NÓS-UP é favorável a concorrer às eleiçons europeias com forças de libertaçom nacional dos povos e contra a UE dos mercados e dos Estados

Nos últimos nove meses -tal como já temos informado mediante vários comunicados-, NÓS-UP mantivo contatos permanentes e regulares com forças políticas galegas e de outros povos do Estado espanhol, visando configurar umha candidatura rupturista para as eleiçons europeias de 25 de maio.

A nossa opçom prioritária sempre foi configurar umha candidatura galega e de esquerda pola saída da UE, tal como foi transmitido em julho de 2013, descartando umha aliança eleitoral com forças de obediência espanhola.

Porém, as possibilidades da participaçom da esquerda independentista e socialista galega numha candidatura sob estes eixos sempre estivérom condicionadas pola negativa a integrar-nos numha formulaçom orgánica onde nom se visibilize a presença do projeto recovolucionário da esquerda independentista que NÓS-UP representa e ter como parceiros a ERC.

NÓS-Unidade Popular pode flexibilizar ao máximo o seu programa político mediante concessons favoráveis a atingir um pacto nacional.

Devemos procurar umha convergência de mínimos que permita estruturar umha candidatura em defesa da economia produtiva galega, contra os constantes ataques à nossa construçom naval, setor pesqueiro e agrário, assim como ao meio natural através da mineraçom selvagem. Devemos igualmente articular a resposta às políticas impostas por Bruxelas e Madrid em plena crise, que conduzem aos despejos, aos roubos dos banqueiros às/aos aforradores, ao corte de serviços sociais fundamentais como a saúde ou a educaçom, etc.

Mas NÓS-UP, tal como acordou na sua VII Assembleia Nacional de 30 de novembro, nom poderia concorrer com umha força que dá cobertura a um governo que aplica umha política neoliberal contrária à maioira social catalá, que dá cobertura à brutalidade da repressom policial dos Mossos de Esquadra e que mesmo pode incorporar-se ao governo presidido por Artur Mas.

Descartada a presença de ERC nas negociaçons e acordos em curso, manifestamos a nossa disponibilidade para fazer parte dumha candidatura com forças amigas dos povos oprimidos polo imperialismo espanhol.

NÓS-UP é pois favorável a que a esquerda independentista galega participe com voz própria numha candidatura sob um programa rupturista onde estejam presentes EHBildu e a CUP, aberta à incoporaçom de organizaçons de outras latitudes do Estado espanhol.

Assim o temos manifestado à CUP e a Sortu: é necessário vertebrar umha candidatura anticapitalista e feminista promovida polas organizaçons de libertaçom nacional da Galiza, Países Catalans e País Basco.

Fazemos entom um apelo à CUP e a Sortu para concorrermos conjuntamente às eleiçons europeias mediante um programa contra a Europa dos mercados e dos Estados. Um programa aberto à incorporaçom de todas aquelas forças politicas e movimentos sociais que coincidamos taticamente na necessidade de vertebrar eleitoralmente em cada um dos nossos povos a rebeldia frente o caduco regime espanhol.

Posteriormente ao multilateral acordo atingido, é necessário poder coordenar as diversas expressons do nacionalismo e do independentismo galego sob umha formulaçom integradora e um programa conjunto.

Direçom Nacional de NÓS-UP

Galiza, 10 de fevereiro de 2014

NÓS-Unidade Popular | Correio-e: nacional@nosgaliza.org | nosup.imprensa@gmail.com | Telefones: Porta-Vozes: 659 306 973 (Rebeca Bravo), Responsável Nacional de Imprensa: 616 868 589 (Carlos Morais),
Responsável Nacional de Organizaçom: 669 778 474 (Bruno Lopes Teixeiro) | Sede Nacional: Rua Costa do Vedor 47, rés-do-chao. Compostela. Galiza | web: www.nosgaliza.org | twitter: @nosgaliza .

Enviado por:
NÓS-Unidade Popular NÓS-UP
-nosup.imprensa@gmail.com-
10 de fevereiro de 2014 18:33
__________________