A Xustiza condena á Xunta por negarlle a Adega o acceso a expedientes sancionadores sobre plantacións ilegais de eucaliptos - #Deseucaliptización

A Xustiza condena á Xunta por negarlle a ADEGA o acceso a expedientes sancionadores sobre plantacións ilegais

O Tribunal Superior de Xustiza de Galiza (TSXG) vén de ratificar a sentenza do Xulgado contencioso-administrativo nº 2 de Lugo polo que se admite a demanda de ADEGA contra a resolución da Consellaría de Medio Rural que denega á asociación ecoloxista ser parte interesada en dous procedementos sancionadores relativos a plantacións ilegais de eucaliptos no concello de Begonte.

Con este fallo, contra o que xa non cabe recurso, ADEGA consegue de novo vencer nos tribunais a pretensión da Administración pública de dificultar o acceso á información contida en expedientes administrativos que afectan directa ou indirectamente ao medio ambiente galego. O TSXG desestima o recurso de apelación presentado pola Consellaría de Medio Rural contra o fallo do xulgado contencioso-administrativo de Lugo que admite a demanda de ADEGA e obriga á Xunta a facilitarlle a esta entidade -nun período improrrogable de un mes desde que a sentenza sexa firme- a información contida en dous expedientes sancionadores incoados por corta de árbores autóctonas e posterior plantación ilegal con eucaliptos, feitos que foron denunciados por ADEGA no ano 2017.

O fallo do TSXG é especialmente relevante por canto confirma que ADEGA está totalmente lexitimada para ostentar a condición de interesada en todos aqueles expedientes sancionadores que teñan a ver con plantacións ilegais e, por extensión, con todos aqueles “feitos que comprometan directa ou indirectamente o medio ambiente”. Acadaría a condición de interesada en virtude da aplicación do réxime xurídico específico de acceso e participación pública e acceso á xustiza en materia ambiental derivado do Convenio Aarhus de 1998, ratificado polo Estado español en 2004, e regulado dous anos despois a través da Lei 27/2006. Esta normativa permite ás entidades sen ánimo de lucro que cumpran os requirimentos establecidos nos artigo 23 da devandita lei a “recorrer omisións imputables ás autoridades públicas que vulneren as normas relacionadas co Medio Ambiente” e, por tanto, concédelles o dereito a persoarse tamén nos expedientes sancionadores. Así pois, segundo o TSXG, a denegación por parte da Consellaría de Medio Rural da condición de interesada a ADEGA e do acceso á información contida neses expedientes, estaría furtando de facto o dereito da entidade ecoloxista de poder “impugnar ou replicar a decisión da administración nos procedementos sancionadores, que podería ser contraria á protección do medio ambiente”, principal obxecto social de ADEGA.

O absurdo e inxustificábel argumentario da Xunta

A Xefatura Territorial de Medio Rural en Lugo, mediante escrito do 23 de marzo de 2017, fundamentaba a súa negativa de dar acceso á información solicitada pola asociación ecoloxista ADEGA ao entender que dita información non ten carácter ambiental, malia a atender aos procedementos sancionadores por dúas plantacións ilegais, engadindo que tampouco é unha información “ambientalmente relevante”. Incluso chega a cuestionar que unha plantación ilegal (neste caso de eucaliptos, tras corta tamén irregular de bosque autóctono) teña que ter necesariamente unha incidencia ambiental.

Deste xeito, a Xefatura Territorial de Medio Rural pon de manifesto a súa concepción nesgada e cativa de información ambiental, restrinxindo esta só a aquela que, ou ben afecta a espazos naturais protexidos, ou ben faga referencia a feitos que precisen do pronunciamento expreso da Consellaría de Medio Ambiente: “Esta incidencia no medio ambiente tampouco pode sosterse por non constituír a totalidade do territorio forestal desta provincia un espazo natural protexido nin ter réxime legal aplicable ao efecto”.

