Amosando publicacións coa etiqueta Prestige. Amosar todas as publicacións
Amosando publicacións coa etiqueta Prestige. Amosar todas as publicacións

mércores, outubro 08, 2014

O Ebola Cheira a Prestige: Espallando risco


Simitudes Ebola Prestige

O Ebola Cheira a Prestige. Espallando riscos

Unha serie de similitudes fan que a traxedia da epidemia do virus Ebola póidase comparar coa catástrofe ecolóxica polo afundimento do petroleiro Prestige:
1.- Os protagonistas: O actual presidente do Goberno era no ano 2002 vicepresidente responsable de coordinar a xestión da crise do Prestige.

2.- Os factores de risco causais dos desastres: A falta de controis, recursos e protocolos para controlar adecuadamente aos centos de petroleiros (moitos deles ferruguentos) que navegaban xunto á costa galega explican en gran parte esta catástrofe. Algo similar á decisión de trasladar a un enfermo afectado polo Ebola desde África sen contar cos recursos e protocolos para tratalo adecuadamente e sen riscos, ao haberse pechado o único Hospital de referencia para Enfermidades Infecciosas do país (Carlos III) para aforrar gasto.

3.- A diseminación do problema por culpa da incapacidade dos administradores e políticos: Obrigouse ao petroleiro a afastarse da costa e percorrer miles de millas mariñas esparexendo a súa carga de petróleo, mentres que no caso do Ebola non se formou nin informou adecuadamente ao persoal sanitario, nin se lle someteu aos controis pertinentes. A auxiliar de enfermería afectada marchou de vacacións e estivo seis días con febre sen estar sometida a control, foi por propia iniciativa que acudiu a un servizo de urxencias convencional, o que  facilitou a diseminación do virus entre familiares, amigos ou contactos esporádicos.

4.- A ideoloxía política dos gobernos: En ambos casos os gobernos presididos por militantes do Partido Popular (Jose Maria Aznar e Mariano Rajoy) tiñan e ten unha clara orientación neoliberal de beneficiar á multinacionais a costa de eliminar as regulacións gobernamentais que garanten a protección do medio ambiente e da cidadanía,  recortando os recursos do sistema para reducir gasto público e beneficiar ao sector privado.
Parece que vai sendo hora que saian da esfera pública Rajoy e os dirixentes do seu partido como a Ministra de Sanidade Ana Mato (remedo do Enrique López Veiga entón . Conselleiro de Pesca da Xunta de Galicia e de Arsenio Fdez. de Mesa Delegado do Goberno en Galicia) pola súa incapacidade de xestionar administracións e recursos públicos.

Asociación Galega para Defensa da Sanidade Pública

Enviado por:
Plataforma en Defensa da Sanidade Pública Ferrol
-plataformadspferrol@gmail.com-
7 de outubro de 2014 18:51

http://www.plataformadspferrol.blogspot.com/

_________________

martes, novembro 19, 2013

O 'Prestige' afundiuse porque quixo, ... Por Manuel Rivas

A sentenza é propia da Idade dos Combustibles Fósiles. Un fósil, en si mesma | Blanquea a actitude do goberno de entón e envía unha mensaxe patética a nivel internaiconal.

Por Manuel Rivas [*]
19.11.2013


A sentenza sobre o Prestige leva por data o 13 de novembro de 2013, xusto no undécimo aniversario do desastre, pero en realidade é un documento da éra prePrestige. Unha sentenza propia da Idade dos Combustibles Fósiles. Un fósil, en si mesma. O relato é inverosímil. Todo parece froito do azar e non existe a casualidade. Formúlase, de forma indirecta ou inconsciente, unha especie de doutrina da irresponsabilidade ambiental. Se branquea a actitude dun Goberno que nunca recoñeceu a realidade dunha marea negra que afectou polo menos a 1.600 quilómetros de costa. Envíase unha mensaxe patética a nivel internacional. Nun peritaxe modélico, os danos foran avaliados en 4.328 millóns de euros. Pero ao non haber responsables, non ha lugar a reclamación. É dicir, os danos non existen. Nun anterior auto da Audiencia, no que se imputaba por vez primeira a un político, José Luís López-Sors, dicíase sobre a xestión gobernamental do desastre: "Peor, imposible". A sentenza, puro conformismo, pode interpretarse agora como un eloxio desa actuación. O mar pode con todo.


