Amosando publicacións coa etiqueta Gabriel Tizón. Amosar todas as publicacións
Amosando publicacións coa etiqueta Gabriel Tizón. Amosar todas as publicacións

domingo, marzo 28, 2021

A conta da descarga de GNL do último gaseiro (LNG Schneeweisschen) - No proceso de regasificación do gas que descargou o buque en Reganosa, vanse esterilizar, a base hipoclorito sódico, 2.636.920 Tons de auga da Ría de Ferrol



Na madrugada deste último venres 26 de marzo,atracaba no peirao de Reganosa o gaseiro "LNG Schneeweisschen", para descargar miles de toneladas de gas natural licuado na planta regasificadora de Mugardos.

A conta da descarga de GNL do último gaseiro

A conta da descarga de GNL do gaseiro de onte, na Planta de Gas de Reganosa, no seu proceso de regasificación, vanse esterilizar, a base hipoclorito sódico -que supón a morte das larvas, ovos, especies, placton- 2.636.920 Tons de auga da Ría que logo será devolta á mesma cunha redución de 6º C na súa temperatura.

Ademais hai que lembrar que o Complexo Petroquímico de Forestal del Atlántico, tamén do grupo Tojeiro, ten autorizado, pola Xunta de Galicia, verter á Ría máis de 27 millóns de Tons /ano, que non só afectan directamente aos bancos marisqueiros de Santa Lucia, A Barca e Noville senón ao conxunto do ecosistema, de feito que a ameixa babosa dáse por desaparecida.

Estes nocivos vertidos industriais, se non contaran co consentimento e complicidade das Administracións para efectualos directamente á Ría, deberían pasar polo proceso de depuración e pago do canon correspondente, como sucede cos que orixinamos a cidadanía do entorno.

Nunha Ría semipechada, das características da nosa, que non soporta xa máis contaminación e máis alteracións do ecosistema, non se pode tolerar un só vertido que non vaia ao colector xeneral e ao sistema de depuración integral no que tanto presuposto se invertíu.

Fotos de Gabriel Tizón. | Sopa Química de Reganosa despois do proceso de regasificación con auga do mar e hipoclorito sódico.

Comité Cidadán de Emerxencia para a Ría de Ferrol
comitecidadan@gmail.com
www.comitecidadan.org
@ComitCEmerxenc

Enviado por:
Comite Cidadan de Emerxencia
-comitecidadan@gmail.com-
28 de março de 2021 12:18

_______

luns, abril 01, 2019

Batería de denuncias, actos e propostas da Eurodeputada Lídia Senra - Insta á CE a incluír a Sensibilidade Química Múltiple na lista europea de enfermidades - Denuncia no pleno do PE que a propia UE impulsa en ocasións actividades que contaminan as augas - Denuncia na CE a nova terminal portuaria prevista na Enseada de San Simón, plena Rede Natura - Chama a desenmarcarar o neoliberalismo: 'As alternativas económicas ao capitalismo son posibles' - Promove en Bruxelas a mostra do galego Gabriel Tizón 'A Europa d@s nen@s perdid@s'


Lídia Senra insta á CE a incluír a Sensibilidade Química Múltiple na lista europea de enfermidades. | A eurodeputada reuniuse con membros da asociación SQM-Galicia, que piden que a Organización Mundial da Saúde recoñeza oficialmente a doenza. | A europarlamentaria reclama algunha iniciativa do Centro Europeo para a Prevención e o Control das Enfermidades para mellorar a vida das afectadas.

A eurodeputada Lídia Senra, membro do Grupo Confederal da Esquerda Unitaria Europea/Esquerda Verde Nórdica (GUE/NGL) e candidata de En Marea ás eleccións europeas de finais de maio, rexistrou esta mañá en Bruxelas unha pregunta escrita dirixida á Comisión Europea (CE) sobre a Sensibilidade Química Múltiple (SQM), enfermidade que nos últimos anos se ven detectando que cada vez afecta a máis poboación e que está incluída oficialmente na Clasificación Internacional de Enfermidades do Estado español desde o 2014 e tamén recoñecida noutros países como Alemaña (desde o ano 2000), Austria (2001), Suíza (2010), Dinamarca (2012) ou Xapón (2009).