Así mesmo, no escrito de oposición á demanda presentado pola Xunta, a Consellaría de Medio Rural considera satisfeitos os dereitos de información de ADEGA, tras serlle indicado unicamente en que estado de tramitación se atopaban os procedementos sancionadores. Esta tese non se ve refrendada nin polo tribunal contencioso-administrativo de Lugo, nin polo TSXG, que constatan a deficiencia da existencia da figura de “satisfacción extraprocesal”, “posto que se lle pecha o paso a indagar o seu resultado -dos expedientes sancionadores- en última instancia”.

Ao mesmo tempo, Medio Rural chega a asegurar que debe prevalecer o interese do infractor fronte os dereitos do colectivo á información ambiental: “...o dereito á información ambiental ten límites e neste caso debe prevalecer o interese do procedemento sancionador que atribúe a lexitimación aos afectados directa e individualmente pola resolución sancionadora”. Porén, este argumento tamén é criticado contundentemente polos tribunais: “Non hai interese que poida primar máis que a protección do amentado ben xurídico que é o medio ambiente, porque ademais co acceso á vía administrativa e no seu caso xurisdicional non se está privando do exercicio de ningún interese ou dereito, véxase que a Administración non queda privada da súa potestade sancionadora e, polo seu lado, o suposto infractor segue podendo dirimir nel o seu dereito de defensa”.

A Xunta, mesmo advirte a ADEGA da inutilidade de acudir a instancias xudiciais, gabándose de que cando chegue o fallo, aínda sendo favorábel á demandante, os procedementos sancionadores xa estarían resoltos: “...carecerá de obxecto cando se dicte esta sentenza a atribución da legitimación que interesa á recurrente porque os expedientes xa estarán resoltos”. Porén, e malia a demora do fallo, nunca é tarde para facer valer os lexítimos dereitos de acceso e participación pública da sociedade galega nos actos administrativos que afecten ao medio ambiente, fronte a intencionalidade manifesta de ocultamento e falta de transparencia dalgunhas administracións.

Maior opacidade administrativa desde o cambio de Xefatura Territorial

A opacidade da xefatura territorial da Consellaría de Medio Rural en Lugo con respecto á tramitación das denuncias por cortas de arboredo autóctono e plantacións ilegais con eucalipto fíxose especialmente patente desde o nomeamento da alcaldesa de Triacastela, Olga Iglesias Fontal como Xefa Territorial en 2017. Desde entón, este departamento aplícalle a ADEGA por defecto o silencio administrativo diante de calquera solicitude expresa de información ou de personamento en expedientes administrativos relativos a infraccións por cortas ou plantacións ilegais efectuadas na provincia. Precisamente, foi coa súa chegada, cando se produciu a primeira denegación de admisión como parte interesada a ADEGA nos expedientes sancionadores incoados polo incumprimento da Lei de Montes de Galicia, a meirande parte deles, resultantes de denuncias presentadas por esta asociación ecoloxista. Esta negativa foi a que deu lugar ao recurso contencioso-administrativo de ADEGA cuxa sentenza favorable se vén de resolver con carácter firme no Tribunal Superior de Xustiza de Galicia.

Desde ADEGA seguiremos exercendo, a partires de agora con máis razón, o noso dereito á información ambiental fronte aos intentos dalgúns cargos públicos de coartar o acceso a este tipo de información ou de vulnerar a lexislación co ánimo de favorecer aos infractores fronte a protección do medio ambiente galego.

Descargas

✅ Sentenza TSXG desestimatoria recurso apelación Xunta 23.04.21.
✅  Sentenza estimatoria Contencioso-Administrativo Lugo 23.12.19.
✅  Notificación da XT de Lugo sobre inadmisión de ADEGA como parte interesada 27.03.2017.

