Manifestación en Carballo, o domingo 14 de Abril, en defensa de Corcoesto e Bergantiños, contra o destrutivo proxecto mineiro

O domingo que vén, a Plataforma pola defensa de Corcoesto e Bergantiños convoca unha manifestación contra a mina de Corcoesto en Carballo. Será a manifestación central das mobilizacións que estamos a facer, por iso queremos conseguir un bo número de persoas nela.

Creamos un evento no facebook, para difundila. Tamén se pode mandar a información por correo, por teléfono, ou en persoa. Por favor, difundide, compartide e convencede. Temos que ser unha morea de xente! Hai que parar este proxecto que podería supoñer un grave precedente. Non é só un problema de Corcoesto. Non é só un problema de Bergantiños. Corcoesto é o inicio dunha inmensa desfeita programada de norte a sur: a veta Malpica-Tui.

Falemos agora, para que calen para sempre!

Agardámoste o domingo ás 12:00 en Carballo, no aparcamento do Haley, para dicirlle á Xunta con voz alta e forte que Bergantiños, que Galiza, non quere esta mina destrutiva no seu territorio.

Fonte: Plataforma pola defensa de Corcoesto e Bergantiños.
______

Paremos a minaría contaminante en Corcoesto - Manifestación Domingo 17 de Febreiro, ás 6 da tarde, en Coristanco

Cartaz da Convocatoria

A cidadanía das comarcas da Costa da Morte e Bergantiños e de todo o País está convocada a unha manifestación este domingo 17 de febreiro, ás 18:00 horas desde a rotonda do centro comercial en Coristanco, a unha manifestación en repulsa polas operacións da compañía canadiana Edgewater que pretende, co beneplácito da Xunta, transformar os montes compartidos polos municipios de Cabana de Bergantiños, Coristanco e Ponteceso nunha inmensa canteira a ceo aberto.

A convocatoria, lanzada pola Plataforma pola defensa de Corcoesto que aglutina á veciñanza, e á que xa se adheriron multitude de organizacións e desde agora a Asociación Monte Pindo Parque Natural, pide axuda para esixir das autoridades que recúen no seu apoio decidido a estas explotacións de consecuencias catastróficas para o entorno natural e humano (así se ven constatando en multitude de experiencias anteriores en todo o mundo), e que as políticas a tomar en consideración non sexan as que pasen por destruír o territorio, contaminar as augas e destruír as formas de vida tradicionais.

O dito: domingo 17, ás 18:00h, todos en Coristanco!

Ten prexuízos a minaría de ouro a ceo aberto?
A Asociación Monte Pindo Parque Natural vén de levar a cabo un estudo de varios aspectos relacionados con este tipo de explotacións, centradas por suposto no caso particular de Corcoesto pero tamén extrapolados a outros casos. Os datos deste traballo aterrorizana a calquera. Para mellor comprensión de todos os nosos visitantes, sintetizámolas nas seguintes infografías que podedes divulgar libremente.

Por cada gramo de ouro extraído úsase suficiente cianuro para matar 128 persoas

Menos do 0,001% da terra removida en Corcoesto será outra cousa que
entullo e residuos, e desa mínima parte, só o 0,25% será ouro

O metro cadrado expropiado en Corcoesto é máis barato ca convidar a unha cervexa.
A empresa asegura que o prezo "realista" sería o dun paquete de chicles

A diferencia visual entre a instalación de Corcoesto e as minas tradicionais

No burato de Corcoesto poderase soterrar a Torre Eiffel e apenas sobresairá a antena

A mina de Corcoesto ocupará a superficie de
763 campos de fútbol regulamentarios

A auga contaminada enchería 10 estadios Santiago Bernabeu

Un só kg de material informático reciclado xera 5 veces máis
ouro que mil quilogramos de terra estragada en Corcoesto

E os postos de traballo?
Coma sempre, é absurdo tratar de obxectivar cantos postos de traballo xustifican a destrución dun espazo natural. Un bo caso témolo nalgunhas piscifactorías que de prometer centos de postos de traballo a meses da apertura iniciaron a súa actividade con apenas unha ducia de prazas de aparcamento para os empregados, ou as instalacións industriais que contaminaron bancos marisqueiros, sen que os postos de traballo da nova instalación igualaran sequera os destruidos.
Asi mesmo hai outro aspecto que se ve resentido para sempre por calquera instalación cun impacto visual semellante: o turismo e o sector servizos.
Porén tamén parece quedar en evidencia que diferentes poderes políticos e económicos interesados en que a explotación saia adiante están absolutamente inmersos nunha campaña de confusión sobre a suposta (e nunca garantida) creación masiva de postos de traballo, unha práctica que as organizacións opostas a este tipo de proxectos denuncian por pretender aproveitar os duros momentos económicos e sociais que vivimos para granxearse as simpatías das persoas máis afectadas.
Velaquí temos varios titulares que recopilamos nos últimos meses sobre o caso de Corcoesto:

"Creará unos 1.400 puestos de trabajo"

Alberto N. Feijóo (Presidente da Xunta), EP, 25/06/11

"La mina de oro de Corcoesto dará empleo directo a 271 trabajadores"

ECG, 01/04/12

"La empresa que buscará oro asegura que reservará 140 de los 271 empleos a residentes en la comarca"

LA OPINIÓN, 17/05/12

"Me comentaron que querían emplear a 100 personas"

José Muiño (Alcalde de Cabana), EL MUNDO, 25/09/11

En Corcoesto? A min non me toca...

