As Comisións Locais de Igualdade da Ría de Ferrol (Navantia de Ferrol e Fene), emitiron un comunicado conxunto co motivo do 8 de marzo de 2022, Día Internacional da Muller

8 DE MARZO DE 2022
DÍA INTERNACIONAL DA MULLER

NAVANTIA POLA IGUALDADE DE XÉNERO
NAVANTIA EN VIOLETA

Co motivo do 8 de marzo de 2022, día Internacional da Muller, desde as Comisións Locais de Igualdade da Ría de Ferrol (Navantia-Ferrol e Navantia-Fene), comunicamos a toda a poboación de Ferrolterra, así como a todos os traballadores e traballadoras, que seguimos desenvolvendo a ferramenta da que nos dotamos ambas as dúas partes, empresa e representación social, co claro obxectivo de acadar a igualdade real na nosa empresa.

Por iso, e segundo a Lei de Igualdade (3/2007), acordamos coa Dirección de Navantia o II Plan de Igualdade (Decembro-2019, cunha vixencia de 4 anos), no que se marcan unha serie de metas, datas, orzamento se é necesario, medidores de cumprimento e mecanismos de corrección e de actualización. Tamén inclúe un Protocolo de Actuación no caso de acoso sexual e por razón de sexo, e novos dereitos para as vítimas de violencia de xénero.

Para facer un seguimento pegado ao terreo destes compromisos, en cada centro de Navantia constituíronse comisións locais, que son as responsables de facer propostas e manter as liñas xerais deste Plan, así como planificar calquera acto que poda ser útil e chame a atención con respecto á situación das mulleres e a solidariedade e apoio entre todas nós.

Desde a Comisión Local de Igualdade de Navantia Fene- Ferrol, facemos un chamamento á asistencia ÁS MOBILIZACIÓNS QUE SE CONVOQUEN CO GALLO DO 8 DE MARZO,  onde todas e todos sumemos forzas e digamos BASTA XA!!! ás desigualdades e abusos contra as mulleres.

No caso de Navantia, faremos ver o noso apoio  e loita pola igualdade iluminando en violeta sitios estratéxicos dos estaleiros durante a semana do 7 de marzo
Desta maneira, chamaremos a atención sobre unha problemática que afecta á metade da poboación, que repercute nos nosos salarios e, consecuentemente, nas prestacións  que se deriven deles.

Navantia Fene Ferrol,  07  de marzo de 2022

Secretaría Comité de Empresa
NAVANTIA FERROL

C/Taxonera, s/n
15403 Ferrol (Coruña)
Tel.: 981 331 311 – Ext.1311

seccomite.fe@navantia.es

Enviado por:
FE.Secretaría Comité (FE)
-seccomite.fe@navantia.es-
7 de março de 2022 12:02
_______

Mobilizacións simultáneas en Ferrol e n'As Pontes, do naval e das auxiliares da central térmica esixindo solucións á crise industrial das comarcas

Traballadores e traballadoras do naval público e das auxiliares da central térmica de Endesa realizaron este xoves mobilizacións simultáneas en Ferrol e nas Pontes para visibilizar a crise que sofren os principais sectores industriais da comarca e esixir solucións inmediatas. O persoal de Navantia e das auxiliares saía ás 10 da mañá da porta do estaleiro para dirixirse á entrada do porto da cidade, onde fixo un corte de tráfico; mentres que os compañeiros e compañeiras das Pontes marchaban dende a central térmica até á autovía AG-64, onde tamén paralizaron a circulación.

O secretario da sección sindical da CIG en Navantia Ferrol, Marcelino Amado, adiantou que xa se está a traballar nun novo calendario para darlle continuidade ás mobilizacións en demanda de carga de traballo inmediata para os estaleiros e para esixir que se fagan as infraestruturas necesarias nas instalacións da ría, que xa estaban recollidas no plan estratéxico inicial pero que foron abandonadas, como o dique cuberto.

"Estes investimentos son vitais para o presente e para o futuro do estaleiro, e polo tanto, para o conxunto da comarca porque o naval é o noso motor económico do que dependen miles de empregos", subliña.

