As Plataformas de apoio a "Egunkaria" no Estado Español, avalían a Sentenza onde se absolve aos xornalistas procesados das graves acusacións que pesaban contra eles

Comunicado Egunkaria absolto, Egunkaria libre

EGUNKARIA ABSOLTO, EGUNKARIA LIBRE

Comunicado das Plataformas de apoio no Estado Español

A recente sentenza da Audiencia Nacional absolve aos procesados das graves acusacións que pesaban contra eles, deixando en moi mal lugar ao xuíz instrutor e á garda civil, que construíron supostas probas co único fin de clausurar o xornal.

Transcorreron 7 anos nos que os procesados sufriron torturas, anos de cárcere, acusacións infundadas, cuantiosas perdas económicas. Os traballadores do diario perderon o seu posto de traballo, e a sociedade basca viuse privada do dereito a recibir información na súa propia lingua. Desde aquí esiximos a reparación e indemnización por todos os danos causados polos poderes públicos e que as persoas que aplicaron de forma ilegal unha lexislación xa de seu inxusta asuman as súas responsabilidades.

A sentenza desautoriza á Delegación do Goberno en Madrid, que prohibiu unha manifestación co lema "Pola liberdade de expresión, contra o peche do diario Egunkaria" por considerar que tiña un fin ilícito, e tamén ao Tribunal Superior de Xustiza de Madrid que ratificou dita prohibición. Ambas as institucións deben recoñecer con claridade o grave erro cometido e o dano causado aos convocantes, incluíndo os custos do recurso, ou en caso contrario dimitir.

Triste papel, por ser benévolos, o exercido pola maioría dos responsables de crear opinión pública, que condenaron durante estes 7 anos sen esperar o fallo do tribunal, e que criminalizan toda mostra de solidariedade, en particular cara á loita do pobo basco. Pero non parecen darse por aludidos, xa que, de novo, en operacións realizadas estes mesmos días, volven asumir como única versión e verdadeira a que ofrecen os corpos policiais, conculcando a presunción de inocencia das persoas afectadas.

Porque nos preocupa o que pasa ao noso ao redor e porque a todas e todos aféctanos o recorte das liberdades, é polo que quixemos contribuír coa nosa mobilización ao restablecemento dos dereitos vulnerados, e sentímonos orgullosos de habelo conseguido entre todos. Pero sabemos que non podemos, que non debemos abandonar a loita, pois moitas persoas seguen sufrindo as consecuencias directas destes atropelos cometidos por uns poderes públicos que, en lugar de estar ao servizo da cidadanía, na maioría dos casos actúan en defensa dos intereses dos poderosos, amparando as súas inxustizas.

A solidariedade entre os pobos é un deber para todas as persoas que aspiran a un mundo en paz e con xustiza social. As persoas e organizacións que loitamos porque se faga xustiza con Egunkaria e os seus procesados, continuaremos loitando por estes valores, alí onde nos atopemos, e animamos a iso a quen compartan estas aspiracións.

Parece que chegamos ao final (pendente de posibles recursos) dun pesadelo que nunca debeu dar comezo. Esperamos que esta sentenza poida significar o punto final dunha política de represión xeneralizada que vulnerou non poucos dereitos, amparada no uso e abuso dunha lexislación excepcional e inxusta. Unha lexislación que, desenvolvida coa escusa da loita anti-terrorista, deu lugar, entre outros atropelos inconstitucionais, a peches doutros medios de comunicación como Egin, Egin Irratia e Ardi Beltza, e que se aplica, cada vez máis, contra calquera brote de disidencia respecto do poder establecido ao longo e ancho do Estado español.

Queremos que esta sentenza contribúa tamén a alumar un futuro de esperanza e de paz, baseada no dereito aos pobos a decidir o seu futuro e a desenvolver a súa cultura e valores propios.

