A Quinta pronuncia-se sobre a Proposición Non de Lei sobre o Bierzo no Parlamento de Galicia - ...queremos manifestar a nosa mais profunda decepción polo resultado saído do Parlamento Galego

A Quinta sobre Proposición Non de Lei (PNL) en el Parlamento de Galicia

Desde A Quinta queremos manifestar a nosa mais profunda decepción polo resultado saído do Parlamento Galego a respecto da Proposición non de Lei presentada polo BNG en nome de CxB (Coalición polo Bierzo). Entendemos que o resultado e froito dos xogos partidarios que se sitúan a marxe da realidade social e política de Galiza e do Bierzo. Lamentamos que os xogos partidarios do PP e o PSOE os levaran a ignorar a milleiros de votantes destes partidos no Bierzo que defende un maior vínculo entre a CAG de O Bierzo cando non a integración do Bierzo en Galiza. Non falemos xa do sentimento provincialista que é este amplamente maioritario entre a cidadanía do Bierzo sexa cal sexa a súa preferencia política.

Desde A Quinta temos que pedir a dimisión do Deputado do PSOE Pablo Arangüeña e rexeitar absoluta e profundamente a súa intervención no debate da PNL. Dicir que dar a posibilidade que o Bierzo se poida converter en provincia e que poida decidir se quere ou non ser parte de Galiza levaría a enfrontamentos violentos é un despropósito e un insulto os valores democráticos asentados entre a cidadanía. Entendemos desde A Quinta que esta maneira de pensar é pre- constitucional e que busca humillar e desprestixiar a democracia e o actual marco constitucional. Recordarlle ao Sr Arangüeña que existen mecanismos legais recollidos na  Constitución Española e o Estatuto de Autonomía de Castilla y León para a modificación das fronteiras interiores do Estado e que os mesmos se teñen feito no pasado recente e que polo tanto que a demanda de provincia e a demanda de ser provincia galega é unha demanda constitucionalista. Argumentar que a aplicación das regras de xogo pactadas na constitución do 78 é un acto de temeridade é simplemente un insulto a intelixencia das persoas e un desprezo a democracia, pero sobre todo é un insulto a todos os bercianos e bercianas demócratas e, moi en especial, a aqueles que se senten provincialistas e irmáns do pobo galego a marxe do partido que voten e a das súas afinidades políticas.

Desde A Quinta entendemos que o debate no Parlamento Galego foi prematuro e que o mesmo debía ir avalado con un amplo respaldo social e mesmo institucional e ser claramente transversal, pois a proposta de converter ao Bierzo en Provincia é unha opción que conta co consenso da veciñanza do Bierzo e integrar dita provincia na CAG conta claramente co apoio maioritario.

Aproveitamos este comunicado para reiterar a nosa demanda pública para que o CIS (Centro de Investigacións Sociolóxicas) realice sondaxes entre a sociedade do Bierzo e a Galega para así verter un pouco de luz sobre a realidade social e política que se está debatendo.

Movemento Cidadán A Quinta

Referencias:

✔ Proposición non de lei rexistrada no Parlamento de Galicia. | Acceder/Baixar.

✔ CB presenta unha histórica proposta no Parlamento de Galicia para recuperar a Provincia no seu Bicentenario | A proposición non de lei foi rexistra hoxe para o seu debate a través do BNG, segunda forza política no Parlamento Galego. | Ir á Web.

Enviado por:
A Quinta O Bierzo
-obierzoaquintaprovincia@gmail.com-
21 de abril de 2021 09:52
_______

Carta enviada desde 'A Quinta' ao Centro de investigacións Sociolóxicas para solicitar que realicen estudos demoscópicos sobre o debate do encaixe territorial do Bierzo na Galiza

O Movemento Cidadán A Quinta ten como finalidade traballar co obxectivo de conseguir que a Comarca do Bierzo se constitúa nunha provincia do Estado integrada na Comunidade Autónoma de Galicia. A Quinta defende que todos e cada un dos pasos que deben darse para conseguir os seus obxectivos deben ser dentro do actual marco constitucional e respectando as vixentes leis que establecen a posibilidade de efectivizar a demanda expresada.

Sabemos que as demandas de A Quinta non representa o sentir unánime dos bercianos e bercianas, pero si podemos dicir que diversas enquisas realizadas reflexan como opción maioritaria dos veciños e veciñas da nosa Comarca a opción de que o Bierzo se converta en provincia e que a mesma se integre na Comunidade Autónoma de Galicia.

Dentro dos estudos sobre a temática referida temos o realizado pola UNED Ponferrada, en 1995, no que o desexo de recuperación da provincia obtivo o SI do 53,4% da poboación fronte ao 34,3% que estaba en contra. En xaneiro de 2020 un novo estudo realizado pola compañía Huaris CC revelaba que, en caso de ter que escoller unha nova configuración autonómica, os bercianos e bercianas elixirían como fórmula prioritaria a unión do Bierzo a CAG (e preferibelmente como quinta provincia). No último apartado da enquisa, no que poden escoller unha nova configuración autonómica, a maioría (38%) preferiría unir O Bierzo a CAG.

Non só están os estudos sociolóxicos dando fe do debate existente na sociedade do Bierzo tamén está o feito que nos últimos anos teñen sido varios os concellos e parroquias bercianas que teñen solicitado a súa integración en Galicia: Fonte de Oliva (opción vista con simpatía polo presidente da Xunta en declaracións públicas) ou A Veiga de Valcarce. Tamén están as iniciativas elevadas por partidos políticos a institucións como o Consello Comarcal do Bierzo e o Parlamento Galego.