#Deseucaliptización

Ferrolterra-Trasancos
adegatrasancos@adega.gal
Apartado 481
15480 Ferrol
http://adega.gal/

Enviado por:
Miguel Anjo -Delegado de Adega-Trasancos
-adegatrasancos@adega.gal-
14 de julho de 2021 11:35
_______

A delegación de Adega de Ferrolterra convida a asinar o manifesto a favor da saúde e fututo do noso monte e contra o plan forestal da Xunta, que vai implicar unha maior eucaliptización da Galiza

A delegación de Adega de Ferrolterra convida a asinar o manifesto a favor da saúde e futuro do noso monte e contra o plan forestal da Xunta, que vai implicar unha maior eucaliptización da Nosa Terra.

Asina por un novo Plan Forestal que rexeite o eucalipto

Uns 50 colectivos galegos rexeitan a revisión do PP do Plan Forestal que implicará unha maior eucaliptización do país e deixar o monte galego en mans privadas con fins unicamente produtivistas. Apoia ti tamén a nosa petición por un monte galego con futuro!: http://chng.it/FM6WNhNTXG

Consulta tamén as 10 razóns polas que debemos rexeitar a Revisión que fai o PP do Plan Forestal, e que pretende aprobar neste primeiro trimestre de ano.

Enviado por:
adegatrasancos@adega.gal
-adegatrasancos@adega.gal-
11 de fevereiro de 2021 04:29
_______

Lídia Senra pide á CE que inclúa os eucaliptos na lista de invasoras, baseándose no ditame do Comité Científico - Chama á Comisión Europea a tomar como análise de risco das especies o documento unánime aprobado pola vintena de científicos do Estado español - A eurodeputada rexistra unha pregunta parlamentaria por escrito para saber se o ente comunitario estaría agora en disposición de iniciar esta tramitación

Lídia Senra pide á CE que inclúa os eucaliptos na lista de invasoras, baseándose no ditame do Comité Científico. | Chama á Comisión Europea a tomar como análise de risco das especies o documento unánime aprobado pola vintena de científicos do Estado español. | A eurodeputada rexistra unha pregunta parlamentaria por escrito para saber se o ente comunitario estaría agora en disposición de iniciar esta tramitación.

Lídia Senra, eurodeputada galega no Parlamento Europeo, reclama á Comisión Europea (CE) que, tomando como base o ditame[1] aprobado de forma unánime polo Comité Científico de Flora e Faunas Silvestres do Estado español, inclúa os eucaliptos na lista de especies exóticas invasoras preocupantes para a Unión.
Senra rexistrou hoxe unha pregunta parlamentaria por escrito na que informa ao ente comunitario de que o Comité Científico do Estado español, órgano consultivo formado por unha vintena de científicos independentes, emitiu recentemente un ditame unánime no que conclúe que “constatados cos datos cienfíticos dispoñibles o carácter invasor das especies Eucalyptus naturalizadas no Estado, se deberían incluír no Catálogo de Especies Exóticas Invasoras todas estas especies: Eucalyptus camaldulensis, Eucalyptus globulus, Eucalyptus gomphocephala, Eucalyptus gunnii, Eucalyptus nitens e Eucalyptus sideroxylon, así como calquera outra especie deste xénero cuxo destino sexa a explotación forestal, debido ao alto risco de invasión a consecuencia das súas caracterísitcas biolóxicas, fisiolóxicas e ecolóxicas”.

Na contestación en maio do 2017 do anterior escrito[2] de Lídia Senra á CE para pedirlle que incluíra os eucaliptos na lista de invasoras europeas, a Comisión respondera que as solicitudes de inclusión de especies exóticas invasoras nesa lista podían proceder dos Estados membros ou da propia CE e que un requisito previo a unha solicitude deste tipo é que se teña efectuada unha análise de riscos. Explicaba daquela a CE que non se recibira ningunha solicitude para a inclusión das especies de eucaliptos na lista da Unión e que a CE tampouco era coñecedora de ningunha análise de risco pertinente, motivos polos cales consideraba improbables que se foran incluír os eucaliptos nesta lista. Agora, tendo en conta que hai un ditame emitido polo Comité Científico estatal, Senra considera que a CE debería volver valorar a situación. Así, a eurodeputada galega pregúntalle á Comisión se “podería estudar con detalle o citado ditame e, guiándose polas súas amplas análises e recomendacións, iniciar o procedemento para solicitar a inclusión destas especies na lista de especies exóticas invasoras preocupantes para a Unión, conforme ao disposto no artigo 4, apartado 2, do Regulamento (UE) nº 1143/2014”.

