Amosando publicacións coa etiqueta Municipalismo. Amosar todas as publicacións
Amosando publicacións coa etiqueta Municipalismo. Amosar todas as publicacións

domingo, xuño 17, 2018

Cidades sen medo (Ciutats sense por - Ciudades sin miedo) - Guía do movemento municipalista global - Libro colaborativo publicado por Icaria Editorial - A primeira guía escrita por e para este movemento municipalista global


Cidades sen medo (Ciutats sense por - Ciudades sin miedo) - Guía do movemento municipalista global.

"O municipalismo é unha forza en alza que quere transformar, desde abaixo, o medo en esperanza e construír esa esperanza en común". - Ada Colau

Nun mundo no que o medo e a inseguridade estanse convertendo en odio e as desigualdades, a xenofobia e o autoritarismo están en auxe, xorde un movemento municipalista renovado que defende os dereitos humanos, a democracia e o ben común.

Cidades Sen Medo é a primeira guía escrita por e para este movemento municipalista global. Froito da colaboración entre máis de 140 alcaldesas, concelleiras e activistas de todo o mundo, o libro ofrece:
  • Unha introdución ás bases teóricas do municipalismo e o seu papel na feminización da política e a loita contra a extrema dereita.
  • Ferramentas que explican como montar unha candidatura, elaborar un programa de xeito participativa ou facer crowdfunding.
  • Exemplos das políticas transformadoras que se están complementando en municipios ao redor do mundo en materia de vivenda, espazo público ou democracia participativa.
  • Perfís de 50 plataformas municipalistas referentes de todo o mundo. 
Prologo da obra, 7 páxinas, en formato pdf. | Acceder/Baixar.

Referencias da obra publicada, en dúas edicións (Ciutats sense por - Ciudades sin miedo), por Icaria Editorial. | Ir á Web.

Enviado por:
Anna Monjo
-amonjo@icariaeditorial.com-
14 de junho de 2018 15:27

___

xoves, novembro 09, 2017

Segunda convocatoria da Asemblea Cidadá Aberta: para a realización de propostas de organización, constitución e elaboración dun plan de traballo - Venres 10 de novembro ás 18:30hs no Ateneo Ferrolán


CONVOCATORIA DE ASEMBLEA CIDADÁ
DIA: VENRES 10 DE NOVEMBRO
HORA: ÁS 18.00hs.
LUGAR: ATENEO FERROLÁN


O próximo venres 10 de Novembro terá lugar a convocatoria dunha nova asemblea cidadá aberta, na que se dará continuidade á tida lugar o pasado 28 de Outubro. A cita será ás 18.00 horas, no Salón de Actos do Ateneo Ferrolán.

Na asemblea aberta do pasado 28 de Outubro, un grupo de  persoas, participantes a título individual, preocupadas pola situación social, cívica, económica, laboral e institucional de Ferrol, estivemos a falar en torno a fomentar a participación da veciñanza na vida do concello, á construción dunha alternativa desde abaixo, desde a pluralidade de inquedanzas, e a necesidade de concretar obxectivos comúns, e tamén o coidado dos procesos, a través do diálogo, da flexibilidade, da transparencia e da horizontalidade.

Tamén concretamos unha orde do día para esta nova asemblea, para traballar na realización de propostas de organización, constitución e elaboración dun plan de traballo.

Resumo da Primeira Asemblea Cidadá do pasado 28 de Outubro

O sábado 28 de Outubro, no Centro Cultural Carvalho Calero, tivo lugar unha asemblea cidadá que reuniu un grupo de persoas a título individual en torno á súa preocupación pola situación social, cívica, económica, laboral e institucional de Ferrol. Entre as asistentes, atopábanse persoas participantes en diversos movementos asociativos e sociais, sindicais e veciñais,e mesmo varias persoas que teñen formado parte do goberno municipal. Isto reflectiu e posibilitou unha pluralidade de visións e perspectivas que guiará o proceso de creación dunha posible alternativa social e política.

Nesta primeira Asemblea foron de especial relevancia as reflexións en torno a fomentar a participación da veciñanza na vida do concello, á construción dunha alternativa desde abaixo, desde a pluralidade de inquedanzas, e a necesidade de concretar obxectivos comúns, e tamén o coidado dos procesos, a través do diálogo, da flexibilidade, da transparencia e da horizontalidade.

Neste contexto, expresouse a vontade da Asemblea de continuar o proceso de construír e afondar unha alternativa social e política para a cidade de Ferrol, e para iso emprazámonos para unha nova asemblea cidadá aberta a todas aquelas persoas que desexen participar, para o venres día 10 de Novembro. A orde do día desta seguinte convocatoria centrarase na realización de propostas de organización, constitución e elaboración dun plan de traballo.

Contacto para Comunicación:
Xaime Aguiar
675 357 630
procesoferrol@gmail.com
Documento: Hai Alternativa - Hai Posibilidade, en formato pdf. | Acceder/Baixar.

