Queixa, das organizacións ecoloxistas e ambientalistas galegas, ante o Valedor do Pobo pola non celebración das obrigadas reunións das xuntas consultivas dos parques naturais e do Observatorio Galego de Educación Ambiental durante o ano 2012

Os colectivos integrantes da Federación Ecoloxista Galega, a Sociedade Galega de Historia Natural e a Sociedade Galega de Educación Ambiental presentan unha queixa ante o Valedor do Pobo pola non celebración das obrigadas reunións das xuntas consultivas dos parques naturais e do Observatorio Galego de Educación Ambiental durante o ano 2012. Este comportamento da Consellería de Medio Ambiente, Territorio e Infraestruturas, ademais de contrario á lexislación en materia ambiental, supón unha merma dos dereitos de representación e información que asisten aos colectivos ecoloxistas e, por extensión, ao conxunto da cidadanía.

As xuntas consultivas dos parques naturais son os órganos colexiados que, segundo o disposto no artigo 42 da Lei 9/2001, colaboran na xestión dos espazos naturais protexidos e canalizan a participación das persoas propietarias e daquelas persoas que representan os diferentes intereses sociais e económicos. Así mesmo, están adscritos á Consellería de Medio Ambiente, Territorio e Infraestructuras.

O Decreto 265/2007, de 28 de decembro, establece a composición das xuntas consultivas, quedando integradas, entre outros axentes, por un/unha representante das asociacións que figuren inscitas no Rexistro de asociacións protectoras do medio ambiente da Xunta de Galicia.

A pesar da relevancia destes órganos de cara a unha axeitada participación pública na xestión dos espazos naturais protexidos, durante o ano 2012 non se celebraron as pertinentes reunións con carácter ordinario en cinco dos órganos mencionados:

• Xunta Consultiva do Parque Natural do Complexo Dunar de Corrubedo e lagoas de Carregal e Vixán.
• Xunta Consultiva do Parque Natural das Fragas do Eume.
• Xunta Consultiva do Parque Natural de O Invernadoiro.
• Xunta Consultiva do Parque Natural da Baixa Limia-Serra do Xurés.
• Xunta Consultiva do Parque Natural da Serra da Enciña da Lastra.

A non celebración de reunións ou a celebración cunha periodicidade superior a un ano supón tamén o incumprimento de diferentes artigos que regulan as funcións que cumpren as xuntas consultivas: informar anualmente das memorias de actividades e resultados, aprobar os orzamentos, aprobar, modificar e revisar os plans relativos ao espazo protexido e os instrumentos de planificación, etc.

Así mesmo, está a incumprirse reiterandamente a convocatoria do Observatorio Galego de Educación Ambiental, o órgano colexiado de participación, consulta e asesoramento en relación co desenvolvemento da Educación Ambiental en Galicia.

A queixa presentada ante o Valedor do Pobo vén motivada no feito de que a non celebración das reunións supón unha merma dos dereitos de representación e información ao conxunto de asociacións ambientalistas galegas.

O incumprimento da periodicidade nas convocatorias doutros organismos consultivos (Consello Galego de Medio Ambiente e Desenvolvemento Sostíbel, Observatorio Galego da Biodiversidade e Consello da Rede de Parques Naturais de Galicia) está xa a ser investigado polo Valedor do Pobo debido a unha queixa presentada pola asociación ADEGA en nome dos colectivos ecoloxistas.

A pesar da lexislación e dos acordos parlamentarios, o día a día na xestión dos espazos naturais protexidos e dos órganos de participación está baseado na falta de información, en impedir a participación aos axentes sociais interesados e no desinterese por parte da Consellería, o que ten como resultado que só dous dos seis parques naturais existentes conten cun Plan Rector de Usos e Xestión. 

Máis información:

Federación Ecoloxista Galega. T. 691 527 277.

Sociedade Galega de Historia Natural. T. 698 141 384.

Sociedade Galega de Educación Ambiental. T. 618 868 612.

Enviado por:
ferrol@verdegaia.org
-ferrol@verdegaia.org-
3 de outubro de 2013 10:2
________________

O grupo de Traballo da Comisión Social de Seguimento por un saneamento inegral para a Ría de Ferrol, remite un documento a todos os partidos políticos con representación no Paralmento Galego

Informe remitido aos grupos políticos

Porque o noso único obxectivo é o saneamento integral da ría, e isto implica defender a utilización eficaz do diñeiro que se está a investir construindo unhas infraestructuras eficaces e con futuro que non virtan nunca mais augas fecais á ría, mesturadas ou non. entendemos que quen xestiona diñeiro público ten que dar conta do que fai con el e utilizalo con eficacia, garantindo ademais o futuro, non só do investimento realizado senón do obxectivo do mesmo, e dicir, o saneamento integral da ría sen mais vertidos. é por iso que enviamos este documento a todos os partidos políticos con representación no paralmento galego para que o asuman e defendan.

