Amosando publicacións coa etiqueta Dereito ao Aborto. Amosar todas as publicacións
Amosando publicacións coa etiqueta Dereito ao Aborto. Amosar todas as publicacións

mércores, setembro 27, 2017

A Marcha Mundial das Mulleres de Ferrolterra participará no Día de Acción Global por un Aborto Legal e Seguro, este xoves 28 de setembro, ás 11.30hs diante do Hospital Arquitecto Marcide


A Marcha Mundial das Mulleres de Ferrolterra participará no Día de Acción Global por un Aborto Legal e Seguro

Desde a Coordenadora Galega da Marcha Mundial das Mulleres sumamos a nosa voz ao movemento feminista internacional para  reclamar aborto libre e seguro e condicións dignas da sanidade do noso país,onde ainda non podemos exercer plenamente este dereito na sanidade pública galega.

A Coruña.-
Ás 11:30 horas, no Rexistro do Hospital Universitario da Coruña e ás 20:00 horas, diante do Teatro Rosalia de Castro. Concentración e performance.

Vigo.-
Ás 18:30 horas, no Marco. Concentración.

Ferrol.-
A Coordenadora Local de Ferrolterra convoca ás 11.30 h da maña do xoves 28 setembro, diante do Hospital "Arquitecto Marcide", do Complexo Hospitalario Universitario de Ferrol -CHUF, para a entrega dunha solicitude de entrevista co responsábel da Xerencia de Xestión Integrada e posterior reparto dun folletos informativos.


Web internacional da Campaña:
http://www.september28.org/


"As mulleres  decidimos"​ ​

Coordenadora Local de Ferrolterra da Marcha Mundial das Mulleres
mmmferrolterra@gmail.com
www.feminismo.info
facebook.com/marchamundialmulleres.galiza
twitter.com/MMMGaliza

Info baseada na enviada por:
Lucia Vizoso
-luciaxocaloma@gmail.com-
27 de setembro de 2017 13:57
______

martes, febreiro 24, 2015

Recortes na Lei de Interrupción do Embarazo e posición pública da Asociacion Galega para a Defensa da Sanidade Pública


AGDSP recortes Lei Interrupcion Embarazo


Ante a proposta do grupo parlamentario do Partido Popular nas Cortes Españolas de modificar a Lei de Interrupción Voluntaria do Embarazo desde a Asociación Galega para Defensa dá Sanidade Pública queremos manifestar:
  1. O noso rexeitamento á esixencia do consentimento expreso de quen exercen a patria potestade nas mozas de 16 a 18 anos, por que limita o acceso ao dereito ás mesmas á interrupción voluntaria do embarazo.
  2. Este cambio deixaría desprotexidas as mozas en situacións de risco social e familiar, ao atrasar a intervención ou a obrigalas a realizala na clandestinidade, poñendo en risco o seu saúde física e psicolóxica.
  3. O que fai a lei actual é facilitar que estas poidan acudir soas si existen motivos fundamentados, coa finalidade de protexelas ante situacións de desamparo familiar, malos tratos ou abusos sexuais no seo familiar.
  4. O Partido Popular mente ao afirmar que a lei vixente priva aos proxenitores da posibilidade de acompañar e orientar ás menores, dado que unicamente o 12% deste colectivo non lles informan.
  5. Ese cambio lexislativo baseado en falsidades pretende congraciar ao PP co seu electorado, a costa dos dereitos das mulleres máis novas e vulnerables.
  6. Desde a AGDSP esiximos ás autoridades sanitaria da Xunta de Galicia que se opoñan a este vergonzoso e vergonzante cambio lexislativo.
Asociación Galega para a Defensa da Sanidade Pública.

20 de febreiro do 2015

Enviado por:
Plataforma en Defensa da Sanidade Pública Ferrol
-plataformadspferrol@gmail.com-
24 de fevereiro de 2015 20:56

http://www.plataformadspferrol.blogspot.com/
_______________

domingo, febreiro 22, 2015

Concentración: "As Mulleres decidimos, as menores tamén", convocada pola Plataforma Galega de Ferrolterra polo Dereito ao Aborto


Concentración: As Mulleres decidimos, as menores tamén


Como en diferentes cidades da Galiza a Plataforma Galega polo Dereito ao Aborto, convoca unha mobilización co lema "As Mulleres decidimos, as menores tamén". Contra a reforma que o goberno do Partido Popular pretende facer da Lei do Aborto.

