Amosando publicacións coa etiqueta Actos. Amosar todas as publicacións
Amosando publicacións coa etiqueta Actos. Amosar todas as publicacións

mércores, maio 06, 2009

O Colectivo Ártabra 21, organiza un Foro Cidadán de Reflexión e Debate sobre Deporte, Lecer e Tempo Libre, no Concello de Ferrol

O Colectivo Ártabra 21, organiza un Foro Cidadán de Reflexión e Debate sobre Deporte, Lecer e Tempo Libre, no Concello de Ferrol, este Xoves, 7 de Maio, ás 7 da Tarde no Ateneo Ferrolán, onde están previstas as seguintes intervencións:
  • Xan Ramírez que participa na asociación "Ferrol Deporte" como membro do "Clube de Montaña de Ferrol"
  • Mel Sanxoán que participa na "Escola Deportiva Inferniño"
  • Miguel López Pérez que preside a "Asociación Veciñal -Fontelonga- de Esteiro"
  • Juán Martínez Montero que participa na ANPA do "Colexio Público Recimil"
  • Manuel Santiago Pérez que é o Concelleiro de Deportes e Participación Cidadán
  • Inácio Martínez Orero do "Colectivo Ártabra 21" como coordenador do foro.
O acto consistirá en respostar as seguintes preguntas:
  • Pensas que en Ferrol faltan infraestruturas deportivas e de lecer ?
  • Pensas que hai unha demanda social destas infraestruturas deportivas e de lecer ?
  • Que é o que lle falta a Ferrol, no campo deportivo e de lecer, segundo a túa opinión ?
  • Pensas que as instalacións d'O Montón deberían estar abertas a toda a veciñanza en xeral ?
  • Pensas que hai unha infrautilización das instalacións deportivas dos centros públicos de ensino ?
  • Pensas que é necesario a contrución do proxectado "Centro Deportivo e de Lecer da Praza de España" e por que ?
Exposición dos motivos:

Desde o Colectivo Ártabra 21 queremos facer un pequeno foro de debate e reflexión sobre deporte, lecer e tempo libre no Concello de Ferrol, partindo dun feito polémico como é o proxectado "Centro Deportivo e de Lecer da Praza de España".

Nos últimos tempos, tanto con este goberno municipal como no anterior, e mesmo desde o conxunto da oposición política, apoiados co voto ou abstendo-se, percebe-se un apoio total a unha costosa infraestrutura que supostamente responde a unha demanda cidadá. Estamo-nos referindo ao "Centro Deportivo na Praza de España", de 5.325,40 m2, de superficie a construír, segundo anteproxecto aprobado. Unha infraestrutura soterrada de dúas plantas, dentro das cais están previstos espazos para actividades deportivas [entre as que o goberno municipal destaca salas de musculación e de exercicios cardiovasculares] e 897,70 m2 para unha piscina de 25X12 m, spa e relax. A maiores trata-se dunha infraestrutura deportiva e de lecer que a súa xestión e explotación vai ser privatizada, será unha empresa privada a que faga, supostamente, negocio coa prestación deste servizo.

Desde o Colectivo Ártabra 21, isto leva-nos a unha reflexión que queremos trasladar a sociedade e debater neste foro cidadán:

As obras de construción e remodelación da Praza da Porta Nova [Praza de España], comezadas en Maio de 2002 foron todo un cúmulo de despropósitos, dun proxecto inicial que parecía cumprir todas as espectativas de mellora da contorna, dedicando unha maior superficie da praza a zona peonil, soterramento do tránsito rodado, ..., pasou-se ao intento de facer un grande centro comercial "plantificado" nun edifio de 21 m de altura no medio da Praza. Pasou de todo perante este proceso: tres gobernos municipais, intervencións da inspección da Xunta, tres ou catro proxectos, denuncias xudiciais con imputacións graves, mobilizacións, ... O asunto foi toda unha "epopeia" e o das obras pasan xa de seis anos [Maio de 2002]. Podemos falar do túnel toda unha obra-despropósito que "aos dous días" da súa inauguración tivo que ser pechado, para súa reforma ... e pechado de novo por inundacións e outra vez máis, e sigue e seguirá ... ao facer o centro de "Lecer e Deportivo", esta-se hipotecando a posibilidade futura de reformar o túnel e regular o tránsito soterrado, como estaba deseñado todo o conxunto nun principio dentro dun modelo de cidade. Está iso reflexionado ou este asunto vai-se pechar en falso ? ... E ao final cos cartos de tod@s [a cidadanía] indemnizamos con varios millóns de euros á empresa ABECONSA, cando tiña que ser esta xunto aos concelleiros responsábeis de semellante despropósito os que pagaran co seu patrimonio tanta irresponsabilidade. Mais agora o que nos interesa non é o asunto da remodelación en superficie que parece ser que o que se vai facer é o mellor posíbel nas circunstancias actuais cunha praza case rematada a nivel estrutural. O que nos interesa é o proxectado "Centro Deportivo e de Lecer da Praza de España".