Acceder ou baixar o Informe.

ASINANTES: ADEGA, SGHN, Verdegaia, Comisión de Medio da A.VV. Recimil.

Enviado por:
Pablo Iglesias
-cidadansversustanquestormentas gmail.com-
30 de setembro de 2013 11:57
http://cidadansversustanquesdetormentas.blogspot.com.es/
___________

Este Sábado 21 de Setembro, pouco antes das 7 da tarde tiña lugar o Acto lúdico reivindicativo, no 'Parque Pablo Iglesias' de Ferrol, para pedir outra localización para o mal chamado "tanque de tormentas" que está proxectado construir no mesmo parque público, e por un outro modelo de saneamento

Este Sábado 21 de Setembro, pouco antes das 7 da tarde tiña lugar un Acto Lúdico Reivindicativo, no Parque Público 'Pablo Iglesias' de Ferrol.

O acto comezou máis tarde da hora prevista. O arquitecto urbanista compostelán, Xosé Allegue, non puido participar como estaba previsto, por motivos familiares. Chema Hernández Roca, da Comisión de Medio Ambiente da Asociación Veciñal de Recimil, foi a persoa encargada da conferencia, explicandoou con claridade o porque da oposición á localización, do mal chamado "tanque de tormentas" no parque. Nomeou, os incumprimentos normativos e lexislativos do sistema de saneamento, desde o artigo 178 do PXOM local, até a Directiva Europea da Auga, pasando pola lexislación autonómica e a estatal. Demandou outra localización para o "tanque" que o cualificou de "simple aliviadoiro" e reivindicou un outro modelo de saneamento, para que se poida cumprir co obxectivo de recuperación integral da Ría de Ferrol.

O Acto estaba convocado pola xa citada Comisión de Medio Ambiente, ademais das entidades ecoloxistas e ambientalistas: ADEGA, SGHN e Verdegaia.

As obras do "tanque de tormentas",  está previsto que inicien antes de que remate o presente mes de Setembro. É por iso que urxe unha reacción cidadá para conseguir o cambio de localización do "tanque" e que non sacrifiquen o Parque Público 'Pablo Iglesias', unha zona de ocio e un espazo verde moi concorrido. Por outra banda, pretende-se abrir un debate sobre o modelo de saneamento que queremos para a nosa Ría baixo o lema “Saneamento sí, mais non así”, pois co saneamento previsto non se consegue o obxectivo de saneamento integral.

A comprometida e excelente poesía recitada por Karloti, e a non menos excelente e comprometida musica e cancións interpretadas por Manolo Bacalhau, puxeron o toque lúdico reivindicativo ao Acto que recibiu fortes aplausos.

Para rematar, Chema Hernández, mencionou a recente constitución dunha Comisión Social de Seguimento - Grupo de Traballo que ten a función de seguir a execución das obras de saneamento e demandar das administracións as modificacións necesarias para cumprir o obxectivo da recuperación Integral da Ría e a sostibilidade da infraestrutura de saneamento que tantos anos levamos agardando. Esta Comisión está aberta a quen quixer participar na mesma (Contactar).

Por último fixo mención a que a mediados de Outubro está previsto facer unhas xornadas, nas que se traten os aspectos técnicos, lexislativos e ambientais co fin de axudar á cidadanía a entender o modelo de saneamento da Ría, así como os seus inconvenientes e facer propostas que contemplen outro modelo de tratamento das augas, no camiño do vertido contaminante cero na Ría de Ferrol.

Enlaces relacionados de Interese:

Sitio na Rede, de información e documentación, para apoiar e facilitar, a loita e o traballo social que procura que o Sistema de Saneamento, nas marxes da Ría de Ferrol, sexa Integral. Saneamento si, mais non así!!!

http://ria-de-ferrol.blogspot.com.es/

O noso 'Informe' >>> Análise crítico do Proxecto de Saneamento acordado, polo Goberno, para a marxe norte da Ría de Ferrol | ALTERNATIVA ELABORADA POLA COMISIÓN DE SEGUIMENTO - GRUPO DE TRABALLO.

