quinta-feira, março 10, 2016

Completo programa de atividades neste mês de março na Fundaçom Artábria


Completo programa de atividades neste mês de março na Fundaçom Artábria


Desde a Fundaçom Artábria trabalhamos dia a dia sem fins lucrativos, para oferecer umha atividade de ócio alternativo às trasanquesas e trasanqueses. Com esta intençom, apresentamos a programaçom deste mês de março, que vem carregado de diversas atividades lúdicas.

As atividades começavam no passado sábado 5, com a representaçom da obra "Dentro é um lugar" do Coletivo Artístico Lampanada.

"Dentro é um lugar" é umha peça de teatro físico e de objetos, sem palavra e musicalizada ao vivo a partir das melodías de Ástor Piazzolla. Um ator e umha clarinetista levam adiante umha série de peripécias, tendo como disparador o objeto Caixa de cartom e a música do bandoneoísta e compositor argentino.

A história desenvolve-se num contexto fantástico no que os objetos se re-significam deixando entrever vários universos. Apresentada de umha perspetiva plástica e apoiada polo sonoro, a personagem explora arredor como quem molda a sua própria realidade.

Na quinta-feira 10 de março, Dia da Classe Obreira Galega fazemos um apelo à nossa base social a participaçom na mobilizaçom convocada polo sindicalismo nacional e de classe representado pola CIG. Após a mobilizaçom, haverá petiscos no Centro Social.

Já na sexta-feira, decorrerá o concerto do 8 de março que fazemos o dia 11, onde a cantora mugardesa Sofia Espinheira vai trazer-nos as suas músicas, tingindo a Fundaçom Artábria de cor lilás.

A entrada é de graça e o concertó começa às 22.30hs.

Meses depois de ganhar os prémios do público e do júri no II Certame de Cançom de autor em Galego Concelho de Teu, Sofia Espinheira acabou de lançar o seu primeiro álbum "Alá onde agromam as ervas", que apresentará no nosso Centro Social. Este trabalho inclui 9 temas em que a autora integra influências da música tradicional e transcendente e perspetiva mais canónica da música de autora.

No dia 12 de março, dentro das atividades que a organizaçom juvenil da esquerda independentista BRIGA organiza com motivo da sua XIII Escola de Formaçom, projeta-se no nosso Centro Social o documentário "Fíos Fora". O trabalho da produtora galega Ilha Bufarda e a associaçom solidária Amarante pretende ajudar a entender a situaçom da indústria têxtil no nosso país.

Será às 17.00hs e a entrada livre. Posteriormente, haverá um debate/colóquio sobre o mesmo.

No mesmo sábado, às 21.00hs, inauguramos umha nova exposiçom no nosso Centro Social. Desta vez, Maurício Castro traz umha nova mostra de aguarelas.

O duo Eira fecha as atividades dete sábado 12 com um concerto em acústico, que começa às 23.30h. A atividade é organizada por BRIGA dentro das atividades da XIII Escola de Formaçom e a entrada é livre.

Na sexta-feira 18, por segundo ano consecutivo celebramos o Sam Martinho's Day com umha nova festa suevo-irlandesa. O Sam Martinho´s day nom é mais que um pinchacarneiro lúdico impulsionado pola Gentalha do Pichel, ao qual nos sumamos com gosto. Eis umha breve explicaçom da celebraçom de este dia.

Como sabedes nos últimos anos estendeu-se por todo o mundo, ajudada polo interesse comercial dumha conhecida marca de cerveja, a celebraçom irlandesa de Sam Patrício. Pois bem, a casualidade favoreceu que exista um forte paralelismo entre a vida do santo padroeiro da Irlanda e um outro santo que, embora bastante desconhecido, tivo umha importáncia na História Galega, Sam Martinho de Dume. Sam Patrício foi o evangelizador da Irlanda, lá polo século V da nossa era, e Sam Martinho cumpriu um papel semelhante na Galiza do século VI, o que lhe permitiu passar à história coma o apóstolo dos e das suevas. Curiosamente, as datas em que se comemoram as festividades de ambos santos están muito próximas no calendário, 17 e 20 de março respetivamente.

A proposta é aproveitar a vontade de festa do pessoal e, já que vamos celebrar Sam Patrício, aproveitemos para celebrar também a nossa suevicidade.

E nom, nom pensedes que na Fundaçom Artábria deixamos de ser laic@s, nom. A ideia é celebrar e reivindicar a suevicidade, nom ao Sam Martinho em si. De facto, um dos contributos fundamentais do bispo de Dume foi a redaçom dum texto conhecido como o "De correctione rusticorum", onde se indicavam e condenavam muitos dos costumes pouco cristaos que @s nossas antepassadas praticavam. Costumes que vos animamos encarecidamente a recuperar, porque, assim entre nós, Sam Martinho era um pouco reaça.

A festa suevo-irlandesa contará com cerveja das duas naçons, "suevitos quentes" e o concerto de "O Puto Coro do Exército Froilanista". Porque nom podemos reivindicar a nossa suevicidade sem ter em conta ao legítimo herdeiro do Reino da Galiza: Froilám III.

O concertó começará às 22.30hs e a entrada é de graça.

Já no sábado 26, mais um ano convocaremos umha concentraçom ao pé das ruínas da casa natal de Carvalho Calero, no bairro de Ferrol Velhor para homenagear ao bulto da nossa cultura no XXVI aniversário do seu passamento.

O ato dará início às 12.30h e o programa ainda esta por fechar, mas adiantamos que haverá música, poesía e intervençons.

Fechamos as atividades do mês de março com a Assembleia Geral de sóci@s que decorrerá no domingo 27 às 11.30h no Centro Social.

Travessa de Batalhons nº7   Esteiro
15403 Ferrol - GALIZA
Telefone:  +34 981 35 29 86
www.artabria.net

Segue-nos em twitter @fartabria e em facebook!

A Fundaçom Artábria é um projecto popular em defesa da língua e cultura nacional, os valores solidários e os direitos históricos da Galiza. Entidade de carácter sociocultural sem ánimo de lucro que está declarada de Interesse Galego e classificada de interesse cultural, com o nº 54 no registo de fundaçons da Xunta de Galicia.

Enviado por:
Fundaçom Artábria
-artabria@artabria.net-
8 de março de 2016 20:48
__________________


Por favor, o contido do seu comentario debe estar relacionado co asunto do artigo.

Prega-se o maior respecto coas persoas, polo que ataques persoais e insultos serán eliminados.

Por favor, non use os comentarios, só para facer propaganda do seu sitio ou será eliminado.
EmoticonEmoticon