En primeiro lugar, desde o noso ponto de vista non entendemos os elevados gastos en infraestruturas de "lecer e deportivas" soterradas baixo cemento!, nos tempos de crise, non haberá outros investimentos necesarios ?. Nunha cidade coa poboación tan envellecida como a de Ferrol [*], non haberá que pensar en infraestruturas de atención as persoas maiores ? O deporte e o lecer pode-se praticar nas múltiples instalacións deportivas infrautilizadas que hai nas escolas e institutos, nas praias e parques. Ese proxecto que nós non compartíamos nen compartimos, mais dentro da súa [a deles] lóxica do imaxinario do pensamento único, era para tempos de bonanza económica, mais agora que aínda non se sabe o alcance da crise, pensamos que compre unha maior reflexión ao respecto, pois non cremos que estexamos para malgastar os fondos que haxa, independentemente de quem poña o diñeiro, nen para hipotecar-se ... Tampouco estamos de acordo coas privatizacións dos servizos públicos, ... Fai falta un seguimento e unha posición do movimento social e veciñal ao respecto. Consideramos que non hai que ter tanta presa ...

En segundo lugar, non entendemos que se pode falar de déficit en infraestruturas deportivas e de lecer, claro está que ao mellor é que non se teñen en conta a cantidade de medios que hai na cidade, os dos centros escolares, os privados dos diferentes clubes como os do "club del Campo" ou os públicos de uso clasista, exclusivista e privado como son os d'O Montón con canchas de Tenis, Baloncesto, Fútbol, Mini-golf, Ximnasios, Squash, Padel, Piscinas [no número de 6], Aulas Multiusos, Embarcacións, discotecas, restaurantes, cafeterías, lavado de Vehículos, porto deportivo, ... e un sinfín de servizos, con miles de metros cuadrados pagados co diñeiro de tod@s, mais que só poden utilizar uns poucos. Isto vai seguir sendo así ?

En terceiro lugar, consideramos que se confunde "progreso" con construír máis, máis crecimento, máis productividade, ter máis, e máis, ... ao principio do su mandato o Alcalde Sr. Irissarri soñaba cunha cidade de máis de 100.000 habitantes como obxectivo, aínda teñen que estar esas palabras nas hemerotecas, Sr. Alcalde, progreso non será aumentar a calidade de vida das persoas, acadar un maior benestar, ter saúde, ser mais feliz, ... ter máis convivencia entre a veciñanza, aprender a vivir mellor con menos, aprender a gozar da natureza, da nosa contorna, da nosa Ría. ..., progresar en relacións humanas, en convivir, en compartir, en benestar social, en saúde, en solidariedade, en vivenda digna para tod@s, en traballo digno para tod@s, en atencións ás persoas maiores, nunha cidade con menos coches, con menos contaminación, con máis transporte público: suficiente, ecolóxico e eficaz ...

En cuarto e último lugar, saudamos a política do Concello pola instalación de parques biosaudábeis, polo servizo de bicis públicas, pola construción de paseos saudábeis, ... mais falta un apoio decidido a mellorar e reparar as infraestruturas deportivas existentes nos centros educativos e abrir estas á cidadanía fora de horario escolar, reparar e reformar as prazas públicas lugar de reunión e lecer, que esta non sexa unha política transversal, senon a principal.

