Novo boletín informativo ambiental de Radio Cerna - O decreto-lei de Sánchez no que exime de avaliación ambiental certos proxectos de enerxías renovábeis fai saltar as alarmas das entidades ecoloxistas.... e outras novas

Boletín informativo ambiental 08/04/22

O decreto-lei de Sánchez no que exime de avaliación ambiental certos proxectos de enerxías renovábeis fai saltar as alarmas das entidades ecoloxistas, mesmo das estatais. As enerxías renovábeis non poden implantarse á custa de rebaixar as garantías ambientais ou de participación pública. ADEGA advirte de que este decreto en Galiza poría en risco espazos que foron propostos como ampliación da Rede Natura 2000. Doutra banda, a Xunta intenta reparar a súa ilegalidade, constatada polo TSXG, e volve a poñer en exposición púbilca aqueles proxectos eólicos aos que lles recurtou a metade o prazo de alegacións. Estas e outras novas de interese, neste espazo de Radio Cerna!

#GalizaPolaPaz

Queres coñecer a actualidade ambiental de Galiza? Escoita Radio Cerna!

Radio CERNA é o primeiro espazo radiofónico especializado na temática medioambiental e ecoloxista en Galiza. Está realizado pola Asociación para a Defensa Ecolóxica de Galiza (ADEGA) para difundir a través da rede e das emisoras locais galegas toda a información relativa á situación medioambiental do país. O espazo dura uns 10 minutos e actualízase todos os días de luns a venres.

Radio CERNA
Ronda Fontiñas, 180 Entrechán. 27002 Lugo. | Tlf: 982 240 299 Email: radiocerna@adega.gal | Administración:Avenida de Castelao, 20-Baixo 15704 Santiago de Compostela | Tlf/Fax: 981 570 099 Email: adega@adega.gal

#RadioCerna
#EolicaAsiNon
#NonInvasionEolica
#GalizaContraAmezaEolica

Delegación de Adega
Ferrolterra-Trasancos
adegatrasancos@adega.gal
Apartado 481
15480 Ferrol
http://adega.gal/

Foto: Manifestación da plataforma "Eólica Así Non" en Santiago de Compostela. | Xoán Álvarez.

Enviado por:
adegatrasancos@adega.gal
-adegatrasancos@adega.gal-
8 de abril de 2022 13:36
_______

Veciñas e veciños de Anca (Neda) afectados polo megaproxecto eólico de Caaveiro, estamos a recoller sinaturas dirixidas á Área de Industria e Enerxía (Delegación do Goberno) - Modelo de recollida de sinaturas

Veciñas e veciños de Anca (Neda) afectados polo megaproxecto de Caaveiro, estamos a recoller sinaturas en oposición ao megaproxecto eolico, para apoiar un escrito dirixido á Área de Industria e Enerxia (Delegación do Goberno), agradecen asinar e difundir. A continuación transcribimos o texto que se pide asinar.

Á atención de:
D. JOSÉ MIÑONES CONDE
ÁREA DE INDUSTRIA E ENERXÍA
DELEGACIÓN DO GOBERNO EN GALICIA
Praza de Ourense, nº 11, A Coruña, C.P. 15003

Asunto: Listado de sinaturas das persoas que manifestan o rexeitamento social ao Parque Eólico Caaveiro de 78 MW e a súa infraestrutura de evacuación na provincia da Coruña (CÓDIGO DO PROXECTO: PEol-431). O parque eólico Caaveiro forma parte dun conxunto de 6 parques eólicos situados na zona  noroccidental da provincia da Coruña, en desenvolvemento por parte de  Enel Green  Power España S.L. O conxunto dos parques eólicos, denominados Caaveiro,  Tesouro, Barqueiro, Badulaque, Santuario e Moeche ten unha potencia instalada conxunta de 611  MW e conectan nun mesmo punto de conexión á Rede a Subestación de REE As Pontes (posición Grupo 3 Central Térmica) e que afecta aos municipios de Neda, Fene, San Sadurniño, A Capela, As Pontes de García Rodríguez e Cabanas. Trátase dun Plan industrial eólico da mesma promotora que se fragmenta de forma artificiosa co fin de eludir a avaliación global dos impactos ambientais e facilitar a tramitación e a axilización administrativa. O proxecto implica prexuízos irreparables para os valores da Zona de Especial Conservación (ZEC), Zona de Especial Protección dos Valores Naturais (ZEPVN) e Lugar de Interese Comunitario (LIC), denominado “Xubia-Castro”. Afección moi severa e prexuízos irreparables e incompatibles coa ZEC ES1110003 “Fragas do Eume” e a serra de Forgoselo. O proxecto é incompatible cos usos forestais actuais e paisaxísticos e implica unha ameaza para a economía dás familias que dependen dás explotacións forestais e agro –gandeiras dá área afectada que destaca pola elevada produción madeireira e agrícola. Afecta de forma severa ao benestar dás familias que viven nos núcleos próximos e aos seus lugares e espazos identitarios.