A europarlamentaria defende que é fundamental que se leve a cabo esta inclusión para poder frear os graves problemas socioambientais que xeran os eucaliptos na Galiza, onde ocupan máis de 400.000 hectáreas (a cuarta parte da superficie forestal galega). E é que os eucaliptos, ao ser un monocultivo, convirten os terreos en áreas con escasa biodiversidade; as súas raíces absorben grandes cantidades de auga impedindo la filtración de augas cara aos acuíferos, e secando pequenos regatos, fontes, etc.; ademais, ao ser prantas pirófitas favorecen os incendios forestais; traen consigo pragas e enfermidades que provocan a aplicación de insecticidas e fungicidas; e tamén é frecuente a aplicación de glifosato para diminuír a carga do sotobosque. A súa expansión provoca a desaparición de masas boscosas de elevado valor tanto ambiental como sociocultural ou patrimonial e estas problemáticas teñen sido denunciadas pola FAO (Organización das Nacións Unidas para a Alimentación e a Agricultural) en varias ocasións.

“Os motivos para que os eucaliptos sexan incluídos na lista sobran e ademais agora todas estas evidencias están refrendadas polo que é o maior organismo consultivo do Estado español para estas cuestións”, defende Senra. O Real Decreto 139/2011 de 4 de Febreiro, para o desenvolvemento do Listado de Especies Silvestres en Réximen de Protección Especial e do Catálogo Español de Especies Amenazadas, no seu Artigo 7, crea o Comité Científico como órgano consultivo para asistir ao Comité de Flora e Fauna Silvestres, as Comunidades Autónomas e ao Ministerio de Agricultura e Pesca, Alimentación e Medio Ambiente. E no 2013, cando se regulou o Catálogo Español de Especies Exóticas Invasoras, ampliáronse as funcións deste Comité Científico a este aspecto tamén. Así, en setembro do 2017, o Ministerio de Agricultura e Pesca, Alimentación e Medio Ambiente, tras a recepción dunha moción do Concello de Teo pedindo a inclusión dos eucaliptos no catálogo de invasoras, solicitou un informe do seu Comité Científico ao respecto e o Comité Científico emitiu o ditame ao que se alude. Fronte á actitude do Ministerio, que despois pedir a elaboración deste ditame e de ver o resultado decidiu obvialo totalmente e desautorizalo, omitindo todas as opinións científicas, Senra chama á CE a valoralo e tomalo como base para iniciar o proceso para a declaración dos eucaliptos como especies exóticas invasoras preocupantes na Unión.

Santiago, 19 de abril de 2018.

[1] O ditame completo pode consultarse aquí:
http://www.mapama.gob.es/es/biodiversidad/temas/conservacion-de-especies/dictamencc302017eucalyptusvariasspp_tcm30-445705.pdf

[2] Esta foi a pregunta rexistrada por Lídia Senra o ano pasado á Comisión sobre este tema:

http://www.europarl.europa.eu/sides/getAllAnswers.do?reference=E-2017-002717&language=ES

Moitas grazas pola vosa atención

Adxuntamos copia da pregunta rexistrada na Comisión Europea.