Este Lúns 23 de febreiro, ás 20 hs, diante da sede do Partido popular en ferrol.
CONCENTRACIÓN polo dereito ao aborto.

ABORTO LIBRE E GRATUÍTO, NOS PARIMOS NOS DECIDIMOS

Correo electrónico:
dereitoabortoferrolterra@gmail.com

Facebook: Ferrolterra Direito Aborto.
https://www.facebook.com/ferrolterra.aborto

Plataforma Galega de Ferrolterra polo Dereito ao Aborto
__________

mércores, setembro 24, 2014

Dende a Área dá Muller da A.C. Fuco Buxan o 23 de Setembro de 2014, é un dia de alegría para todas as cidadás e cidadás que durante meses nos atopamos na rúa loitando por un dereito conseguido e que nos querían arrebatar


Compañeiras da 'Marcha Mundial das Mulleres', da 'Plataforma Galega en defensa do dereito ao aborto' ou do 'Tren da liberdade', cidadáns e cidadás:  PARABÉNS !!!

Quixeramos chamar a atención sobre unha das súas frases de despedida “máis que desautorizado, sento que non fun capaz de cumprir o encargo". É dicir era un encargo do goberno e do presidente.

Na película da reforma da lei do aborto é Ruiz-Gallardón o protagonista. Pero non é o director. Porque o director chámase Mariano Rajoy. O presidente do Goberno. Quizá o protagonista, pola súa personalidade, codirixe algunhas escenas do filme.

Crese totalmente o personaxe e colle a bandeira dos bispos que espantan aos seus fieis con argumentos tales como que a lexislación actual (e a pasada) produce un “holocausto silencioso”; que “o aborto é peor que o abuso sexual a menores por parte de eclesiásticos”; que a batalla “pola vida será longa, como a que aboliu a escravitude”, ou que hai que derrogar toda a lei porque “si é un crime, non pode aceptarse en ningún suposto”.

Por sorte, álzanse as bases católicas que pisan rúa e ven o sufrimento das mulleres que afrontan embarazos non desexados. Crear un problema co 83% da cidadanía en contra como di 'Redes Cristiás', que agrupa a centenares de igrexas de base e a grupos organizados como 'Somos Igrexa', o 'Foro de Curas e a Asociación de Teólogos Juan XXIII'.

O papel, en todo caso, de ter éxito, permitiríalle en certo momento ter a posibilidade de optar, contar con apoios que no pasado faltáronlle.

Unha vez mais vemos como a dereita española está secuestrada pola a minoritaria voz do nacional-catolicismo e unha vez mais emerxe ata alborotar a convivencia que nestes momentos está en sintonía cos Dereitos Humanos e que nos sitúa ética e xuridicamente entre os países modernos da nosa contorna.

Como director da película, Mariano Rajoy o final quixo que fose obra súa e antes de marcharse de viaxe, saca de escena ao protagonista deixando o papel, dun actor secundario de serie ”B”  e dinos que o proxecto de reforma retírase ante a falta de consenso. Que a reforma Gallardón morreu.

É importante sinalar que Gallardón vaise enfrontado con todos os sectores da Xustiza por diversos motivos, entre eles:
  • Impulsou un anteproxecto de Lei Orgánica do Poder Xudicial, rexeitada por todos os sectores da Xustiza, cunha reorganización da administración de Xustiza.
  • Fai un ano remitiu ao Congreso un novo Código Penal con algunhas polémicas como a prisión permanente revisable, equivalente a unha cadea perpetua revisable. Ten rexeitamento da maioría da oposición.
  • Ao comezo da lexislatura asegurou que era inconstitucional a elección parlamentaria de todo o Consello Xeral do Poder Xudicial. A metade de lexislatura cambiou de criterio e pactou cos partidos unha renovación con elección parlamentaria de todos os seus membros sen volver mencionar a suposta inconstitucionalidade. A reforma foi aprobada sen máis apoios que o do PP e está recorrida no Tribunal Constitucional.
  • As taxas xudiciais que implantou no inicio da lexislatura. Só os votos do PP aprobaron esta medida e agora rexeitaron no Congreso a derrogación. A medida foi aprobada no inicio da lexislatura e está recorrida no Tribunal Constitucional.
  • A cesión aos rexistradores mercantiis a xestión dos rexistros civís.
  • Constituíu un comité de expertos para facer unha nova Lei de Enxuizamento Criminal, necesaria para cambiar o proceso penal. O PP admitía por primeira vez a posibilidade de que os fiscais instrúan procesos. Foi aparcada e tampouco sairá esta lexislatura.
  • As carreiras de fiscais e xuíces, pese a ser maioritariamente conservadoras, están enfrontadas co ministro de Xustiza por medidas como a eliminación de substitutos o que implica perda de calidade no traballo. Nesa batalla están ata as asociacións conservadoras e organismo como o Consello Fiscal con maioría conservadora.
  • Anunciou que os aforados reduciríanse a 22, aínda que iso supuxese cambiar a Constitución e os Estatutos de autonomía. Daquela o Goberno ha ir matizando e quedou na posibilidade de eliminar o aforamento de xuíces e fiscais.
Compañeiras, ¡ esperemos que este pseudo-actor, este,  por moito tempo,  afastado de postos onde poida facer dano á liberdade de calquera cidadán¡ ¡ A loita continua ¡                       
Área da Muller da A.C. Fuco Buxán
http://www.fucobuxan.net/

