Amosando publicacións coa etiqueta Eleccións Locais 2019. Amosar todas as publicacións
Amosando publicacións coa etiqueta Eleccións Locais 2019. Amosar todas as publicacións

mércores, xuño 05, 2019

Comunicado da Executiva Nacional do BNG sobre as eleccións municipais e europeas do 26 de maio


En relación ao escenario aberto tras as eleccións do 26 de maio a Executiva Nacional do BNG fai as seguintes consideracións:

1.- O resultado das eleccións municipais confirma o avance social do BNG, consolidada ao Bloque como terceira forza política no ámbito municipal cunha sólida implantación territorial e sáldase con representación en todas as corporacións das grandes cidades galegas e coa alcaldía de Pontevedra.

2.- O incremento á alza trasládase tamén aos resultados das eleccións europeas, nas que se duplica o número de apoios nun notable avance que sitúa ao BNG como terceira forza política en Galiza tamén no ámbito europeo.

3.- O escenario postelectoral deixa un escenario aberto en moitos concellos e deputacións. Dixémolo en campaña e reafirmámolo agora: imos traballar para evitar gobernos da dereita.

4.- O BNG tomará as decisións sobre os pactos avaliando caso a caso e nesa toma de decisións será clave o papel da militancia a través das asembleas locais.

En todo caso, calquera acordo se formulará en base a criterios programáticos que permitan darlle á veciñanza gobernos transformadores, en clave de país, que aposten por un modelo municipal no que se teñan en conta cuestións como a mobilidade, a sustentabilidade, as políticas sociais e de igualdade, a defensa da economía local e de proximidade ou o apoio a lingua e a cultura do país.

5.- O BNG é unha forza política cun programa xenuíno, non homologable ás forzas de ámbito estatal, e imos traballar desde os concellos, -ben na oposición, ben no goberno-, para facer avanzar o proxecto de país que temos para Galiza e que, tamén se constrúe cun avance do BNG nas vilas e cidades.

6.- En relación ás deputacións, o BNG aposta por unha reflexión demorada sobre o noso papel nestas institucións e facer unha avaliación do resultados dos pactos de cogoberno destes catro anos. En todo caso, de cara ao futuro, salientar que calquera acordo estará guiado polo criterio de baleirado competencial destas institucións, -un horizonte no que hai que camiñar-, pola eliminación de calquera amiguismo e caciquismo, garantido o seu funcionamento democrático e o trato igualitario a todos os concellos.

7.- O BNG vai abrir un espazo de diálogo para evitar gobernos de dereita e poder levar a cabo políticas realmente transformadores.

8.- A Executiva nacional volve trasladar o seu recoñecemento a toda a militancia e simpatizantes, candidatos e candidatas polo seu traballo. O mellor do BNG é unha militancia activa, que actúa con xenerosidade e cun único interese: fortalecer a presenza do nacionalismo galego para ofrecer un horizonte de esperanza para este país.

Compostela, 29 de maio de 2019

Executiva Nacional do BNG

Bloque Nacionalista Galego
Avda. Rodríguez de Viguri, 16 baixo
15703 - Santiago de Compostela - GALIZA
Correo: sedenacional@bng.gal
Teléfono: 981555850
Web: https://www.bng.gal/

Enviado por:
Inácio GZ
-inaciogz@gmail.com-
5 de junho de 2019 08:10

____________

xoves, maio 30, 2019

O ‘sorpasso’ en votos do BNG ao PP abre a porta ao primeiro goberno de esquerdas en Barreiros - Ana Ermida, nº1 da candidatura: 'A sensación é de alivio e liberdade por rachar con tantos anos da dereita en Barreiros'

Ana Ermida nº1 da cabndidatura do BNG, a máis votada no concello de Barreiros (A Mariña). AXM

Candidatura do BNG de Barreiros, liderada por Ana Ermida. AXM

O ‘sorpasso’ en votos do BNG ao PP abre a porta ao primeiro goberno de esquerdas en Barreiros. |
Os nacionalistas empatan a cinco concelleiros cos populares e o PSOE obtén un edil.