O Colectivo Ártabra 21, convida a participar neste Foro, en especial, ás persoas vinculadas ao movimento asociativo e veciñal da cidade, ainda que está aberto a todas as persoas interesadas no tema sobre o que debatiremos e reflexionaremos.

[*] Algúns datos Estatísticos:
  • En 2007 índice de envellecemento: 151,9.
  • Por cada 100 persoas de menos de 15 anos hai 152 maior de 6.
  • En 2008 a poboación de Ferrol era de 74.696 persoas, das cais maiores de 65 anos eran: 16.920 persoas.
  • O 22,65 % dos habitantes de Ferrol teñen máis de 65 ano.
Fonte: Instituto Galego de Estátistica
____________________

venres, maio 04, 2007

O martes 8 de maio, Mesa Redonda no Ateneo Ferrolán: Un percorrido polos despropósitos municipais

martes, marzo 13, 2007

XVII Certame Fotografía de Medio Ambiente 2007

De: ATENEO FERROLAN -a_ferrol@teleline.es-
Para: artabra21@gmail.com
Data: 13 de marzo de 2007 19:27
Asunto: XVII Certame FOTOGRAFÍA de MEDIO AMBIENTE 2007

XVII Certame FOTOGRAFÍA de MEDIO AMBIENTE 2007

O ATENEO FERROLÁN, con motivo da celebración do DÍA MUNDIAL DE MEDIO AMBIENTE, organiza un concurso fotográfico para afeccionados e profesionais, que se rexerá polas seguintes :

BASES

TEMA: Estará relacionado coa Ecoloxía nos seus diferentes aspectos (fauna, flora, paisaxe, agresións...). Non se aceptarán a concurso fotografías de pitiños, niños, nin ningunha imaxe que poda implicar sufrimento ou dano dun ser vivo. No caso de imaxes en cativerio, será necesario mencionar dita circunstancia.

PARTICIPANTES: Estará aberto a todas as persoas interesadas no tema, sexan afeccionadas ou profesionais da fotografía.

OBRAS: Cada participante poderá enviar un máximo de TRES fotografías, en branco e negro ou cor, podendo acceder soamente a un dos premios.

Non se admitirán fotografías publicadas ou premiadas noutros concursos. Tampouco se aceptarán colaxes, montaxes, fotografías pintadas nin manipuladas dixitalmente que alteren as imaxes máis alá do que se pode chegar a modificar mediante os procesos de fotografía tradicional.

Os participantes responsabilizaranse así mesmo de que non existan dereitos sobre as imaxes de terceiras persoas, así como de calquera reclamación que poida xurdir sobre as mesmas no que se refire a dereitos de imaxe. Estes dereitos estenderanse a fotografías do autor que teñan unha grande similitude coas presentadas a concurso.

TAMAÑO: Ningunha das fotografías presentadas poderá exceder no seu lado maior de 40 cm., nin este poderá ser inferior a 24 cm. As fotografías deberán presentarse montadas sobre unha cartolina con dous tamaños únicos de 30 x 40 ou 40 x 50 cm.

PLICAS: Os participantes indicarán o pseudónimo do autor e o título da fotografía no reverso da cartolina na que deberá montarse cada foto. No interior dun sobre pechado que leve o pseudónimo, figurarán os seus datos persoais: nome, apelidos, NIF, enderezo, teléfono, e-mail e pseudónimo utilizado.

ENVÍOS: As fotografías enviaranse ao seguinte enderezo:

ATENEO FERROLÁN
Rúa Magdalena, 202-204, 1º
CP 15402, FERROL (A Coruña)

A organización velará pola correcta conservación das obras presentadas. Aínda así, non se fai responsable de calquera desperfecto que de maneira involuntaria poidan padecer as fotografías.

PRAZO: O prazo de admisión remata o venres 25 de maio de 2007.

XURADO : O xurado estará formado por TRES persoas cualificadas no campo da fotografía. A secretaría recaerá nun representante do Ateneo. A decisión do xurado será inapelable e darase a coñecer o martes día 5 de xuño, no acto de inauguración da Exposición, coincidindo coa celebración do DÍA MUNDIAL DE MEDIO AMBIENTE.