Enviado por:
Área da Muller da A.C. Fuco Buxán
-fucobuxan@gmail.com-
24 de setembro de 2014 01:36

Engádese Nota da Área da Muller da A.C. Fuco Buxán, referente ao acontecido este martes 23 de setembro:  Retirada polo goberno da Reforma da Lei do Aborto. Dimisión do Ministro de Xustiza. Área da Muller de Fuco Buxán (Reforma Lei Aborto e dimisión Gallardón).

_________

luns, febreiro 17, 2014

O pasado Sábado 15 de Febreiro foron penduradas faixas, alusivas ao dereito ao aborto e convocando a Manifestación nacional do 9 de Marzo en Compostela, en varias pontes de Ferrol


Grupo de traballo da Plataforma Galega polo dereito ao aborto en Ferrolterra.
ABORTO LIBRE E GRATUÍTO, NOS PARIMOS NOS DECIDIMOS

Na noite de onte sábado 15 de febreiro o Grupo de traballo da Plataforma Galega polo dereito ao aborto en Ferrolterra, colgou en varias pontes da Cidade pancartas alusivas ao dereito ao aborto libre e gratuíto e dereito a decidicir das mulleres, dentro da campaña ca Plataforma Galega polo Dereito ao Aborto está a facer en contra do proxecto de lei do ministro Gallardón e do Goberno do PP, que volta ás mulleres a un retroceso aos anos 50 nos dereitos conqueridos.

http://feminismo.eu/PlataformaAborto/

Enviado por:
Polo Dereito ao Aborto Ferrolterra
-dereitoabortoferrolterra@gmail.com-
16 de fevereiro de 2014 18:20

____________

venres, febreiro 07, 2014

Alén de Ancos e Marta Masafret na Festa Solidaria polo dereito das mulleres a decidir libremente a súa maternidade - Grupo de traballo da Plataforma Galega polo dereito ao aborto en Ferrolterra

O Grupo de traballo da Plataforma Galega polo Dereito ao aborto en Ferrolterra organiza unha FESTA SOLIDARIA para alertar do “grave retroceso” que supón a reforma que pretende facer o Goberno do Partido Popular

As organizacións integrantes da Plataforma de Ferrolterra denuncian que “a drástica reforma” do Goberno está a ocasionar “consecuencias nefastas para a vida e a saúde integral das mulleres" e reclaman o "dereito a decidir".

Ferrol, 7 de febreiro de 2014.- O Grupo de traballo da Plataforma polo Dereito ao Aborto de Ferrolterra está a organizar unha FESTA SOLIDARIA que terá lugar o sábado 8 de febreiro de 2014 no local “MANCHITA COSA” na céntrica rúa Madalena número 138. O obxectivo é, segundo afirma a Plataforma "chamar a atención da cidadanía de Ferrolterra sobre o grave retroceso de dereitos das mulleres que supón a proposta de reforma da lei do aborto do Goberno" ao tempo que organizar un acto festivo e reivindicativo aberto ao público en xeral no que "esixiremos o dereito das mulleres a decidir libremente a súa maternidade"

O Grupo de Traballo da Plataforma polo Dereito ao Aborto de Ferrolterra integrado por representantes de organizacións feministas, políticas, sindicais e cívicas, leva case dous anos traballando a prol do mantemento da lei da interrupción voluntaria do embarazo e contra da reforma da mesma proposta  polo Goberno en voz do ministro Gallardón e nesta volta, tal como afirman as súas representantes,  "pretendemos aglutinar as vontades da cidadanía da comarca para acadar o respaldo cívico que impida a contrarreforma programada polo Goberno".