Porén, denuncia que, malia as xuntanzas e as declaracións de boas intencións do goberno español e galego e a sucesión de plans estériles, "a resposta real das administracións e da dirección de Navantia é negar estas dúas reivindicacións básicas: carga de traballo e investimentos, co que isto implica para moitas familias que están sufrindo o desemprego". Lembra que tras a saída do segundo buque para a armada australiana, as gradas están baleiras e non se agarda nova obra até o inicio das fragatas, que como moi pronto comezarán a construírse no segundo trimestre de 2022.

Amado referiuse tamén á marxinación que están a sufrir os centros da ría de Ferrol con respecto a outras instalacións de Navantia, para as que si se están destinando novos encargos. "Onte asistimos, unha vez máis, á frustración dun proxecto que viñamos defendendo como alternativa a esta falta de ocupación, a transformación do buque Galiza, que definitivamente se foi para Cartaxena, quedando Ferrol sen esa importante carga de traballo", alerta.

Neste senso, valora que "de nada serven a as reunións co delegado do goberno nin co alcalde da cidade, do mesmo partido que goberna no Estado, que amosan unha falta total de capacidade política para reverter a situación, en contraposición ao que ocorre noutros centros de Navantia e os políticos que os representan".

Transición xusta para As Pontes

Ao tempo, nas Pontes, traballadores e traballadoras da central e das súas auxiliares marchaban cara á autovía onde fixeron un corte de tráfico para esixir garantías de emprego, que se concretan xa os proxectos e alternativas industrias para a localidade así como reclamar que se proceda xa á sinatura do Convenio de Transición Xusta.

Alberte Amado, da Executiva da CIG-Industria, subliña que os acordos que había con Endesa referentes ao emprego nas auxiliares e á preferencia na formación e no proceso de desmantelamento da central quedan trastocados ante a decisión de tramitar polo procedemento ordinario o expediente administrativo de impacto ambiental do peche da central.

Isto supón que a resolución se demorará até finais de ano, pero o acordo de garantías con Endesa só chega até xuño. "O que demandamos é que as garantías de emprego para as auxiliares cubran todo este período, que se concreten xa as alternativas e os proxectos industriais de futuro para a localidade e que se aclare que viabilidade teñen, canto emprego xeran ou cales son os tempos de execución", asevera Alberte Amado.

Xunto isto, advirte que é preciso evitar caer nun baleiro no período de transición dende o desmantelamento da central até que esas alternativas industriais se materialicen. En calquera caso, reitera, estes proxectos, xa sexan da man de Endesa ou doutras empresas, "deben levar parellas obrigas coa industria auxiliar e co colectivo de transportistas". Neste liña, Amado recalca que os proxectos non poden estar vinculados exclusivamente a que se concedan fondos do plan Next Generation, "senón que se teñen que implantar nas Pontes xa sexa con estas axudas ou con outro financiamento".

Convocatoria de Mesa o día 2 de Xuño

Estas cuestións serán trasladadas novamente aos gobernos na xuntanza da Mesa de Transición das Pontes que, logo de reiteradas peticións, o MITECO por fin convocou para o vindeiro día 2 de xuño. De igual xeito, tamén se reivindicará a sinatura inmediata do protocolo de actuación para a elaboración do convenio de transición xusta, pois As Pontes é o único territorio afectado polo peche das centrais no que aínda non se asinou. Neste caso, pola negativa da Xunta de Galiza, que entende que se trata dunha competencia autonómica.

A este respecto, Amado chama a atención sobre o feito de que o goberno galego se escude nesta cuestión, cando non está a exercer as competencias nin en materia de emprego nin de industria, "pois levamos meses demandándolle que busque e dispoña chan industrial nas Pontes para poder asentar os posíbeis proxectos que veñan, pero a día de hoxe aínda non fixo ningunha xestión neste sentido".

Xunto a isto, o representante sindical critica tamén que non se está a dar cumprimento ao acordo aprobado na comisión de industria do Congreso a prol de garantir o emprego nas auxiliares e promover unha transición enerxética verdadeiramente xusta.

