Novas en Radio Fusión

Foucellas e Manuel Vilar

Sociedade 17/03/2012

Ocorreu hai 60 anos. En marzo de 1952 detiveron a Foucellas en Oza dos Rios. Con él estaba, Manuel Vilar Arnoso, Manoliño, home de Fene, natural do Sartego. Segundo veciños da zona, era carpinteiro e traballaba en Bazan. Fora despedido do estaleiro con ocasión da folga do aceite en 1946. Entraron en contacto con el e botouse ao monte coa guerrilla antifranquista.
|Entra en Radio Fusión|

A toupiña ensínalles aos nenos as estacións

Patasdepeixe edita en galego as historias do “Mickey Mouse do bloque comunista”

Cultura 17/03/2012

A toupiña Krtek, que o checo Zdeněk Miler creou a finais dos anos 50 para que o bloque comunista tivese un Mickey Mouse de seu, fala galego grazas a Patasdepeixe Editora. “Decidimos rescatar este personaxe tenro e entrañable que nunca se editara na Península”, explica Laura Sáez Fernández, quen destacou tamén nos micrófonos de Radiofusión o aspecto “retro e vintage” da ilustración. “Publicamos a serie da toupiña nun formato cartón para que os nenos, ademais de ler, poidan xogar”, engade.
|Entra en Radio Fusión|

A Xunta propón solucionar o problema das preferentes a través dun laudo arbitral

Institucional 16/03/2012

A Xunta propón un laudo arbitral para que as persoas afectadas polas participacións preferentes e as entidades financeiras se poñan de acordo na súa devolución. “A proposta que facemos como comunidade autónoma é a posibilidade de solucionar estes conflitos vía extraxudicial, a través da arbitraxe, a través dun laudo arbitral que ten forza de sentenza xudicial”, aseverou o presidente Alberto Núñez Feijóo, remarcando que o Executivo autonómico está a traballar e seguirá traballando nesta materia no ámbito das súas competencias, que tan só afectan “ao ámbito do consumo”. Segundo explicou Feijóo tras o Consello da Xunta, para isto “é necesario, primeiro, que as entidades acepten este procedemento” e, segundo, “que tamén os clientes afectados o acepten”.
|Entra en Radio Fusión|

“Equipo de investigación: Multimillonarios” (Antena 3, 00:15 h.)

Sociedade 16/03/2012

Dende que o lin un día nunha revista, xa non o podo esquecer. Por mor dunha investigación policial tiveron que exhumar o cadáver a medio corromper da vedette francesa Lolo Ferrari. Alí, baixo terra, estaba o corpo en descomposición agás polos seus peitos de tres quilos de peso, os máis grandes do mundo, aínda desafiantes en toda a vizosa exuberancia da silicona non biodegradable. Nunca se representou mellor a traxedia do postizo. Velaí un síntoma da tolerancia ás inxeccións artificiais que desenvolvemos dende que aceptamos que neste mundo o diñeiro é un valor absoluto: sexa para o que for, canto máis mellor. Se é para poñerse unha manolas descomunais, ok. Se é para fichar aos mellores futbolistas do mundo para o equipo do noso barrio, tamén ok. Se de Carballo a Sidney xa case non se pode mercar outra roupa que non sexa a de Inditex, porque non deixar que pase o mesmo cos nosos clubs amados? Foi así, a golpe de presentación estelar de mediapuntas, como España asumiu o mundo musulmán como non o facía dende os tempos de Almanzor.
|Entra en Radio Fusión|

Jordi Calvo (Centre Delàs): “A banca pode decidir que armas se producen”

Sociedade 16/03/2012

O BBVA é “o segundo do mundo en dar crédito ás empresas de armas”. Así consta no informe que o Centre d'Estudis per la Pau Josep Manuel Delàs vén de publicar co título “A banca armada. Investimentos explosivos de bancos e caixas”. O seu autor, Jordi Calvo, explicou en Radiofusión que os bancos “armados” son aqueles que “dedican parte relevante do seu negocio ao sector da industria das armas”. O principal no Estado é o BBVA, a cuxa xunta anual de accionistas acudiron esta mañá os pacifistas para reclamarlle que abandonen ese negocio.
|Entra en Radio Fusión|

Radiofusión é a programación común elaborada polas Emisoras Municipais Galegas desde unha perspectiva local, con vocación pluralista e comprometida con Galiza, ...

