O Sábado, 28 de setembro 17:30h desde a Estación de tren Compostela, Manifestación Nacional.
Manifesto 28 de Setembro
Por unha vida digna, libre e desexada. Non á contrareforma da lei de aborto!
Na Plataforma Galega polo Dereito ao Aborto xuntámonos máis de 65
organizacións e aínda cando cada organización ten o seu propio punto de
vista respecto da regulación da Interrupción Voluntaria do Embarazo,
todas defendemos que o acceso á IVE tense que realizar en condicións de
seguranza e legalidade, adoptando as medidas necesarias para que a
decisión da muller poida facerse efectiva.
Con motivo do 28 de Setembro, Día Internacional pola despenalización
do aborto, sumámonos á loita coas nosas irmás feministas do resto de
territorios do Estado e do mundo e facemos un chamado á mobilización
cidadá para esixir respecto aos dereitos sexuais e reprodutivos das
mulleres así como para afirmar que non permitiremos que a lei actual de
saúde sexual e reprodutiva e da interrupción voluntaria do embarazo se
reforme de modo restritivo e a nosa defensa do aborto libre e do dereito
a decidir.
Reclamamos o acceso ao aborto legal, seguro e gratuíto como unha
demanda de dereitos humanos, de xustiza social e de saúde pública. As
mulleres somos suxeitas de dereitos con plena capacidade para tomar
decisións de acordo ás nosas realidades e proxectos de vida, incluíndo a
decisión de abortar ou de ser nais, de ter fillos/fillas ou non.
As mulleres somos persoas autónomas, responsables, libres e iguais e,
como tales, exiximos o dereito a decidir sobre os nosos corpos e vidas.
Exiximos que todos os actores sociais e o Estado respecten a nosa
autonomía sexual e reprodutiva, e que se nos achegue a información e os
medios para exercela sen riscos. Isto debe abarcar: acceso universal a
métodos anticonceptivos modernos e seguros, incluíndo anticoncepción de
emerxencia; educación sexual laica; acceso a abortos seguros, legais e
na sanidade pública; condicións sociais e estruturais adecuadas para
vivir unha maternidade voluntaria, protexida e gozosa, se optarmos por
ela. Só desta forma serán respectados os dereitos consagrados no sistema
internacional de dereitos humanos.
Denunciamos que o contexto de crise está a ser aproveitado por
ideoloxías conservadoras e ultracatólicas, co PP e o Ministro de Xustiza
Gallardón á cabeza, para impornos un programa ideológigo moi claro. A
restrición do dereito ao aborto é unha medida máis de ataque aos nosos
dereitos sexuais e reprodutivos. Por unha banda pretenden prohibir
abortar a aquelas mulleres que non queren ser nais e, doutra, Ana Mato,
ministra de Sanidade, exclúe a mulleres sen parella e a parellas de
lésbicas do acceso á reprodución asistida no sistema público sanitario.
Isto súmase á inaceptable exclusión ao acceso ao sistema público
sanitario de migrantes en situación irregular, paradas de longa duración
e outras mulleres precarizadas, o que lles impide ser atendidas nos
servizos de xinecoloxía.
A contrarreforma prevista deixará ao Reino de España á marxe das
recomendacións da Organización Mundial da Saúde, que advirte que a
restrición do aborto só produce máis mortalidade materna no mundo. Os
abortos clandestinos matan a máis de 70.000 mulleres ao ano, segundo a
OMS. Isto implica un grave dano á saúde física e mental das mulleres e
constitúe unha violación aos seus dereitos humanos fundamentais, en
especial o dereito á vida, á saúde, á autodeterminación das mulleres, á
igualdade e á non discriminación, a estar libres de torturas e danos, á
liberdade de pensamento e relixión, e ao control da súa propia
fecundidade.
