Por Yolanda Díaz [*]
18.02.2012
O PP sempre dille si aos empresarios. Esa patronal que agrupa, eles si van unidos, a banqueiros e grandes empresas xa ten o que quería: a fin do acordo social que regulamentaba nas empresas o conflito entre capital e traballo: quedamos sen negociación colectiva, con todo o poder para as empresas que poderán baixarnos o salario, ou cambiar horarios e mobilidade ó seu arbitrio; empresas que poderán contratar por un ano en probas sen dereito algún para o traballador por menos do SMI; empresas que nos poderán despedir alegando menos que nada; empresas que seguiran a recibir a fartura de milleiros de millóns de euros en bonificacións e deducións demasiadas veces acadadas en puro fraude de lei tolerado polos gobernos da quenda restauracionista. Así goberna o partido da patronal (PP): nun decreto dánlle 50.000 millóns – nosos– á banca; noutro nos arrincan os dereitos gañados no final da ditadura franquista e na transición. O desafío é inmenso para os que acreditamos no valor do sindicalismo de clase e compartimos a trincheira do mundo do traballo, aquela que se cavou en 1848 e que resta aberta malia todas as tentativas de pechala cos traballadores e traballadoras dentro. Se nas empresas as illas de dereitos sempre foron fráxiles, agora restan asolagadas polo PPatronal: a resposta para derrotalos se atopa nas rúas e nos centros de traballo, en xerar neses ámbitos unidade, organización e loita. Porque temos razón, podemos vencer. Depende de nós, do que fagamos unidos dende xa e na dura xeira de mobilizacións que virán.
Publicado no Diario de Ferrol o Sábado, 18 de Febreiro de 2012 00:00
[*] Yolanda Díaz é voceira de EU, avogada, ...
__________________
Por favor, o contido do seu comentario debe estar relacionado co asunto do artigo.
Prega-se o maior respecto coas persoas, polo que ataques persoais e insultos serán eliminados.
Por favor, non use os comentarios, só para facer propaganda do seu sitio ou será eliminado.
EmoticonEmoticon