http://alternativa-proxecto-saneamento.blogspot.com.es/

________________

Acto lúdico reivindicativo, este Sábado 21 de Setembro, ás 18:30 hs, no 'Parque Pablo Iglesias' de Ferrol (conferencia, concerto, recital de poesía, ...) - En demandan doutra localización para o "tanque de tormentas" - Debate sobre o modelo de saneamento que queremos para a nosa Ría baixo o lema “Saneamento sí, mais non así”

Acto lúdico reivindicativo, este Sábado 21 de Setembro, ás 18:30 hs, no 'Parque Pablo Iglesias' de Ferrol, por un outro modelo de saneamento e contra a construción, no mesmo parque público, dun mal chamado "tanque de tormentas" e polo saneamento integral da Ría de Ferrol. Acto convocado pola Comisión de Medio Ambiente da Asociación Veciñal de Recimil, ademais das entidades ADEGA, a SGHN, Verdegaia.
As organizacións ecoloxistas e a veciñal demandan outra localización para o "tanque de tormentas",  cuxas obras está previsto que inicien antes de que remate o presente mes de Setembro. Pretende-se e abrir un debate sobre o modelo de saneamento que queremos para a nosa Ría baixo o lema “Saneamento sí, mais non así”.

Acto que se celebrará no Parque, cunha conferencia na que disertará o arquitecto urbanista Xosé Allegue,  recital de poesía con Karloti, ... e musica e cancións con Manolo Bacalhau, ...

Enlaces relacionados de Interese:

Sitio na Rede, de información e documentación, para apoiar e facilitar, a loita e o traballo social que procura que o Sistema de Saneamento, nas marxes da Ría de Ferrol, sexa Integral. Saneamento si, mais non así!!!

http://ria-de-ferrol.blogspot.com.es/

O noso 'Informe' >>> Análise crítico do Proxecto de Saneamento acordado, polo Goberno, para a marxe norte da Ría de Ferrol | ALTERNATIVA ELABORADA POLA COMISIÓN DE SEGUIMENTO - GRUPO DE TRABALLO.

http://alternativa-proxecto-saneamento.blogspot.com.es/

________________

Foi a concentración no 'Parque Pablo Iglesias' de Ferrol, por un outro modelo de saneamento e contra a construción, no mesmo parque público, do mal chamado "tanque de tormentas" - Polo saneamento integral da Ría de Ferrol - Vídeos, fotos e enlaces de interese

Moitas persoas acudiron á chamada das organizacións ecoloxistas e veciñais concentrando-se nun moi concorrido 'Parque Pablo Iglesias'. Parque público onde está previsto construír un mal chamado "tanque de tormentas". Chema Hernández Roca, membro da Comisión de Medio Ambiente da Asociación Veciñal de Recimil, leu un comunicado consensuado polos colectivos convocantes (Escoitar nos vídeos). Ademais das entidades ADEGA, a SGHN, Verdegaia e a xa mencionada entidade veciñal, participaron na concentración veciñas e veciñas usuarias do parque, diferentes activistas de asociacións culturais, sindicais e do movimento social de Ferrol Terra; políticos de dous dos grupos municipais da oposición (BNG e EU) que fixeron expreso o apoio ás demandas da concentración; tamén apoiaron outros partidos como Equo Galicia, Espazo Ecosocialista Galego e mesmo ANOVA que contou co deputado de AGE Antón Sánchez. A concentración, deste martes, 17 de Setembro de 2013, reivindicou a paralización da construción do "tanque de tormentas" cuxas obras se ten previsto iniciar antes de que remate o presente mes, e abrir un debate sobre o modelo de saneamento que queremos para a nosa Ría baixo o lema “Saneamento sí, mais non así”.

Ao final do acto anunciaron-se outros actos como o do vindeiro Sábado 21 de Setembro, no mesmo Parque Pablo Iglesias, unha actividade reivindicativa (conferencia, concerto, recital de poesía, teatro...) e na segunda quincena de Outubro unhas Xornadas nas que se traten os aspectos técnicos, lexislativos  e ambientais, co fin de axudar á cidadanía a entender o modelo de saneamento da Ría así como os seus inconvenientes e facer propostas que contemplen outro modelo de tratamento.