Na nosa Comarca no 107.7 da FM ou a través da Rede, Rádio Fusión - Radio Fene, Rede de Emisoras Municipais da Galiza.
 Máis Información 

Enviado por:

Radio Fusión

radiofusion@radiofusion.eu

17 de março de 2012 08:49

________

Afunden a carga de traballo para os estaleiros - O PP negouse a transaccionar un acordo co portavoz do BNG no Congreso, Francisco Jorquera, que contemplase medidas para o sector naval de Galiza

Afunden a carga de traballo para os estaleiros

O plantel de Navantia reclama carga de traballo

O PP negouse a transaccionar un acordo co portavoz do BNG no Congreso, Francisco Jorquera, que contemplase medidas para o sector naval de Galiza, tanto o relativo aos estaleiros da Ría de Vigo como os públicos de Navantia na Ría de Ferrol. O resultado da votación da proposición nacionalista foi: 130 votos a favor, 180 en contra e 17 abstencións.

Sociedade • 22/02/2012 • Autor: Redacción

O Pleno da Cámara debatía unha proposición non de lei de Jorquera, á que varios grupos parlamentares presentaron emendas, entre eles o grupo popular. O deputado do BNG considerou excesivamente ambigüa, nada concreta e moi insuficiente a emenda do PP, por iso ofertou unha transacción ao grupo popular coa vontade de chegar a un acordo. Máis, para o BNG hai cuestións que son irrenunciábeis, como a necesidade de adoptar unha solución para os estaleiros da Ría de Vigo mentras a UE non solucione a cuestión do Tax Lease, como o compromiso concreto de construir o dique flotante en Ferrol e que se negocie unha data de vencemento ás limitacións que pesan sobre o estaleiro de Fene.

É preciso salientar que en xuño do ano pasado, 2011, o PP votou a favor destas cuestións relativas a Navantia na votación dunha moción do BNG aprobada en Pleno. En cambio, agora que está no Goberno a súa posición é distinta. Precisamente, a falla de compromiso do PP cos plantexamentos do BNG sobre os estaleiros públicos da Ría de Ferrol, foi o que motivou que Jorquera só aceitara as emendas transaccionais presentadas por IU e polo grupo socialista.

Na súa intervención no pleno, Jorquera destacou que as medidas do BNG para o sector naval público e o privado “contribuirían a resolver a gravísima crise que padece o sector naval, tanto no conxunto do Estado como na Galiza en particular”. Neste sentido, puxo de manifesto que o sector naval é un sector “básico da economía galega xa que representa o 5,7% do PIB do noso territorio, e no 2008 empregada directamente a máis de 10.000 traballadores, ademáis dos traballos indirectos”.

Advertiu o deputado do BNG que a crise que afecta a este sector cuestiona até a súa propia superviviencia. Pero no caso galego tamén conflúen outras razóns, subliñou. “Os estaleiros públicos da Ría de Ferrol están a sufrir as consecuencias dos dictados de Bruxelas que os obrigou a operar case en exclusiva na construción naval militar”.

O Tax Lease non conleva competencia desleal

E en relación ao Tax Lease que afecta especialmente aos estaleiros da Ría de Vigo, salientou que a investigación iniciada pola Comisión Europea sobre o sistema de arrendamento fiscal “situou aos estaleiros privados ao borde do peche”. O BNG, enfatizou, “nega rotundamente que o Tax Lease conleve competencia desleal”. Así, lembrou que a realización de contratos con este sistema se iniciou no 2003, e “non se presentou ningunha denuncia até o pasado ano. Unha denuncia que só busca disputar cotas de mercado nun contexto de forte caída da demanda”.

Jorquera argumentou que na UE o imposto de sociedades non está armonizado e que distintos países europeos practican rexímenes fiscais beneficiosos para o seu naval, “onde está a competencia desleal?”. Explicou a situación de parálise pola que atravesan os estaleiros debido ao bloqueo ao Tax Lease. Agora mesmo a carteira de pedidos dos estaleiros privados redúcese a só sete unidades. “A consecuencia é que se perderon xa 3.500 postos de traballo nas auxiliares e outros tantos están suxeitos a ERE´s”. E reprochou que outros países se teñan feito coa cota do mercado dos estaleiros galegos.

Por iso, afirmou, “é urxente que a Comisión Europea autorice un novo sistema de arrendamento fiscal mentras non se resolva o procedemento”.

Navantia

No que atinxe aos estaleiros públicos, Jorquera tamén describiu a crítica situación pola que atravesan: “a súa carteira de traballo está practicamente esgotada, e se non hai novos encargos perigarán os 5.600 postos de traballo dos estaleiros e das auxiliares”. Nos últimos meses, enfatizou, destruíronse 700 empregos.