O parque eólico proxectado é incompatible cos usos e a fertilidade actual dos chans, fragmenta o territorio e implica a perda de biodiversidade. As cimentacións dos parques xunto coas remocións de toneladas de terra previstas para a súa implantación, altera de forma irreversible a cuberta vexetal e os recursos hídricos, producindo erosión dos chans e a medio e longo prazo desertización da área afectada. A perda dá cuberta vexetal converte aos chans nun recurso natural non renovable e finito eliminando  a súa funcionalidade e aptitude agrícola actual e potencial, gandeira e forestal de xeito irreversible.

Pídese a súa retirada definitiva.

✅ Modelo para asinar dirixido á Área de Industria e Enerxía (Delegación do Goberno). | Acceder/Baixar.

Facebook Asociación Veciñal de Anca (Neda)

#EolicaAsiNon
#NonInvasionEolica

Enviado por:
André Abeledo Fernández
-andre1474@gmail.com-
20 de dezembro de 2021 14:51
_______

A Xunta confirma que o 30% de Galicia quedará afectada polos eólicos

A Xunta confirma que o 30% de Galicia quedará afectada polos eólicos

·  Afectados e afectadas esixen que a moratoria inclúa os centos de proxectos en trámite e non só a solicitudes de 2022

·  A planificación de parques por todo o territorio fará que Galicia perda riqueza natural, económica e mesmo a súa identidade

·  Galicia xa xera enerxía eólica para exportar cos actuais parques

A coordinadora de plataformas  Aldeas Libres de Macroeólicos esixe á Xunta de Galicia que paralice os trámites dos centos de proxectos eólicos solicitados na nosa Comunidade, toda vez que a conselleira de Medioambiente, Territorio e Vivenda, Ánxeles Vázquez, confirmou onte aos medios de comunicación que o 30% do territorio quedará afectado por xeradores de enerxía.

A coordinadora lembra á Xunta de Galicia a súa responsabilidade na protección do patrimonio natural galego e insta a que a moratoria anunciada para 2022 comece neste mesmo intre ata que se elabore un plan de desenvolvemento enerxético equilibrado entre as necesidades enerxéticas e o medioambiente.

Aldeas Libres de Macroeólicos advirte que de continuar o plan sectorial actual a desfeita das nosas paraxes suporá, ademais da perda de riqueza e benestar para os galegos e galegas,  o borrado dunha gran sinal de identidade da nosa Comunidade. Así mesmo sinala que, como a propia conselleira explicou, Galicia se sacrificará para responder ás necesidades enerxéticas de Europa en beneficio das grandes compañías produtoras, xa que actualmente na nosa terra xa se produce máis enerxía da que precisamos e a compensación polos danos das empresas que explotan o territorio é insignificante, máis tendo en conta que os parques construídos hai 15 ou 20 anos amosan que non xeran nin postos de traballo nin dinamizan a zona, senón todo o contrario, levan perda de poboación.

A cidadanía galega esixe que os plans estratéxicos dos Gobernos autonómico e Estatal sexan complementarios para evitar unha sobreexplotación e que se reactive o plan da Rede Natura 2000 de protección dos nosos espazos, xa que Galicia é unha das Comunidades Autónomas con menos das súas paraxes protexidas, motivo polo cal xa recibiu unha multa da Unión Europea e recentemente, este mesmo 2021 un novo apercibimiento do ente internacional.

Santiago de Compostela, 12 de decembro de 2021

https://aldeaslibresdemacroeolicos.com

Contacto:
ortegaldinon@gmail.com

Enviado por:
Ortegal Di Non
-ortegaldinon@gmail.com-
12 de dezembro de 2021 13:40
_______

Gran participación na mobilización que tivo lugar esta mañá en Ferrol baixo o lema 'Eólica así Non'

Gran participación na mobilización que tivo lugar esta mañá en Ferrol baixo o lema "Eólica así Non"

Facéndoo coincidir co Día das Montañas as distintas plataformas, veciños e asociacións percorreron as rúas ferrolás dende a estación de tren ata o concello, onde os organizadores agardaban cun chocolate quente aos asistentes ao acto.