A pregunta é froito da reunión que Senra mantivo o venres pasado en Santiago con varias membros da Asociación SQM-Galicia, quenes lle explicaron a loita que están a levar a cabo para que se activen protocolos en todos os lugares e a Organización Mundial da Saúde (OMS) recoñeza a enfermidade adquirida, caracterizada pola perda progresiva de tolerancia a produtos químicos diversos, que deriva en problemas cardiovasculares, respiratorios, endocrinos, hepáticos, inmunolóxicos, neurocognitivos, neurolóxicos, xinecolóxicos, androlóxicos, de pel e mucosas, ademais de xerar alteracións do estado do ánimo e derivar en incertidume, aillamento e incomprensión. Isto leva a que as persoas afectadas por SQM non poidan levar unha vida normal, xa que estar en contacto ou en ambientes con produtos químicos como combustibles, disolventes, pesticidas, pinturas, materiais de construción, barnices, produtos de uso habitual como colonias, pergumes, desodorantes, produtos de limpeza, ambientadores, deterxentes, suavizantes, etc, desencadéalles serios problemas de saúde.

Senra insta neste sentido á Comisión Europea a exercer as competencias que ten para loitar contra as enfermidades e para garantir a saúde medioambiental europea e pídelle unha valoración sobre a SQM. “Valora o Centro Europeo para a Prevención e o Control das Enfermidades incluír esta doenza na súa lista, realizar estudos e levar a cabo programas para contribuír a mellorar a vida das persoas afectadas?”, pregunta a eurodeputada no texto rexistrado hoxe en Bruxelas. “Considerando que as asociacións de afectadas levan tempo pedindo tamén que a OMS recoñeza oficialmente esta enfermidade, contempla a CE impulsar un cambio nesta dirección?”, apela Lídia Senra. A CE debería dar resposta a estas preguntas nas próximas semanas.

Santiago, 27 de marzo de 2019.

Adxuntamos copia da pregunta rexistrada ante a CE.

---
Senra denuncia no pleno do PE que a propia UE impulsa en ocasións actividades que contaminan as augas. | Votou en contra dun informe sobre a Directiva da Auga por non garantir o acceso universal e distorsionar a inciativa cidadá Right2Water. | Reitera a importancia de protexer este ben común da privatización e da contaminación e apela á responsabilidade institucional a tódolos niveis.

Reunido en sesión plenaria en Estrasburgo, o Parlamento Europeo vén de aprobar un informe sobre a proposta de Directiva do Parlamento Europeo e do Consello relativa á calidade das aguas destinadas ao consumo humano. A eurodeputada galega Lídia Senra, coordinadora do Grupo da Esquerda Unitaria Europea-Esquerda Verde Nórdica (GUE/NGL), votou en contra deste informe e interveu na Eurocámara para reivindicar unha vez máis o acceso á auga como “un dereito humano que hai que protexer da privatización e da contaminación; da forestación inadecuada, como a realizada a base de eucaliptos, e das grandes infraestruturas”.

O informe aprobado hoxe xurdiu motivado orixinariamente pola iniciativa cidadá europea Right2Water. Sen embargo, o filtro institucional europeo aplicado ás demandas cidadás recollidas nesta iniciativa deron lugar a un texto intolerábelmente feble “que non só non garante o acceso á auga para tódalas persoas, senón que tampouco establece uns parámetros para a auga potábel que resposten á preocupación que existe a día de hoxe con respecto á acumulación de substancia negativas para a saúde humana”, alerta Senra.

Este é o caso dos denominados disruptores endocrinos, substancias que modifican os comportamentos hormonais e que poden derivar nun mal desenvolvemento fetal, deficiencias cognitivas, malformacións conxénitas ou cancros como o de mama, próstata ou tiroides. Esta situación ten sido denunciada, entre outras, pola plataforma italiana Mamme No PFAS, que agrupa a persoas afectadas pola contaminación das augas con sustancias perfluoroalquílicas (PFAS) na rexión de Veneto, e que a finais do ano pasado mantiveron unha xuntanza cas deputadas/dos do GUE/NGL para achegar a súa experiencia.