VIVA A SOLIDARIEDADE ENTRE OS POBOS

EGUNKARIA AURRERA (ADIANTE)

Plataformas de apoio a Egunkaria de Zaragoza, Valladolid, Asturias, Catalunya e Madrid - Abril 2010

Enviado por:

madridegunkaria

-madridegunkaria@nodo50.org-

21 de abril de 2010 01:17

_____________________

Enlace relacionado:

Ártabra 21: Caso Egunkaria: Absolven aos cinco directivos do diario -Martxelo Otamendi, Xabier Oleaga, Txema Auzmendi, Iñaki Uria e Joan Mari Torrealdai- poñendo en cuestión o peche do xornal basco e afirmando que "non tiñan a máis mínima relación con ETA"
_________________________

Caso Egunkaria: Absolven aos cinco directivos do diario -Martxelo Otamendi, Xabier Oleaga, Txema Auzmendi, Iñaki Uria e Joan Mari Torrealdai- poñendo en cuestión o peche do xornal basco e afirmando que "non tiñan a máis mínima relación con ETA"

Absolveron aos cinco, mais ainda non se fixo xustiza, para que se faga xustiza hai que reparar o dano causado, ...  e o proceso ainda está sen rematar [O ex director do xornal cre que "os perdedores" no xuízo presentarán un recurso contra a sentenza, e advirte que queda a parte económica do caso], no seu momento Director, Martxelo Otamendi, foi torturado, calquera que se atrevera a defender Egunkaria era tildado de terrorista, a liberdade de expresión foi secuestrada, ... o resto dos medios de comunicación, os que non aplaudiron a medida, gardaron un cúmplice silencio, ... Os cinco realizarán hoxe pola mañá unha Rolda de Prensa no Parque da Cultura, en Andoain.

O 20 de febreiro de 2003, Euskaldunon Egunkaria [*], o único diario publicado integramente en lingua basca en todo o mundo, foi clausurado polo xuíz da Audiencia Nacional Juan do Olmo que decretou o seu peche "temporal", e dez membros do seu persoal ou que formaron parte del no pasado foron arrestados baixo a acusación de "colaboración con banda armada". A Garda Civil española levou a cabo unha redada a gran escala tanto nas oficinas centrais do xornal en Andoain como nas súas delegacións de Iruñea (Pamplona), Bilbao e Gasteiz (Vitoria), que quedaron precintadas.

A Audiencia Nacional española absolve aos cinco directivos de "Egunkaria" que foron xulgados

A Audiencia Nacional española absolveu a Martxelo Otamendi, Xabier Oleaga, Txema Auzmendi, Iñaki Uria e Joan Mari Torrealdai, que foron xulgados na causa contra "Egunkaria" a pesar de que a propia Fiscalía pedira o arquivo do proceso. O fallo pon en cuestión o peche do diario en euskara e afirma que os procesados e o xornal "non tiñan a máis mínima relación con ETA".

[Joan Mari Torrealdai, Iñaki Uria, Txema Auzmendi, Martxelo Otamendi and Xabier Oleaga]

• Sentenza íntegra [en formato -pdf-]
• Martxelo Otamendi: "Pozik gaude, baina partida ez dá oraindik erabat bukatu" [ Para ler a interesante noticia pode utilizar un traductor de Esukera-Español, de Euskara-Galego ou de Euskara-Português non os atopamos]
• A maioría de forzas políticas pide que se repare o dano causado

Fontes: xornal basco "Gara" [Máis Información] e ideasapiens [2003]

Web de Egunkaria:
http://egunkaria.info/

[*] EUSKALDUNON EGUNKARIA [o xornal dos basco-falantes] naceu o 6 de decembro de 1990. Era o único xornal publicado en basco, e estaba á venda en todo o País Basco, tanto en Iparralde como en Hegoalde [é dicir, tanto na zona norte como na zona sur do País Basco a ambos os dous lados da fronteira franco-española]. Publicaba-se seis días á semana de martes a domingo. Tiña unha versión on-line en basco que contiña tamén unha sección en inglés.

