viñan xa dunha noite de peche no edificio administrativo da praza de España, onde permaneceron desde as dúas da tarde do día anterior en rexeitamento aos recortes. Como xa sucedeu noutras ocasións, o persoal do centro hospitalario Arquitecto Marcide protagonizou a concentración máis numerosa na mañá de onte, con preto de 400 persoas, e unha hora despois secundaban outra protesta varias decenas de funcionarios da sede da Xunta" [Montse Mayoral en Diario de Ferrol 29.02.2012]


http://youtu.be/6SfCEC0z6NQ

Desaloxan do Parlamento aos representantes sindicais do sector público por manifestar a súa oposición aos recortes

No exterior, o persoal concentrábase ante un desmesurado dispositivo policial

O persoal do sector público saíu ás rúas a manifestar masivamente o seu rexeitamento ás medidas de recorte das súas condicións laborais, salariais e sociais que hoxe se aprobaban no Parlamento de Galiza cos votos a favor, unicamente, do Partido Popular. Entre mentres, en sede parlamentaria, as e os representantes sindicais eran desaloxados por manifestar a súa oposición a estas medidas levantando uns carteis onde se recollían as denuncias do sector.

As concentracións repetíanse diante dos centros de traballo, á mesma hora, agás nos hospitais onde estaban convocadas para as 11:00 da mañá. En todos os casos, as súas denuncias coincidían “queren reducir o déficit público á nosa costa e que paguemos as consecuencias dunha crise da que non fomos responsábeis e da que tampouco imos saír así”.

Para a secretaria nacional de CIG-Administración, María Carme López Santamariña “vimos de asistir a unha nova imposición do PP dentro do Parlamento galego. Imposición que xa nos veu aplicando desde o momento en que se nos presentou este proxecto de lei, sen atender ás demandas dos sindicatos que pedíamos que procedera a retiralo e se estabeleceran canles de comunicación e negociación para falar e poder opinar do seu contido”.

No mesmo sentido se manifestou o secretario nacional de CIG-Ensino, Anxo Louzao, quen asegurou que é “a mostra máis evidente do talante antidemocrático do Partido Popular, non só polo desaloxo dos representantes sindicais que estabamos no pleno, senón tamén por recorrer á vía de urxencia para aprobar estas medidas”.

Para Louzao estamos ante unha lei que supón “unha involución e un ataque aos dereitos laborais e aos propios servizos públicos, co obxectivo de destruír emprego”. Ao seu entender evidénciase o carácter “autoritario” do PP ao recorrer á vía de urxencia para “nin máis nin menos, modificar aspectos e conquistas históricas que están en lei grazas ás loitas sindicais de hai anos”.

Do mesmo xeito, denunciou que este sistema “é totalmente improcedente e a mostra máis palpábel de que para eles o Parlamento galego é unha institución sen ningún tipo de interese, que pasan o rodillo e transforman unha maioría absoluta nunha ditadura. É totalmente inadmisíbel”. E advertiu que “a mobilización vai seguir en pé e van ter que retirar esta medida”.

Tal e como se lle trasladou aos grupos parlamentarios no día de onte a CIG non entende, por unha banda, que sendo aprobados hai escasamente dous meses os orzamentos de Galiza se fagan agora modificacións nesa lei de orzamentos cando non se prantexaron no seu día. “Por que hai tanta presa en facer estes recortes cando están pendentes de aprobación os orzamentos xerais do estado, dos que a día de hoxe descoñecemos o alcance e o impacto que van ter, canto a recortes, nos servizos públicos?”, pregúntase López Santamariña.

Consecuencias na calidade asistencial

Para Susana Méndez, secretaria de Organización de CIG-Saúde, aínda que en primeira instancia o máis prexudicado é o persoal do sector público, neste caso, “está claro que dada a situación na que está hoxe a sanidade pública, cos recortes e privatizacións previas que se fixeron desde o goberno da Xunta, isto é un ataque directo a un servizo público e os grandes prexudicados van ser os usuarios, que van ver diminuída gravemente a calidade asistencial que se lles presta”.

Méndez alerta de que a aplicación destas medidas vai implicar unha diminución aínda máis drásticas das contratacións, a supresión de moitísimos postos de traballo e máis carga de traballo para o persoal que agora mesmo presta o servizo, o que obviamente repercutirá nos e nas doentes. “desde hai bastante tempo, na Sanidade Pública xa se veñen facendo recortes de xornada e contratos de catro e cinco horas para facer substitucións en determinadas actividades. Agora o que fan é instaurala con obrigatoriedade para a xente que se vai contratar e con posibilidade de aplicala tamén aos fixos se se prestan voluntariamente”.

O feito de suprimir tres días de libre disposición implica, di, que vai aumentar a xornada dos traballadores e traballadoras que están contratados/as como interinos e como fixos. “Vai ser unha bolsa de horas da que van tirar para cubrir as ausencias que teñan co cal diminúe a contratación de novo persoal”. De feito, CIG-Saúde ten calculado que son 500 postos de traballo que deixarán de contratarse.

Galería de imaxes da xornada de mobilizacións

Fontes: Ártabra 21, Avantar e Diario de Ferrol.

* * *

Centrais Sindicais

• Central Obreira Galega - COG
• Confederación Galaica da - CNT/AIT
• Confederación Intersindical Galega - CIG
• Confederación Unitaria de Traballadores - CUT
• Confederación Xeral do Traballo en Galicia - CGT
• Sindicato Nacional de CCOO de Galicia - CCOO
• Unión Xeral de Traballadores en Galicia - UGT
• Unión Sindical de Traballadores Galegos - USTG

Confederacións Internacionais

• Federación Sindical Mundial - FSM
• Confederación Sindical Internacional - CSI
  
• Asociación Internacional dos Traballadores - AIT
• Global Unions
• Confederación Europea de Sindicatos - CES

Outras centrais sindicais de interese

• Intersindical Portuguesa - CGTP
• Sindicato Andaluz de Traballadores/as -SAT
• Sindicato de Obreir@s do Campo
  e do medio Rural de Andalucia -SOC
• Corrente Sindical de Esquerdas -CSI
• Intersindical Canaria
• ELA-STV / Sindicato Vasco
• LAB / Sindicato Vasco
• Intersindical -CSC / Sindicato Catalán

___________________