Barreiros deparou a gran sorpresa das eleccións municipais 2019 na Mariña Lucense co empate a cinco edís entre o Bloque Nacionalista Galego (BNG) e o Partido Popular (PP). A candidatura nacionalista, liderada por Ana Ermida, superou aos populares como a forza máis votada con 941 votos (46,47%), o que lle outorgará a posibilidade de formar un executivo de esquerdas por primeira vez en toda a democracia.

O PP de Alfonso Fuente Parga, alcalde desde 2005, obtivo 877 apoios, o 43,31% do escrutado, mentres que o PSdeG-PSOE de Carmen Veiga sumou 178 para acadar un edil. Unha coalición de esquerdas podería poñer fin a unha etapa de mandatos conservadores que duraba desde 1979, con Manuel Díaz Sampedro, Luis Fraga Leiro e o propio Fuente Parga.

RESPONDEREMOS AO APOIO

A líder da lista do BNG barreirense agradeceu o apoio dos votantes. “Aínda nos costa crelo, puxemos moito esforzo e moitas ganas neste proxecto e ser a primeira forza é algo impresionante. A sensación é de ilusión e de ganas e responderemos a este respaldo da cidadanía”, concluíu Ermida.


“A sensación é de alivio e liberdade por rachar con tantos anos da dereita en Barreiros”. | Ana Ermida, do BNG, será a alcaldesa do municipio barreirense despois da vitoria dos nacionalistas nas eleccións municipais do pasado domingo.

Ana Ermida (Barreiros, 1983) ten unha leve afonía, probablemente produto da campaña electoral e tamén da celebración dun fito histórico: por primeira vez, o Bloque Nacionalista Galego (BNG), a candidatura que liderou, gobernará o municipio barreirense, poñendo fin así a mandatos conservadores desde as primeiras eleccións municipais trala ditadura, no 1979.

Como está despois da vitoria deste domingo?


Aterrizando (risas). Estamos recibindo moitas chamadas para felicitarnos, xente que pola rúa nos dá a noraboa. Isto danos moito ánimo, ilusión para o que temos por diante.

Barreiros terá por primeira vez un goberno de esquerdas desde 1979. Imaxino que haberá xente maior que non coñeceu máis ca primeiro a ditadura e despois executivos de dereitas no municipio. Que lles di a xente?


Pois creo que a sensación xeral é de alivio, dunha certa liberdade. Rachamos co que case poderiamos chamar unha tradición. Vai haber un cambio total: haberá un goberno de esquerda, nacionalista e cunha muller á fronte.

“vai haber un cambio total: haberá un goberno de esquerdas, nacionalista e cunha muller á fronte”

No 2015, a primeira vez que se presentou como candidata, quitou 699 votos (catro edís), por 377 de 2011 (dous). Agora alcanzou os 941, para sumar cinco actas. Cando se deu conta de que o BNG podía alcanzar o goberno?

Pois a verdade é que eu non o crin ata que se pechou o escrutinio, mesmo agora me custa crermo. É certo que viñamos nun ritmo ascendente e que fixemos un traballo importante ao longo dos anos, cun grupo de xente plural e diverso, que traballa moitísimo, con xente nova e con moita ilusión.

Creo que a campaña foi determinante, porque foi limpa e dinámica, falamos de nós e do que tiñamos que ofrecer aos barreirenses, sen entrar en descualificacións. E conforme avanzaron os meses si que percibimos un aire distinto, xente que de súpeto non tiña medo de posicionarse.

“a campaña foi limpa, centrámonos no programa e creo que iso foi determinante. de súpeto, a xente non tiña medo de posicionarse”

Foi a primeira candidata en anunciarse da Mariña Lucense e quizais unha das máis madrugadoras de Galicia.