A morte do rural foi representada nesta andaina, mesturada co son das gaitas e os cánticos dos veciños en protesta por esta inversión eólica.

Unha vez na Praza de Amboaxe pasouse a ler o manifesto e o poema de Darío Xohán Cabana "Venceredes vós".

A continuación facémosvos chegar a nota de prensa oficial da coordinadora "Eólicas así Non".

Atentamente,

Luka, Ortegal di Non

 VID-20211211-WA0038.mp4

 VID-20211211-WA0071.mp4

 VID-20211211-WA0037.mp4


MÁIS DE 5000 PERSOAS SAÍMOS HOXE Á RÚA NA DEFENSA DAS MONTAÑAS GALEGAS FRONTE A INVASIÓN EÓLICA

Galiza, Días da Montañas, a 11 de decembro de 2021

Hoxe sábado, 11 de decembro, Galiza mobilizouse masivamente a prol das montañas e do rural galego e en contra da actual invasión eólica que ameaza o noso territorio. Mais de 5000 persoas participaron nas 22 mobilizacións convocadas en toda Galiza pola coordinadora galega “Eólica Así Non” para este Día mundial das Montañas co gallo de reivindicar diante das administracións públicas a preservación destes ecosistemas fronte a actual vaga eólica, baixo o lema “Na defensa das montañas. Eólica Así Non”.

Como xa acontecera o pasado 5 de xuño na Praza do Obardoiro de Santiago de Compostela, a resposta da sociedade galega foi contundente. A multitude congredada desta volta en diferentes localidades do país volveu reclamar á Xunta a paralización urxente, real e efectiva dos case 300 parques eólicos que se atopan actualmente en tramitación e que se prevén instalar no noso país. Máis de 170 entidades que fan parte da coordinadora, entre colectivos e plataformas veciñais, de afectados/as, ecoloxistas, culturais, sociais ou políticas, rexeitan a falaz e inútil moratoria anunciada polo goberno de Alberto Núñez Feijóo, por non ter ningún efecto sobre os actuais proxectos en tramitación e que só pretende confundir a opinión pública e desmobilizar a sociedade. Porén, o goberno da Xunta non conseguiu desmotivarnos. Agora máis que nunca reivindicamos a derrogación do desfasado Plan eólico de Galiza e das “leis de depredación” da Xunta (Lei de fomento de implantación de iniciativas empresariais e Lei de simplificación administrativa) de cara a deseñar unha nova planificación eólica, participada pola sociedade galega, xusta coas persoas e respectuosa co rural e co medio ambiente galego. Doutro xeito, estaríamos deixando en mans do oligopolio eléctrico o futuro do noso territorio.

Desde a Coordinadora Eolica Así Non entendemos que o éxito desta gran mobilización debe obrigar á Xunta a reconsiderar un cambio no modelo de implantación eólica e, por extensión, un cambio de modelo enerxético, no que se aposte polas enerxías renovábeis, pero non co fin de satisfacer as ansias especulativas do lobby enerxético e á costa de sacrificar o noso territorio, senón pensando no interese xeral. O novo modelo de implantación da enerxía eólica debería estar fundamentado na soberanía enerxética, no fomento do aforro e da eficiencia enerxética, no autoconsumo e na xestión pública do recurso ao servizo da sociedade galega. Tamén se fixo fincapé sobre o irreparábel impacto que estes preto de 300 proxectos eólicos, xunto coas súas liñas de evacuación e outras infraestruturas asociadas, terían sobre a rede de montañas galegas. Estes ecosistemas, que constitúen o principal obxectivo de ocupación das promotoras eólicas, representan un papel fundamental no desenvolvemento e resiliencia da nosa sociedade. As montañas son a nosa principal fonte de auga e de alimento, son refuxio das especies e hábitats de maior interese para facer fronte ao quecemento global, regulan o clima e controlan a erosión do solo, son paisaxe e reservorios do noso patrimonio cultural,... En definitiva, son unha peza clave para o equilibrio ecolóxico de Galiza, polo que a súa destrución estaría poñendo en risco o noso futuro e o das vindeiras xeracións.