A organización terá o dereito de reprodución das fotografías premiadas, que poderán ser utilizadas libremente e sen compensación económica, con finalidades relacionadas co concurso de Fotografía de Natureza ou coas actividades do Ateneo Ferrolán que non conlevan ánimo de lucro. Para isto e para valorar a fidelidade das copias presentadas os gañadores deberán presentar os orixinais antes de percibir os respectivos premios. En caso de utilizar para a captación das fotografías medios dixitais remitirase o ficheiro en formato RAW e tamén o arquivo do que se obtivo a copia para realizar as comprobacións necesarias.

PREMIOS:
1º) 900 €
2º) 300 €
3º) 150 €

Se as obras presentadas non alcanzasen a calidade necesaria, a criterio do xurado e por unanimidade, os premios poderán ser declarados desertos. Se con posterioridade á concesión dos premios se tivese coñecemento de anomalía ou incumprimento das Bases, procederase á revogación do mesmo, recorrendo a calquera forma adecuada dentro do ordenamento xurídico.

ENTREGA DE PREMIOS: Farase o día 5 de xuño no acto de inauguración da Exposición.

EXPOSICIÓNS: Coas fotografías seleccionadas farase unha primeira Exposición no Ateneo Ferrolán, dende o día 5 até o día 30 de xuño. A Organización, facendo uso dos seus dereitos, realizará unha itinerancia da Mostra durante o resto do ano 2007. Dentro da itinerancia contémplase a súa mostra no Outono Fotográfico de Ourense. As fotografías seleccionadas para esta Mostra quedarán a disposición do Ateneo Ferrolán ata o día 31 de decembro.

DEVOLUCIÓNS: Devolveranse aquelas obras que veñan acompañadas dun sobre prefranqueado ou aquelas que sexan recollidas persoalmente no Ateneo Ferrolán, establecendo un prazo de 60 días a partir da clausura da Exposición. Transcorrido o mesmo entenderase que os autores renuncian a calquera dereito sobre as fotos presentadas.

OBSERVACIÓNS:

*A participación no Concurso implica a total aceptación destas bases.

*Os casos non contemplados nestas BASES serán resoltos polo xurado.

AGRADECEMENTOS: Á Casa da Xuventude de Ourense, por incluír as fotos seleccionadas na súa Mostra, no conxunto de exposicións que compoñen tan prestixioso evento no mundo da imaxe.

venres, marzo 02, 2007

Como foi a Mesa Redonda con proxección da reportaxe de Liña 900 “Un gasoducto no meu xardín” Nota de 28 de febreiro 2007

De: Comité Cidadán
-comitecidadan@iespana.es-

Para: artabra212gmail.com
Data: 2 de Marzo de 2007 01:04
Asunto: Nota sobre acto do día 27

Para información de quenes non asistiron á mesa redonda do pasado 27 de febreiro, ou para quenes esten fóra de Ferrol ou de Galicia, achego a nota sobre a mesma.

Así mesmo o artigo que José Manuel Ponte publica hoxe na páxina 2 de La Opinion de A Coruña.

Tamén achéganse unhas fotos do acto.

Saúdos cordiais
Carmelo Teixeiro
Coordinador do Comite Cidadán de Emerxencia para a Ría de Ferrol.
http://comitecidadan.org/

________________________

Mesa Redonda con proxección da reportaxe de Liña 900 “Un gasoducto no meu jardin”
Nota de 28 de febreiro 2007

Moi poucos actos en Ferrol reúnen a 160 asistentes, como ocorreu o martes 27 de febreiro na Mesa Redonda convocada polo Comité Cidadán de Emerxencia para a Ría de Ferrol, no Salón de Actos do Vicerrectorado Universitario, sen axuda nin presenza dos medios. O seu Coordinador, Carmelo Teixeiro, iniciou o acto lendo un comunicado no que anunciou que en primeiro lugar proxectaríase a reportaxe de Liña 900 titulado "Un gasoducto no meu xardín", co permiso de Jaume Codina, director de Liña 900. Así mesmo que estaban presentes Carles Enrique e José Costas, dous dos compoñentes do equipo de TVE en Barcelona que elaboraron a devandita reportaxe, ademais dos xornalistas galegos Xan Morales, José Manuel Ponte e Sonia Vizoso.