Enviado por:
Proceso Ferrol
-procesoferrol@gmail.com-
29 de outubro de 2017 13:05
8 de novembro de 2017 23:47

________________

xoves, outubro 26, 2017

Hai Alternativa - Hai Posibilidade - Asemblea Cidadá que vai ter lugar o Sábado 28 de Outubro, ás 18.00 horas, no Centro Cultural Carvalho Calero do Inferniño


CONVOCATORIA ASEMBLEA CIDADÁ EN FERROL - 28 DE OUTUBRO


Somos un grupo de persoas preocupadas polo noso Concello, que levamos varios meses reflexionando sobre a situación social, cívica, económica, laboral e institucional de Ferrol.

Por este motivo, vimos de convocar unha Asemblea Cidadá que vai ter lugar o Sábado 28 de Outubro, ás 18.00 horas, no Centro Cultural Carvalho Calero do Inferniño.

Nesta Asemblea gustaríanos compartir reflexións e sumar vontades, para o que partiremos dun pequeno texto que se adxunta (tamén se pode ver máis abaixo) que elaboramos como proposta para comezar e orientar o debate da Asemblea.

Para contactar: Barbara Primo e Xaime Aguiar.
procesoferrol@gmail.com

QUEREMOS UNHA ALTERNATIVA

Moitas persoas estamos a observar a regresión e o progresivo deterioro da situación social, cívica, económica, laboral e institucional de Ferrol.

Lonxe de patriotismos partidarios e de prexuízos políticos, debemos sobrepoñernos e superar a precariedade e frustración presentes, así como as alarmantes perspectivas de futuro que podemos prever.

Temos obxectivos

Xa temos algún camiño andado, e sabemos que desde intereses diversos podemos chegar a obxectivos comúns. Que debemos ser quen de construír unha mínima unidade popular, de remunicipalizar, feminizar, rehabilitar, galeguizar, participar.

Queremos organizar un proxecto de participación política local, perdurable no tempo e con capacidade de influír social e institucionalmente. En definitiva, unha ferramenta política con carácter democrático para un proxecto municipalista.

Queremos e temos que organizarnos

Propoñemos un lugar de encontro aberto ao conxunto da cidadanía, onde todo xire en torno á articulación de formas respectuosas de participación entre nós, e tamén na interacción con todo tipo de organizacións e movementos sociais.

Unha proposta política con modelos de funcionamento horizontais, transversais e plurais. Procurando consensos desde a diversidade e a diferenza, como elementos que están na natureza mesma do proxecto

Un espazo político para as persoas, onde nos poidamos recoñecer mutuamente, sen mediacións, nin autoridades, nin poderes fácticos de ningunha caste.

Con estritas garantías democráticas, no que as persoas poidamos exercer os nosos dereitos plenamente, en réxime de radical igualdade.

Queremos actuar desde o respecto e a honestidade

Un proxecto sen imposturas, que faga o que di que vai facer desde a máxima transparencia e radicalidade democrática. Desde a honestidade persoal como antesala da honestidade colectiva.

Un espazo soberano e autónomo, pero non excluínte. Aberto a fórmulas de cooperación con proxectos compatibles cos nosos obxectivos políticos.

Aspiramos a representar maiorías sociais, por iso non podemos eludir a relación existente entre un horizonte emancipatorio que promova o cambio social, co máis inmediato e pragmático horizonte electoral.

Planificar as tarefas precisas para atender a eses horizontes temporais semella ser o traballo que debemos abordar xa, participadamente, desde o conxunto do colectivo.

HAI ALTERNATIVA. HAI POSIBILIDADE.

Documento Anexo en formato pdf. | Acceder/Baixar.

Enviado por:
Proceso Ferrol
-procesoferrol@gmail.com-
26 de outubro de 2017 11:46

_______________________

luns, decembro 14, 2015

A modernización do municipalismo galego pasa necesariamente pola integración das TI, ... Por Raúl Fernández Iglesias


Por Raúl Fernández Iglesias [*]
14.12.2015

As Tecnoloxías da Información (TI) supoñen unha oportunidade á vez que unha obriga e un compromiso para os nosos concellos. | A modernización do municipalismo galego pasa necesariamente pola integración das TI.

Son moitas as ferramentas das que nos dotan as TI para acadar unha administración eficaz e eficiente. As páxinas web institucionais, as redes sociais e todas as novas ferramentas que vaian aparecendo son elementos poderosos para espallar a nosa cultura, lingua e as posibilidades turísticas dos nosos concellos á vez que proporcionan información precisa da labor de goberno e actividades. Máis tamén hai outras moitas caras: os trámites e a propia xestión administrativa que xa non se entende sen as computadoras, a relación de todas e todas coa administración na realización de todo tipo de trámites dende o propio domicilio mediante a sede electrónica e os portais de transparencia onde publicar todo aquelo que da propia administración queren e deben saber todas e todos. Ademais son elemento ideal para levar a cabo unha verdadeira democracia participativa, un goberno compartido con toda a veciñanza.