EUSKALDUNON EGUNKARIA desenvolveuse de xeito considerable desde o inicio da súa andaina, cando contaba con só 32 páxinas. No momento do seu peche tiña xa 60 páxinas na súa edición diaria, e tendo en conta todos os seus diferentes produtos, publicaba unha media de 76 páxinas diariamente.

EUSKALDUNON EGUNKARIA era un xornal corrente, e ofrecía as seccións habituais en calquera diario: opinión, política do País Vasco, sociedade do País Basco, economía, deportes, artigos, servizos, cultura, sucesos e televisión.

EUSKALDUNON EGUNKARIA tiña a súa sede central en Andoain (Gipuzkoa) e delegacións en Iruñea (Pamplona), Baiona (Bayonne), Bilbao e Gasteiz (Vitoria). Contaba cunha plantilla de 150 persoas.











Enviado por:

Imorero

-inaciogz@gmail.com-

13 de abril de 2010 07:00

__________________

NÓS-Unidade Popular apela à solidariedade com Gzvideos: contra a criminalizaçom da informaçom livre

A esquerda independentista tem já umha longa experiência de perseguiçom policial e mediática por parte dos instrumentos repressivos do regime espanhol, que tentam evitar a todo o custo qualquer forma de auto-organizaçom que ponha em questom o seu monopólio do poder, seja político, associativo ou, como neste caso, informativo.

Gzvideos, um colectivo que representa umha dessas iniciativas auto-organizativas que o Estado espanhol tanto teme, é nos últimos meses vítima de umha verdadeira campanha de assédio repressivo para tentar dar cabo de umha ferramenta popular de máxima utilidade par dar a conhecer, mediante o uso das novas tecnologias, a realidade das luitas oculta nos meios oficiais e da burguesia.

Esse é o motivo das sucessivas multas, interrogatórios e ameaças que venhem sofrendo reporteiros e reporteiras de Gzvideos, que agora vive mais um episódio repressivo com umha acusaçom falsa da Polícia espanhola contra umha das suas activistas. A farsa de uns inexistentes gritos alheios à actividade jornalística e proferidos em espanhol por umha roporteira galegofalante cai polo seu próprio peso, mas nom por isso deixa de servir ao objectivo último de liquidar umha iniciativa mediática alheia ao controlo reaccionário e útil para o exercício efectivo da liberdade de informaçom e de expressom.

Por todo o anterior, e em reconhecimento ao labor dos companheiros e companheiras de Gzvideos, NÓS-Unidade Popular manifesta a sua solidariedade com a companheira represaliada e o seu apoio à concentraçom convocada para amanhá, dia 17 de Setembro, nos tribunais compostelanos das Fontinhas, às 9h45.

Contra a repressom e a censura, em defesa do direito de informaçom e de livre expressom!

Permanente de NÓS-Unidade Popular

Galiza, 16 de Setembro de 2009

Enviado por:
NÓS-UP
-imprensa@nosgaliza.org-
17 de setembro de 2009 16:02
________________________

Gzvideos denuncia a persecución aos seus activistas mentres gravan mobilizacións a través de posteriores denuncias falsas da Policia

• O xoves terá lugar unha concentración de apoio ás 9.45 da mañá no Xulgado de Fontiñas e pola defensa da liberdade de expresión antes do xuízo de faltas que terá lugar contra unha fotógrafa que ademais gravou a cadea humana de Ceivar pola liberdade dos presos políticos o 24 de xullo de 2008.
  

• A denuncia policial acusa falsamente á xornalista de berrar neste acto “policia asesina”, “torturadores” e “ETA matalos”, tentando reprimir a liberdade de información.
  

A primeira sanción administrativa chegou para Gzvideos no mes de xuño deste ano. Acusábase a un dos nosos reporteiros de portar a faixa de cabeceira dunha manifestación de ensino medio na defensa do galego, de corear lemas e de ser un dos principais organizadores e dirixentes do estudantado que se mobilizaba no mes de maio na defensa do ensino en galego convocados polo Foro da Mocidade de Vigo, ao tempo que se recoñecía na denuncia que “portaba cámara”, coa que estaba a filmar o evento. Asi, impúñase unha sanción de 500 euros por organizar unha manifestación ilegal, que nestes momentos está aínda nos trámites de recurso.