Si, en xullo. Queriamos demostrar que había un proxecto definido, cunha cabeza visible, preocupado só en chegar á xente. Tentamos levalo á veciñanza polas parroquias e creo que fixemos o que tiñamos que facer; ser positivos, falar do noso programa e dunha serie de medidas para sacalas adiante. Creo que a xente percibiunos como unha alternativa real.

Como interpreta o resultado e que cre que é o prioritario en Barreiros?


Interpretamos que os barreirenses votaron a favor dun cambio da maneira de facer as cousas. Cremos que ese voto tivo que ver co noso traballo por estar en contacto permanente coa veciñanza e por iso adquirimos un compromiso de goberno de que a cidadanía teña a súa participación na política e que estea enterada de como e por que se fan as cousas, de que haxa un executivo transparente. Queremos levar a cabo unha auditoría das contas municipais para que todo o mundo saiba o que hai e tamén para nós, para saber de que partimos.

“queremos transparencia. faremos unha auditoría de contas para mostrarlle á veciñanza de onde partimos”

Por outra parte, aspiramos a gobernar cunha planificación que teña en conta os recursos cos que contamos. Non estamos para un ano senón para catro, polo que hai que facer un plan a medio prazo. Queremos ser un punto e aparte do que se fixo ata agora.

Falaba antes da súa condición de muller. Foron poucas as candidatas na Mariña Lucense nestas eleccións xerais.

Isto é importante para que a sociedade confíe cada vez máis en nós e tamén para que se goberne cun punto de vista diferente, máis feminino. Somos a metade da poboación e tradicionalmente fomos esquecidas. Hai que dar voz e representación a quen non a ten, penso tamén nas persoas maiores. Ogallá algún día non falemos disto e ser alcaldesa entre dentro dunha normalidade, pero por agora lamentablemente segue a ser unha nova.

Imaxino que, para unha estabilidade de goberno, buscarán un pacto co PSOE barreirense, que sumou un edil. Xa conversou con Carmen Veiga, a edil socialista?

Aínda é cedo para conversar con outros partidos porque nin sequera conversamos entre nós (risas). Por suposto queremos un goberno estable, e temos o compromiso de responder á confianza maioritaria da cidadanía cun executivo que respecte e leve adiante o programa que se lle ofreceu aos votantes.

“ogallá os resultados do bloque dean confianza á nosa xente. penso que gañamos en credibilidade cada día”

Tamén é a responsable comarcal do Bloque. Que valoración fai dos resultados?

As eleccións serían positivas aínda que non se desen resultados coma os desta vez polo traballo da nosa xente. Temos persoas que traballaron arreo durante a campaña para cambiar as cousas. Obviamente, os resultados son bos, gañamos unha alcaldía que non tiñamos e mantemos a de Ribadeo. Subimos en moitos concellos e é posible que entremos en gobernos de coalición.

Penso que demostramos que onde gobernamos, facémolo ben. Temos un exemplo ao lado. Cada día gañamos en credibilidade e creo que a xente nos ve xa como unha alternativa real para gobernar. Ogallá que este apoio lle dea confianza á nosa xente para seguir.

Resultados Eleccións Locais 2019 en Barreiros. | Acceder.

Publicado no Xornal da Mariña. | Para a entrevista:  Ramón González Rey. | 26 e 27 de maio de 2019. | Xornal da Mariña é o primeiro gran xornal dixital en galego do norte da provincia de Lugo e comarcas do Eo.
______________

martes, maio 28, 2019

LiGanDo e a valoración dos resultados electorais deste 26M


VALORACIÓN DOS RESULTADOS ELECTORAIS

LiGanDo - LGD fai unha valoración negativa dos resultados obtidos na cidade de Ferrol así como os da coalición electoral Xuntos por Miño. Entendemos que na cidade de Ferrol non fomos capaces de converter a simpatía pola nosa organización en votos e sendo certo que parte da prensa ocultou a nosa existencia, tamén o é que esa ocultación foi amplamente contrarrestada nos debates, charlas, mitins e no porta a porta. a pesar dos resultados non pensamos que a nosa participación teña sido un erro, mais ben todo o contrario xa que foron centos, cicais varios miles de persoas os que por primeira vez souberon da existencia da nosa organización así como dos principios ideolóxicos polos que nos movemos no nos traballo diario: Decrecemento e Arredismo.