A festa solidaria contará, entre outras actividades con recitais e música a cargo de diferentes artistas da bisbarra como Alén de AncosMarta Masafret entre outr@s amáis de contar con actividades lúdicas dirixidas ao público infantil.

Esta actividade, decidida na xuntanza mantida o pasado día 3 de febreiro, concorda coa organización de eventos similares en toda Galicia xa que, aseguran as portavoces desta plataforma "tentamos de achegar ao gran público de xeito lúdico e solidario a reivindicación das mulleres do dereito a decidir". A festa terá lugar en horario de 18.00 a 20.00 horas  con entrada libre aínda que se ofertará a posibilidade de apoio ás actividades da Plataforma a través de petos e da venda de bonos solidarios.

O evento no facebook:
https://www.facebook.com/events/414313892036131/

web:
http://feminismo.eu/PlataformaAborto/

facebook:
https://www.facebook.com/p.g.polo.dereitoaoaborto

twitter:
https://twitter.com/feminismogalego

Enviado por:
Polo Dereito ao Aborto Ferrolterra
-dereitoabortoferrolterra@gmail.com-
6 de fevereiro de 2014 20:40

___________________

sábado, decembro 21, 2013

En Ferrol como no conxunto das cidades galegas, sobre as 7 da tarde, concentraban-se numerosas persoas para denunciar e protestar ante tal atropelo contra os dereitos das mulleres - O Consello de Ministros aprobaba o anteproxecto de reforma da lei do aborto

Concentración en Ferrol - 20 de Decembro de 2013 -Foto: Fer Ocampo M.

Onte o Consello de Ministros do, polo de agora, Reino de España, aprobaba o anteproxecto de reforma da lei do aborto. Contrareforma conservadora con nome eufemístico: 'Anteproxecto de Lei Orgánica de Protección da vida do Concibido e os Dereitos da Muller Embarazada', que reforma a actual  'Lei orgánica 2/2010 de Saúde Sexual e reprodutiva e da interrupción voluntaria do embarazo'.

 En Ferrol como no conxunto das cidades e varias vilas galegas, sobre as 7 da tarde, concentraban-se numerosas persoas para denunciar e protestar ante tal atropelo contra os dereitos das mulleres. A convocatoria a realizaba a Plataforma Galega polo Dereito ao Aborto, para rexeitar esta contrarreforma do goberno  do PP, contra Dereitos Sexuais e Dereitos Reprodutivos. No conxunto do territorio do Estado tamén saíron ás rúas e prazas miles de persoas.

No acto de Ferrol, participaron numerosas persoas, moitas delas portaban unha candea en sinal de do. Estes recortes en dereitos só van traer máis sufrimentos e dor para as mulleres.  No transcurso do acto berraron-se diferentes consignas contra o atropelo reaccionario e integrista da dereita española que queren impoñer a súa hipócrita moral ao conxunto da sociedade. Só hai que ver as diferentes portadas dos xornais conservadores (La Razón, ABC, La Gacdeta, ...) intentando manipular a realidade. O comunicado unitario foi lido pola compañeira Tereixa Pereiro Garcia da Marcha Mundial das Mulleres. A loita continua.

A continuación transcribimos a reportaxe publicada no xornal dixital 'Praza Pública', xornal que fornece importante e numerosa  información e opinión (baixo licenza
Creative Commons by-sa), no camiño da construción dun país normalizado, xusto e libre que merece o noso apoio.