O vindeiro Xoves, 18 de Sembro,  vai ter lugar unha Xuntanza da Comisión de Seguimento - Grupo de Traballo. Será ás 20:30hs, no barrio de Recimil, frente ao nº6 da rúa Euzkadi, nun local da asociación veciñal. Esta será a segunda sesión da Comisión que queda aberta a novas incorporacións.


http://www.youtube.com/watch?v=pYTVlVwlB5k&feature=share&list=UUEsyIpC9Y8SoVla3A-qmvlw

http://youtu.be/JoThnPHvxM4

http://youtu.be/_-UcVGTT0yk
Enlaces relacionados de Interese:

Sitio na Rede, de información e documentación, para apoiar e facilitar, a loita e o traballo social que procura que o Sistema de Saneamento, nas marxes da Ría de Ferrol, sexa Integral. Saneamento si, mais non así!!!

http://ria-de-ferrol.blogspot.com.es/

O noso 'Informe' >>> Análise crítico do Proxecto de Saneamento acordado, polo Goberno, para a marxe norte da Ría de Ferrol | ALTERNATIVA ELABORADA POLA COMISIÓN DE SEGUIMENTO - GRUPO DE TRABALLO.

http://alternativa-proxecto-saneamento.blogspot.com.es/

________________

O Sistema de Saneamento da Ría de Ferrol - O vindeiro Martes 3 de Setembro, terá lugar unha Asamblea Cidadán Aberta, de información e debate

O saneamento da Ría de Ferrol que non hai que confundir coa súa recuperación integral, xa que o saneamento é só un paso previo á mesma, non só é unha obriga moral coa natureza; unha débeda coa auga, a terra e o mar que nos dá a vida e benestar; unha necesidade para a nosa saúde e a do resto dos seres vivos, senón que tamén é unha obriga legal. As leis e as directivas europeas esixen-no e deron prazos concretos, sempre incumpridos pola mala administración. Hai máis de 15 anos que o sistema de saneamento tiña que estar a pleno funcionamento (remataba o prazo o 31 de Decembro de 1998).

Trala visita, fai máis de seis meses, dunha delegación de eurodiputad@s para comprobar in situ a situación das rías galegas, e tendo pactado non incluír no informe a Ría Ferrol, deron-se conta de que non tiñan mais remedio que informar da grave contaminación da zona. Isto causo unha grande controversia na Comisión de Peticións do Parlamento Europeo, que despois de varios adiamentos aínda a día de hoxe non consensuaron os dous informes emitidos, polo que quedou aprazada a súa votación sine die , por presións do Partido Popular que prefire seguir ocultando a grave situación que vivimos.

O problema é tan evidente que xa existe unha consciencia colectiva de que a situación da Ría de Ferrol é insostíbel e que require dunha recuperación integral. A contaminación da Ría afecta de xeito directo á saúde das persoas, pois consumen-se peixes e mariscos que se extraen a diario e mesmo hai moita xente que se baña nas praias, aínda que estexan clasificadas non aptas para o baño (e a calidade das augas sexa insuficiente). Tamén afecta a todos os seres vivos tanto mariños como da contorna terrestre, e como non, é a ameaza que pende sobre os centos de postos de traballo que dependen do sector marisqueiro.

Na actualidade a Ría é un sumidoiro e un vertedoiro onde botamos de todo (residuos urbanos, verquidos incontrolados, refugallos industriais, ...). As organizacións ecoloxistas veñen demandando, dende que existen, unha recuperación integral da Ría e polo tanto un sistema de tratamento integral das augas pluviais e residuais que permita a recuperación das augas pluviais non contaminadas, para usos de utilidade pública ou para a súa chegada natural á Ría. Demandan un sistema de saneamento integral, pois a Ría non permite un verquido máis. A Ría esta declarada como 'zona sensíbel' que require un tratamento especial e o grado máis alto de depuración. Non é de recibo pois, que o Sistema de Saneamento previsto contemple verquidos contaminados de forma sistemática e non só como algo extraordinario, por forza maior.

O sistema de saneamento da marxe esquerda (Sur) da Ría, está practicamente terminado. O da marxe dereita (Norte) que vai desde Xuvia (Neda), pasando polos concellos de Narón e Ferrol, até Prioriño Chico, leva moito tempo conformando-se. Xa están construídos: o emisario terrestre A Malata - EDAR de Cabo Prioriño, cruce e impulsión da Malata, e o EDAR e emisario submarino de Cabo Prioriño. Mais  apenas deron comezo as obras, denominadas "interceptores xerais da marxe dereita da ría de Ferrol", de reparación e construción de colectores e inicio de construción dalgúns tanques de tormenta, .... Prevé-se máis de tres anos de obras segundo consta no 'Pliego de Prescripcións Técnicas' e no 'Pliego Cont... Execución Obras...'.