Máis información:

Oficina de Lídia Senra, Eurodeputada Galega integrada no Grupo da Esquerda Unitaria Europea/Esquerda Verde Nórdica (GUE/NGL). | Comisión de Agricultura. | Comisión de Pesca. | Asamblea Paritaria África, Caribe, Pacífico-UE. | 0034 609 845 861 .| lidia.senra@europarl.europa.eu | http://ageuropa.gal/

twitter | facebook

Enviado por:
AGEe Europa
-ageeneuropa@gmail.com-
19 de abril de 2018 13:11
________________

34 persoas de 18 colectivos diferentes de defensa do monte viaxarán ao Parlamento Europeo o 6 e 7 de decembro a proposta da eurodeputada galega Lídia Senra, onde denunciarán o desleixo da Xunta, que en conivencia cos intereses da industria celulosa, non está a protexer os xacementos arqueolóxicos Iniciativa para sensibilizar á UE da destrución de patrimonio galego que está provocando o eucalipto

Iniciativa para sensibilizar á UE da destrución de patrimonio galego que está provocando o eucalipto. | 34 persoas de 18 colectivos diferentes de defensa do monte viaxarán ao Parlamento Europeo o 6 e 7 de decembro a proposta de Lídia Senra. | Denunciarán o desleixo da Xunta, que en conivencia cos intereses da industria celulosa, non está a protexer os xacementos arqueolóxicos.

A eurodeputada galega Lídia Senra promoverá unha serie de actividades encamiñadas a internacionalizar no Parlamento Europeo a problemática de eucaliptización que sofre o patrimonio galego. Así o anunciou este venres pola mañá, durante unha rolda de prensa que deu en Santiago, acompañada polo presidente da Asociación Mariña Patrimonio, Manuel Miranda Ruíz. Senra explicou que un total de 34 persoas pertencentes a 18 colectivos diferentes de defensa do patrimonio cultural, arqueolóxico e natural, ecoloxistas, arte rupestre e montes viaxarán até Bruxelas os días 6 e 7 de decembro para denunciar no ente comunitario a situación de ameaza que está a provocar o monocultivo de eucalipto na nosa terra.

A europarlamentaria explicou que a visita foi pensada tendo en conta que o próximo ano, 2018, será declarado pola UE como o Ano Europeo do Patrimonio Cultural e, neste contexto, é un bo punto de partida que se poña en valor o patrimonio cultural que albergan os nosos montes e que “está ser destruído a consecuencia da falta de interese por parte de quen debería conservalo, que son as Administracións públicas”. “Esta visita é oportuna para contribuír a visibilizar na UE o que pasa na Galiza”, dixo. Así, Senra reclamou que o eucalipto sexa declarado como especie exótica invasora e criticou a resistencia que está poñendo o Estado español no marco do Convenio de Berna do Consello de Europa, en conivencia coa industria forestal, para que isto sexa posible.

Manuel Miranda acusou á industria celulosa do eucalipto de estar provocando unha destrución masiva do patrimonio arqueolóxico, “como demostran os centos de denuncias presentadas nos últimos anos” e tendo en conta que “só se denuncia unha pequena parte do total de agresións”. Neste contexto, Miranda explicou que “queremos informar á UE e denunciar alí o que non está facendo a Xunta aquí para protexer o patrimonio”. “A xunta está mirando para outro lado e está incumprindo o seu deber, tamén moral, de protexer o patrimonio, atendendo aos intereses dunha industria celulosa totalmente insensible e irresponsable”, afirmou. “Os xacementos arqueolóxicos están protexidos pola lei e non se poden danar para plantar eucaliptos nin outras árbores. Polo tanto, a Xunta debe actuar e facer cumprir a lei, algo que non fai”, denunciou.

Para o representante de Mariña Patrimonio, a relación entre a Xunta e a industria celulosa é “como mínimo de corrupción, desleixo e complicidade”. “A sociedade ten claro que a Xunta non actúa na defensa do patrimonio porque hai intereses comúns coa industria celulosa. Din que hai que plantar eucaliptos porque esa industria é moi rendible. Se é así, deberían empregar parte desa rendibilidade en protexer os xacementos arqueolóxicos e non en destruílos”, argumentou. Ante esta situación, defendeu que “non queda outro remedio que que a sociedade civil, as asociacións, actuemos”. “Estamos seguros de que podemos atallar esta desfeita. Hai que esixirlle á Xunta e á industria que cumpran as leis autonómicas, estatais e europeas. Tócanos denunciar publicamente a industria do eucaliptos e explicarlles aos consumidores europeos que estamos ante unha industria que destrúe boa parte do patrimonio europeo”, insistiu.