En Miño pagamos con creces o desexo manifesto da maioría de electores de mandar á oposición ao PP. O acordo de goberno con este partido non foi entendido aínda que durante estes 4 anos se fixo unha moi boa xestión. Este desexo de mandar á oposición ao PP non é exclusivo de Miño senón que é un fenómeno de ámbito galego do que se está beneficiando de xeito moi importante o PSOE. A negativa do PSOE a falar de acordos en pé de igualdade con outras candidaturas deulle en Miño os seus mellores resultados da democracia. Este fenómeno que empezou nas últimas eleccións xerais indica un cambio de goberno na Xunta, mais non debemos esquecer os fortes cambios electorais que se producen en poucos meses.

Outro elemento que xogou a nosa contra en Ferrol foi basear a centralidade do noso discurso en aspectos (medio-ambiente -cambio climático e contaminación-, política dos coidados, crise enerxética mundial, feminismo, R do Decrecemento ...) que non forman parte do discurso dos grandes partidos porque as liñas do seu pensamento e discurso (o crecemento e a solución) seguen a ser as mesmas que as do século XX. Este feito de ter axendas de debate diferente as dos grandes partidos ocultou as nosas propostas nos debates que participamos e nas entrevistas que nos realizaron.

Estamos seguros que todas as persoas que repararon en nós e que non chegaron a comprender os fundamentos da nosa mensaxe se van atopar nos próximos meses, como moito anos cunha realidade climática (mudanza climática) e enerxética (prezo da electricidade e o petróleo) mundial que os vai facer despertar da falsa realidade na que vivimos que non é outra que a falacia do crecemento continuo nun planeta de recursos limitados como o xeito de solucionar os problemas.

Con respecto ao futuro dicir que a campaña nos permitiu fortalecer a nosa organización, o cal valoramos moi positivamente. Imos seguir traballando en Ferrolterra con mais forza que o viñemos facendo ate o de agora con propostas, comunicados, conferencias, ... O noso obxectivo non son, estritamente as eleccións, mais entendemos que son un bon campo de xogo para facer chegar a nosa mensaxe a un número moi importante de persoas. É por isto que para dentro de catro anos a nosa pretensión, actual, non é só repetir nos concellos que participamos neste proceso electorais, senón incrementar o número de candidaturas xa que entendemos que a situación política, enerxética e medio ambiental global que se vai producir durante os 4 anos desta lexislatura vai facilitar a comprensión do noso discurso.

Miguel Anxo Abraira

Voceiro Nacional de LiGanDo.

Enviado por:
LiGanDo Lgd
-ligando.lgd@gmail.com-
27 de maio de 2019 19:15

____________

luns, maio 27, 2019

O BNG de Ferrol extrae cando menos tres conclusións ou ideas do resultado das pasadas Eleccións Locais


Do resultado das últimas eleccións municipais, o BNG de Ferrol extrae cando menos tres conclusións ou ideas. A primeira é que pese á tan comentada disgregación e atomización da política ferrolá, supostamente sumida no caos, a realidade difire moito das análises que de maneira reiterada se teñen feito nas semanas e meses previos á cita electoral e Ferrol contará na próxima corporación municipal, co panorama político máis simplificado das últimas décadas.

A segunda ten que ver co feito de que neste contexto, o BNG de Ferrol afianzou un proxecto político que, compartido ou non, é único e claramente diferenciado do resto de opcións que estarán presentes na próxima corporación municipal e que, pese as dificultades, é preciso que nos próximos anos avance de maneira substancial.