Diversidade de actos na defensa das montañas

Nesta xornada de defensa das montañas, a Coordinadora “Eólica Así Non” convocou a sociedade galega en 22 enclaves xeográficos repartidos nas catro provincias galegas: Bembibre-Val do Dubra, Carral, Coristanco, Ferrol,  Mazaricos (provincia A Coruña);  Antas de Ulla, Becerreá, Chantada, O Courel, Foz, Lugo, Meira, Vilalba (provincia de Lugo); A Lama, Bueu, Cerdedo, Gondomar, Marín, Pontevedra, Vila de Cruces (provincia de Pontevedra); Castro Caldelas e Laza (provincia de Ourense).

Algunhas das consignas máis proclamadas nesta xornada de concentracións foron “Eólicos si, pero non así”, “Montañas sagradas, aldeas habitadas”, “O Capital bótanos do rural”, “Non, non, non a esta invasión; non, non, non á colonización”, “Que nos escoiten, queremos vivo o monte” ou “Non ao espolio do noso Patrimonio”...

A meirande parte dos actos celebrados nesta xornada discorreron en forma de concentración reivindicativa na que se leu o manifesto “Na Defensa das Montañas. Eólica Así Non”. Porén, nalgúns casos, como o de Bembibre (Val do Dubra), Ferrol, Cerdedo ou Antas de Ulla houbo manifestacións ou percorridos a pé que cortaron o tráfico de varias estradas. Nas mobilizacións convocadas para A Lama, Mazaricos, Marín e Gondomar realizáronse subidas aos montes ou montañas máis emblemáticos destas áreas en cuxos cumios se prodeceu á lectura do manifesto. As mobilizacións máis concorridas foron as de Bembibre (Val Do Dubra), Ferrol, Marín, Gondomar, seguidas de Pontevedra, Lugo, Foz, Vila de Cruces, Cerdedo, Carral e Meira.

En Lugo, Foz e Vilalba os actos estiveron acompañadas polo son das gaitas tradicionais e tamén se  fixeron recitais poéticos, e en Castro Caldelas amenizouse a xornada reivindicativa cunha chocolatada. Na concentración de Becerreá leu o manifesto o veciño da Fonsagrada e protagonista de “O que Arde”, Amador Arias, e en Pontevedra sumouse á mobilización o alcalde da cidade. Na andaina polo monte de Gondomar houbo unha especial presenza dos clubes de montaña. Na península do Morrazo, os actos terán lugar ao longo de toda a xornada, completándose a andaina de pola mañá no concello de Marín, cunha palestra e magosto pola tarde en Bueu. E no concello de Laza celebraranse en sesión de tarde, a partir das 16 horas. A última hora, tívose que desconvocar a concentración en Seoane do Courel por motivos de prevención fronte a incidencia da Covid-19.

Ao longo desta semana tamén amosaron o seu apoio ás mobilizacións convocadas pola Coordinador Eólica Así Non persoas recoñecidas da cultura galega como Miguel de Lira, Xurxo Souto, a Banda da Loba, Adela Figueroa, Lois Pérez ou Benedita Sánchez, entre outras.

Álbum de imaxes:
https://bit.ly/3yl8NT8

Cartaz Mobilización 11D:
https://bit.ly/3IAkERV

Manifesto NA DEFENSA DAS MONTAÑAS. EOLICA ASÍ NON: https://bit.ly/3lOvhXD

Listado colectivos EÓLICA ASÍ NON:
https://bit.ly/3xo57PT

Enviado por:
Ortegal Di Non
-ortegaldinon@gmail.com-
11 de dezembro de 2021 17:05
_______

A coordinadora galega 'Eolica Así Non' convoca 22 mobilizacións nas diferentes comarcas afectadas pola invasión eólica de Galiza - En Ferrol este sábado 11 de decembro andaina desde a Estación do Tren

MOBILÍZATE NA DEFENSA DAS MONTAÑAS FRONTE A INVASIÓN EÓLICA

Máis de 170 entidades que conforman a "Coordinadora Eólica Así Non" convídante a participar nalgunha das 22 mobilizacións que terán lugar, este sábado 11D, Día Internacional da Montañas para berrar alto e claro: “Na Defensa das Montañas, Eólica Así Non!”

E se non podes asistir a ningunha das concentracións ou manifestacións previstas, sobe á túa montaña e faite unha foto co lema “Eólica Así Non” e, logo, difúndea nas redes co cancelo #EolicaAsiNon

Con motivo do Día das Montañas, o vindeiro 11 de Decembro ás 11h terá lugar en Ferrol unha mobilización que empezará na estación de tren, percorrerá as rúas da cidade pasando pola Praza de España e rematará enfronte do Concello, na Praza de Armas.