Disruptores endocrinos como as sustancias perfluoroalquiladas, máis coñecidas como PFAS, foron detectados xa na auga potábel da metade do territorio europeo. Sen embargo, durante a votación desta Directiva a finais do ano pasado, as emendas que facían alusión aos límites a establecer nos PFAS non foron aprobadas”, lembra a eurodeputada galega.

Lídia Senra chamou tamén a atención sobre a necesidade de ter unha visión holística do ciclo da auga, habida conta de que en moitos casos as substancias tóxicas presentes na mesma están a evidenciar un problema medioambiental precedente, non abordado polas Administracións correspondentes, e aí a Unión Europea non pode eludir a súa responsabilidade co manido argumento de carecer de medios ou de capacidade inspectora. “Na Galiza diversos colectivos veñen denunciando e reclamando actuacións urxentes para pór fin á contaminación das rías, ríos e acuíferos en xeral. Moitas destas situacións de contaminación están vinculadas ao modelo de desenvolvemento económico capitalista, como por exemplo as minas de San Fins e de Touro, as obras do tren de alta velocidade en Laza, macrovertedoiros como SOGAMA ou a agricultura industrial, como as granxas de porcos e polos de COREN na Limia”.

 Outros moitos exemplos evidencian, ademais, que as cousas só se poden facer así de mal se existe  conivencia política, como é o caso das “depuradoras insuficientes ou ineficaces que verten directamente no mar ou nos ríos, como por exemplo o Sar; os lodos de depuradora que se deitan nas terras; o glifosato; os pesticidas ou os proxectos ao abeiro da chamada economía circular que enchen ou pretenden encher de residuos os ocos que deixan as canteiras, como Miramontes e Casalonga. Grande parte de todo isto está potenciado e financiado pola Unión Europea. Sen embargo a UE non só non está a mudar a súa orientación, senón que cando lle achegamos as denuncias medioambientais incluso tentan escudarse en que non teñen medios abondo. As institucións europeas teñen o deber de dotarse dos medios necesarios para evitar os incumprimentos sistemáticos por parte das autoridades competentes en cada Estado”.

Bruxelas, 28 de marzo de 2019.

---
Lídia Senra denuncia na CE a nova terminal portuaria prevista na Enseada de San Simón, plena Rede Natura. | A eurodeputada explica a Bruxelas que o proxecto, que se faría con recheos, afectaría ás 1.500 persoas que viven da pesca e ao marisqueo na zona. | Defende no seu escrito que o tráfico marítimo que acollerían estas instalacións pode realizarse sen problema no propio porto de Vigo actual.

A eurodeputada Lídia Senra, membro do Grupo Confederal da Esquerda Unitaria Europea/Esquerda Verde Nórdica (GUE/NGL) e candidata de En Marea ás eleccións europeas de finais de maio, ven de denunciar na Comisión Europea (CE) o proxecto do Porto de Vigo para transformar varias instalacións portuarias obsoletas nunha nova terminal mediante recheos de gran calado en plena Enseada de San Simón, é dicir, en pleno espazo marítimo incluído na Rede Natura.

Senra rexistrou esta semana unha pregunta parlamentaria por escrito dirixida á CE, na que lle explica ao organismo comunitario que estas instalacións novas se levarían a cabo nunha área “especialmente sensible por tratarse dunha zona de estuario”, sendo ademais “unha zona marítima de explotación tradicional que acolle mais de 1.500 postos de traballo en pesca artesanal, marisqueo e bateas de mexillón”.

A eurodeputada valora que o Porto de Vigo presenta uns índices de utilización dos seus peiraos actuais inferior ao 50 por cento, polo que é obvio e defende que “o tráfico que se pretende desviar á Enseada de San Simón podería realizarse nas instalacións que xa hai no propio porto, sen necesidade destas novas”. Ante esta situación, Lídia Senra pídelle á CE que se posicione sobre se cre que o obxectivo do Porto de Vigo de aumentar as infraestruturas ten fundamento e sobre se o proxecto dunha nova terminal portuaria en plena Rede Natura, como é o caso, é posible. A parlamentaria lembra que o Porto de Vigo non dispón da ferramenta fundamental de planificación da actividade, é dicir, de Delimitación dos Espazos e Usos Portuarios (DEUP) porque foi anulado por sentenza do 4 de decembro de 2017 da Audiencia Nacional.