Fonte: Avantar. | 27 de maio de 2021 | Licenza Creative Commons.
_______

CC.OO. de Navantia Ferrol denuncia a actual situación da empresa pública naval: Levamos tempo denunciando o deterioro dos procesos produtivos, das relacións laborais e a calamitosa situación económica ... as actuais direccións corporativas son o auténtico cancro de Navantia - Esiximos un cambio na política industrial da nosa empresa

Comunicado de CC.OO. Navantia Ferrol

Desde CC.OO. de Navantia Ferrol queremos transmitir a máis profunda decepción e indignación na forma na que o actual goberno está xestionando unha empresa pública como é Navantia. O anuncio en prensa do cambio da actual presidenta (e van 3 en menos de 3 anos) é síntoma de que o actual goberno non ten intención de abordar os problemas que asfixian á nosa empresa.

As persoas que traballamos en Navantia fixemos un gran esforzo por negociar un plan industrial no ano 2018 que garantise o futuro da nosa empresa e das nosas comarcas, pero sen un cambio de rumbo como o que se suscitaba naquel momento non tardaremos en volver á situación catastrófica que nos levou a ter que negociar devandito plan.

Levamos tempo denunciando o deterioro dos procesos produtivos, das relacións laborais e a calamitosa situación económica dunha empresa, que segundo recolle o actual plan industrial xera máis de 38.000 postos de traballo no conxunto do estado, sendo o principal motor económico das comarcas onde están as súas factorías.

Lonxe de acometer estes problemas, o actual goberno está utilizando á nosa empresa como o seu chiringuito privado, colocando políticos e políticas con salarios desorbitados, que nada coñecen de como se xestiona unha empresa como a nosa e o único que fan é reafirmar ás actuais direccións corporativas, que son o auténtico cancro de Navantia.

Si comparamos os procesos produtivos de fai unhas décadas cos actuais, darémonos conta de que o persoal de Navantia pasou de ser a que deseñaba e fabricaba os produtos, a mera xestora de compañías auxiliares, a subcontratación multiplicouse por 3 ou por 4 mentres o persoal principal reduciuse a menos da metade, pola contra as perdas lonxe de reducirse, pasaron de ser sostíbeis a superar nalgúns exercicios os 300 millóns de euros.

Quen apostou por este modelo de subcontratación, polo modelo fracasado de xestión PUMA, ou quen eran responsábeis industriais durante programas como o S-80 ou os actuais AAORes, non deberían seguir decidindo o futuro de tantos miles de familias. Con todo, continúan perpetuándose nos seus postos, mentres os políticos e políticas de quenda que ocupan a presidencia provocan contratacións de centos de miles de euros para abandonar dita presidencia en poucos meses.

CC.OO. de Navantia Ferrol di ¡XA ABONDA!

Creemos que a presidencia débea ocupar alguén relacionado co sector naval, coñecedor dos nosos procesos e cunha solvencia contrastada, nada de políticos de 2º nivel que non se sabe onde colocar. En todo caso, o absolutamente necesario é cambiar ao comité de dirección, pois quen trouxeron a Navantia a esta situación e continúan coas súas formulacións, por moi fracasados que se demostren, non deberían continuar nas súas responsabilidades.

Esiximos un cambio na política industrial da nosa empresa, non poden ser que os procesos produtivos sexan peores co paso dos anos, e tamén que a nova presidencia cumpra cos compromisos do plan industrial no referente a carga de traballo e investimentos.

Esixímosllo pois a un goberno que leva por bandeira a defensa do público, desde un persoal público que non se sente defendida.

