01.09.2021
Megaproxectos eólicos, espolio, abuso e atentado contra a saúde - Efectos dos parques eólicos sobre a saúde.
Logo de case 20 anos de implantación de parques eólicos de forma masiva preto das vivendas en países como Dinamarca, Francia, Bélxica, Holanda, coñécense xa os graves problemas que provocan na saúde das persoas, feito que carrexou a paralización eólica en Australia, e ata que se haxan ditado sentenzas que obrigan a desmantelar aeroxeneradores e parques eólicos por estes motivos.
Coñécese este problema como a "síndrome da turbina eólica" polo que os expertos recomendan a localización dos aeroxeneradores a unha distancia de polo menos 2 quilómetros das vivendas. Con todo, algúns parques eólicos están xa construídos ou proxectados a menos de 500 metros de áreas residenciais, pobos ou casas individuais.
Calquera persoa que viva a unha distancia inferior a 6 km dun parque eólico, debería ser avisada das consecuencias que pode ter para a súa saúde e calidade de vida?.
O ruído, é un dos problemas máis evidentes. As puntas das aspas dun molino de vento poden chegar a alcanzar unha velocidade de ata 80 metros por segundo o que provoca sons e vibracións e ata cambios na presión do aire.
A iso hai que engadir os infrasóns ou ultrasóns, e ondas de baixa frecuencia ou de baixa intensidade, sons de frecuencia inferior a 16 Hz. Nos aparellos de maior potencia, de 3Mw, son maiores os infrasóns, propáganse quilómetros, e poden ocasionar dores de cabeza, problemas de soño, pesadelos nocturnos e problemas de aprendizaxe en nenos, zumbidos nos oídos (tinnitus), irritabilidade, ansiedade, depresión, problemas de concentración e memoria, de equilibrio, mareos e náuseas, cansazo extremo e neurosis.
Tamén se pode engadir o efecto estroboscopio ou "efecto discoteca", que provocan as sombras parpadeantes proxectadas polas aspas ao virar cando o sol está detrás dos muíños, moi estresante e asóciase ata a certos problemas de saúde como ataques epilépticos.
Escintileos e fogonazos das luminarias dos aeroxenedores pola noite, do mesmo xeito, supoñen un motivo relevante de estrés e de perda de calidade de vida para as persoas que viven cerca ou rodeadas de muíños.
Colectivos veciñais, organizacións ecoloxistas e plataformas, grupos de montañeiros e asociacións veciñais e culturais de distintas zonas do rural están en guerra contra o despregue de parques.
A razón é que saben que se aveciña un futuro cun ventilador en todos e cada un dos montes e, por outra e, sobre todo, porque non é máis que un, un espolio.
A min tócame a ameaza do proxecto "Parque Eólico de Caaveiro", a todos os veciños de Anca tócanos loitar si non queremos desaparecer.
O macroproxecto eólico de Caaveiro aféctanos de cheo.
Un proxecto vergonzoso que por non cumprir nin sequera cumpre coa lexislación vixente.
Megamuiños xeradores a uns 269 metros de vivendas, cando a lei marca 500 metros para xeradores moito máis pequenos e polo tanto menos potentes e daniños.
En Alemaña multiplícase a altura do eólico por 10 para calcular a distancia do aeroxenerador das vivendas, neste caso estamos falando de muíños de 200 metros, así que a distancia sería de 2 quilómetros e non de 500 metros.
Obrigáronnos a movernos e facer alegacións sobre proxectos que non deberían estar sobre a mesa, porque atentan contra a poboación e ata contra a lexislación vivente, obrigáronnos a comezar unha loita e poñer diñeiro dos nosos petos para tratar de frear un abuso, un auténtico acto de agresión contra os intereses dos poboadores dos territorios afectados.
Para os veciños afectados por estes megaproxectos eólicos os efectos serán demoledores.
Estamos falando de aeroxeneradores de máis de 200 metros de altura que van provocar uns fortes impactos sobre os veciños e o territorio.
- Os terreos e as vivendas situados ata a 3 quilómetros do parque perderán sobre o 30% do seu valor actual.
- O espazo forestal e agrario quedará dependente do macroparque por 30 anos prorrogables.
- As interferencias no uso do chan, en relación ao uso gandeiro, agrícola e forestal.
- O grave impacto na paisaxe.
- O impacto sobre a auga, fontes, caudais, traídas, etc,
- O ruído insoportable e constante que ten graves efectos sobre a saúde física e mental das persoas.
- As interferencias que dificultan o funcionamento dos sistemas de telecomunicación, radionavegación aérea, e dos radares.
- Os accidentes polo desprendemento de pezas.
- O chamado "efecto discoteca" ou palpádeo de sombras das aspas en movemento sobre as casas.
- Non aportan postos de traballo, é unha gran mentira.
- Agudizan o despoboamento do rural, posto que a ninguén lle gustaría vivir preto dun parque eólico. A realidade demostra que o 90% dos municipios con parques eólicos perderon poboación.
- Problemas coa flora. Todos os anos morren miles de animais como consecuencia da produción de enerxía eólica. Os morcegos son os máis prexudicados.
- Non son bos para o ser humano. Pode traer problemas biolóxicos ao ter moita contacto con elas, por iso levantar estes parques tan preto da poboación é un verdadeiro atentado contra nosa saúde.
EÓLICOS AQUÍ NON!
[*] André Abeledo Fernández,
nado en Neda o 14 de Xullo de 1974, militante comunista e
sindicalista. Membro da Sección Sindical e Delegado da CIG en Mercadona na Provincia d'A
Coruña. | Facebook e Twitter.
Enviado por:
André Abeledo Fernández
-andre1474@gmail.com-
31 de agosto de 2021 23:48
_______
Por favor, o contido do seu comentario debe estar relacionado co asunto do artigo.
Prega-se o maior respecto coas persoas, polo que ataques persoais e insultos serán eliminados.
Por favor, non use os comentarios, só para facer propaganda do seu sitio ou será eliminado.
EmoticonEmoticon