Santiago, 28 de marzo de 2019.

---
Lídia Senra chama a desenmarcarar o neoliberalismo: “As alternativas económicas ao capitalismo son posibles”. | A deputada inaugurou na Facultade de Filosofía da USC a xornada ‘Finanzas, enerxía, terra, coidados, datos: Privados? Sociais? A Economía no século XXI’. | A europarlamentaria ve prioritario facerlle fronte ao actual modelo para ter unha sociedade máis xusta, igualitaria e que protexa o medio ambiente.

É necesario desenmascarar o discurso do neoliberalismo. As alternativas económicas ao capitalismo son posibles e con elas podemos lograr unha sociedade máis xusta, igualitaria e que faga fronte ao cambio climático como prioridade”. Así o defendeu a eurodeputada Lídia Senra, membro do Grupo Confederal da Esquerda Unitaria Europea/Esquerda Verde Nórdica (GUE/NGL) e candidata de En Marea ás próximas eleccións europeas, durante a inauguración das xornadas ‘Finanzas, enerxía, terra, coidados, datos: Privados? Sociais? A Economía no século XXI’, que se están a desenvolver na Facultade de Filosofía da Universidade de Santiago de Compostela (USC). A parlamentaria europea considera que é fundamental debater sobre a necesidade de que os sectores da economía claves estean en mans públicas, en contraposición coa actual tendencia de privatización e control das grandes multinacionais.

Neste sentido, Senra chama en colocarse en fronte de aqueles e aquelas que pretenden facerlle crer á sociedade que non hai saída, que a única política económica posible é a que emana do neoliberalismo e que todo se ten que seguir desregulando para que o mercado non teña ningún tipo de cortapisas no avance dos seus intereses. Así, asegura negarse a crer que esta situación que impera actualmente, de concentración da riqueza cada vez en menos mans, de fracaso social e de crise climática é o modelo axeitado. “Cremos firmemente que hai que cambiar o modelo, que son posibles outras alternativas e políticas. E ademais, é fundamental abordar este debate, e divulgalo e traballar nesta liña, porque nos negamos a facerlle o xogo aos que nos queren facer crer que só existe a verdade que divulga o capitalismo, igual que nos negamos a admitir as prácticas que con total falta de escrúpulos están poñendo os intereses do capital por riba dos dereitos das persoas en calquera ámbito da vida, na sanidade, no ensino, no acceso á alimentación, á enerxía, etc”, dixo a eurodeputada.

Lídia Senra tamén aproveitou para defender que de ningunha maneira o actual modelo económico é compatible coa loita contra o cambio climático. “Pretenden desde o neoliberalismo dicir que si, que é posible loitar así, pero nós sostemos que é imposible, que hai que cambiar. Négome a darlle aval a este tipo de cuestións”, zanxou.

As xornadas, organizadas en colaboración co economista e membro do Consello das Mareas Xabier Pérez Davila, están a desenvolverse con varios coloquios, que se prolongarán até as sete da tarde, e nos que participan relatores e relatoras chegados de diferentes países, como Margarita Mediavilla Pascual, profesora da Escola de Enxeñarías Industriais e membro do Grupo de Enerxía, Economía e Dinámica de Sistemas da Universidade de Valladolid, e Xoán Doldán, decano da Facultade de Económicas da USC, que abordaron a cuestión de se é posible unha transición enerxética a un sistema descentralizado baseado en enerxías renovables. Mediavilla alertou de que o capitalismo resístese a decrecer, desatendendo o límite da capacidade de carga do planeta, apostando pola sobreexeplotación e degradando o medio, o que nos está conducindo cara ao colapso. Fronte a iso, defendeu que a agroecoloxía, a bioconstrución, o urbanismo intelixente e a economía equilibrada é a saída, que nos podería conducir á sustentabilidade.