A terceira idea ten que ver coa distribución de concelleiros e concelleiras na próxima corporación. Neste senso é evidente que debe ser o PSOE o que estableza primeiro cales son as liñas estratéxicas para o futuro político desta cidade resepcto de temas que son transcendentais desde todos os puntos de vista, económicos, urbanos e sociais. E, tendo definido os trazos do que debe ser o futuro da cidade, constrúa o vindeiro goberno local do mellor xeito posible para adaptalo e levar adiante os obxectivos marcados, tendo en conta as liñas estratéxicas definidas.

Ferrol, 27 de maio de 2019.


Ferrol | Web | Facebook | Twitter.
Local Electoral BNG
Rúa Galiano, 66 Baixo.





Enviado por:
BNG Ferrol
-bngferrol@gmail.com-
27 de maio de 2019 17:41

________________

Resultados Eleccións Locais do 26 de maio de 2019 - Ferrol e Comarcas (Ferrolterra, Eume e Ortegal)

Resultados en Ferrol

Resultados en Narón
Resultados en Fene

Resultados Eleccións Locais do 26 de maio de 2019 - Ferrol e Comarcas

Enlace á Web do ministerio de Interior.


FERROLTERRA

ARES

CEDEIRA

FENE

FERROL

MOECHE

MUGARDOS

NARÓN

NEDA

SAN SADURNIÑO

AS SOMOZAS

VALDOVIÑO


EUME

CABANAS

A CAPELA

MONFERO

PONTEDEUME

AS PONTES

ORTEGAL

CERDIDO

MAÑÓN

ORTIGUEIRA

CARIÑO

Resultados na Galiza. Acceder.

___________

venres, maio 24, 2019

O BNG de Ferrol rematou hoxe a campaña electoral nun acto público en Caranza no que interviu o candidato á alcaldía, Iván Rivas, e no que estivo acompañado por membros da súa lista así como por simpatizantes e veciñas e veciños da cidade

Foto do Acto Central do pasado 22 de maio no Teatro Jofre de Ferrol
Ana Pontón, Iván Rivas, Ana Miranda e María do Mar López
O BNG DE FERROL PECHOU HOXE A CAMPAÑA ELECTORAL CUN ACTO PÚBLICO NO BARRIO DE CARANZA

O BNG de Ferrol rematou hoxe a campaña electoral nun acto público en Caranza no que interviu o candidato á alcaldía, Iván Rivas, e no que estivo acompañado por membros da súa lista así como por simpatizantes e veciñas e veciños da cidade.

Rivas incidiu durante a súa intervención na importancia de acudir este domingo ás urnas e confiar no BNG, a única alternativa real para mudar a cidade. Neste senso, o nacionalista afirmou que moitos dos candidatos que se presentan e que afirman que na política local importan máis as persoas que os partidos xa tiveron a oportunidade de gobernar a cidade e o resultado está á vista. “O Sr. Suárez e o Sr. Rey Varela son os dous últimos alcaldes da cidade a e o Sr. Mato foi concelleiro de urbanismo no anterior goberno socialista. Inclusive o Sr. Langtry tivo as competencias da concellería de Facenda durante o mandato do señor Varela, polo que o que poden agardar xa o sabedes”, indicou Rivas.

O candidato á alcaldía afirmou que xa é hora de rematar cos privilexios que teñen uns poucos a costa do esforzo da maioría dos veciños e veciñas da cidade. “En Ferrol non somos todos iguais, administracións públicas como o Mº de Defensa, a Autoridade Portuaria e Navantia non pagan os tributos que pagamos os demais, as transnacionais enchen o seu bandullo cos nosos cartos xestionando os servizos básicos privatizados como a auga ou o lixo e o resto do noso aforro vai directo aos bancos mentres a cidade cae”, apuntou Rivas.

O candidato a Alcaldía insistiu ademais na necesidade de gastar o diñeiro dos e das ferrolás, nos e nas ferrolás, en investimentos e prestación de servizos abandonando a dinámica económica dos últimos anos nos que os diferentes gobernos locais decidiron acumular inxentes cantidades de diñeiro nas arcas municipais en forma de superávit que despois tivo como destino aos bancos mentres a cidade se derrubaba.