O día a día cunha nova lei do aborto que xa é contestada na rúa

Tan só poucas horas despois de que o Consello de Ministros aprobase o anteproxecto de reforma da lei do aborto, e logo de que o ministro Ruiz Gallardón a xustificase en rolda de prensa, centos de mulleres saíron ás rúas nas concentracións convocadas pola Plataforma Galega polo Dereito ao Aborto en varias cidades do país. "Nin un paso atrás nos nosos dereitos", berraron unhas manifestantes que volveron denunciar o retroceso en 30 anos que supón unha contrarreforma que só contenta o sector máis extremo e radical da dereita española.
"Fóra os rosarios dos nosos ovarios", berraron as mulleres que se manifestaron este venres en varias cidades galegas
"Nós parimos, nós decidimos" ou "fóra os rosarios dos nosos ovarios" foron algúns dos cánticos máis repetidos nas mobilizacións das sete cidades galegas, ademais das de Cangas e Ribadeo. "Que desilusión, que o pai de Gallardón non puxera un condón", chegouse a berrar tamén nunhas marchas que demostraron a rabia e indignación dun colectivo que "nin nos peores presaxios" imaxinaba unha contrarreforma "tan dura" que tamén foi contestada en moitos outros lugares do Estado.

Protestaban as mulleres contra o anteproxecto de Lei para a Protección da Vida do Concibido e dos Dereitos das Mulleres Embarazadas. Unha iniciativa que, de aprobarse, provocará que as mulleres que queiran abortar en España se atopen con grandes dificultades para facelo. Se coa lei actual de prazos, aprobada en 2010, as que queren interromper de forma voluntaria o seu embarazo dentro das primeiras 14 semanas de xestación -o 89,77% das que abortan fano antes das 12 semanas- non deben acreditar ningunha razón, coa futura reforma deberán sempre xustificar cun ditame médico que seguir co embarazo pon en risco a súa saúde mental.
Dez casos sobre como poderían abortar as mulleres en España, baseándose na proposta do Goberno e en casos ficcionados baseados en datos e perfís reais
A continuación, explicamos como as mulleres poderían abortar en España de aprobarse a reforma do PP, en base á información ténica facilitada polo Ministerio de Xustiza, con casos ficcionados baseados en datos e e perfís reais.

1. Ana e seus pais

Ana ten 16 anos, vive cos seus pais e quedou embarazada. A noticia é un shock para seus pais, pero están de acordo con ela en non seguir adiante co embarazo. Eles deben, por lei, consentir o aborto. Van ao médico de cabeceira, onde a moza explica que está sometida a unha forte tensión e ansiedade pola situación, que de seguir co embarazo pode afectar á súa saúde mental. Ten sorte. O seu médico non se declara obxector de conciencia. Remítea con carácter de urxencia a unha consulta psiquiátrica. Este especialista deberá acreditar que efectivamente a saúde mental de Ana periga. Ademais, Ana e seus pais deberán buscar outro especialista médico, dun centro diferente de onde se vaia a practicar o aborto, que asine o ditame que acredita o risco. Pero iso non é todo.

A continuación, Ana deberá acudir aos Servizos Sociais da súa Comunidade, onde a informarán por escrito e de maneira verbal, "que a vida do non nado constitúe un ben xurídico protexido pola Constitución". Ademais, explicaranlle as prestacións sociais, públicas e privadas, ás que ten dereito en caso de continuar co embarazo e contaranlle "as alternativas existentes" ao aborto como a adopción. Daranlle un certificado coa data na que recibiu esta información. Outro médico, alleo ao centro no que se realizará o aborto, deberá explicarlle "os riscos que a interrupción voluntaria do embarazo pode levar para a saúde da muller e para a súa maternidade futura", entre outros aspectos. É un momento moi difícil, pero tras recibir toda esta información, Ana mantense na súa decisión de abortar. Pero aínda terá que agardar sete días, o período de reflexión ao que obriga a lei. Pasado ese tempo, Ana pode xa interromper o seu embarazo, despois de asinar o consentimento informado que require calquera intervención hospitalaria.

2. Marta e o seu pai maltratador

Marta acaba de cumprir 17 anos e acaba de decatarse que está embarazada. Non quere ese fillo. Así que acode cunha amiga aos servizos sociais. Alí dinlle que se quere abortar, ademais de acreditar que corre perigo a súa saúde mental cun ditame asinado por dous médicos, necesita o consentimento dos seus pais. Marta cóntalle ao traballador social que o seu pai a maltrata e ten moitísimo medo de contarlle o ocorrido. Infórmana que no seu caso pode solicitar ao Xulgado Civil de Instrución que decida sobre a súa situación. Debe explicar as súas "circunstancias persoais", así como "a identidade dos médicos que van realizar a intervención e das persoas interesadas no procedemento". Marta tamén deberá incluír, no seu caso, o informe médico que acredita que a súa saúde mental corre perigo, os certificados que constatan que recibiu a información dos servizos sociais e dos riscos médicos de someterse a un aborto. Nun prazo non maior a 15 días o xuíz pode investigar toda a información que considere relevante para tomar a súa decisión. El será quen diga se Marta ten a madurez suficiente para tomar esta decisión sen o consentimento paterno.