Criticou a prohibición que pesa sobre o estaleiro de Fene de construir buques, porque “restrinxir a actividade á construción naval militar significa depender da contratación pública, moi limitada polos drásticos recortes”.

Explicou que fronte ás costas galegas pasa un dos corredores marítimos internacionais máis importantes, e os “estaleiros da Ría de Ferrol teñen unha posición xeográfica privilexiada para atraer ese mercado”. Pero iso exixe “investimentos como a construción dun dique flotante para reparar grandes buques”. E aludiu tamén á necesidade de superar as limitacións impostas pola UE.

Lembrou Jorquera que outros puntos da iniciativa do BNG coinciden cos dunha moción aprobada por unanimidade no pasado mes de xuño, e “o PP, durante a campaña electoral, comprometeuse a facer realidade o dique flotante se gañaba as elecións, demanda compartida polo conxunto da sociedade de Ferrolterra”.
“É hora, puntualizou, de que as promesas den paso aos feitos”.

Fonte: RadioFusión
______________________

O Consello Escolar de Galicia solicita a devolución da Lei de Convivencia á Consellaría de Educación - Enlaces relacionados - Vídeo

O Consello Escolar tomba a Lei de Convivencia, mais Educación levará o texto ao Parlamento

Vázquez Abad elevará o anteproxecto ao Consello da Xunta malia o rexeitamento

O Consello Escolar de Galicia solicita a devolución da Lei de Convivencia á Consellaría de Educación. A maioría dos sindicatos que representan ao profesorado e as organización presentes no principal foro do sistema educativo galego demandaron a retirada do proxecto votando de maneira conxunta as oitos emendas á totalidade do texto que prosperaron con 21 votos a favor, 11 en contra e dúas abstencións. CIG-Ensino, UGT, Comisións Obreiras e STEG foron algúns dos colectivos que elevaron ao consello as emendas contra o conxunto do articulado. É a segunda vez na que o Consello Escolar desacredita as propostas lexislativas da Administración do Partido Popular. Xa o fixera co decreto do plurilingüismo, porén a Xunta teimou en sacalo adiante fronte a opinión do sector ao que afectaba. Cabe agardar que unha vez máis, o conselleiro Jesús Vázquez volva impor o seu criterio. Así se desprende dunha nota que trasladaba a Consellaría de Educación e que facendo caso omiso do resultado deste encontro limítase a sinalar que o anteproxecto pasará agora ao Consello da Xunta e podería entrar no Parlamento de Galicia a finais do mes de febreiro. No comunicado, o Goberno pide acadar “o máximo consenso” e desoe as críticas.
Institucional.

Entre as críticas formulados polos sindicatos figuran o feito de que a proposta da Xunta non contempla estratexias preventivas, omite as referencias aos órganos colectivos de participación e goberno, e establece a través da “participación directa das familias” un proceso de consulta do que non se regula nin o obxecto da consulta, nin o procedemento, nis as consecuencias da mesma, segundo explicou Comisións Obreiras nun comunicado, que critica á Administración por querer darse un cheque en branco saltando o xa regulado a través dos consellos escolares. A consulta pretendía lexitimar a enquisa aos pais para que determinasen a lingua na que ían estudar os seus fillos a educación primaria.

Segundo o resumo achegado por CIG-Ensino, que organizou unha concentración de protesta contra a Lei de Convivencia ás portas do Consello Escolar, o obxectivo claro do anteproxecto era “pernicioso: prohibir ensinar en galego”. Ao mesmo tempo, critícase que o presunto reforzo da autoridade do profesorado nas aulas baséase en “criterios correctivos e represivos e non formativos e educativos”, apostando por unha “xudicialización do ensino”.

Así as cousas, o máximo órgano consultivo do ensino en Galicia tira abaixo unha nova proposta da Xunta, ao igual que xa informara negativamente a decreto do plurilingüismo. O conselleiro de Educación, Jesús Vázquez Abad, que esta semana acusara aos sindicatos do ensino de quererlle impor a súa acción á Xunta, terá que demostrar agora se quere volver lexislar en contra da opinión maioritaria dos colectivos afectados pola norma que promove.