Fonte: Edgewater

Si que che toca. Esta e outras moitas empresas, todas elas multinacionais, teñen xa identificada unha grande veta mineira de ouro desde As Pontes ata Tui pasando por centos de municipios que poden ser potenciais víctimas da mesma estratexia.
Hoxe pode que non, mañá tampouco, pero pasado pode que sexan as túas terras as expropiadas a 1 euro e 20 céntimos, para que uns señores que nunca coñeceremos se fagan moito máis ricos aínda e desaparezan das nosas vidas para sempre, deixando nelas tan só a paisaxe destrozada e cianuro na túa fonte.
Non desertemos da terra cando precisa da nosa axuda, coma ela non deserta cando nós precisamos dela.

Fonte: Asociación Monte Pindo Parque Natural.
O Rabecho s/n, CP 15296 O Pindo (Carnota) A Coruña
 info@montepindo.org
Teléfono: 655 56 43 72
No facebook:
https://www.facebook.com/montepindo.pn
No twitter:
http://twitter.com/montepindo
No youtube:
http://www.youtube.com/user/montepindopn
____________

Comunicado de Alternativa Galega de Esquerda denunciando extorsión e chantaxe por parte de Edgewater Exploration LTD en Cabana de Bergantiños

Os propietarios dos terreos onde se pretende realizar un proxecto de extracción de ouro están a recibir unha carta da empresa Mineira Corcoesto S.L (*) instándoos a vender os terreos por 1,2 euros/m2, e ameazándoos con que se non o fan así antes de fin de ano, comezaría o proceso expropiatorio e obterían prezos máis baixos.

AGE considera moi grave estas actitudes e critica que dende a Xunta de Galicia se avale este tipo de proxectos, tolerando pasivamente que unha sociedade de capital estranxeiro practique a extorsión e a chantaxe a través de cartas intimidatorias intolerables.

1.- AGE manifesta que a misiva é un cúmulo de falsidades, dende a valoración do terreo, até o feito de que xa sexa inminente o proceso expropiatorio, que non o é, e que en caso de expropiarse os prezos sexan os que di a empresa.

En primeiro lugar, a valoración que oferta a empresa é mesmo inferior aos valores de mercado que a propia Xunta ten aprobado (Orde do 28/12/2011, de valores de prezos medios de mercado; DOG do 29/12/2011).

En segundo lugar, o que silencia a empresa é que pretende aplicar en Galiza a mesma táctica que empregou en Asturias, ao querer mercar agora a prezo baixo para que dispois, no proceso expropiatorio, se tomen como referencia comparativa de prezos de mercado os valores fixados nos contratos de compra-venta asinados antes de comezar as expropiacións, co cal non só se pagaría un prezo ridículo agora senón que iso perxudicaria aos que non vendan agora e sexan expropiados dispois.
En terceiro lugar, a mina tramítase como proxecto industrial estratéxico (DOG 02/05/2012) pero aínda non está aprobado como tal polo Consello da Xunta, polo cal mentres a Xunta non aprobe definitivamente o proxecto, a empresa non pode expropiar. ¿Ou é que a empresa xa sabe que a Xunta vaille aprobar o proxecto desestimando as alegacións presentadas ?.

2.- AGE considera que as prácticas da empresa e a pasividade da Xunta son especialmente graves cando se trata dun proxecto cun enorme impacto medio-ambiental (**) que, de aprobarse, teria consecuencias moi negativas de cara ao futuro. Manifestamos que o proxecto mineiro de Corcoesto é máis propio de antigos modelos de desenvolvemento do terceiro mundo, da época colonial, polo seu impacto ambiental, polo saqueo dos nosos recursos naturais e pola súa insostibilidade.

Resulta evidente que este tipo de empresas busca países cunha lexislación ambiental moi laxa e onde atopen a complicidade das autoridades políticas, coma é o caso do goberno de Feijoo e do alcalde do PP de Cabana de Bergantiños.

AGE lembra ao respecto que un proxecto de idénticas características foi rexeitado polo Principado de Asturias, decisión que foi confirmada polos tribunais de xustiza, desestimando as reclamacións da empresa. Adxuntase a sentenza do Tribunal Supremo ao respecto.

(*) 1.- A anterior sociedade, Rio Narcea Gold Mines S.L cambia o nome polo actual de Mineira Corcoesto S.L o 11/04/2012. O 100 % do capital pertece a Edgewater Exploration LTD (compañía canadiana constituida en xuño de 2007 en Vancouver).