A única nova competencia que establece a Lei 27/2013 para os concellos é a especificada no seu artigo 25.ñ, que determina como competencia municipal a promoción da participación de todas e todos no uso eficiente e sostible das Tecnoloxías da Información e Comunicación (TIC). Lémbranos isto que as TI teñen dúas caras, a da administración poñendo os medios de transmisión e comunicación pero tamén a das propias persoas que precisan estar capacitadas para a recepción de información e a comunicación coa administración, sendo responsabilidade desta procurar a eliminación da fenda dixital.

As TIC facilitan unha administración transparente, organizada e áxil na súa resposta. A estas alturas nin se pode nin se debe obrigar á presenza física para a realización de xestións e as propias leis dotan de dereitos á veciñanza neste senso. Un dos perigos nos que habitualmente cae a administración é obrigar a que un tramite só se poida facer de xeito telemático, obviando que hai moitos sectores da poboación que nin teñen coñecementos tecnolóxicos nin dispoñen de medios materiais para facelo, co consecuente custo económico dun tramite administrativo que ten que ser gratuíto, aumentando a fenda dixital e a desigualdade no acceso á administración. Compre pois poñer a disposición por unha banda de posibilidades formativas as que acollerse e por outra servizos de asistencia onde poder facer eses trámites. Non se pode negar que si a información chega electronicamente, será moito mais doado, barato, eficaz e eficiente o seu procesamento, permitíndolle ademais aos concellos aforrar recursos humanos e materiais que se poden asignar a outras tarefas nas que o trato humano e directo sexa máis necesario.

Non se nos escapa que a día de hoxe moitos concellos non reúnen nin as capacidades técnicas nin as económicas para afrontar todos estes retos. É por elo indispensable a intervención do Goberno de Galiza, non solo como coordinador de procedementos senón tamén como base de apoio para aquelas entidades que non dispoñan dos medios nin dos coñecementos precisos para levalos a cabo.

A rede "Rede Dixital da Sociedade da Información" creada polo nacionalismo no seu paso polo goberno do país era ferramenta indispensábel para a formación e alfabetización dixital de persoas e empresas locais, ademais da dinamización de todos estes axentes sociais. A volta do partido popular á Xunta trouxo como consecuencia unha labor sistemática de deconstrucción da que non se librou esta Rede e, despois de dous anos pechada con moita presión social para a súa reapertura, creouse a Rede CeMIT na que de unha cobertura prácticamente de toda Galiza pasamos a menos de cen centros e solo a metade subvencionados. É urxente pois que estas aulas cubran todo o territorio e que se faga unha labor de dinamización indispensábel para que haxa unha implicación efectiva de todos os axentes sociais.

Por outra banda, a implantación de software libre e de código aberto na administración local implica beneficios tales como un aforro importante de medios económicos, aínda que cómpre lembrar que libre non significa gratuíto. Como efectos complementarios, e quizais aínda máis importantes, imos ter ferramentas informáticas na nosa lingua, sen depender de multinacionais que funcionan a golpe de talonario, e ademais as empresas locais do sector serán beneficiadas e poderán traballar nas aplicacións para adaptalas as novas normativas e posibles melloras na xestión. Os formatos de datos abertos eliminarán a dependencia de aplicacións pechadas e propietarias.

As TIC van ser importantes na labor de apoio a economía local xa que abrirán novos mercados de negocio para a produción e empresas locais, á vez que serán parte importante na definición de nichos de negocio non existentes até o de agora. O coñecemento é a baza máis importante para competir con outros mercados nos que é imposible facelo nos produtos comúns.

[*] Raúl Fernández Iglesias, Lugo, 1955. Enxeñeiro en Informática pola Universidade da Coruña onde reside. Cursou tamén estudos de Enxeñería Industrial na Universidade Politécnica de Madrid.

 Traballa na Fegamp onde é Coordinador de actas e informes ademais de responsábel das Tecnoloxías da Información e Comunicación.

 Participou do movemento veciñal no que ostentou o cargo de Presidente da Asociación de Veciñas/os de Monte Alto.

 Na actualidade é o Responsábel Local do BNG da Coruña e forma parte, entre outras, da Comisión de Análise Local do Parlamento de Galiza.

Fonte: Terra e Tempo | 14.12.2015
__________

Enlaces relacionados:

Observatorio da Sociedade da Información e a Modernización de Galicia - OSIMGA:
http://www.osimga.gal/

Axencia para a Modernización Tecnolóxica de Galicia - AMTEGA:
http://amtega.xunta.gal/

Enlaces de interese:
Software Libre:

GNU Operating Sistem:
http://www.gnu.org/philosophy/free-sw.gl.html

Galipedia:
https://gl.wikipedia.org/wiki/Software_libre

Distribucións Linux:
https://es.wikipedia.org/wiki/Anexo:Distribuciones_Linux

O sitio web DistroWatch:
http://distrowatch.com/
__________________