Euroeume presentará este venres 12 de novembro o proxecto Enraizadas, na Casa Dopeso d'As Pontes ás 7 da tarde - Vídeo

Euroeume presentará este venres o proxecto Enraizadas

A presentación levarase a cabo o vindeiro venres 12 de novembro na Casa Dopeso en As Pontes ás 19 horas. Por motivos de aforo, é necesario realizar a inscrición das persoas que queiran acompañarnos.

O acceso é libre para todas ás persoas que desexen asistir, se ben por motivos de aforo e de protocolo COVID recomendase realizar unha inscrición previa a través do correo electrónico euroeume@euroeume.org ou do teléfono 981440668.

Euroeume presenta este venres o seu proxecto audiovisual Enraizadas. Enraizadas é un traballo de fomento do consumo responsable e de proximidade e de defensa dos valores da igualdade. A campaña está protagonizada por nove mulleres, produtoras de seis concellos distintos das comarcas do Eume e Ferrolterra, que teñen algún tipo de vinculación ao sector agroalimentario:  Cynthia Arias Ramil, produtora de horta de As Pontes, Isabel Goti, apicultora e traballadora da Asociación Casa do Mel en As Pontes, Cristina Pérez, produtora de Requeixo Restrebas de Monfero, Manola Permuy, presidenta da Cooperativa Campo Capela, Nanda Cuíña, da cooperativa Vacalouras de Pontedeume, Leticia Iglesias produtora de horta de Neda e Cruz, Marisol e Teresa produtoras dehorta para auto-consumo do concello de Cabanas, son as protagonistas deste proxecto.

A través destas pezas de vídeo, coñeceremos as súas traxectorias e iniciativas e os valores que as rexen, tratando de amosar como co consumo destes produtos se está a coidar da terra e das persoas que a habitan. Preténdese, ademais, poñer en valor os produtos da zona e os procesos de elaboración dos mesmos.

O acto consistirá no visionado das pezas audiovisuais ao que lle seguerá un pequeno faladoiro con algunhas das participantes. Este proxecto foi impulsado por Euroeume en colaboración con Rexenerando (Xestión e producción) e Illa Bufarda (gravación e edición), no marco da  Convocatoria de Subvencións da Deputación da Coruña a entidades sen fins de lucro para o desenvolvemento de programas de políticas de igualdade de oportunidades entre mulleres e homes e loita contra a violencia de xénero no ano 2021.


Enviado por:
Comunicacion EuroEume
-comunicacion@euroeume.org-
10 de novembro de 2021 12:30
_______

O sábado día 30 celebrarase, no Parque Etnográfico do río Sesín, unha nova edición do soutelo organizado polo Museo Etnográfico da Capela en colaboración coa Asociación Euroeume

Soutelo no río Sesín

O sábado día 30 celebrarase, no Parque Etnográfico do río Sesín, unha nova edición do soutelo organizado polo Museo Etnográfico da Capela en colaboración coa Asociación Euroeume, unha actividade orientada a familias con nenas e nenos de entre 4 e 12 anos.

A xornada comezará ás 10.30, coa presentación da actividade na Casa do Museo Etnográfico da Capela, no lugar de O Pazo, a continuación realizarase un pequeno roteiro a través das Fragas para chegar ata o Parque Etnográfico do río Sesín. Ás 11.30 comezará unha actividade de inspección ambiental do río, enmarcada dentro do Proxecto Ríos, na que as persoas participantes, guiados por persoas voluntarias de Euroeume analizarán a calidade das augas do río Sesín e o estado da fauna e a flora do río e da súa ribeira.

Ás 13.00 comezará o Soutelo, coa retirada das castañas da curripa do río Sesín. Nesta actividade reproducirase a fase final dun Soutelo tradicional. Coa chegada do outono comeza o tempo das castañas, e tradicionalmente as familiar comezaban a traballar no proceso que remataba coa súa recollida. Primeiro limpábanse os soutos e as curripas, despois vareábanse os castiñeiros para baixar ao chan ou ourizos verdes. Os ourizos recollíanse e trasladábanse ás curripas, onde, unha vez cubertos con felgos e polas, agardábase entre 10 e 15 días para que abrisen. Pasado este tempo, retirábanse os felgos  e as polas, e xa se podían recoller as castañas listas para consumir.  

