Informando e difundindo a convocatoria da Manifestación do 30 de Setembro e Citas para esta semana

O Comité Cidadán de Emerxencia para a Ría de Ferrol, ven informando a poboación sobre o estado da situación da ilegal e perigosa planta regasificadora que lle deixaron construir a REGANOSA dentro da Ría e a súa vez convocando para a manifestación cidadá do vindeiro 30 de setembro. Que está previsto que saía desde o Porto de Ferrol, ás 12 do mediodía. Festivais populares e eventos que se producen na Comarca son visitados por activistas do Comité. Perante esta semana, partidos sindicatos e organizacións cidadáns van ser informadas de forma específica. Vai ser moi difícil contrarrestar a campaña mediática que REGANOSA co apoio das administracións está realizando, mais confiamos na capacidade de reflexión da cidadanía, para dar-se conta que o despropósito gasístico que REGANOSA instalou dentro da nosa Ría, é unha aberración que entraña un grande perigo para a vida e seguridade das persoas que moramos no contorno da Ría, como tamén pon en perigo os 600 postos de traballo da xente do mar, non só pola cantidade de buques gaseiros que está previsto entren e saían anualmente da Ría coa conseguinte paralización da actividade en varios dos bancos marisqueiros, senon polo obsoleto sistema de vaporización por auga mariña que utiliza REGANOSA que produce un impacto ambiental de enormes perxuicios á xa deteriorada Ría.
_____
+ Info na Folla Informativa da Convocatoria da Manifestación do 30 de Setembro en formato PDF, para reproduzir e fotocopiar:

Enlace co ficheiro da convocatoria en formato -PDF-


AS CITAS DESTA SEMANA:

- 20 de Setembro, Xoves, ás 20:00 hrs, na Biblioteca Municipal de Pontedeume, Organizado polo Colectivo Fusquenlla: Proxección de “O salario do silencio”. Será presentado pola actriz e produtora executiva do documental, Mabel Rivera, e por Enrique Banet, director. Tamén estarán presentes Miguel López (da Asoc. Veciñal Fontelonga), e Luz Marina Torrente (Presidenta da Plataf. de Veciños O Cruceiro de Mehá).

- 21 de Setembro, venres, proxeción pública do documentario "O salario do Silencio", ás 9 da noite na Praza do Hino Galego en Esteiro. Organizada pola A. V. Fontelonga, Fervesteiro, Fundaçom Artábria, NÓS-UP e Unión Libertaria. No caso de que chova realizara-se na carpa do Festival de Fervesteiro que estará situada no campo de Batallóns ao lado da muralla do asteleiro.

- 21 e 22 de Setembro, celebrarase en Esteiro o Festival Fervesteiro, adicado a Loita Cidadá contra REGANOSA, será apregoeira do Festival Luz Mariña Torrente, presidenta da Plataforma Veciñal "Cruceiro de Meá" e unha das portavoces da veciñanza pechada na Casa do Concello de Mugardos.

- 22 de Setembro, Sábado, ás 12 do mediodía, Salón de Actos da Universidade, Facultade de Humanidades - Campus de Esteiro, reunión de intelectuais, xente das letras e da cultura, para elaborar e asinar un manifesto contra o despropósito gasístico de REGANOSA.
__________

Galería de diapositivos do Sábado e Domingo, 15 e 16 de Setembro de 2007, o Comité Cidadán de Emerxencia informando no Campeonato de Triatlón e no Feirón de Ferrol. Planta de Gas Fora da Ría !!

[Para entrar na Galería de Diapositivos, clicar no enlace ou acima da imaxe]


__________