No grupo de persoas que se desprazarán a Bruxelas para participar desta iniciativa, haberá membros do Sindicato Labrego Galego, do SOS Arte Rupestre Galega, da Sociedade Antropolóxica Galega, da Comunidade de Montes Veciñais en Man Común de Salcedo, do Colado do Vento, de Cousa de Raíces, da Asociación para o Fomento do Deseño Sostible Kunterbunt, de Adega, da Asociación Nordés, da Asociación Amig@s de historiadegalicia.gal, do colectivo A Rula, da Asociación Mariña Patrimonio, da Asociación Cultural Irmandade de Santo Estevo, de Amigos do Patrimonio de Castroverde, de Anova Terra, Umia Vivo, Irmandade Illa de Tambo e do Colectivo da Defensa do Patrimonio A Forneiriña.

Durante a visita ao Parlamento Europeo, a delegación galega reunirase con representantes da Comisión Europea competentes na materia para explicarlles a situación que se está a vivir na Galiza, e tamén con eurodeputados doutros países, especialmente alemáns, xa que a maior parte da produción de Ence é exportada. Concretamente, un 23% vai para Alemaña, un 16% vai para Italia, e só o 5% queda no Estado español. O obxectivo é sensibilizar á poboación internacional do problema que arrastra a política da pasteira e a eucaliptización na nosa terra e esixirlle á comunidade internacional que fagan cumprir os mínimos de respecto á natureza, patrimonio e desenvolvemento sostible do monte. “O 95% da celulosa que produce Ence vai para o mercado europeo e desgraciadamente o mercado europeo non sabe o custe que ten esa celulosa para o patrimonio galego e polo tanto europeo. Queremos que o consumidor europeo saiba que eses folios que usa están provocando unha destrución masiva do noso patrimonio”, explicou Miranda.

Tamén se levarán a cabo unha serie de coloquios centrados en “A destrución do patrimonio galego por parte do sector industrial madeireiro”, “O desleixo da Xunta de Galiza co patrimonio cultural galego e a problemática dos incendios” e “Artellando solucións para protexer o patrimonio fronte á eucaliptización”.

Senra defendeu na rolda de prensa que unha sociedade “non se pode rexer pola rendibilidade económica que poida ter para uns poucos a plantación dunha especie en concreto, porque o monte ten un valor máis alá da rendibilidade económica dun monocultivo. Aporta biodiversidade e moitísimas cousas que necesitamos como o dereito a ter auga libre de contaminación”. “Cando un monocultivo se implanta a biodiversidade pérdese. Estamos falando de que está en perigo o futuro de toda a sociedade, non só de catro empresas multinacionais que se lucran de poñer o país a monocultivo de eucalipto”, dixo. Así, defendeu que o monte “é a despensa das granxas e das casas labregas e esa ten que seguir sendo unha das súas funcións. Hai que facer unha política agraria que contemple o monte como un complemento da agricultura”. Tamén chamou a reflexionar sobre as miles de perdas que xera o lume neste país. “A sociedade está contribuíndo economicamente a apagar eses lumes para o rendemento desa industria”, dixo. “A extinción máis eficaz é a prevención e a prevención pasa por non perder persoas que traballen as terras agrarias ou por acabar co monocultivo de eucalipto e por unha política agraria que volva a agroecoloxía”, concluíu.

Santiago, 24 de novembro de 2017. 

Lídia Senra, eurodeputada galega, integrada no Grupo Confederal da Esquerda Unitaria Europea/Esquerda Verde Nórdica (GUE/NGL). | lidia.senra@europarl.europa.eu | http://ageuropa.gal/

Enviado por:
AGEe Europa
-ageeneuropa@gmail.com-
24 de novembro de 2017 13:38
___________________