Eugenia Freire Fajardo
Resp. Organización - Gabinete Económico
CCOO Industria - Galicia
Tlf. oficina: 981369326

efreire@industria.ccoo.es

Enviado:
MARIA EUGENIA FREIRE FAJARDO
-efreire@industria.ccoo.es-
2 de abril de 2021 12:51
_______

Foto: Botadura do buque ”Nuship Supply” - 23.11.2018 | Primeiro dos AOR que Navantia construíu para a Real Marina Australiana, segundo o contrato firmado en maio de 2016.
_______

O Comité de Empresa sobre a Fábrica de Turbinas de Navantia Ferrol

O Comité de Empresa sobre a Fábrica de Turbinas de Navantia Ferrol

COMUNICADO INFORMATIVO

Ante a actual situación que está a atravesar a Fábrica de Turbinas, a falla de definir un Plan Industrial que garanta as inversións precisas para a modernización de maquinas e a ausencia de incorporacións que rexuvenezan un cadro de persoal minguado e envellecido.

Este Comité de Empresa fai un chamamento aos traballadores e traballadoras de Navantia e as compañeiras e compañeiros da IIAA a non colaborar nas tarefas propias das caixas redutoras do Avante.

Co o obxectivo de que a actual Dirección reflexione sobre a súa falta de propostas e a súa falta de diálogo nas diferentes frontes que ten abertos na actualidade.

Ferrol, a 5 de febreiro, de 2021

O Comité de Empresa de Navantia Ferrol

Enviado por:
FE.Secretaría Comité (FE)
-seccomite.fe@navantia.es-
5 de fevereiro de 2021 11:46
_______

Co mantemento non se xoga - Comunicado da posición de CCOO sobre a licitación do mantemento en Navantia e a súa afectación no empreg

Co mantemento non se xoga

CCOO Industria Ferrol critica taxantemente as políticas de subcontratación de Navantia e o claro ataque aos dereitos d@s traballadores/as e a representatividade sindical.

Existen estratexias agochadas tralos procedementos de licitación axeitados aos obxectivos de prexudicar claramente aos colectivos que máis dereitos teñen ou máis forza por estaren organizados e combate-las inxustizas que contra eles se practican.

Neste caso na licitación do contrato de mantemento da Ría de Ferrol, na anterior licitación saíu por lotes, pudendo agrupalos á hora de ofertar e como así foi, levar a meirande parte unha empresa. Observamos que no resto de centros de Navantia licitacións posteriores foron en bloque, sen dividir en lotes e tendo a mesma cantidade de traballos e mesmo en algún centro maior contido e maior presuposto.

Rememoramos dende CCOO que o ano 2019 dende o 23 de setembro ata o 10 de outubro este plantel loitou contra 15 despidos cunha folga indefinida coa que se acadou a readmisión destes compañeiros. Unha folga que paralizou traballos pola falta de mantemento. A Dirección xa por aquel entón loitou de xeito ilexítimo para facer fracasar a folga e non o acadou, e agora quere tomar as represalias na licitación.

O resultado que a Dirección de Navantia quere é dividir a este plantel en diferentes empresas o que comparando con outros centros e sabendo que a división en máis empresas repercutirá na necesidade de máis recursos, menos capacidade de xestionar os picos ou baixadas de traballo e na capacidade de atender as avarías como ata agora. E dende CCOO entendemos que non é necesario ter que argumentar a importancia do mantemento e da atención urxente de calquera tipo de avaría.

Existirá un reparto do persoal entre as diferentes empresas que vai a supoñer que este ano en función dos traballos que sexan adxudicados a cada empresa algún traballador se non se consigue carga de traballo de xeito urxente ou ben por baixada de traballo ou pola intención de Navantia de recuperar traballos pode ver perigrar o seu posto de traballo e o seu dereito de subrogación acadado no vixente convenio do metal asinado por este sindicato.

Polo tanto, instamos a que se revise o modelo de contratación e a imperiosa necesidade de abrir a Comisión Central de Auxiliares cos temas de calado que requirimos nesta Factoría e levan anos prexudicando a meirande parte de traballadores que entran cada día neste centro de traballo, a un e outro lado da Ría.

Así mesmo, se Navantia quere mostrar boa fe respecto desta licitación pode garantir o emprego prioritario deste persoal no mantemento, é dicir, calquer situación que repercuta no emprego destes compañeiros supoña a contratación en calquera das outras empresas de mantemento que resulten adxudicatarias evitando deste xeito a realización de horas extras ou a realización destes traballos por persoal non subrogado mentres o actual subrogado é despedido.