Centrado en ‘Propiedade da terra e soberanía alimentaria’, esta mañá tivo tamén lugar un coloquio con Xoán Carlos Carreira Pérez, doutor e enxeñeiro agrónomo, profesor da USC retirado; e Marina dos Santos, membro da Dirección Nacional do Movimento dos Trabalhadores Rurais Sem Terra (MST), conducido pola secretaria xeral do Sindicato Labrego Galego (SLG), Isabel Vilalba. Vilalba denunciou que a planificación territorial galega non responde ás necesidades da nosa terra e apuntou o dato de que nos últimos anos, perdéronse 136.000 hectáreas da superficie agraria das granxas lácteas, co avance do eucalipto e da minería, que impulsan unha economía para catro, non para os intereses da sociedade xeral.

Xa pola tarde, a partir das 16.00 horas, terá lugar o coloquio ‘Finanzas: Privadas ou Públicas’, con Ricardo G. Zaldívar, doutor en Economía e ex-coordenador de ATTAC no Estado español. Adrián Dios, doutor en Economía, investigador na USC e membro da Coordenadora de En Marea, será o encargado de moderar este debate.

E para rematar o día, a partir das 17.3O horas, desenvolverase o coloquio sobre ‘Economía de coidados: Conceptos e debates’, coa participación de Mertxe Larrañaga Sarriegui, doutora en Economía Aplicada na Universidade do País Vasco, especialista en perspectiva económica feminista, que será presentada pola deputada de En Marea no Parlamento Galego, Paula Vázquez Verao.

As xornadas terán unha segunda parte, que se desenvolverá o sábado da próxima semana, 6 de abril, novamente na Facultade de Filosofía da USC, en horario de 10.00 a 13.00. Será para ter primeiramente un coloquio, de 10:00 a 11:15 horas, sobre ‘Os nosos datos, son propiedade común?’, no que intervirá Ekaitz Cancela Rodríguez, xornalista e autor do libro ‘Despertar do soño tecnolóxico’. A propia Lídia Senra conducirá este coloquio. E xa de 11.30 a 13.00, desenvolverase a mesa ‘Romper co consenso, planificación para unha economía socialista’, con William Paul Cockshott, profesor de Computing Science na Univesidade de Glasgow. Neste coloquio será o propio Xabier Pérez Davila o encargado de moderar e presentar.

Santiago, 30 de marzo de 2019.

---
Lídia Senra  promove en Bruxelas a mostra do galego Gabriel Tizón “A Europa d@s nen@s perdid@s”. | O Centro Galego La Tentation acollerá este mércores unha mostra integrada por 30 imaxes que denuncia o abandono dxs nenxs refuxiadxs. | O fotógrafo galego tamén trasladará a súa experiencia documental en materia de persoas refuxiadas ás deputadas e deputados do GUE/NGL.

As alarmas saltaron no ano 2016, cando un informe da Europol alertou de que alomenos 10.000 nenas e nenos refuxiados desapareceran nada máis pisar Europa. Sen embargo, e malia que dende institucións a tódolos niveis, organizacións gubernamentais e ONG’s seguen a denunciar que esta situación persiste, as explicacións dilúense nun inconcreto abano que oscila dende a posibilidade de que estas nenas e nenos abandonen voluntariamente os centros de retención de migrantes, pasando por teren sido obrigados por mafias a separarse do resto de familiares, ate o secuestro para tráfico de órganos e prostitución. Unha vez máis, achegarnos ao rol que a UE está a ter con respecto ao drama humanitario que está acontecendo no seu propio territorio non pode provocar máis que vergoña e indignación.

Preocupada por esta realidade, a eurodeputada do Grupo da Esquerda Unitaria Europea-Esquerda Verde Nórdica (GUE/NGL) Lídia Senra promove esta semana en Bruxelas a exposición “A Europa d@s nen@s perdid@s”, do fotógrafo galego Gabriel Tizón [PÁXINA OFICIAL]. A mostra será inaugurada este mércores 3 de abril no Centro Galego La Tentation ás 18.30hrs., e contará con unha introdución a cargo da propia Lídia Senra e unha presentación da exposición en profundidade a cargo do autor.