Fonte: RadioFusión - 28.01.2011
_________________________________

Enlaces relacionados:

Avantar - O Consello Escolar solicita á Consellaría a retirada da Lei de Convivencia e Participación da Comunidade Educativa - A CIG-Enisno, que presentara unha emenda á totalidade do anteproxecto, levou a cabo unha concentración coincidindo co pleno do Consello

Galicia Hoxe - O Consello Escolar rexeita o borrador da Lei de convivencia ... O pleno do Consello Escolar de Galicia solicitou a devolución do borrador de anteproxecto de Lei de convivencia e participación da comunidade educativa á ...

O Xornal de Galicia - O Consello Escolar de Galicia rexeita o anteproxecto da Lei de ... Meijón sinala a unanimidade de gran parte dos membros do Consello Escolar de Galicia respecto da “pobreza e precariedade argumental” con que os ...

FETE UGT Galicia - Inicio
O Consello Escolar de Galicia ratifica a postura de FETE UGT sobre o anteproxecto de Lei de Convivencia da Comunidade Educativa. ...

Comisiones Obreras - Federación de Enseñanza de Galicia
Con esta votación o Consello Escolar de Galicia solicita a devolución da Lei de ... CCOO-ENSINO presenta no Consello Escolar de Galicia unha enmenda a ...

lei de convivencia.- no Consello Escolar de Galicia ás enmendas á ...
no Consello Escolar de Galicia ás enmendas á totalidade do texto gañan 21 votos contra 11. Se a Jesús Vázquez quédalle algo de dignidade terá que retirar o ...

_________________________________





Fonte: http://www.youtube.com/user/cigensinotv
________________________________

Boletín de noticias de RadioFusión - 18.01.2011

ATTAC denuncia a apropiación dos mercados financeiros do “saboroso” negocio das xubilacións
“As pensións son un pastel”. Así resume toda a polémica arredor da reforma das pensións o responsable en Galicia de ATTAC, a Asociación pola Taxación das Transaccións e a Axuda aos Cidadáns, Marcos Gay Varela. Esta asociación internacional alerta contra a creación interesada dun “medo na cidadanía” promovido polos mercados que pretenden repartirse o negocio económico que supón actualmente o fondo solidario das prestacións. Gay Varela reclama un “debate social e aberto” e chama á sociedade a informarse sobre a realidade do sistema de pensión, desbotando a crenza a cegas na doutrina do Fondo Monetario Internacional, “o que nos trouxo até aquí”, denuncia, en relación á crise económica actual.

Carvalho Calero, de Ferrol para o mundo
Ricardo Carvalho Calero, a súa vida e a súa obra, son sos protagonistas dunha mostra que se inaugura esta tarde no centro que leva o seu nome, no Inferniño. O alcalde, Vicente Irisarri, preside o acto de apertura ás 19:30 horas.

Anxo Louzao: “A Lei dá cobertura legal a algo que é ilegal”
Reducir a presenza do galego no sistema educativo, esta é a finalidade que, segundo a CIG, ten o anteproxecto de Lei de Convivencia e Participación da Comunidade Educativa presentada pola consellería de Educación. Así o indicou o secretario nacional de CIG-Ensino, Anxo Louzao, quen destacou a demagoxia desta Lei ao carecer do debate no ámbito educativo. Louzao apuntou tamén que a Lei da potestade ás familias para decidir a lingua na que se impartirán as materias, cando esta debería ser unicamente competencia das administracións educativas.

O Senado falou na lingua galega
A lingua galega, o euskera e o catalá estiveron presentes este mércores no pleno do Senado por primeira vez na historia, nunha sesión na que se activaron os servizos de tradución simultánea nun clima de normalidade. O senador de Entesa Ramón Aleu iniciou o turno facendo uso da potestade que lle otorga o novo Regulamento. Tamén falaron nas súas linguas, o senador balear Pere Torres, a do PNV Loren Leanizabarrutia, o de CiU Ramón Alturo, o do PSOE Joan Cardona e o do BNG Xosé Manuel Pérez Bouza. Os senadores do PP fixeron un uso mínimo da tradución simultánea e aplaudiron á súa representante cando lembrou que o castelán é a lingua na que se entende "todo o mundo".

Nota.- Radiofusiòn é a programación común elaborada polas Emisoras Municipais Galegas desde unha perspectiva local, con vocación pluralista e comprometida con Galiza, que pode ser difundida polas emisoras asociadas a e por calquera entidade ou asociación galega na emigración que estea dentro da zona de cobertura do satélite Hispasat 1C Europa que serve o noso sinal.

www.radiofusion.eu

Enviado por:

radiofusion@radiofusion.eu

-radiofusion@radiofusion.eu-

18 de janeiro de 2011 22:32

_____________________