O Centro de Investigacións Sociolóxicas ten dentro dos seus cometidos o estudo científico da sociedade do Estado Español. A realización dos estudos sociolóxicos por parte do CIS perseguen a obtención de datos rigorosos das simpatías, inquedanzas, apoios, ... que a sociedade españolaou de parte da mesma teñen de cara a diferentes posicionamentos.

Entendemos, desde A Quinta, que o debate sobre o encaixe territorial do Bierzo así como o desexo e demanda de cambio territorial que se esta a manifestar de diversas formas dentro da sociedade berciana cumpre con todos os requisitos para que sexa tido en conta dentro dos estudos que o CIS realiza habitualmente.

E por ilo que SOLICITAMOS ao Centro de Investigacións Sociolóxicas a través da súa Secretaría Xeral:

1º.-Que deseñe, programe e realice un ou varios estudos sobre a realidade social, política e económica do Bierzo.

2º.-Que dentro dos estudos a realizar se inclúan aspectos relacionados coa satisfacción dos bercianos e bercianas sobre o trato que recibe a Comarca do Bierzo por parte da Comunidade Autónoma de Castilla y León.

3º.Que dentro dos estudos a realizar se pregunte sobre a satisfacción do actual encaixe territorial da Comarca do Bierzo dentro da provincia de León e da comunidade autónoma de CyL.

4º.-Que dentro dos estudos a realizar se pregunte acerca do apoio que se lle da á demanda de constituír o Bierzo como provincia e a súa integración dentro da actual Comunidade Autónoma de Galicia dentro do actual marco constitucional.

5º.Que dentro dos estudos a realizar se pregunte á cidadanía galega sobre o grado de aceptación que tería a inclusión da Comarca do Bierzo como unha quinta provincia galega.

Ficando á espera do acuse de recibo da presente solicitude e da aceptación do inicio do estudo da mesma, saudámolos moi atentamente.

Ponferrada, 13 de Febreiro de 2021

A Quinta
Movemento Cidadán do Bierzo

Enviada por:
A Quinta O Bierzo
-obierzoaquintaprovincia@gmail.com-
22 de fevereiro de 2021 11:48
_______

Iniciativa da Coalición polo Bierzo no Parlamento Galego para o recoñecemento do dereito do Bierzo a se poder converter nunha provincia, na que bercianos e bercianas decidan o seu encaixe territorial a través dunha consulta popular

Desde o Movemento Cidadán A Quinta congratulámonos da iniciativa que Coalición polo Bierzo veñen de presentar no Parlamento Galego por medio do BNG. Entendemos que a iniciativa da sentido a creación e existencia do noso movemento pois a nosa orixe buscaba sensibilizar á sociedade galega e berciana da necesidade de abrir, dentro do marco constitucional, a posibilidade de encaixar a nosa comarca como a quinta provincia galega. Este encaixe debe empezar por dous piares fundamentais: que a sociedade do berciana e a galega estean de acordo e que este acordo sexa asumido polas lexítimas institucións que as representa: Parlamento Galego e Consello Comarcal do Bierzo.

Entendemos que esta iniciativa de CxB, elevada ao Parlamento Galego polo BNG, nace ao calor do nacemento de A Quinta e dentro do espírito que nos levou a impulsar a campaña de recollida de sinaturas que estamos levando adiante na actualidade con moitas dificultades por causa da situación sanitaria. A mesma avanza a bo ritmo e dentro da nosas perspectivas máis optimistas o que nos da a entender que poderemos finalizar a mesma cumprindo todos os obxectivos marcados. Entendemos que ter impulsado a mesma foi unha decisión arriscada mais aledamos, xa que a mesma empeza a dar froitos entre os que esta o introducir na axenda política o debate provincialista e galeguista existente no seo da sociedade do Bierzo. A clase política e sociedade galega e berciana deben debater abertamente da necesidade de abrir unha canle para que o Bierzo poida ter un camiño amparado lexislativamente para acadar as súas lexitimas aspiracións de se converter na quinta provincia galega.

Despois de parabenizar ao BNG e a Coalición polo Bierzo por ter sido os primeiros en tomar nota do camiño deseñado polo Movemento cidadán A Quinta para levar a bo porto as aspiracións das xentes da nosa Comarca entendemos que estamos na situación de pedir:

✔ A.- A CxB de que está iniciativa sexa sincera e un paso na procura de conseguir o obxectivo de converter ao Bierzo en provincia e poder optar a ser provincia galega. Esperamos que a iniciativa non teña só a intención de dar que falar nas redes sociais e nos medios de comunicación e agradamos que esta organización siga impulsando medidas concretas en todas as institucións onde ten representación para que a reivindicación de nos poder converter en provincia galega camiñe cara a súa materialización definitiva.

✔ B.- Ao BNG para que non faga un uso partidario da lexítima reivindicación e busque, por encima de todo, que a mesma sexa aprobada -coas modificacións que sexa necesario- mediante un acordo por unánime de todos os grupos políticos do Parlamento Galego. A non aprobación da iniciativa por consenso dos tres partidos con representación no parlamento galego dificultaría a consecución do gran acordo no Congreso dos Deputados que é preciso acadar para converter ao Bierzo en provincia enmarcada dentro da Comunidade Autónoma de Galicia.

O Bierzo, 30 de Xaneiro de 2021.

Referencias:

✔ Proposición non de lei rexistrada no Parlamento de Galicia. | Acceder/Baixar.

✔ CB presenta unha histórica proposta no Parlamento de Galicia para recuperar a Provincia no seu Bicentenario | A proposición non de lei foi rexistra hoxe para o seu debate a través do BNG, segunda forza política no Parlamento Galego. | Ir á Web.

Enviado por:
A Quinta O Bierzo
-obierzoaquintaprovincia@gmail.com-
30 de janeiro de 2021 12:25
_______