Malas horas para os proxectos de ampliación do negocio de Reganosa no actual contexto de descarbonización, segundo a axencia europea de reguladores enerxéticos - O LNG Tanker 'Arctic Princess' puxo rumbo ao porto de 'Las Palmas', despois de arrefriar os seus tanques, o que para o holding gasista supuxo un negocio e aumentar a baixa porcentaxe de utilización da planta, para as persoas que moramos na contorna, foi aumentar exponencialmente o risco para a seguridade e a vida que xa de por si representa a localización da planta de gas no corazón da Ría de Ferrol

O LNG Tanker "Arctic Princess" puxo rumbo hoxe, 13 de maio de 2021, ao porto de Las Palmas, nas Illas Canarias, despois de arrefriar os seus tanques en Reganosa, cargando 4600 m3 de GNL, proceso que durou case tres días desde o pasado 10 deste mes de maio, logo de estar reparando en Navantia Ferrol desde o pasado 30 de abril. A posta en frío dos tanques, é un proceso que dura unhas 50 horas. É un dos diferentes negocios da empresa regasificadora, aínda que isto signifique aumentar as probabilidades de risco para a seguridade e a vida da poboación que mora na contorna da Ría. Para o holding gasista supón un negocio e aumentar a baixa porcentaxe de utilización da planta, para xustificar a súa permanencia no sistema. Pois o historial de utilización da planta é moi baixo respecto á súa capacidade e previsións recollidas no documento xustificativo para a súa construción.

Malas horas para os proxectos de ampliación do negocio de Reganosa no actual contexto de descarbonización.

Todo isto nunha conxuntura onde sae á luz a comunicación da Comisión Nacional dos Mercados e a Competencia (CNMC) que advertiu na UE sobre varios proxectos gasistas en diferentes lugares do territorio peninsular que considera innecesarios no actual contexto de descarbonización. As advertencias figuran nun relatorio da axencia europea para a cooperación dos reguladores da enerxía (ACER), [1] e comprenden varias infraestruturas de gas natural licuado (GNL) e un proxecto para construír unha terceira interconexión con Portugal. O xornalista Antonio M. Vélez, publica unha interesante análise sobre este relatorio da axencia europea, no xornal 'El Diario', no que manifesta que "... o relatorio da axencia europea tamén advirte sobre catro proxectos de ampliación doutra regasificadora polémica que leva anos en marcha, a de Reganosa, en Mugardos (A Coruña): 'De acordo coa actual Política Enerxética Española de descarbonización, as novas infraestruturas e corredores de gas non van ser desenvolvidos na Península Ibérica'...". Continua escribindo Antonio M. Vélez, sinalando os proxectos da regasificadora de Mugardos: "Os catro proxectos prevén duplicar a capacidade da terminal de GNL ate 19,8 mcm/diarios mediante a construción de novos vaporizadores Open Rack; construír un segundo porto de atraque para os barcos que descargan o GNL; ampliar a capacidade de almacenamento cun tanque adicional para 190.000 metros cúbicos; e construír un novo gasoducto de 318 quilómetros de lonxitude que iría desde Guitiriz (Lugo) ate a estación de compresión de Enagas en Zamora". A preguntas do xornalista sobre esta cuestión, os responsábeis de comunicación de Reganosa non queren contestar: "Reganosa, que ten nos seus socios á Xunta de Galicia, declinou facer valoracións sobre este asunto ["Non comentamos informes dos reguladores"]. A empresa logrou a finais do ano pasado que o Ministerio para a Transición Ecolóxica concedese a Declaración de Impacto Ambiental (DIA) favorábel á planta. Un paso imprescindíbel despois de que, en xullo de 2019, o Tribunal Supremo declarase nula a exención dese procedemento que acordou o Consello de Ministros en maio de 2016, co Goberno de Mariano Rajoy en funcións". Sobre a ampliación do gasoduto e a capacidade de almacenamento, o relatorio da axencia europea que reproduce o contribuído pola CNMC, é demoledor ante as aspiracións cobizosas da cinco veces sentenciada Reganosa: "O informe de ACER cuestiona outro proxecto vinculado a ese gasoducto que suscita Reganosa, a construción dunha terceira interconexión con Portugal proxectada pola empresa lusa REN. Trátase da primeira fase da infraestrutura que conectaría Celorico dá Beira, no Distrito de Garda, con Zamora (España), cun gasoducto de 162 quilómetros. A iniciativa recibiu observacións en contra do regulador portugués e do español. A CNMC 'dúbida da necesidade deste proxecto' e recorda que xa hai en operación dúas interconexións gasistas entre ambos países que están infrautilizadas...". [2] Asunto que leva tempo denunciando o Comité Cidadán de Emerxencia para a Ría de Ferrol. Trátase da burbulla especulativa do gas que non tardará en rebentar. Falamos das  infraestruturas non necesarias construídas, que están moi por abaixo da súa capacidade de utilización, Reganosa entre elas. Infraestruturas que nos obrigan, pola vía dos impostos e peaxes, a manter e pagar.

[1] O Relatorio de ACER está fechado o 3 de maio e recolle as observacións dos organismos de supervisión de cada país sobre os borradores de proxectos a dez anos presentados en outubro de 2020 polos diferentes xestores de transporte de gas da UE. | Opinión Nº 02/2021 da axencia da unión europea para a cooperación dos reguladores de enerxía (ACER) do 3 de maio de 2021 sobre o proxecto ENTSOG do plan decenal de desenvolvemento de Rede 2020. | En Inglés, de 36 páxinas en formato pdf. | Acceder/Baixar.

[2] Di o relatorio da axencia europea: O CNMC dubida sobre a necesidade deste proxecto. Actualmente hai dous gasodutos de interconexión entre estes países que están baixo reserva (reservados ao redor do 67% da capacidade técnica no primeiro semestre de 2020) e, ademais, infrautilizados (só ao redor do 10% da capacidade reservada empregouse no primeiro semestre do 2020). Nas poxas de produtos anuais para o ano 2020 (20 de outubro, 21 de setembro) só se asignou o 4% da capacidade ofrecida (o 26% da capacidade técnica dispoñible e, polo tanto, ofrecida) de España a Portugal. Prezo de reserva. O mercado non solicitou capacidade de Portugal a España (o 82% da capacidade técnica estaba dispoñible e ofrecida).

Planta de Gas: Peche Xa !!
Planta de gas, fora da Ría !!
Gas Non é Solución !!
#GasNoneSolucion
#PlantaDeGasForaDaRia


Desde Ártabra 21 seguimos apoiando a loita do Comité Cidadán de Emerxencia.

Comité Cidadán de Emerxencia para a Ría de Ferrol
comitecidadan@gmail.com
www.comitecidadan.org
@ComitCEmerxenc


Enlaces de interese:

✔ Gas: os excesos dun sistema que pagas na factura. Un especial dixital realizado por "Ballena Blanca".

✔ Gas e fracking. | Ecoloxistas en Acción.
_______