3. Berta quéreo ter

Berta apenas cumpriu 14 anos e estuda Segundo da ESO. Hai poucos meses que sae cun mozo, o seu primeiro noivo, e ten seis semanas de xestación. Ela só pensa en seguir adiante co seu embarazo. Pero ao contárllelo aos seus pais estes opóñense, cren que é moi nova para ser nai, e queren que aborte. Ela decide presentar unha solicitude de amparo ao xuíz, quen tras escoitar aos pais e á moza, decide darlle a razón aos pais xa que como Berta ten 14 anos o maxistrado debe atender "principalmente ao consentimento manifestado polos pais". Con todo, podería darse o caso de que o xuíz considerase que a decisión dos pais "fose contraria á protección do interese da muller", e resolvese que Berta pode seguir co seu embarazo.

4. Natalia quere unha carreira

A Natalia quédanlle dous anos para terminar Mediciña. Sorprendeulle moito o seu embarazo porque usaba un método anticonceptivo. Pero despois duns días de desconcerto e dunha conversa co seu noivo decidiu que non quere ter o bebé. Quere continuar cos seus estudos e é unha responsabilidade que non pode asumir. Acode aos servizos sociais e danlle toda a información que está obrigada a recibir por lei. Non lle importan as axudas que haxa, ela non quere ter un fillo. O de ter que esperar unha semana enteira mortifícaa, parécelle unha crueldade innecesaria. A ansiedade mesmo a leva a Urxencias unha noite. Son sete días eternos ata que finalmente pode abortar. A intervención vai ben, pero a recuperación tarda. Foron moitas semanas de angustia, de sentirse presionada para cambiar a súa decisión.

5. Cristina, a crise e o medo

Cristina e o seu marido chegaron hai cinco anos de Ecuador. Ten 32 anos e de momento as cousas non foron doadas. O diñeiro non é dabondo. El está no paro desde hai tempo, e a ela reducíronlle a xornada laboral, e polo tanto o seu soldo na empresa de limpeza onde traballa. Ela quere ter un fillo, pero tras unha tristísima charla decidiron que a falta de recursos pesa máis. Terán fillos cando teñan máis medios. Acoden aos servizos sociais, onde lle dan toda a información social, así como a médica. É un proceso moi doloroso. E tarda demasiado. O seu marido mesmo lle expón acudir a un coñecido do que lle dixeron que fai abortos sen necesidade dos trámites. Ela resístese. Nos sete días de reflexión, Cristina non deixa de pensar e asustarse ante as palabras do médico, que lles explicou os riscos que o aborto pode levar. Díxolles mesmo que podería non volver quedar embarazada. Unha amiga anímaa dicíndolle que é un risco mínimo. Finalmente danlle cita nunha clínica. Por sorte conta co apoio da súa parella. Despois de longas semanas o calvario acabou. A preocupación non.

6. Beatriz marcha a Londres

Beatriz ten 35 anos, vive coa súa parella desde hai tempo e ambos teñen uns traballos que lles permiten vivir de maneira folgada. Acaban de saber que ela está embarazada, pero decidiron abortar porque non queren ter fillos. Nunca os quixeron. Acoden directamente a unha clínica privada onde os informan dos pasos a seguir, como que deben ter un ditame médico, asinado por dous especialistas, que acredite que a saúde mental de Beatriz corre perigo se segue co embarazo, e que tamén deben acudir aos servizos sociais. Beatriz non está disposta a que un médico diga que as súas facultades mentais quedarían prexudicadas se segue co seu embarazo. Pero non ten outra opción. Non ten ningunha posibilidade de elixir agás alegar unha enfermidade psíquica. Así que ela e a súa parella optan por viaxar a Londres, onde unha amiga concertoulles xa unha cita nunha clínica. En menos dunha semana están de volta en España.