O devandito comunicado resaltou que a raíz da reportaxe de Liña 900, ademais das actuacións por vía administrativa ou xudicial, o Goberno Central e a Xunta de Galicia continúan agora máis emplazados a que non sexa autorizada a entrada en funcionamento de Reganosa que ten obrigación de solicitar, máxime cando a Xunta de Galicia ten outra opción para unha Planta de Gas fóra da Ría de Ferrol que lle ofrecen operadores europeos, cun proxecto e prazo a tempo suficiente no obxectivo que a Xunta alega para que Galicia dispoña de plataforma gasista.

Tamén sinalou que as imaxes da reportaxe de liña 900 son unha proba da proximidade da poboación e dos condicionados que Reganosa ten imposible de cumprimentar en relación coas distancias mínimas que require a Directiva Europea Seveso II ou o RAMINP, así mesmo sobre a saída de urxencia dos buques gaseros. Por iso este documental ten tamén un valor pericial, polo que xa foi enviado á Comisión Europea, tamén ao Defensor do Pobo Europeo. Así mesmo a reportaxe de liña 900 este luns pasado 26 de febreiro presentouse no Tribunal Superior de Xustiza de Madrid como proba no contencioso contra a autorización de construción a Reganosa. O devandito contencioso, iniciado en setembro de 2004, agora comezou a moverse coincidindo con dias posteriores á emisión da reportaxe de Liña 900.

Carmelo Teixeiro finalizou dicindo que o CCE non oculta a súa satisfacción con esta reportaxe, así mesmo que felicita aos profesionais de Liña 900 por este traballo, que se debería propoñer para un premio como unha boa reportaxe televisiva e de expresión da problemática social.

Logo da proxección da reportaxe, actuando de moderadora Montse Garel, interviñeron Xan Morais xornalista de Radiofusión, Carles Enrique Redactor de TVE liña 900, José Luís Costas Realizador de Liña 900, José Manuel Ponte xornalista e Sonia Vizoso xornalista do diario El País.

Carles Enrique e José Luís Costas informaron do seu traballo para realizar a reportaxe. No ano 2004, cando viñeron realizar unha reportaxe sobre o amianto, recibiron un dossier do Comité Cidadán, pero non foi ata o outono do 2006 cando estudaron o tema e pediron máis información. Destacaron que para facer unha reportaxe televisiva é imprescindible dispoñer de imaxes, mentres que outros medios poden arranxarse con textos e fotos. Os traballos duraron tres meses e realizaron dezaseis horas de grabación televisiva para obter unha reportaxe que dura 24 minutos. Na primeira visita impactoulles moito ver a magnitude e gran tamaño dos tanques que constrúe Reganosa á beira de casas e núcleos de poboación dentro da pequena Ría de Ferrol. Por iso con imaxes ademais do zoom trataron de reflectir a proximidade das instalacións de Reganosa á poboación, o gran tamaño de buques en relación coa estreita canle de saída da Ría, e o Porto Exterior onde estaba previsto situar a Planta de Gas. Algunhas imaxes onde se ve unha gran gabia aberta co gasoducto a medio instalar, foron realizadas cunha cámara de video pequena na primeira viaxe, un mes despois volveron cunha cámara grande e a gabia xa fora tapada.

Pola súa banda Xan Morais, destacou que reportaxes como este só podía realizalos unha televisión pública. Así mesmo que determinados medios de comunicación non responden á necesidade informativa dos cidadáns. Puxo unha mostra: no caso de que nunha gran cadea comercial producísese unha contaminación nos alimentos, ¿Como actuarían os medios nos que dita cadea comercial ten o seu maior investimento publicitario?.

José Manuel Ponte resumiu que a esta situación pódese chegar por tres causas: a corrupción política, o control mediático polos poderes político e económico, ademais da pasividade da cidadanía que non reaccionou antes pero que agora se alarma ao ver as obras ou a reportaxe de Liña 900. Como paradoja no comportamento das autoridades en materia de seguridade puxo como mostra destes días o buque holandés OSTEDIJK, que cunha carga de fertilizantes descomposta puxéronse medidas extremas de non permitirlle achegarse a núcleos de poboación, pero que as mesmas autoridades seguen impasibles ante o anuncio da entrada na Ría de Ferrol de grandes buques gaseros cargados con gas natural licuado, que é unha mercancía moi perigosa.

