Carta de Francisco Maceira sobre a Asemblea de Barrio: "Participación cidadá no barrio de Esteiro"

Participación cidadá no barrio de Esteiro

A asociación de  veciños á que pertenzo  -Esteiro- ven traballando dende hai anos para mellorar e suplir as carencias  deste emblemático barrio de Ferrol. Clases de pilates, encaixe de  palillos, punto canario, corte e confección, informática, exposicións, sardiñada de San Xoan, ciclos de cine, excursións, reivindicación da escola infantil, do comedor social ... Non chegaría esta folla para enumerar os centos de actividades e proxectos que saen adiante gracias ó traballo desinteresado de xente que emprega o seu tempo libre para beneficio  da comunidade.

Esta semana tivo lugar a votación  de Participación Cidadá para elexir os representantes do barrio ante o concello. Como era de esperar tamén se presentaron  persoas da  Asociación Veciñal de Esteiro. Inexplicablemente non saiu ningún elixido.  O máis votado foi un tipo que na miña vida vin polo barrio. Eu xa sospeitei algo cando vin a sala da votación ateigada e rezumando un glamour inusual en actos participativos. Recordoume  cando na miña aldea os do PP carrexan votantes cara as urnas.  Por suposto que estas artimañas non van amedrentar á asociación veciñal  que xa  confirmou a continuidade do seu traballo. A pesar de ter o concello en contra seguirán loitando pola escola, polo comedor  ou por calquer outro proxecto que supoña un ben para os veciños. Incluso para aqueles que o único que fixeron polo barrio foi ir a votar o día que alguén, dende o concello, descolgou un teléfono.

Francisco Maceira

Esteiro - Ferrol

Enviado por:
Francisco Maceira
-f.maceira@hotmail.com-
19 de abril de 2012 23:33
___________________________

Carta a Jesús Rodríguez Pumar, propietario da antiga Fábrica de Lápis, ... Por Francisco Maceira - Polo mesmo autor: "As ratas da fábrica de lápis de Ferrol"

Carta a D. Jesús Rodriguez Pumar, propietario da fábrica de lapis

Por Francisco Maceira [*]
22.02.2012

Entendo, don Jesús, que, despois de tantos anos de litixio, queira exercer o seu dereito a edificar no solar da fábrica de lapis. Que queira derrubala para levantar vivendas porque a eso precisamente se adica JERPU, empresa da que vostede é propietario. O que xa non entendo tanto é porqué non intenta encaixar o seu proxecto co do Colexio Oficial de Arquitectos ou dos expertos en patrimonio -algún vido de fóra do país- que recomendan conservar elementos , sinais de identidade do noso pasado industrial.

Por que non se chegou a reunir cos que lle querían dar unha visión distinta sobre o tema? Descubrir porqué Hispania é algo máis que unha ruína ou unha niñada de ratas.

Ninguén do seu arredor soubo explicarlle que unha pala tirando cheminea e fachada da fábrica non é progreso. Todo ó contrario, é barbarie. Persoalmente creo que está mal asesorado. Na vida hai algo máis que cartos e cemento. Pode que incluso economicamente fose máis rendible manter en pé ó imaxinario de Johan Sindel.

De tu a tu, don Jesús, teño moitos menos cartos que vostede, pero nin polo dobre dos que ten me gustaría pasar á Historia como o home que destruíu un dos bens máis emblemáticos do patrimonio industrial ferrolán.

[*] Francisco Maceira Rodíguez -Ferrol, 1963.
f.maceira@hotmail.com


Enviada por:

Francisco Maceira

-f.maceira@hotmail.com-

22 de fevereiro de 2012 10:45

______________

As ratas da fábrica de lápis de Ferrol

Francisco Maceira (Ferrol)

Leo estes días na prensa opinións a favor do derrubo da fábrica de lápis de Ferrol. Argumentan que é un edificio carente de valor e que hai moitas ratas. Non din así autoridades expertas en patrimonio industrial que confirman a necesidade de manter alomenos as súas sinais identitarias :fachada, cheminea... Conservar estas pezas non está reñido cos beneficios económicos que lexítimamente reclaman os actuais propietarios do inmoble. Todo o contrario pois as vivendas incrementarían o seu valor si se ubican dentro deste ben único do pasado industrial ferrolán. Cabe recordar que no nome das ratas derrubouse no seu día o barrio de Esteiro. Tamén se vendeu o buque escola "Galatea". No nome das ratas quíxose tirar o casco histórico de Santiago e as murallas de Lugo. Non podemos deixar temas tan importantes como a conservación do noso pasado en mans dos políticos . É verdade que o mundo do Johann Sindel está ameazado polas ratas. Pero non as do solar -que non as hai- senón polas que pululan por dentro das nosas institucións.

Publicado no xornal Diagonal - Lunes 6 de Febreiro de 2012
___________________

En defensa da auga, ... por Francisco Maceira

Por Francisco Maceira [*]

15.03.2011

Vivimos no país das mil maneiras de chover. Se hai algo que caracteriza a Galicia é a auga. É a nosa esencia, a nosa alma. A Xunta, co subterfuxio da nova lei de augas, acaba de poñela á venda.

Coa Lei 9 / 2010 na man non somos donos da traída que fixo o avó, do cano do prado, do rego de auga, do pozo... As nosas fontes non tardarán moito en ter un candado coas iniciais dalgunha multinacional do sector servizos. Nas cidades a situación non é menos grave, pois xa hai tempo que empresas privadas estannos a cobrar por algo que non se pode vender. Que é tan noso como o sol ou o aire que respiramos. Todo esto apúranse a desmentilo desde a Xunta porque hai cousas que non convén que se saiban antes das eleccións municipais.

O próximo domingo día 20 as plataformas en defensa da nosa auga organizan unha gran manifestación en Santiago. Debemos acudir para que se derogue esta lei tan prexudicial e os versos máis emblemáticos da nosa Rosalía non se convirtan en profecía. Xa puxeron á venda os nosos aeroportos, autoestradas, educación, sanidade ... pero agora estamos ante un caso máis grave aínda. Queren privatizar a alma do noso país e o 70% dos nosos corpos.

Martes, 15 de Marzo de 2011

[*] Francisco Maceira Rodíguez -Ferrol, 1963.
f.maceira@hotmail.com

Publicado nos xornais "Diario de Ferrol" e  "La Opinión de A Coruña"

Foto de Suso Pazos - Susete'70, do seu álbum Fotos de Ferrol Terra.
____________