7. Familia numerosa
Paula ten tres fillos, de seis, catro e dous anos. Encántalle ter unha familia numerosa. Pero volveuse a quedar embarazada. Pasan unhas semanas de dúbidas, de exporse e reformularse o asunto. Finalmente ela e o seu marido deciden non ter un cuarto fillo. Está de 12 semanas cando acode ao seu médico de cabeceira para explicarlle que seguir co embarazo xéralle un estado de ansiedade terrible. O médico contéstalle que non pode axudala porque é objetor de conciencia ante o aborto. Paula e o seu marido, desconcertados, acoden a outro médico do mesmo centro, que lles responde o mesmo. A desesperación crece. E entre tantos intentos, as ausencias de ambos no traballo empezan a xerar problemas. Non o contaron por medo á presión dos demais. Finalmente, un terceiro sanitario derívalles á consulta de psiquiatría e failles o favor de chamar para que a atendan canto antes. Pero a mala sorte fai que dean cunha especialista que se nega a emitir o informe médico. Teme que o certificar risco psíquico nunha muller que é felizmente nai poida acabar nunha demanda dalgún grupo dos denominados provida. Desesperados e xa con varias semanas de xestación, deciden concertar e pagar unha cita nun centro privado para lograr o ditame médico. Respiran aliviados ao saber que os traballadores sociais da rede pública non poden acollerse á obxección. Finalmente Paula pode interromper o seu embarazo, xa con 18 semanas de xestación.

8. Irene e o seu dobre drama

Irene, de 34 anos, sofre un dobre drama e non pode compartilo con ninguén. Non foi capaz de contar nin sequera á súa familia que foi violada por un mozo que coñecera nunha discoteca. Non o denunciou. E agora sabe que está embarazada de 10 semanas. Baixo ningún concepto quere ter o bebé. No hospital explícanlle que debe acreditar a violación cunha denuncia -un requisito indispensable en caso de violación- e que debe acudir aos Servizos Sociais para que lle informen de todo o proceso. A cita atrásase e ten medo que pase o prazo máximo de 12 semanas nos que o aborto é legal en caso de violación. Son días de desesperación, porque ademais hai que contar coa obrigatoria semana de reflexión até poder interromper o seu embarazo a tempo.

9. Martina e o dilema

Martina e o seu marido queren desde hai tempo ter un fillo. Por fin ela quedou embarazada e todo transcorre ben ata que o seu xinécologo infórmaos de que o bebé nacerá con síndrome de Down. Está embarazada de 14 semanas, pero ambos cren que non están preparados para asumir esa responsabilidade. Deciden non ter un fillo nestas condicións. Dinlles que necesitan un informe, asinado por dous médicos distintos, que acredite que de seguir adiante co embarazo a saúde mental de Martina está en perigo. O paso polos servizos sociais é durísimo. Alí infórmanlle das supostas axudas que tería e dos recursos cos que conta a rede pública (e privada) para casos de nenos con esa discapacidade. Pero eles seguen sen sentirse capaces. E pensan en que pasará con ese fillo se eles morren. Tras obter o certificado de recibir a información médica e co ditame médico na man, Martina finalmente pode abortar.

10. Pilar e o peor diagnóstico


Pilar está xa na semana 22 de embarazo. Ela e a súa parella esperan impacientes a chegada da súa segunda filla. Pero na última visita ao seu xinecólogo déronlles unha mala noticia: o feto ten anencefalia, unha anomalía moi grave. Os médicos dixéronlle que morrerá ao pouco de nacer. Ante esta situación e por moito que a parella queira ter o seu fillo, non queren levar o embarazo até o final sabendo que o neno morrerá axiña. Explícanlles que un médico debe acreditar esta "anomalía" do feto e que ademais outro especialista debe certificar que esa "anomalía é incompatible coa vida" supón un grave perigo para a saúde psíquica de Pilar. Á dor de coñecer o peor diagnóstico para o seu bebé súmase un peregrinar por especialistas e psiquiatras que convirtan o seu caso en apto para someterse a unha interrupción do embarazo.

Por  Patricia Rafael e Miguel Pardo .

Recomendamos entrar na noticia orixinal en Praza Pública con comentarios, galerías fotográficas e máis información relacionada .

Publicado no xornal Praza Pública 21 de decembro de 2013 Licenza Creative Commons by-sa.

Praza  Pública precisa de Ti:
A forza de Praza Pública son os seus lectores e lectoras. Praza é un medio da súa comunidade de lectores. A existencia do xornal depende das achegas realizadas por todos nós [+info].
__________________