Convocada unha nova acción de protesta, ante a entrada na Ría dun novo buque gaseiro, o 'LNG Bayelsa' que ten previsto descargar en Reganosa este fin de semana - Concentración, o venres 4 de outubro, ás 7 da tarde, na Praza Amada Garcia, diante do edificio administrativo da Xunta de Galicia en Ferrol

Ante a entrada na Ría dun novo buque gaseiro, o "LNG Bayelsa" para descargar en Reganosa, está convocada unha nova acción de protesta en Ferrol, na Praza Amada Garcia (Diante do Edificio Administrativo das Xunta de Galicia).

CONCENTRACIÓN SONORA EN FERROL,
VENRES 4 DE OUTUBRO, ÁS 7 DA TARDE
(Novo horario outono-inverno)
NA PRAZA AMADA GARCIA
(DIANTE DO EDIFICIO DA XUNTA)

O "LNG Bayelsa", é un buque gaseiro de bandeira de conveniencia das Marshall Islands, de máis de 16 anos de antigüedade (2003), de 288 metros de eslora, 49 de manga e 11,4 de calado, ten previsto descargar en Reganosa o vindeiro domingo 7 de outubro, miles de toneladas de gas natural licuado, sendo ás 6:30 a súa hora de arribada. Este buque fai o número 258 que entra na Ría de Ferrol cargado con GNL. Mentres se produza a descarga no pantalán de Punta Promontoiro (Mugardos), perante 24 horas, aumentará de xeito exponencial, o xa de por si perigo que ten a Planta de Gas, instalada no corazón da nosa Ría. Un potencial perigo, para todas as persoas que moramos na sua contorna.

Concentración diante do edificio da Xunta en Ferrol

O Comité Cidadán convoca a participar na acción de protesta, deste venres 4 de outubro, que quere poñer, unha vez máis, ao descuberto a corrupción política e económica que subxace en todo este despropósito, despois de cinco sentenzas do Tribunal Supremo en contra da Planta de Gas, e está última ditada hai case tres meses onde tumba a resolución do anterior Goberno Español de Mariano Rajoy, dun partido corrupto até o espiñazo, que eximiu a Reganosa de ter que someter-se a avaliación ambiental, intentando chulear deste xeito as sentenzas condenatorias que declaran ilegal, á perigosa planta regasificadora.

Última sentenza (E van cinco)

A sentenza núm. 1075/2019 do Tribunal Supremo, de 16 de xullo de 2019, anulou o Acordo do Consello de Ministros de 27 de maio de 2016 polo que se declaraban excluídos do trámite de avaliación de impacto ambiental aos proxectos da planta de recepción, almacenamento e regasificación de gas natural licuado en Mugardos [Sentenza].

Esta nova sentenza da que se deu conta en rolda de prensa por parte do Comité, declara ilegal a citada resolución gobernamental de exención da avaliación ambiental da planta regasificadora de Mugardos.
Denuncia á Fiscalía da area de medio ambiente e urbanismo

Ante a entrada deste novo buque gaseiro o Comité Cidadán de Emerxencia, denunciou ante a fiscalía esta situación, pois a planta mugardesa está funcionando cunha autorización anulada por sentenza firme, sen avaliación ambiental e cun plano de emerxencias exterior tamén anulado.

Autorización administrativa previa, de aprobación do proxecto de execución e estudo de impacto ambiental da planta de regasificación e entidades e persoas, na súa maioría da Comarca, recorreron contra tal pretensión

O Comité Cidadán de Emerxencia para a Ría de Ferrol, perante estes últimos días fixo un chamamento á poboación en xeral e en especial á veciñanza da contorna da Ría e as entidades veciñais, sociais, sindicais e políticas, para que participen na campaña de alegacións contra o novo intento da ilegal e perigosa Reganosa, de conseguir novas autorizacións despois de fracasar no seu intento fraudulento de legalizar pola vía de feitos consumados a súa instalación no corazón da nosa Ría. Destes recursos dará conta nunha rolda de prensa que se celebrará, tamén este venres, mais pola mañá ás 11.30hs, no Ateneo Ferrolán.

O COMITÉ CIDADÁN DE EMERXENCIA PARA A RÍA DE FERROL, TAMÉN NECESITA NESTES MOMENTOS AXUDA ECONÓMICA, PARA CONTINUAR COS PROCESOS XUDICIAIS E ADMINISTRATIVOS ABERTOS: COLABORA.

Comité Cidadán de Emerxencia para a Ría de Ferrol
comitecidadan@gmail.com
www.comitecidadan.org
@ComitCEmerxenc

Información baseada na enviada por:
Comite Cidadan de Emerxencia
-comitecidadan gmail.com-
1 de outubro de 2019 19:32
_______________