Ante a actual vaga de lumes: Máis de 50 colectivos sairán a rúa nas sete grandes cidades galegas este xoves- En Ferrol, será cunha concentración ás 20:30hs, na Praza Amada García (diante do Edificio da Xunta) - Queren amosar a súa 'indignación' e exixir medidas á Xunta

A plataforma "Por un monte galego con futuro", da que forma parte máis de 50 entidades de todo o país, convocan concentracións nas sete cidades cidades galegas para o xoves 21 de xullo ás 20h (20:30 en Ourense) para amosar a súa "indignación" e esixir medidas á Xunta ante a actual vaga de lumes.

En Ferrol, será cunha concentración hoxe xoves 21 de xullo, ás 20:30hs, na Praza Amada García (diante do Edificio da Xunta)

Os actos amosarán o total apoio á veciñanza afectada así como aos colectivos dos profesionais que traballan na prevención e extinción dos lumes. As concentracións organízanse en resposta a vaga de incendios que está a devastar as máis emblemáticas xoias ecolóxicas de Galicia.

As entidades convocantes reclamarán a declaración de "zona cartastrófica" (agora "zona afectada gravemente por unha emerxencia civil") das áreas atinxidas polos lumes, así como accións inmediatas para evitar a erosión destes solos de extraordinaria importancia e procurar o antes posíbel a súa restauración, entre outras reivindicacións que se lerán nun manifesto conxunto.

"Co obxecto de que o goberno da Xunta escoite unha soa voz que percorra o país ao berro de LUMES NUNCA MÁIS, a plataforma 'Por un monte galego con futuro', anima á sociedade galega a saír á rúa, asistindo ás concentracións convocadas na Coruña, Compostela, Ferrol, Pontevedra, Vigo, Lugo e Ourense", apunta o colectivo nun comunicado.

Entre as entidades que integran a Plataforma "Por un monte galego con futuro" están A Estruga, A Rente do Chan-Pladever, A Ría Non se Vende, A Terra Non se Vende (ATNSV), Agrupación Micolóxica Naturalista Liboreiro, Amarelante Sociedade Cooperativa Galega, Amigos da Terra, Anduxía, Asociación Ambiental Petón do Lobo, Asociación Ambiental Senda Nova, Asociación de Amigos e Amigas dos Bosques "O Ourol de Anllóns", Asociación para a Defensa Ecolóxica de Galiza (ADEGA), Asociación para a defensa medioambiental Salvemos Monteferro, Asociación pola Defensa da Ría (APDR), Asociación Galega de Amigos do Camiño de Santiago (AGACS), Asociación Galega de Apicultura (AGA), Asociación Galega Cova Crea, Asociación Cultural Bidueiro, Asociación Galega de Custodia do Territorio (AGCT), Asociación de Custodia do Territorio Brexa, Asociación Frouma, Asociación Medioambiental Galicia Ambiental, Asociación Medioambiental Grupo Lobo, Asociación Monte Galego, Asociación Montes de Galiza (MONTEGAL), Asociación Naturalista Baixo Miño (ANABAM), Asociación Naturalista Hispella, Asociación Rebinxe, Asociación Rexeneración Autóctona, Asociación Veciñal do Saviñao, Colectivo Agrocuir da Ulloa, Comando Ghichas, Confederación Intersindical Galega (CIG), Ecoloxistas en Acción, Federación Ecoloxista Galega (FEG), Federación Rural Galega (FRUGA), Foro do Camiño, Fundación Eira, Greenpeace, Grupo Naturalista Hábitat, Instituto de Estudos Miñoráns, Mariña Patrimonio, Organización Galega de Comunidades de Montes (ORGACCMM), Plataforma Pola Defensa da Ría de Vigo «CÍES», Plataforma pola Protección da Serra do Galiñeiro, Quercus Sonora, Salvemos as Fragas de Catasós, Sindicato Labrego Galego, Sociedade Galega de Ornitoloxía (SGO), SOS Groba, SOS Suído Seixo, Terra Chá Sostible, Verdegaia e Véspera de Nada.

Publicado en Galicia Confidencial, baixo licenza Creative Commons by-nc-sa/4.0.
_______

A nova faciana do Galicia Confidencial

A nova faciana do GC
Galicia confidencial inicia unha nova etapa. Mudou de faciana para presentarlle á sociedade galega un novo producto informativo que fai das noticias sensibles, das suxeitas a censuras nos medios tradicionais ou das que moitos non queren contar o seu principal sustento.

Por Xurxo Salgado [*]
14.12.2009

Non cambiamos de filosofía, cambiamos a roupa. Xa hai tempo que se viñan facendo necesarias novas ferramentas e novas seccións, así como certa profesionalización dos seus contidos. O vello formato encorsetaba as necesidades informativas e o progresivo aumento da audiencia --andamos polos 2.000 lectores diarios-- facía necesaria unha renovación.

Non queremos ser pretenciosos. Coñecemos as nosas limitacións. Sabemos dos problemas aos que nos enfrontamos. Os que nos seguides habitualmente sabedes que durante estes últimos seis anos tentamos informar de todo e de todos, sen importarnos ideoloxías ou correntes políticas. Fomos críticos con Fraga, continuamos no bipartito e mantemos o mesmo espírito co Goberno de Núñez Feijóo. A nosa visión da actualidade, aínda que crítica, pretende ser constructiva. Non queremos destruir, senón construir unha mellor sociedade, e a única arma que temos é a información.

Nesta nova etapa tamén queremos abrir portas, queremos demostrar que a sociedade e os movementos civís de todas as tendencias, ademais das formacións políticas, tamén teñen voz. GC sempre será unha fiestra aberta a todos, a Galicia e ao mundo. Por iso, ampliamos o abano de colaboradores. Ademais de políticos, haberá xente da cultura, da comunicación, do deporte ou dos movementos sociais. Abrimos tamén novos espazos á información local, a máis próxima a nós e a que mellor coñecemos, e queremos potenciar a participación do lector a través dos foros e das redes sociais.

Este é o novo GC, o de sempre ainda que mellor vestido. Tentaremos seguir facendo o mesmo traballo, evitando erros, que tamén os temos, e agardando poder contar con vós. ADIANTE...

• Publicado en Galicia Confidencial
  
  
• Recomendamos entrar neste interesante e completo sitio web:
  http://www.galiciaconfidencial.com/

[*] Xurxo Salgado Tejido é Xornalista. Traballou en prensa, radio, televisión, gabinetes de prensa, axencias de noticias e Internet. Participou en varios proxectos de xornalismo electrónico. É o coordinador de GC
_______________________