Para o BNG, o futuro da cidade debe ir encamiñado á rehabilitación e recuperación de espazos fronte a proxectos e políticas especulativas como as que se pretenden desenvolver no Sánchez Aguilera. “Cómpre derrubar os muros físicos pero tamén mentais que nos impiden ver a realidade do que necesita esta cidade. Ferrol ten o 20% de vivendas baleiras, polo que o prioritario é rehabilitar mellorando a habitabilidade e illamento das vivendas así como recuperar a cidade para a xente. Os peóns deben tomar as rúas para camiñar polas zonas céntricas e evitar o uso de automóbiles particulares”, afirmou.

Ferrol, 24 de maio de 2019.

En Europa:

#AgoraRepublicas #AgoraBNG #AgoraAnaMiranda

Coas Ideas Claras
http://ideasclaras.bng.gal/

Ferrol | Web | Facebook | Twitter.
#AgoraGaliza
#AgoraBNG
#Agora Ferrol
Local Electoral BNG Ferrol
Rúa Galiano, 66 Baixo.
BNG

Enviado por:
BNG Ferrol
-bngferrol@gmail.com-
24 de maio de 2019 16:23

_______________

xoves, maio 23, 2019

O BNG de Ferrol desenvolveu un acto público na asociación veciñal de Mandiá, un acto no que interviron Tania Rei, Roberto Montero e Iván Rivas - E o venres 24 de maio, terá lugar o Acto público de peche de campaña no 'Galicia de Caranza', coa participación de Iván Rivas


AXENDA DO BNG DE FERROL PARA O 24 DE MAIO

Ás 20:00 horas do venres 24 de maio, terá lugar o Acto público de peche de campaña no "Galicia de Caranza" coa participación de Iván Rivas.


O BNG DE FERROL INCIDIU NA IMPORTANCIA DO RURAL NO ACTO PÚBLICO DE MANDIÁ

O BNG de Ferrol desenvolveu hoxe un acto público na asociación de veciños e veciñas de Mandiá, un acto no que interviron Tania Rei, Roberto Montero e Iván Rivas.

O candidato á alcaldía fixo referencia durante a súa intervención á importancia do medio rural en Ferrol. Para o BNG é fundamental recuperar os terreos en desuso que existen no concello para desenvolver o sector primario na cidade con hortas e espazos de cultivo que ademais permitirán o acceso a produtos alimentarios de calidade.

Nesta cidade temos espazos abandonados cun alto valor produtivo que compre recuperar, coma o Val de Esmelle, que poderían servir de base para desenvolver unha agricultura a pequena escala que fornecese aos veciños e veciñas de produtos alimentarios de calidade, así como as hortas urbanas, que xa agora mesmo se están a desenvolver pero con ningún apoio público. O concello debe servir de intermediario entre os propietarios e propietarias dos terreos e as persoas dispostas a traballar nestes espazos da zona rural e dispoñendo ademais unha mínima infraestrutura e os medios e ferramentas necesarias para desenvolver entres traballos.

Todo isto contribuiría ademais á xeración de emprego, unha das grandes necesidades de Ferrol.

Rivas incidiu ademáis na importancia de contar cun plan forestal para converter Ferrol nun Concello libre de eucaliptos. Cómpre asumir como necesidade e como prioridade básica o desenvolvemento dun plan forestal que teña como obxectivo a recuperación dos montes de carácter municipal con especies autóctonas, a protección de espazos singulares como Menáncaro e axudas a particulares para a substitución do eucalipto.

Ferrol, 23 de maio de 2019.

#AgoraEuropa #AgoraRepublicas #AgoraBNG
Coas Ideas Claras
http://ideasclaras.bng.gal/

Ferrol | Web | Facebook | Twitter.
#AgoraGaliza
#AgoraBNG
#Agora Ferrol
Local Electoral BNG Ferrol
Rúa Galiano, 66 Baixo.
BNG

Enviado por:
BNG Ferrol
-bngferrol@gmail.com-
23 de maio de 2019 17:27
__________