A poboación galega só consume dous terzos da enerxía que xeramos agora mesmo, sen a necesidade de instalar un só muíño máis. E aínda así queren que o noso rural soporte a maior densidade de muíños por km2 do Estado, se está esta vaga de proxectos de polígonos industriais eólicos segue adiante. Isto significaría que un 25% do noso territorio sería catalogado coma poligonal de parques eólicos.

Está claro, ademais que estas empresas non están actuando de boa fé. Estes proxectos presentase fraccionados de tal xeito que poidan sortear os controis públicos. Non hai transparencia no proceso, non se lle informa os veciños e afectados, e estanse a atopar trabas administrativas incluso á hora de presentar as alegacións. Sabemos que a nosa rede eléctrica non podería soportar todos estes proxectos que intentan implantar. E ademais, agora decatámonos de que parte desta produción eléctrica enviaríase ao estranxeiro.

Temos constancia de que ningún dos parques instalados fai 15 ou 20 anos trouxo beneficio para a sua zona de asentamento. A proxección destes proxectos vai dirixida ao rural, un rural que novamente vaise ver sacrificado. E despois preguntarémonos por que se está despoboando. No caso de Muras, a sua poboación veuse reducida á metade en 20 anos. Non podemos aceptar que os custos e impactos se centralicen só nun territorio. A transformación física da nosa paisaxe vai afectar as nosas explotacións gandeiras e agrícolas, ao noso turismo, e en definitiva a todo o que coñecemos agora.

Defendemos as enerxías renovables, pero non podemos defender o espolio enerxético.

Por todo isto, e baixo o lema "EÓLICA ASI NON" convocamos os cidadáns ás mobilización que van ter lugar este sábado en Ferrol, e animamos os que non poidan achegarse a esta a que usen as distintas formas de protesta que ímos anunciar nas nosas redes sociais.

Luka, Ortegal di Non

Enviado por:
Ortegal Di Non
-ortegaldinon@gmail.com-
10 de dezembro de 2021 19:01
_______

A Plataforma 'Ortegal di non' organiza un acto sobre 'a invasión eólica no rural', na que participaran como poñentes Margarida Prieto e Andrés Castro, ambos do Sindicato Labrego Galego - o venres 26 no Centro Sociocomunitario de Mañón

INVASIÓN EÓLICA NO RURAL
O QUE NON NOS CONTAN DOS EÓLICOS
Charla informativa no Barqueiro.

Ortegal di non organiza unha charla o venres 26 no Centro Sociocomunitario de Mañón ás 19h na que participaran como poñentes Margarida Prieto e Andrés Castro, ambos do Sindicato Labrego Galego. Esta súmase ás múltiples accións que a plataforma leva realizado dende a súa creación fai escasamente 2 meses. Este Novembro acudiron co seu posto de información á Feira do Mel e da Mazá do Concello de Ortigueira, realizaron unha charla informativa e recollida de alegacións na parroquia de Barbos e  acudirán tamén á primeira edición do Festival de Outono que organiza a Granja Labrada o día 28 en Grañas, así como a cita xa habitual cada xoves no mercado local de Ortigueira.

A comarca do Ortegal vese afectada polo de agora por 3 proxectos P. E. Barqueiro, P. E. Balocas e P. E. San Brandán, San Cibrao. A plataforma defende a idea de que outro modelo enerxético é posible no que se inclúa un respecto pola natureza, o noso patrimonio e que afecte o menos posible aos habitantes  das nosas aldeas.

Hai estudos que demostran os efectos nocivos da implantación de estes muíños tan preto dos humanos e sentenzas a favor dos afectados noutros países europeos.

Ademais, estes proxectos farían perigar a candidatura do Xeoparque Cabo Ortegal, por non falar da economía local baseada na agricultura, o gando e o turismo rural.

Considera que hai outras opcións para contribuír ao aforro enerxético coma a creación de comunidades enerxéticas, a colocación de paneis solares nos teitos dos edificios en polígonos industriais xa en uso, unha concienciación cidadá do uso da enerxía, non aumentando a produción sen limite facendo desaparecer a nosa paisaxe e identidade.

A día de hoxe xa se sabe que parte da enerxía que Galicia xeraría pretendese exportar en forma de hidróxeno a outros países.

