A Federación Veciñal de Ferrol " Roi Xordo " apoia a mobilización en Defensa da Sanidade Pública, contra as privatizaciòns e os recortes e contra o establecemento do repago que se celebrará o Martes 4 de Decembro en Ferrol

Comunicado aos medios de comunicación

A Federación Veciñal de Ferrol  "Roi Xordo" apoiamos decididamente a mobilización convocada pola Plataforma en Defensa da Sanidade Pública de Ferrol para o martes día 4 de decembro ás 19 horas diante do Edificio da Xunta de Galicia na Praza de España en Defensa da Sanidade Pública, contra as privatizaciòns e os recortes e contra o establecemento do REPAGO.

Entendemos o acesso á Sanidade Pública como un dereito e como unha conquista da clase traballadora, que o Goberno do Estado e da Xunta de Galicia, coa excusa da crise, nos queren arrebatar.

Afirmamos que a Sanidade Publica é perfectamente sostible: O Estado Español é o que menos diñeiro lle dedica por persoa, 1500 euros/ano de media, de toda a Unión Europea e en Galicia aínda estamos por detrás. Con ese investimento, que non gasto, se obtén unha asistencia sanitaria de mellor calidade que a do conxunto da UE. En indicadores como a esperanza de vida ou en curación de cancro de mama estamos á cabeza e eso só é posible pola caliidade asistencial que, ata o momento, existe no Estado Español.

Se non fose sostible, que o é, do mesmo xeito que se foi socorrer á Banca Privada da mala xestión dos seus directivos, a pesar do que reciben indemnizacións millonarias como premio á súa mala xestión, con maior motivo habería que socorrer á Sanidade Pùblica.

Mentres se invisten 1500 euros por persoa/ano en Sanidade Pública o rescate á Banca nos custa a cada cidadán 1830 euros/ano. E logo dín que a Sanidade Pública non é sostible?.

Desde a Federación Veciñal de Ferrol " Roi Xordo" defendemos unha sanidade pública, gratuíta e universal para todos por igual, como ben recollido na Constitución Española e na Lei Xeral de Sanidade,

Reclamamos da Xunta de Galicia os compromisos incumpridos con esta Área Sanitaria.

• O investimento de 63 millóns de euros que se ían investir en tres anos no antigo Hospital Naval para modernizalo e milloralo, facendo innecesarios os concertos con Hospitais Privados.
• Que non se peche o Hospital Novoa Santos.
• Que se reabra, como ten acordado o Pleno do Concello de Ferrol por unanimidade, o Consultorio da Graña.
• Que se amplie o Fontenla Maristany.
• Que se constrúan os centros de Saúde comprometidos para A Capela, Ares, Cedeira e Narón, que xa tiñan que estar en funcionamento.
• Que se remate con urxencia a ampliación do Centro de Saúde de Serantes.
• Que se remate con urxencia o novo Centro de Saúde de As Somozas que leva anos paralizado.

Por todas estas e outras moitas razóns convocamos á cidadanía a participar na Concentración do Martes día 4 de Decembro ás 19 horas no Edificio da Xunta na Praza de España.

Federación Veciñal de Ferrol “ROI XORDO”
Centro Cultural “CARVALHO CALERO”
Praza do Inferniño, s/n
15404 - FERROL
Telf: 981.37.05.61
Fax: 981.32.29.66
e-mail: roixordo@roixordo.org

http://cogave.org/index.php

Enviado por:
avesteiro
-avesteiro@galicia.com-
2 de dezembro de 2012 12:36
__________________
_________________