Este plantel require respostas e solucións á súa situación que foi vantaxosa dende que CCOO conseguiu este convenio e agora esta Dirección quere fulminalo por outra vía. Daremos traslado desta proposta á Comisión de Auxiliares para que a traslade á Dirección e se non temos resposta pasaremos á ofensiva.

Estas propostas foron consensuadas no día de hoxe en asemblea por CCOO Industria Ferrol cos afiliados e simpatizantes deste colectivo e co apoio manifestado polo Secretario Xeral de CCOO de Navantia Ferrol de que se loitará nese sentido dende a Sección Sindical.

Ferrol a 30 de decembro de 2020

CCOO Industria Ferrol
                                  
Enviado por:
ROBERTO VILLASUSO VAZQUEZ
-rvillasuso@industria.ccoo.es-
30 de dezembro de 2020 18:22
_______

Ante a situación do estaleiro, a Sección Sindical CC.OO. Navantia Ferrol, chama á mobilizacións e outras medidas de presión

Mobilizacións e outras medidas de presión

A sección sindical de CC.OO. en Navantia Ferrol quere transmitir o enorme descontento existente tanto entre a nosa afiliación coma no conxunto da organización, produto da falta de vontade da nosa dirección por cumprir os compromisos no relativo á transformación do estaleiro e ó futuro da fábrica de Turbinas.

O mesmo tempo denunciamos publicamente a falta de transparencia e intención construtiva nas negociacións no desenrolo do plan industrial.

Non hai ningunha negociación que non sufra o boicoteo constante por parte da dirección con falta de transparencia e ultimamente incluso con saídas de ton intolerábeis.

O último exemplo inasumible é o acontecido na comisión local de emprego co descarte de 4 candidatos en dúas especialidades distintas porque un psicólogo entende que non son idóneas para traballar na nosa empresa.

Por todo o anterior as CC.OO. propoñeremos o resto do comité o incremento das mobilizacións e das medidas de presión, comezando polo corte total das prolongacións de xornada e medidas de non colaboración.

Entendemos que con esta dirección non se pode chegar a acordos mentres non mude a súa actitude polo tanto propoñeremos que ate ese momento non se manteñan relacións con ela. As medidas de presión semanais contra a dirección local iran en aumento.

As mobilizacións internas e externas tamén serán máis fortes confluíndo con empresas da nosa comarca que están incluso nunha situación peor ca nosa, coma GAMESA ou a central térmica de ENDESA nas Pontes.

Xa anunciamos que de non mudar esta situación, dende as CC.OO. trataremos de confluír coas demais organizacións sindicais nunha gran folga xeral á volta do nadal.

Ferrol, 3 de decembro de 2020

Sección Sindical CC.OO. Navantia Ferrol

Enviado por:
CCOO (FE)
ccoo.fe@navantia.es
3 de dezembro de 2020 13:50
_______

Acordos incumpridos (parte 2), análise do Movemento Alternativo Sindical (M.A.S.) de Navantia Fene e Ferrol

Acordos incumpridos (parte 2)

Xa vos informabamos nun anterior comunicado dos acordos incumpridos no expediente de regulación de emprego e no rexuvenecemento do persoal. Neste segundo comunicado querémosvos relatar a situación dos investimentos en infraestruturas e en transformación dixital (Astillero 4.0) Pois ben, como xa sabedes, nos acordos asinados no Plan Estratéxico de Navantia (PEN) figuraban unha serie de investimentos en infraestruturas nos diferentes estaleiros.

En canto ao noso (Ría de Ferrol) existía, como xa sodes coñecedores, un compromiso de grandes investimentos, e así se trasladou publicamente tanto aos traballadores como a toda a cidadanía. Podemos destacar a construción dun dique cuberto cos seus correspondentes servizos, tales como guindastres, pórtico, etc. vimos como, aos poucos, este investimento estrela e imprescindible íase caendo dos discursos, tanto por parte da dirección da empresa como dos políticos que ostentan o Goberno da nación nestes momentos. Non é un esquecemento, senón unha omisión intencionada para que aos poucos salga da luz dos focos este investimento.