Non se pode entender que se, aproximadamente o 80% das edificacións en Ferrol teñen feita a separación de augas residuais das pluviais, como así ordena o PXOM vixente (Art. 178. Rede de saneamento), e mesmo que haxa pouco tempo que rematou unha actuación de case 4 millóns de euros para sanear e recuperar uns tramos dos ríos do Tronco e Inxerto, entre outras actuacións, separando as augas pluviais das residuais,  este novo proxecto de sistema de saneamento, non contemple este grande esforzo económico e medio ambiental, feito pola cidadanía de Ferrol. O modelo que se decidiu construír é o sistema de saneamento unitario, descartando o máis sustentábel: o sistema separativo.

A voz crítica ante este proxecto deu-na un colectivo veciñal que vive nas inmediacións do Parque Público 'Pablo Iglesias' e que son usuarios habituais do mesmo. Decataron-se do ilóxico da construción dun enorme 'tanque de tormentas' -o Esteiro 2, no mesmo parque público (moi concorrido), cando podía ser instalado perfectamente ao lado do Esteiro-1, que está previsto construír pola parte de fóra do recinto militar, mesmo á beira da porta do almacén de subministros da armada (dentro do recinto militar hai espazo máis que suficiente onde pode ser instalado). Ante a negativa do concello e a empresa acuaNorte de contemplar outra posibilidade de localización do 'tanque' que non fose o parque, a veciñanza comezou a mobilizar-se e investigar sobre o sistema de saneamento proxectado, detectando un sistema non conforme cos expectativas de saneamento integral da Ría, que vai verquer sistematicamente augas contaminadas,  cunha manutención moi custosa, que non contempla a separación de augas pluviais das residuais, non sustentábel e en poucos anos obsoleto.

Por todo o exposto, as organizacións Sociedade Galega de Historia Natural -SGHN, a Asociación para a Defensa Ecolóxica de Galiza -Adega, e a Asociación Ecopacifista Galega Verdegaia -Verdegaia, xunto  ao Colectivo Veciñal Opositor ao 'Tanque de Tormentas' no parque público 'Pablo Iglesias', e a comisión de Medio Ambiente da Asociación Veciñal de Recimil, decidiron convocar, para o vindeiro martes  3 de Setembro ás 19:30hs unha Asemblea Cidadá Aberta, de información e debate, para tratar o proxecto de saneamento que se está levando acabo na Ría de Ferrol. A Asemblea terá lugar no Centro Cultural Carvalho Calero, do Inferniño.

__________

Choiva de Estrelas Perseidas: este Domingo 11 de Agosto de 2013, en Esmelle, ás 10 da noite, coa SGHN e a Asociación veciñal

[Clicar acima da imaxe para ampliar]

O vindeiro domingo día 11 de agosto ás 22:00 h a SGHN na colaboración coa Asociación de Veciños de Esmelle, organiza na Praia de Esmelle a tradicional observación da Choiva de Estrelas Perseidas (Bágoas de San Lourenzo).

Durante un curto período de tempo, poderemos ver aos planetas Venus e Saturno, todo iso si as condicións meteorolóxicas permíteno.

Prégase levar roupa de abrigo así algo para poder tumbarse e mirar o ceo.

Astronómia e contaminación lumínica da SGHN Ferrol

Sociedade Galega de Historia Natural
Desde 1973 estudando, divulgando e defendendo o medio natural galego
Delegación de Ferrol
Apartado de Correos n1 356 ; 15480 FERROL (A Coruña)
Tfno. (24 horas) e fax 981 35 28 20 mobil 616 388 935
web: http://www.sghn.org
correo-e: ferrol@sghn.org
Blog da Delegación de Ferrol:
http://sghnferrol.blogspot.com
_________________________

Enlaces relacionados:

• International Meteor Organization
• Canal de Video Astronociencia
• Asociación Astronómica de Vigo (Pontevedra).
• Agrupación Astronómica Ío (A Coruña).
• Agrupación Astronómica Rías Baixas (Pontevedra).
• Asociación Animacción (Ourense).
• Asociación de Divulgación Científica Ourense Astronómico(Ourense).
• Asociación Astronómica Cielo Barbanza (A Coruña).
• Asociación Astronómica Sirio (Pontevedra).
• Clube Compostelán Vega de Astronomía (A Coruña).
• Asociación Astronómica Cova da Serpe (Lugo).
• Taller de Astronomía da Asociación Cultural Foula (Ourense).
• Astronomía na Beirarrúa (USC-Clube Vega).
• Asociación Astronómica de Ourense (Ourense).
• Observatorio Astronómico Ramón María Aller da USC (Santiago de Compostela).
• Sociedad de Observadores de Meteoros y Cometas de España
• Astrogaliza 2009 -Desenvolvera-se entre o 18 e 20 de Setembro en Maceda-

______________________________