Dende o inicio da crise das persoas refuxiadas en Europa, fai agora tres anos, dous millóns de persoas camiñaron polas nosas fronteiras desesperandamente. Son familias enteiras que fuxen da morte segura, que non teñen outra opción que camiñar en contra da súa vontade, sen destino final, e aínda que parece que non, continúa ocorrendo”, lembra Tizón. “Pero dentro de todas estas persoas inocentes, hai unhas persoas inocentes dentro dos inocentes,  os nenos e as nenas”.

Dende o primeiro momento en que Europa comezou a prestar atención mediática á situación dos milleiros de persoas que estaban -e están- tentando chegar ao continente fuxindo da morte nos seus países, a maioría dos cativos e cativas que chegan fano sós e soas. Nestes últimos tempos mesmo se está a perceber que cada vez as nenas e nenos que fan este percorrido sós teñen menos idade. “As familias optan por envialos coa esperanza dunha vida mellor sen ter diñeiro para poder acompañalos, e outros son separados das súas familias nesta viaxe de perigos, onde as mafias aproveitan o caos e o abandono dos responsables”, explica o fotógrafo galego. “Estos nenos e nenas desaparecen por mafias e traficantes que traballan o longo de todo o camiño,  engánannos ás veces, outras simplemente usan a forza, e  o destino final case sempre é o mesmo:  a escravitude, a prostitución e o tráfico de órganos”.

Para a eurodeputada Lídia Senra, esta mostra fotográfica “proporciónanos a posibilidade de achegarnos á crise humanitaria da que está  a ser cómplice a Unión Europea dun xeito máis realista e comprensible do que moitas veces permiten os datos e os papeis. Ao fin e ao cabo, unha imaxe vale máis que mil palabras. Pensamos tamén que é interesante achegar a Bruxelas o traballo neste eido desenvolvido por un fotógrafo galego, e agardamos que serva para seguir petando nas conciencias e para que dunha vez por todas as institucións europeas asuman as súas responsabilidades e poñan fin a esta traxedia”.

Grabriel Tizón trasladará tamén este mércores ás deputadas/os do GUE/NGL a súa experiencia ao longo de 14 países documentando o día a día das persoas refuxiadas que consiguen chegar a Europa.
 
Bruxelas, 1 de Abril, de 2019.

---
Lídia Senra, eurodeputada galega, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), candidata de En Marea ás próximas eleccións europeas. | Tlf: 609 845 861, lidia.senra@europarl.europa.eu | http://lidiasenra.gal/ | https://www.facebook.com/LidiaSenraRodriguez

Oficina de Lídia Senra na Galiza

Tlf.: +34.698.144.067 / 698.120.268
Tlf.: +34.881.817.443

Enviado por:
SENRA RODRÍGUEZ Maria Lidia OFFICE
-lidia.senra-office@europarl.europa.eu-
1 de abril de 2019 18:44
AGE Europa - Galiza
-age.europa.galiza@gmail.com-
27 de março de 2019 15:48
30 de março de 2019 12:32

_______

mércores, novembro 21, 2018

'Nenos, nenas e adolescentes nas fronteiras de Europa', baixo ese título, este venres 23 de novembro, celebrara-se no Ateneo Ferrolán, a VI Xornada sobre o Maltrato á Infancia e á Adolescencia, aberta ao público en xeral, desde ás 5 da tarde, con Xavier Ron, Ana Miranda e Jose Palazón - Proxetara-se o documental: 'O silencio das persoas refuxiadas', de Gabriel Tizón


AGAMME celebra o vindeiro venres 23 de novembro as VI Xornadas, que terán por título “Nenos, nenas e adolescentes nas fronteiras de Europa”.

O vindeiro venres 23 de novembro AGAMME organiza a súa VI Xornada sobre o Maltrato á Infancia e á Adolescencia, que se desenvolverá a partir das 17:00h. no Ateneo Ferrolán.