Xa está claro:

Goberno, a Sepi e Navantia, non teñen intención algunha de executar a obra do dique cuberto en Ferrol, malia ser unha obra clave na futura competitividade do noso estaleiro. Algúns agora creen que coa choiva de millóns de euros que non se cansan de publicitar desde Bruxelas, e desde o propio Goberno con motivo da pandemia, vanse a poder acometer os investimentos necesarios para poder ser competitivos e así volver ser referente na construción naval.

Sen dique, imos por outra dos investimentos estrela na Ría de Ferrol, o taller de subloques. Recentes cambios no proxecto inicial xa facían presaxiar que o dique non existiría. Pois bo, sen dique, estoutra obra convértese nun quero e non podo. Fabricar bloques de maiores dimensións, sen os medios de elevación adecuados, e finalmente con montaxe en grada, non se traduce nunha mellora da competitividade apreciable.

Os investimentos en modernizar a Fábrica de Turbinas, que se taxan na actualidade en 12 millóns de euros, tradúcense na práctica nun mero mantemento sen intención de ir máis aló do traballo que se realiza habitualmente. Non hai ningunha intención de modernizar a fábrica de turbinas e moito menos de darlle o impulso que necesita para acceder a novas liñas de negocio a través de I+D+I e alianzas con outras empresas. Habemos de recordar que a Fábrica de Turbinas foi un taller punteiro nas súas liñas de negocio que, aos poucos, se ha ir deixando morrer, e que na actualidade apenas conta con 100 operarios. Simplemente axústanse os operarios ás pedidos en carteira para facer cadrar números, non buscando en ningún momento ningún novo nicho de mercado. Todos os investimentos van dirixidas á Fábrica de Motores de Cartagena. Mesmo caso no departamento de Reparacións, nulos investimentos. No seu momento circulaban dous proxectos para abrir novos mercados e manterse nos actuais. Non se lle escapa a ninguén que os gaseros de nova xeración son moito máis grandes que os actuais, feito polo cal, a capacidade dos diques que temos na actualidade non será suficiente no futuro máis próximo. Neste caso os proxectos pasaban pola construción dun novo dique na dársena á beira do nº3 ou, si non era este o caso, a ampliación do existente. Ademais disto, si xa quixésemos entrar noutros mercados como a reparación de cruceiros, por exemplo, sería fundamental cubrilo. Pero máis aló da achega que faga o departamento de Reparacións ás contas de Navantia, o retorno para a comarca, por euro facturado, é maior ao de obra nova. Reparacións tamén actuou sempre como refuxio de postos de traballo e do tecido industrial da zona cando a actividade en obra nova diminuía.

En canto a Fene, solicítase un plan serio para aproveitar e dotar de actividade as instalacións, un plan de diversificación serio, e non utilizalo como un simple lugar de almacenaxe.

Non hai unha aposta seria deste Goberno pola Ria de Ferrol, e si por outras zonas xeográficas, o que nos fai espertar o recordo da pantasma da reconversión dos anos 80.

En canto a investimentos 4.0, pois bo, todos vimos vídeos que parecen máis unha realidade virtual que outra cousa, e que nos mostran un suposto futuro da construción naval. Tamén vimos a demostración dun "drone" en Reparacións, e agora prométennos o 5G de Movistar. ¡E xa! O 4.0, parece ser o "caixón de()sastre" da Dirección da Empresa. É unha máquina de xerar informes e para comer recursos en custosas licenzas que logo hai que desenvolver, provocando enormes atrasos.

Xulgar vós mesmos. Seremos competitivos no futuro? Ou é que están buscando outra cousa?

Navantia Fene-Ferrol a 04 de decembro de 2020

Movemento Alternativo Sindical (M.A.S.)
NAVANTIA (Grupo SEPI)
C/Taxonera, s/n
15403 Ferrol (Coruña)
Tel.: 981331412 / 698153978
masferrol@navantia.es
sindicatomas@gmail.com

Enviado por:
MAS FERROL (FE)
-masferrol@navantia.es-
4 de dezembro de 2020 13:44

_______