Pola tarde continuarán as actividades, cun obradoiro de elaboración de xoguetes con elementos da natureza onde os bugallos, as polas, as cáscaras de noces e calquera outro elemento da natureza transformanse en xoguetes para incentivar a imaxinación dos máis pequenos.

O peche da actividade será ás 18.00, coa  celebración dunha castañada, na que se poderán degustar as castañas recollidas pola mañá na curripa.

Aquelas persoas interesadas en participar nesta actividade poden inscribirse ou ampliar a información a través do correo electrónico euroeume@euroeume.org

As Pontes, a 27 de outubro de 2021

Asoc. Euroeume

Enviado por:
Angel Lorenzo EuroEume
-euroeume@euroeume.org-
27 de outubro de 2021 09:58
_______

O concello d'As Pontes e a asociación Euroeume participarán na XVI Limpeza simultánea de ríos, o domingo 26 de setembro

O concello de As Pontes e a asociación Euroeume participarán na  XVI Limpeza simultánea de ríos

A XIV Limpeza Simultánea “Móllate polos ríos” se celebrará este ano en 51 concellos de toda Galiza, e participarán máis de 65 entidades (asociacións, concellos, colectivos ecoloxistas, centros de ensino…). A limpeza que será o 26 de setembro e mobilizará a numerosas persoas voluntarias que se desprazarán aos ríos destes 51 concellos para deixalos libres de lixo, nunha xornada de voluntariado ambiental e concienciación social.

En As Pontes esta actividade parte da colaboración entre o Concello de As Pontes e a Asociación Euroeume, que contarán co apoio de Protección Civil de As Pontes para a retirada e posterior traslado dos residuos ao punto limpo. Na limpeza organizada no ano 2021 un total de oito persoas voluntarias retiraron máis de 200 kg de residuos das zonas máis próximas ao río, destacando polo seu volume os plásticos e as latas de bebidas.

A actividade consistirá nunha limpeza das beiras do río Eume ao seu paso pola vila pontesa. A xornada comezará o domingo 26 ás 10:30 horas, sendo o punto de encontro a praza da Igrexa, fronte ao Museo Etnográfico Monte Caxado, e a duración aproximada da actividade será de 3 horas. As persoas voluntarias que participen nesta actividade serán agasalladas cunhas camisolas co lema da limpeza.

Respectaranse tamén as indicacións pertinentes en relación á situación de pandemia provocada pola COVID-19 dependendo da situación sanitaria de cada zona. Dende o Proxecto Ríos recoméndase que  os grupos sexan de 10 persoas como máximo e se respecte sempre que sexa posible unha distancia de 1,5 m. O uso de máscara será de obrigatorio para todas as persoas participantes. Cada persoa voluntaria deberá levar as súas propias luvas.

As persoas interesadas en participar nesta actividade poden inscribirse a través do correo electrónico euroeume@euroeume.org, ou chamando ao teléfono 981 440668

Voluntariado Ambiental:

O Proxecto Ríos é un programa de Educación e Voluntariado Ambiental que ten a finalidade de dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación.

A asociación Euroeume, no seu plan de voluntariado ambiental, participa neste proxecto a través da realización destas actividades de limpeza de ríos e de actividades de inspección e sensibilización ambiental no río Sesín (A Capela), e no rego do Candedo (Monfero), colaborando para estas actividades co Museo Etnográfico de A Capela e coa Asociación Rural Contemporanea respectivamente, e contando coa participación de persoas voluntarias. Aquelas persoas interesadas en formar parte dos programas de voluntariado da asociación poden inscribirse ou ampliar a información a través do correo electrónico euroeume@euroeume.org

As Pontes, a 20 de setembro de 2021

Asociación Euroeume
http://euroeume.org/

Enviado por:
Angel Lorenzo EuroEume
-euroeume@euroeume.org-
22 de setembro de 2021 14:07
_______