As leis restritivas inflúen pouco ou nada no número de abortos que se
realizan, pero si determinan se estes se fan en condicións de risco ou
non. Coa aprobación da contrareforma sumariamos á lista de países onde o
aborto está restrinxido ou penalizado pola lexislación, e onde se
producen a gran maioría dos abortos clandestinos, obrigando
especialmente a mulleres con poucos recursos e/ou mozas a interromper o
embarazo de forma pouco segura.
A contrarreforma prevista polo Partido Popular deixaríanos, ademais,
lonxe da lexislación vixente na maioría dos países de Europa Occidental,
á que, polo visto, debemos pertencer en todo salvo no referido aos
nosos dereitos.
Novamente, a práctica do aborto será fonte de inseguridade xurídica
para as mulleres e para o persoal sanitario e de inequidade territorial e
social. A nova lexislación suporá unha titorización intolerable sobre a
decisión das mulleres e unha forma de criminalización do dereito que
nos asiste a todas nós a decidir sobre a nosa maternidade, é dicir,
sobre os nosos corpos e as nosas vidas.
Denunciamos as poucas garantías dadas ás mulleres na súa decisión de
abortar e tamén na de ser nais, con recortes en axudas á maternidade, en
educación, en bolsas para comedores escolares, co aumento da
malnutrición infantil. Sumados aos recortes en dependencia, sanidade e
un longo etc. que nos fai preguntarnos de que vida falan cando falan da
vida.
Exiximos sanidade pública e de calidade. Porque se o aborto é unha
intervención de carácter sanitaria, ten que se realizar nas mesmas
condicións que o resto de prestacións sanitarias: en centros públicos e
garantindo a accesibilidade, calidade e confidencialidade, con todas as
garantías sanitarias.
O Goberno actual é ANTI-VIDA. Porque o Goberno que di protexer a
vida, ao mesmo tempo elimina prazas en escolas infantís públicas, quere
privatizar os servizos públicos, sométenos a cortes atroces en axudas á
dependencia, sanidade, educación e comedores escolares, o que fai
imposible a conciliación da vida persoal e laboral.
A lei eliminará o suposto de malformación grave fetal ao mesmo tempo
que os gobernos do Partido Popular arrasan co investimento en políticas
relacionadas coa dependencia. O Goberno do PP fala de protexer a vida
durante as semanas de xestación, pero abandona á súa sorte ás persoas
unha vez que chegaron ao mundo.
O Partido Papular, ese que dí defender a vida, deixa as agresións e os
asasinatos machistas fora da visibilización política ao anunciar a nova
política de estatísticas sobre violencia de xénero. Xa non van ser
contabilizadas as mulleres que pasen menos de 24 horas no hospital.
Os feminismos somos PROVIDA. Porque ser Pro-vida é loitar por ter
unha boa vida e non condenar ás persoas a situacións que fagan que esta
non mereza a pena ser vivida.
Estamos aquí para dicirlle ben alto ao PP e ás ideoloxías
ultracatólicas e fascistas que estamos unidas e en pé. Que non nos van
calar nin con multas nin con reformas de códigos penais que pretenden
restrinxir o noso dereito a nos manifestarmos na rúa.
Estamos aquí para berrar ben forte que non imos permitir que recorten
os nosos dereitos e que xuntas neste 28 de setembro damos comezo a un
novo curso de rebeldía feminista.
SÁBADO 5 DE OUTUBRO: XORNADA FEMINISTA EN FERROL TERRA
Para a semana que entra, terán lugar, en Ferrol Terra, unha
xornada feminista que baixo o título "
FEMINISMO EN OBRAS", organiza a
Marcha Mundial das Mulleres. Está interesante xornada está prevista para o Sábado día
5 de Outubro no Centro de Día Municipal 'Manuela Pérez Sequeiros' de Narón (
Inscrición e Programa aquí).
Para máis info, sobre esta proposta de Lei e a Loita contra a mesma na:
Web oficial da Plataforma:
http://feminismo.eu/PlataformaAborto/
