O Encontro Social de Ferrol Terra ten previsto realizar hoxe, Martes 20 de Novembro, a súa XVI Asemblea Aberta

Unha nova Asemblea do Encontro Social de Ferrol Terra, vai ter lugar hoxe, Martes 20 de Novembro, ás 7 da tarde, nos locais da asociación veciñal de Esteiro. Este encontro social, en proceso de construción desde Decembro do pasado ano, vai acompañado da Rede de Apoio Mutuo para esta Comarca. O Encontro Social, está tecendo alternativas ás políticas neoliberais, desde a base asociativa, desde os movimentos sociais, tece a Rede Social de Ferrol Terra, con propostas e ferramentas que necesitan un compromiso activo da base social do movimento asociativo desta comarca. Todo un reto socio-político e organizativo.

Probabelmente hoxe quede ultimado o proceso de constitución de Arméria Soc. Coop., unha sociedade cooperativa galega sen ánimo de lucro, unha ferramenta legalizada e con entidade xurídica propia da Rede de Apoio Mutuo. Arméria ten como obxectivo promover actividades de economía social e solidaria que incidan favorabelmente na calidade de vida das persoas poboadoras do territorio no que actúa, nas comarcas de Ferrol Terra de Trasancos, Bezoucos, Alto Eume, Baixo Eume e Ortegal. Unhas actividades guiadas polos principios da cooperación, a complementariedade, a reciprocidade, a autoxestión, portas abertas, democracia, e axuda mutua, con metodoloxías creativas e enfoque intercultural. Nestas actividades empregam xunto ao diñeiro corrente, os euros, o diñeiro social, medido en tempo, traballo voluntario ou intercambios. Para asociar-se a Arméria hai que contribuír con 30 euros ou 5 horas de traballo comunitario.

Nesta nova Asemblea Plenaria, do proceso de constitución teñen previsto abordar asuntos relacionados cos pasos dados e os futuros na constitución de Arméria Soc. Coop.; a explicación e significado da nova normativa que entrou en vigor o pasado venres, 16 de Novembro, o Real Decreto-lei 27/2012, do 15 de novembro, de medidas urxentes para reforzar a protección aos debedores hipotecarios. e en relación con este tema o análise das mobilizacións, a situación dos desafiuzamentos pendentes e a nova estrutura da Comisión na Rede, tamén falara-se da reunión mantida co Valedor do Pobo, celebrada o Venres 16 de Novembro; abordara-se a nova etapa da Plataforma en Defensa da Sanidade Pública da Área Sanitaria de Ferrol que ten convocada unha Asemblea Plenaria para debater e acordar sobre o seu futuro; considerara-se unha proposta para preparar un Foro Social co obxectivo de deliberar e analizar sobre o actual modelo enerxético e as posíbeis alternativas; e outros asuntos entre os que están o de deliberar sobre a agresión do Goberno de Israel contra o pobo palestino que vive na prisión máis grande do mundo, a Franxa de Gaza.

correo-e:
forosocialdeferrolterra@gmail.com

Telefono de contacto:

Lupe Ces - 652201003
(Moderadora Provisional das Asembleas Plenarias)

Directorio:

http://redesocialdeferrolterra.blogspot.com
______________