Pouco despois, unha unidade de "delictos tecnolóxicos" da Guardia Civil española retiña outro reporteiro logo de saír da súa propria casa e levávao ao cuartel de Pontevedra para declarar supostamente sobre un vídeo de debuxos animados alleo á produción do GzVídeos, interrogando ao activista sobre o equipo editorial, funcionamento do portal e toda unha serie de cuestións que demostraban que se tratou dunha coartada para recoller información e atemorizar ao compañeiro.

O martes 15 de setembro, a través do telefone, informaban a outra das nosas compañeiras de que se vai celebrar este xoves 17 de setembro ás 10.10 da mañá un xuízo de faltas na Sala de Vistas nº 2 do Xulgado de Compostela por unha denuncia da Policia sobre uns feitos que supostamente aconteceran no 24 de Xullo de 2008.

A denuncia policial recolle que a nosa compañeira fora identificada na Praza de Galiza ás 20 da tarde , lugar donde se concentraron diversos colectivos independentistas. Recóllese que "la reseñada durante el transcurso de la concentración profiere gritos tales como -policia asesina-, -ETA matalos-, -Torturadores-”, algo completamente falso e fora da realidade.

De feito, a nosa compañeira nesta data lembra que fora identificada na Praza de Galiza mentres estaba a realizar fotografias e videos, diante da pregunta dun antidisturbios de se "era da prensa”, polo que procedeu a ensinarlle a credencial de fotógrafa do Novas da Galiza, medio co que tamén colabora e no que publicou as fotografías realizadas nesta data.

Desde Gzvideos queremos denunciar este terceiro ataque que vimos de recibir, que entendemos só coa vontade de castigarnos economicamente e tentar que o traballo de crítica, de información de manifestacións, concentracións e difusión de actos que son sistematicamente silenciados polos medios empresariais sexa finalmente invisibilizado e calado a forza de sancións económicas e identificacións sistemáticas.

GzVideos naceu en Maio do 2008 como unha iniciativa indendente e non comercial, coa vontade de "constituír un espazo de encontro para a creación audiovisual que parte dos movementos sociais galegos, un campo onde conflúe o video-activismo e o debate xerados a partir da crítica á realidade galega". A plataforma gzvideos.info conta a día de hoxe con mais de 200 videos de produción propria e mais de 500 aportacións externas, converténdonos na principal xanela do xornalismo audiovisual galego na rede, dando cobertura a actos políticos e culturais, loitas sindicais, defensa do medio ambiente, xornadas, charlas, loita polos dereitos lgbt, contra o patriarcado, a prol da soberanía política do noso país e na denuncia da represión e violacións dos dereitos humanos mais elementais, algo que sen dúbida non debe resultar cómodo para quen pretende impor unha sociedade acrítica e pasiva, ademais de protagonizar a coacción e a represión.

Animamos a participar na concentración convocada ás portas do Xulgado de Fontiñas mañá ás 9:45 da mañá en solidariedade coa nosa compañeira e na defensa da liberdade de expresión, un concepto de dubidosa aplicación no Estado Español, onde a policía se adica a denunciar falsamente a reporteiros independentes co obxectivo de reprimir a liberdade de información.

De GzVideos ocuparémonos de dar difusión a este intento por suprimir a liberdade de expresión e de información, e tentaremos por todos os medios legais a exculpación da nosa compañeira. Non están a reprimir tan só ao GzVideos, se non a todo o que representa: están a tentar erradicar a difusión das actividades de dúcias de colectivos galegos e impor unha única maneira de pensar. Ainda así, seguiremos editando e difundindo vídeos. Hoxe mais do que nunca: apaga a TV e prende a túa mente!

Compostela, 16 de setembro de 2009

Zélia Garcia

Enviado por:
Galiza Non Se Vende
16 de Setembro de 2009 16:41
________________________