Benvidos á prehistoria da inxustiza ambiental.

Naqueles días de outono do 2002, o entón ministro de Defensa e heroe de Perejil, Federico Trillo, propuxo bombardear o barco. Visto o visto, foi unha mágoa non haberlle dado máis cancha ao noso comandante xurídico. Hoxe teriamos, polo menos, a viñeta espectacular dun afundimento causal, a certeza dun home con ovos e ao mando e talvez un proustiano conde do Prestige para celebrar este tempo perdido.

A de Trillo foi unha das moitas declaracións memorables no florilegio do Prestige, aínda que tivo que competir cunha alta xerarquía en plena inspiración, desde o ramallazo beat de Aznar ("Son cans que ladran o seu rancor polas esquinas") ao insuperable haiku de Rajoy ("Uns pequenos hilitos / solidificados / plastilina en estiramiento vertical"). Con todo, quédome coa brillantez do aforismo do entón delegado do Goberno en Galicia, Arsenio Fernández de Mesa: "Hai unha cifra clara, e é que a cantidade que se verteu non se sabe".

Houbo dúas mareas negras. Unha, física, brutal, con sucesivas embestidas dos miles de toneladas do fuel da peor calaña, de uso prohibido en Europa. E outra marea de intoxicación pública, usando a linguaxe ao xeito da Neolengua de Orwell, onde o que se afirmaba significaba o seu contrario. A complexidade deste xuízo, cunha instrución máis que precaria, non permitía alimentar moitas esperanzas, aínda que o caso Prestige era unha oportunidade extraordinaria de crear un referente e ensanchar a mirada xurídica contra a gravísima violencia medioambiental. Pero saír un fósil. A linguaxe é propio da Neolengua. E así din da acción gobernamental: "Tomouse unha decisión discutible, pero parcialmente eficaz, enteiramente lóxica e claramente prudente". ¡Chapó!

O Prestige non levaba "rumbo suicida", di tamén a sentenza, en contradición co anterior auto da Audiencia. En Portugal, a modo de elegante eufemismo, adoita dicirse do suicida: "Morreu porque quiz". Iso é o que lle pasou ao barco. Non houbo nin haberá responsables. Afundiuse porque el quixo.

[*] Manuel Rivas, nado no barrio coruñés de Montealto o 26 de outubro de 1957, é un escritor, poeta, ensaísta e xornalista galego. Así mesmo, dende o 31 de xullo de 2009 é académico da RAG [Galipedia].

Publicado na edición para Galicia do xornal 'El Pais' o 13 de Novembro de 2013 | ESPECIAL: Consulte toda a información sobre a catástrofe.

Enviado por:
Miguel Ángel Fernández
-miguelafp@gmail.com-
19 de novembro de 2013 11:22
____________

martes, outubro 20, 2009

Preguntas presentadas no Congreso dos Deputados por Esquerda Unida en relación coa situación do Prestige


  • ESQUERDA UNIDA PRESENTA NO CONGRESO DOS DEPUTADOS DÚAS PREGUNTAS EN RELACIÓN COA IMPUTACIÓN DE LÓPEZ SORS
  • ESQUERDA UNIDA PREGUNTA POLAS CONSECUENCIAS ECONÓMICAS DERIVADAS DUNHA HIPOTÉTICA CONDENA
  • ESQUERDA UNIDA DEMANDA DO GOBERNO DO ESTADO UNHA VALORACIÓN DA IMPUTACIÓN DO EX DIRECTOR XERAL
Esquerda Unida vén de presentar no Congreso dos Deputados dúas preguntas parlamentarias ao obxecto de que o Goberno do Estado clarexe cal é a súa postura diante do xiro producido polo auto da Audiencia Provincial da Coruña, no cal volta a imputar ao que entón era director xeral da mariña mercante, José Luis López – Sors, como presunto autor dun delito medioambiental pola súa actuación na decisión de afastar o Prestige.