Nesta ocasión a xornada pretende salientar a dramática situación dos nenos, nenas e adolescentes que están a chegar ás fronteiras de Europa fuxindo da guerra, do empobrecemento e a desnutrición extremas dos seus lugares de orixe.

Crianzas desaparecidas dos centros de persoas refuxiadas en territorio comunitario, captadas por redes de trata, centros de menores non acompañados-as saturados, adolescentes vivindo na rúa en grandes cudades europeas, nenos e nenas de curta idade que tentan suicidarse en centros de refuxiados. Os centos de menores de idade que perden a vida nas rotas terrestres e marítimas. Este é o escenario do que parte esta VI Xornada, que ten por título “Nenos, nenas e adolescentes nas fronteiras de Europa. Unha revisión dende a perspectiva de dereitos de infancia”.

O primeiro relatorio correrá a cargo de Xabier Ron, membro do Foro Galego de Inmigración dende a súa fundación, docente, activista e militante de Esquerda Unida.

A continuación intervirá Ana Miranda, deputada no parlamento Europeo polo BNG, membro da Comisión de Inmigración, embarcada no buque Open Arms durante a crise do Aquarius.

Finalizará a quenda de intervencións José Palazón, Presidente da Asociación Prodein, que leva décadas denunciando a situación dos nenos, nenas e adolescentes non acompañados-as en Ceuta e Melilla e as condicións nas que se atopan os centros de menores destas cidades.

Proxectarase o documental do fotógrafo ferrolán Gabriel Tizón, "O silencio das persoas refuxiadas".

Para finalizar o evento abrirase un coloquio.

http://www.agamme.org/

FACEBOOK | TWITTER

Causas Comúns

http://www.causascomuns.org/
___________________

xoves, abril 07, 2016

En Pontedeume unha fin de semana chea de actividade, di o Colectivo Terra: O Sábado unha Gastrofesta e Gabriel Tizón e Rocío Botana ofrecerán un coloquio-exposición fotográfica que nos transportará ás fronteiras de arame de espiño que está construíndo Europa - E o Domingo, unha actuación de Fran Amil que presenta o seu disco "A Voz do Vento", unha homenaxe a Manuel María


Actividades fin de semana

Temos unha fin de semana chea de actividade. 


O vindeiro sábado 9 de abril argallamos unha nova Gastrofesta co fin de prestar axuda na medida das nosas posibilidades ás refuxiadas que cada día tentan atravesar as fronteiras de Europa.

Levaremos a cabo un pequeno festival con maxia, música e contos onde os beneficios da barra e da cea (menú árabe a base de hummus, falafel e harise) irán destinados de xeito íntegro á Asociación Causas Comúns.

Dúas crianzas morren ao día tentando chegar ás costas de Europa. Pode soar simple, pero a foto de Aylan, o meniño sirio que nos sobrecolleu a todas, non é consecuencia dunha crise migratoria. Esta traxedia é consecuencia directa do sistema capitalista. Siria, último Estado que levantou (con erros e acertos) as bandeiras do nacionalismo árabe, que non ten débeda externa con organismos internacionais, rico en recursos naturais e, casualidade, que defende a causa palestina, é agora o epicentro das políticas de exterminio desenroladas por EEUU, o Sionismo e a OTAN.

Fotografías como idioma universal. Gabriel Tizón e Rocío Botana ofrecerán un coloquio-exposición fotográfica que nos transportará ás fronteiras de arame de espiño que está construíndo Europa. O imperialismo queda retratado unha vez máis neste drama. Lembrade o inicio de todo. O punto de partida. Por exemplo, un serán nas Azores. A fotografía. Idioma universal.

O Domingo 10 de abril contaremos no Terra coa actuación de Fran Amil que ven a presentar o seu disco 'A Voz do Vento', unha homenaxe a Manuel María, recoñecido poeta e incansábel activista a prol da lingua a quen este ano se lle adican as Letras Galegas. Será ás 17:30h no local do Colectivo Terra. Agardamos por vos!

Agardámosvos a tod@s!!!

#RefuxiadasBenvidas

http://colectivoterra.gal


Enviado por:
Colectivo Terra
-colectivoterra@gmail.com-
6 de abril de 2016 08:31

______________