Estanse presentando proxectos en todo o rural para obter os cartos dos fondos europeos, a rede eléctrica actual non sería capaz de soportar as xeración de estes proxectos, temos unha rede mal planificada, pensada fai moitos anos para grandes centrais, na actualidade compensan as renovables con gas, o subir o prezo deste sube o prezo da electricidade. Aumentar a produción non abarataría o prezo final o consumidor, se non que descompensaría mais a rede o que se xoga aquí é obter fondos europeos non pesar no consumidor.

Pretendemos con estás accións concienciar á xente da manipulación que hai detrás deste boom da enerxía verde ca intención de que por unha vez se fagan ben as cousas dende a base, pesando nos cidadáns e non nos intereses das grandes corporacións.

Ortegal di Non

Contacto: ortegaldinon@gmail.com

#NonInvasionEolica
#EolicaAsiNon

Enviado por:
Ortegal Di Non
-ortegaldinon@gmail.com-
23 de novembro de 2021 23:14
_______

A loita contra os megaproxectos eólicos é de todos e por todos, ... Por André Abeledo Fernández

Por André Abeledo Fernández [*]
29.10.2021

Algunhas loitas son de todos, axuntan as persoas, cada un do seu pai e da súa nai, a veciños con vidas diferentes, a xente de distintas ideoloxías, eso é o que está sucedendo agora na Galiza co movemento nado para loitar contra os macroproxectos eólicos que ameazan ó rural galego e o seu xeito de vivir.

O movemento non é uniforme, en cada comarca, en cada aldea organizase dun modo diferente e está mellor ou peor organizado, pero nun movemento cun potencial de unidade transversal capaz de poñer de acordo as aldeas enteiras no seu afán de seguir vivas e non permitir que intereses económicos esmaguen a súa dignidade e destrúan o seu futuro.

Como ocorre neste tipo de movementos sempre hai quen intenta controlalos, ou busca sacar un rédito político, as multinacionais lles interesa calar as voces discordantes, adormecer a opinión pública, e enganar aos veciños afectados. Os poderes económicos sempre atopan políticos aos que comprar ou parvos útiles aos que utilizar para alcanzar os seus obxectivos.  

Persoalmente entendo que unha plataforma debe nacer da organización dos afectados a nivel individual, e fortalecerse coa achega doutras persoas solidarias, con asociacións de veciños, grupos ecoloxistas, etc. E cando a causa é xusta, como é o caso, debe estar apoiada, que nunca controlada, polo Goberno Municipal e os distintos grupos políticos.

Pero non o van a ter fácil, o rural galego xa ten demostrado noutras ocasións a súa capacidade de loita. Como galegos somos desconfiados, pois temos sido enganados e utilizados en demasiadas ocasións.

En cada comarca e en cada concello nacen plataformas para loitar pola nosa terra, polo noso presente, e polo futuro dos que virán detrás, algunhas nacen ben, son plataformas de afectados a nivel individual, coa participación de asociacións ecoloxistas ou veciñais, e tamén de persoas que aman a Galiza como a si mesmos, outras nacen mal, con políticos de mente estreita que tentan controlalas por medo a que alguén poida sacar un suposto beneficio electoral no futuro, ou ainda peor nacen controladas por persoas que se teñen vendido as multinacionais do sector.

En realidade é algo que ten pasado sempre, ben sexa na loita contra a megaminería, ou na loita contra os megaproxectos eólicos, ou en tantas outras.

Persoalmente estou convencido de que os traidores ao seu propio pobo serán arrastrados por unha marea humana que non se vai a parar por moitos atrancos que lles poñan no camiño.

A nosa Galiza profunda, o noso rural galego dará nesta batalla e a gañará, pobre do político que pense que pode enganar a este pobo, mais lle valería sacarse do medio antes de que suba a marea, ou mellor, escoller trincheira coa xente que loita polo que é xusto, que defende a súa su dignidade e a de todo un pobo contra xigantes que como no Quijote hoxe son muíños.

Esta loita a imos gañar entre todas e todos. A Galiza non se vende, se defende.

[*] André Abeledo Fernández, nado en Neda o 14 de Xullo de 1974, militante comunista e sindicalista. Delegado de persoal da CIG no comité de empresa de Mercadona na Provincia d'A Coruña. | Facebook e Twitter.

Enviado por:
André Abeledo Fernández
-andre1474@gmail.com-
28 de outubro de 2021 08:04
_______