Sonia Vizoso suscitou que nalgún momento os políticos terán que pedirlle perdón a Ferrol, e sinalou que na actual televisión pública galega non se poden facer reportaxes como este de Liña 900, a causa do control político. Como mostra as reportaxes pagas que seguen existindo en base a convenios das Consellerías da Xunta de Galicia con determinados medios galegos para publicidade encuberta das devanmditas Consellerías. Eses convenios foron elaborados cando gobernaba o PP e continúan aplicándose, pese a que o BNG e o PSOE cando eran oposición denunciáronos e prometido suprimir. Resaltou que a Xunta na reportaxe de Liña 900 aparece afectada co “síndrome do clip”, porque ao Director Xeral de Industria véselle cun clip nas mans, dándolle continuas voltas, mentres as súas palabras “xustifican” que acepta a herdanza de Reganosa.

No coloquio posterior houbo un gran número de cualitativas intervencións de preocupación pola peligrosidad das instalacións que constrúe Reganosa, tamén con propostas e ofrecimientos para continuar con actuacións a fin de que Reganosa non entre en funcionamento.

Varias intervencións denunciaron a manipulación e censura informativa nos medios de comunica­ción, producíndose un cualitativo e interesante debate sobre a liberdade de expresión, con intervencións dos xornalistas invitados. En relación con este asunto Sonia Vizoso manifestou que segue pendente dispoñer do Estatuto dos xornalistas para que poidan exercer o dereito á liberdade de expresión, sen condicionamientos polos poderes políticos e económicos.

A intervención dun asistente ao acto propuxo que non se compre un xornal diario impreso que di ser de máis tirada en Galicia, porque censura e manipula a información en asuntos de interese xeral para os cidadáns, en varios temas tamén en relación coa Planta de Gas.

Outra intervención preguntou canto tempo pode pasar para que sexa paralizada Reganosa e a ameaza que supón para a vida humana na Ría de Ferrol, respondéndolle o Coordinador do Comité Cidadán que por vía xudicial poden pasar de un a varios anos ata que existan sentenzas que paralicen a Reganosa, pero que a vía Administrativa nunca se pode dar por esgotada e en calquera momento a administración central competente pode acordar paralizar as obras de Reganosa ou non darlle autorización de funcionamento. Ademais a autorización de construción a Reganosa ten uns condicionados imposibles de resolver en relación coas distancias á poboación e coa saída de urxencia de buques gaseros, que non os tiñan as plantas de Bilbao e Sagunto. Quen teña a competencia para autorizar a entrada en funcionamento de Reganosa, atoparase co final en falso dun proceso tramposo que pretende vulnerar a lexislación vixente. Polo tanto é de esperar que non sexa autorizada a entrada en funcionamento de Reganosa.

Finalmente fíxose referencia aos indicios de que os promotores de Reganosa están moi preocupa­dos, segundo o publicado na Voz de Galicia, ante un posible fracaso do negocio se non lle aumentan a 800.000 m3/hora a produción de gas natural que veñen reclamando desde decembro de 2006, (máis do dobre dos 322.500m3/hora que ten autorizados). Por iso non hai que descartar o que un fracaso do negocio de Reganosa termine con ese pesadelo, antes que pola vía xudicial.

_________
Artigo do xornalista José Manuel Ponte publicadio en La Opinión de A Coruña o 1 de marzo de 2007
[Para ampliar clicar acima da imaxen]

Información Mesa Redonda Mugardos 3.3.2007. A Costa Galega: Riqueza a defender

De: Antonio Gª -angaji@yahoo.com- Para: artabra21@gmail.com Data: 1 de marzo de 2007 15:42 Asunto: Información Mesa Redonda Mugardos 3.3.2007. A Costa Galega: Riqueza a defender


Queridos compañeiros/as: Reenvío esta mensaxe con información sobre Mesa Redonda "A Costa: Riqueza a defender" o día 18,30 en Mugardos, no Concello, e unha exposición sobre o tema, por se vos interesa asistir/participar e/ou comunicar ós socios/as

Unha aperta e boa fin de seman

Antonio García