25S: Solidariedade da Alternativa Galega de Esquerda con Miguel Quinteiro e con todas as persoas represaliadas

Alternativa Galega de Esquerda esixe a liberación inmediata de Miguel Quinteiro, activista vigués detido o 25 de setembro na mobilización en Madrid. Denunciamos a detención do activista Miguel Quinteiro, histórico defensor da Banca Pública e membro da Plataforma polo Aforro Público de Vigo. Igualmente considera que o trato que trasladan as imáxenes da súa detención poidera poñer en risco a súa saúde ao tratarse dun home maior convalecente aínda dunha enfermidade.

A ALTERNATIVA GALEGA DE ESQUERDA de Ourense considera que o desmesurado operativo policial e a actitude provocadora dos corpos de intervención policial (UIP) foron a todas luces intolerables nunha mobilización exemplar e que simplemente procuraba denunciar o verdadeiro secuestro que vive o parlamento do estado español, o que sistemáticamente fai o goberno impedindo á cidadanía e a oposición política ser parte activa dos instrumentos de representación popular.

O detido, Miguel Quinteiro, activista histórico de numerosas plataformas en defensa dun sistema financeiro público, nin é un terrorista nin membro dun deses “grupos violentos” que de xeito intoxicador está difundindo certa prensa. Trátase dun cidadán vigués exemplar, con anos de defensa de modelos de participación política plural e de plataformas cívicas abertas. A súa detención parécenos propia dun réxime fascista incapaz de entender a oposición democrática ás súas políticas de recortes sociais e agresións ao conxunto das clases populares.

A ALTERNATIVA GALEGA DE ESQUERDA anima á cidadanía e a súa militancia a participar nas concentracións en solidariedade co 25S e en apoio ás detidas e detidos e ferid@s pola brutalidade policial e o comportamento provocador da subdelegación do goberno en Madrid e o goberno autonómico.
____________________________