Segundo o exposto no seu escrito de acusación, Esquerda Unida – única organización política persoada na causa – reclamaba a imputación de López – Sors e a Audiencia vén de darnos a razón, cando no auto cualifica a decisión de afastar o buque como erro clamoroso, e cando afirma que as probas reunidas na fase de instrución do sumario amosan o seu desacerto na xestión da crise, até facer constar que as súas actuacións foron peor imposible.

No auto a Audiencia critica a compracencia cun rumbo suicida, estimando que non se valorou de maneira adecuada a situación real do buque e a decisión de afastalo non proporcionaba unha solución de intervención co obxectivo de salvar a nave.

O deputado de Esquerda Unida, Gaspar Llamazares, presenta, xa que logo, estas dúas preguntas para as que solicita resposta por escrito do Goberno central:

¿ Cal é a valoración que fai o Goberno da imputación do ex director xeral da Mariña Mercante polas súas responsabilidades na orde de alonxar o Prestige e o
conseguinte delito medioambiental cometido ?

¿ Cales poderían ser as consecuencias económicas para o Estado, no caso de condea do imputado ?

A nosa organización reclama a maior celeridade para avanzar nunha causa que arrástrase dende o ano 2003.

Compostela,20 de outubro de 2009

Envio por:
eu-ferrolterra@esquerdaunida.org
20 de outubro de 2009 17:31


Estimad@s amig@s:  vaivos unha información de Esquerda Unida nacional en relación coas preguntas presentadas no Congreso dos Deputados por Esquerda Unida en relación coa situación do Prestige. Grazas pola vosa atención. Saúdos, Ramiro Marier

______________________

martes, outubro 06, 2009

Esquerda Unida sobre decisión Audiencia no caso Prestige


  • ESQUERDA UNIDA FELICÍTASE POLA DECISIÓN DA AUDIENCIA PROVINCIAL DA CORUÑA QUE DA A RAZÓN A EU AO  IMPUTAR DE NOVO A LÓPEZ – SORS NO CASO PRESTIGE 
  • YOLANDA DÍAZ, COORDINADORA NACIONAL DE EU, ANUNCIA UNHA BATERÍA DE INICIATIVAS PARLAMENTARIAS NO CONGRESO DOS DEPUTADOS
Esquerda Unida quere manifestar a súa satisfacción pola decisión da Audiencia Provincial da Coruña, que da a razón ao recurso de apelación presentado,  entre outras, pola nosa organización en relación co que fora director xeral da mariña mercante, José Luís López – Sors

Esquerda Unida vén mantendo ao longo destes anos a relevancia das decisións de López – sors en orden a alonxar ao buque da costa e, xa que logo, o posterior naufraxio do navío. No auto ditado pola Audiencia Provincial da Coruña apóntanse que coexisten cumulativamente todas as condicións para depurar en xuízo oral a presunta responsabilidade criminal ... a título de imprudencia grave.

Tiñamos razón en perseverar como acusación porque non pode ser que a desgraza do Prestige reste impune. Esquerda Unida está a estudar coa nosa representación legal as implicacións e pasos a seguir de agora en diante.

Yolanda Díaz, Coordinadora Nacional de Esquerda Unida, adianta que vaise levar ao Congreso dos Deputados un conxunto de iniciativas en relación co Prestige. Sendo a primeira delas unha pregunta parlamentar ao Goberno en relación coa responsabilidade dun cargo público agora de novo imputado.

Esquerda Unida agarda que o auto da Audiencia abra o camiño para a depuración plena das responsabilidades pola catástrofe do Prestige. Depuracións que ten que servir como exemplo do que nunca máis  teñen que facer as autoridades públicas nun caso semellante: antepor  criterios de oportunismo no canto de adoptar as medidas  de protección máis garantistas e racionais.

Compostela, 6 de outubro  de 2009

Enviado por:
eu-ferrolterra@esquerdaunida.org
6 de outubro de 2009 18:08


Prezad@s compañeir@s: achegamos nota de prensa en relación co auto ditado pola Audiencia Provincial da Coruña imputando de novo - dándolle a razón a Esquerda Unida - a López - Sors e as inicitivas a seguir no Parlamento.

Gabinete de prensa de EU

___________________________