O goberno local anuncia o inicio das obras de reparación da cuberta do pavillón do Manuel Masdías

• O edil Angel Mato apunta que, con cargo aos 13,3 millóns de euros do Plan E, comezarán no prazo máximo de 15 días
• Explica que así llelo trasladaron onte á dirección do centro os concelleiros de Educación e de Deportes nunha xuntanza

Ferrol, 07 de maio de 2009.-

O concelleiro de Urbanismo, Angel Mato, informou esta mañá do inminente inicio das obras de reparación da cuberta do pavillón polideportivo do colexio público Manuel Masdías, en Caranza, dando cumprimento así ao compromiso adquirido polo alcalde da cidade, Vicente Irisarri, e a concelleira de Educación, Mercedes Carbajales, no último pleno ordinario. Neste senso, o edil explicaba que os traballos se executarán con cargo aos fondos do Plan Ê concedidos polo Goberno central e destacaba que se trata dunha actuación prevista polo equipo de goberno dende o ano pasado, previamente ao paso do ciclón Klaus pola cidade. O prazo de execución: dous meses. Enviaba, deste xeito, unha mensaxe de tranquilidade á comunidade escolar deste centro ferrolán e destacaba que o curso 2009-2010 comezará cun pavillón totalmente remozado. De feito, a propia titular de Educación e o edil de Deportes, Manuel Santiago, se desprazaban no día de onte ao centro para informar á dirección deste feito ao tempo que aproveitaban a visita para comprobar o nivel de seguridade das instalacións na actualidade.

Máis polo miúdo, o responsable das políticas urbanísticas da Administración local apuntaba que a finais de 2008 a titular de Educación trasladaba á area de Urbanismo a necesidade de intervir en varios centros escolares do termo municipal. Unha iniciativa criticada no seu día polos grupos da oposición, tal e como recordaba Mato, ao considerar que excedían das competencias propias do Concello. Nesta liña, Mato destacaba a obriga do equipo de goberno de garantir uns servizos públicos de calidade a tódolos ferroláns e ferrolás. Política na que se enmarca a decisión do Concello de incluir esta actuación dentro dos proxectos seleccionados pola Administración local con cargo aos 13,3 millóns de euros aprobados para Ferrol polo Goberno central ao abeiro das medidas adoptadas para combater o actual contexto de crise económica. E, ao fío, lembraba que se incluíran nove actuacións para oito centros escolares ferrolás.

A partir de entón, se poñían en marcha os mecanismos para contratar estas obras, que daban como froito que o pasado 10 de marzo se iniciara a licitación e se adxudicara definitivamente o 20 de abril á firma especializada en cubertas Empresa Metalúrgica Pontesa S.L. Unhas obras, engadía o edil, cuxo importe ascende a 66.000 euros, mentres que o prazo de execución é de dous meses. Consistirán na demolición da cuberta e na instalación dunha nova. E, ao fío, o edil apuntaba que os traballos darán comezo no prazo máximo de 15 días.

Finalmente, o concelleiro de Urbanismo destacaba o compromiso do goberno local para atender as necesidades dos centros públicos escolares do municipio. E, ao fío, lembraba que no marco dos Fondos Estatais o Concello ten previsto intervir en sete centros máis.

Saúdos; Gabinete de Comunicación
____________________
Gabinete de Comunicación do Concello de Ferrol
Praza de Armas s/n – 15402 Ferrol – (A Coruña)
Teléfono 981 94 40 13 – Fax 981 94 40 19
gabineteprensa@ferrol.es
__________________