(**) As características do proxecto:

-Excavación de un diámetro de 1,5 km
-Construción dunha balsa de decantación de 10.000.000 m3, semellante á de Aznalcollar que provocou o desastre natural no Parque Nacional de Doñana.
-Utilización de cianuro no proceso de obtención de ouro.

---
ASEMBLEA DE SENTINELAS DO MANDATO POPULAR


Asemblea do Movemento Social de Ferrolterra en apoio á coalición
Alternativa Galega de Esquerda

Correo-e:
asemblea.apoio.alternativa@gmail.com

Blogue:
http://asembleadeferrolterra.blogspot.com

Enviado por:
Asemblea Popular Alternativa
-asemblea.apoio.alternativa@gmail.com
8 de dezembro de 2012 22:30
_____________

A multinacional canadense Edgewater, pretende explotar unha mina de ouro en Bergantiños, utilizando toneladas de cianuro.

 Unha plataforma veciñal "Corcoesto: non todo é brillo no ouro. Plataforma salvemos Corcoesto" ven denunciando os plans da multinacional Edgewater, que quere explotar unha mina de ouro no concello de Cabanas, Bergantiños. Concretamente pretenden sacar 1,2 millóns de onzas. Esta mesma compañía ten outro proxecto en Ghana.

Esta plataforma denuncia os efectos que para a saúde humana ten esta actividade, polo uso do cianuro que contamina as augas e o ar, e os efectos ambientais. Mais desde o concello (PP) están apoiando esta nova desfeita contra a saúde e o territorio, amparándose en propaganda non convencional da empresa que promete máximo emprego e desenvolvemento da zona. A plataforma asegura que a riqueza e o futuro de Corcoeso, e de todo Bergantiños, está na divulgación e conservación  da súa exuberante riqueza natural e paisaxística.

Este sábado 11 de agosto realizarán un festival poético de solidariedade e denuncia.

Comunicado da Plataforma "Corcoesto: non todo é brillo no ouro. Plataforma salvemos Corcoesto"
CONTRA A MEGAMINARÍA CONTAMINANTE EN GALICIA. NON Á MINA DE OURO DE CORCOESTO

A Costa da Morte coruñesa está en perigo. Avecíñase un novo 'Prestige' en forma dun irracional plan de minaría a ceo aberto autorizado pola Xunta que pode condenar primeiro a esta bisbarra e logo ó resto de Galicia, a padecementos ambientais e sociais inéditos ata o de agora.

Aproveitando a actual crise económica, e baixo o paraugas dunha promesa laboral incerta, corporacións multinacionais como a canadense Edgewater teñen en mente levar a cabo proxectos como o da mina de ouro de Corcoesto, no Concello de Cabana de Bergantiños. Favorecido directamente por José Muiño (PP), alcalde de Cabana, este proxecto empregará, entre outros produtos de elevada toxicidade, toneladas de cianuro para separar o ouro da rocha.

Esta substancia química ten efectos prexudiciais mesmo a doses baixas, podendo afectar ó aparato respiratorio e ós sistemas cardiovascular, gastrointestinal, neurolóxico, ocular e dérmico, dado que en contacto coa pel pode absorberse. A inhalación de concentracións de 401 a 601 mg/m³ resulta mortal para o ser humano. Os efectos sobre a saúde poden durar meses ou anos, e van dende o risco de padecer cancro aos problemas reprodutivos, hipertiroidismo, ou danos permanentes no sistema nervioso.

A minaría a ceo aberto presenta, ademais, unha interminable lista de impactos ambientais:

-Alterando o entorno, modificando a morfoloxía do terreo e deixando ó descuberto grandes cantidades de material estéril, potencialmente perigoso para a saúde. Adoitan alterarse cursos de auga e nos chamados diques de cola, fórmanse grandes lagoas de material altamente tóxico.

-Contaminando o aire con po residual e outros elementos nocivos provenientes das distintas fases do proceso, que poden penetrar ata os pulmóns provocando afeccións respiratorias agudas e crónicas.

-Contaminando a auga. Lagoas de tratamento mal deseñadas ou cun mantemento inadecuado poden contaminar os cursos de auga superficial. Filtracións de augas contaminadas cos reactivos e outras substancias químicas usadas no proceso poden chegar ás augas subterráneas, que habitualmente son fonte de abastecemento de auga potable.

-Contaminando o chan. Eliminando o chan na área de explotación, provocando un proceso de erosión continuado na área periférica. Verteduras accidentais de refugallos ou substancias químicas poden afectar a grandes zonas estremeiras de xeito permanente converténdoas en terreo estéril, e o rendemento agrícola de toda unha bisbarra pode verse alterado.

Queremos un futuro para Cabana de Bergantiños, a Costa dá Morte e Galicia, pero non este. Non nun concello cuio progreso está na conservación e difusión da súa exuberante riqueza natural.

Fontes propias, da Plataforma Salvemos Corcoesto e da propia empresa espoliadora.
_________________